Read Библия Церковнославянская Сiрахъ 9 Bible Online

Сiрахъ 9 - Библия Церковнославянская bible

Сiрахъ 9

¹Не ревнѹ́й женѣ̀ нѣ́дра твоегѡ̀, нижѐ наѹчѝ на тебѐ самаго̀ ѹ҆че́нїю лѹка́вѹ.

²Не да́ждь женѣ̀ дѹшѝ твоеѧ̀, є҆́же превзы́ти є҆́й над̾ крѣ́пость твою̀.

³Не срѣта́й жены̀ блѹдни́цы, да не ка́кѡ впаде́ши въ сѣ҄ти є҆ѧ̀.

⁴Къ спѣва́ющей не примѣша́йсѧ, да не ка́кѡ ѹ҆вѧ́знеши въ начина́нїихъ є҆ѧ̀.

⁵Дѣ́вы не назира́й, да не когда̀ соблазни́шисѧ въ красотѣ̀ є҆ѧ̀.

⁶Не да́ждь блѹдни́цамъ дѹшѝ твоеѧ̀, да не погѹби́ши наслѣ́дїѧ твоегѡ̀.

⁷Не ѡ҆бзира́й сто́гнъ гра́да и҆ въ пѹсты́хъ є҆гѡ̀ не заблѹжда́й.

⁸Ѿвратѝ ѻ҆́ко твоѐ ѿ жены̀ кра́сныѧ и҆ не назира́й чѹжды́ѧ добро́ты:

⁹добро́тою же́нскою мно́зи прельсти́шасѧ, и҆ ѿ сеѧ̀ по́хоть ѩ҆́кѡ ѻ҆́гнь разгара́етсѧ.

¹⁰Съ мѹжа́тицею ѿню́дъ не сѣдѝ и҆ не ме́дли съ не́ю въ вїнѣ̀:

¹¹да не когда̀ приклони́тсѧ дѹша̀ твоѧ̀ на ню̀, и҆ дѹ́хомъ твои́мъ поползне́шисѧ въ па́гѹбѹ.

¹²Не ѡ҆ставлѧ́й дрѹ́га ста́рагѡ, но́вый бо нѣ́сть то́ченъ є҆мѹ̀:

¹³вїно̀ но́вое дрѹ́гъ но́въ: а҆́ще ѡ҆бетша́етъ, съ весе́лїемъ и҆спїе́ши є҆го̀.

¹⁴Не ревнѹ́й сла́вѣ грѣ́шника: не вѣ́си бо, ко́е бѹ́детъ превраще́нїе є҆гѡ̀.

¹⁵Не соизво́ли и҆зволе́нїємъ нечести́выхъ: помѧнѝ, ѩ҆́кѡ да́же до а҆́да не ѡ҆правдѧ́тсѧ.

¹⁶Дале́че ѿстѹпѝ ѿ человѣ́ка, и҆́же и҆́мать вла́сть ѹ҆бива́ти, и҆ не ѹ҆бои́шисѧ стра́ха сме́ртна:

¹⁷и҆ а҆́ще пристѹ́пиши, не согрѣша́й, да не ѿи́метъ живота̀ твоегѡ̀:

¹⁸познава́й, ѩ҆́кѡ посредѣ̀ сѣ́тей минѹ́еши и҆ по забра́лѡмъ гра́да хо́диши.

¹⁹По крѣ́пости твое́й разсмотрѧ́й и҆́скреннѧго и҆ со премѹ́дрыми совѣ́тѹй.

²⁰Съ разѹми́выми бѹ́ди размышле́нїе твоѐ, и҆ всѧ̀ по́вѣсть твоѧ̀ въ зако́нѣ вы́шнѧгѡ.

²¹Мѹ́жїе првднїи да вечерѧ́ютъ съ тобо́ю, и҆ во стра́сѣ гд҇ни бѹ́ди хвала̀ твоѧ̀.

²²Ѿ рѹкѝ хѹдо́жникѡвъ дѣ́ло похвале́но быва́етъ, и҆ во́ждь люді́й премѹ́дръ въ словесѝ свое́мъ.

²³Стра́шенъ во гра́дѣ свое́мъ мѹ́жъ ѧ҆зы́ченъ, и҆ де́рзый въ словесѝ свое́мъ возненави́дѣнъ бѹ́детъ.