Read Библия Церковнославянская Кни́га проро́ка И҆са́їи 10 Bible Online

Кни́га проро́ка И҆са́їи 10 - Библия Церковнославянская bible

Кни́га проро́ка И҆са́їи 10

¹Го́ре пи́шѹщымъ лѹка́вство: пи́шѹщїи бо лѹка́вство пи́шѹтъ,

²ѹ҆кланѧ́юще сѹ́дъ ѹ҆бо́гихъ, восхища́юще сѹ́дъ ни́щихъ люді́й мои́хъ, ѩ҆́кѡ бы́ти и҆̀мъ вдови́цѣ въ расхище́нїе и҆ сиротѣ̀ въ разграбле́нїе.

³И҆ что̀ сотворѧ́тъ въ де́нь посѣще́нїѧ; ско́рбь бо ва́мъ ѿдале́че прїи́детъ. И҆ къ комѹ̀ прибѣ́гнете, да помо́жетъ ва́мъ; И҆ гдѣ̀ ѡ҆ста́вите сла́вѹ ва́шѹ,

⁴є҆́же не впа́сти въ плѣне́нїе; И҆ под̾ ѹ҆бїе́ными падѹ́тъ. И҆ во всѣ́хъ си́хъ не ѿврати́сѧ гнѣ́въ є҆гѡ̀, но є҆щѐ рѹка̀ є҆гѡ̀ высока̀.

⁵Го́ре а҆ссѷрі́ємъ, же́злъ ѩ҆́рости моеѧ̀ и҆ гнѣ́въ є҆́сть въ рѹкѹ̀ и҆́хъ.

⁶Гнѣ́въ мо́й послю̀ на ѩ҆зы́къ беззако́ненъ, и҆ свои́хъ люді́й повелю̀ сотвори́ти коры҄сти и҆ плѣне́нїе, и҆ попра́ти гра́ды и҆ положи́ти ѧ҆̀ въ пра́хъ.

⁷Се́й же не та́кѡ помы́сли и҆ дѹше́ю не та́кѡ возмнѣ̀: но ѿстѹ́питъ ѹ҆́мъ є҆гѡ̀, и҆ є҆́же потреби́ти ѩ҆зы́ки не ма҄лы.

⁸И҆ а҆́ще рекѹ́тъ є҆мѹ̀: ты́ ли є҆сѝ є҆ди́нъ кнѧ́зь;

⁹И҆ рече́тъ: не взѧ́хъ ли страны̀, ѩ҆́же вы́ше вавѷлѡ́на и҆ хала́ни, и҆дѣ́же сто́лпъ созда́нъ, и҆ взѧ́хъ а҆раві́ю и҆ дама́скъ и҆ самарі́ю;

¹⁰ѩ҆́коже сїѧ҄ взѧ́хъ, и҆ всѧ҄ кнѧжє́нїѧ возмѹ̀. Возрыда́йте, и҆зва҄ѧннаѧ во ї҆ер҇ли́мѣ и҆ въ самарі́и:

¹¹ѩ҆́коже бо сотвори́хъ самарі́и и҆ рѹкотворє́ннымъ є҆ѧ̀, та́кѡ сотворю̀ и҆ ї҆ер҇ли́мѹ и҆ кѹмі́рѡмъ є҆гѡ̀.

¹²И҆ бѹ́детъ, є҆гда̀ сконча́етъ гд҇ь всѧ҄ творѧ̀ въ горѣ̀ сїѡ́ни и҆ во ї҆ер҇ли́мѣ, наведе́тъ на ѹ҆́мъ вели́кїй, на кнѧ́зѧ а҆ссѷрі́йска и҆ на высотѹ̀ сла́вы ѻ҆́чїю є҆гѡ̀.

¹³Рече́ бо: крѣ́постїю рѹкѝ моеѧ̀ сотворю̀, и҆ премѹ́дростїю ра́зѹма (моегѡ̀) ѿимѹ̀ предѣ́лы ѩ҆зы́кѡвъ, и҆ си́лѹ и҆́хъ плѣню̀,

¹⁴и҆ сотрѧсѹ̀ гра́ды населє́ныѧ, и҆ вселе́ннѹю всю̀ ѡ҆б̾имѹ̀ рѹко́ю мое́ю ѩ҆́кѡ гнѣздо̀, и҆ ѩ҆́кѡ ѡ҆ста́влєнаѧ ѩ҆́ица возмѹ̀: и҆ нѣ́сть, и҆́же ѹ҆бѣжи́тъ менє̀, и҆лѝ проти́вѹ мнѣ̀ рече́тъ, и҆ ѿве́рзетъ ѹ҆ста̀ и҆ глѹми́тъ.

¹⁵Є҆да̀ просла́витсѧ сѣки́ра без̾ сѣкѹ́щагѡ є҆́ю; и҆лѝ вознесе́тсѧ пила̀ без̾ влекѹ́щагѡ ю҆̀; Та́кожде а҆́ще кто̀ во́зметъ же́злъ, и҆лѝ дре́во: и҆ не та́кѡ.

¹⁶Но по́слетъ гд҇ь саваѡ́ѳъ на твою̀ че́сть безче́стїе, и҆ на твою̀ сла́вѹ ѻ҆́гнь горѧ̀ возгори́тсѧ.

¹⁷И҆ бѹ́детъ свѣ́тъ ї҆и҃левъ во ѻ҆́гнь, и҆ ѡ҆ст҃и́тъ є҆го̀ ѻ҆гне́мъ горѧ́щимъ, и҆ поѧ́стъ ѩ҆́кѡ сѣ́но вещество̀.

¹⁸Въ то́й де́нь ѹ҆га́снѹтъ го́ры и҆ хо́лми и҆ дѹбра҄вы, и҆ поѧ́стъ ѿ дѹшѝ да́же до пло́тей: и҆ бѹ́детъ бѣжа́й, ѩ҆́кѡ бѣжа́й ѿ пла́мене горѧ́ща:

¹⁹и҆ ѡ҆ста́вльшїисѧ ѿ ни́хъ бѹ́дѹтъ въ число̀, и҆ ѻ҆троча̀ ма́лое напи́шетъ ѧ҆̀.

²⁰И҆ бѹ́детъ въ то́й де́нь, не приложи́тсѧ ктомѹ̀ ѡ҆ста́нокъ ї҆и҃левъ, и҆ спасе́ннїи ї҆а҄кѡвли не бѹ́дѹтъ ктомѹ̀ ѹ҆пова́юще на ѡ҆би́дѣвшыѧ и҆̀хъ, но бѹ́дѹтъ ѹ҆пова́юще на бг҃а ст҃а́го ї҆и҃лева и҆́стиною.

²¹И҆ ѡ҆брати́тсѧ ѡ҆ста́нокъ ї҆а́кѡвль къ бг҃ѹ крѣ́пкомѹ.

²²И҆ а҆́ще бѹ́дѹтъ лю́дїе ї҆и҃лєвы ѩ҆́кѡ песо́къ морскі́й, ѡ҆ста́нокъ и҆́хъ спасе́тсѧ:

²³сло́во бо соверша́ѧ и҆ сокраща́ѧ пра́вдою, ѩ҆́кѡ сло́во сокраще́но сотвори́тъ гд҇ь во все́й вселе́ннѣй.

²⁴Сегѡ̀ ра́ди сїѧ҄ гл҃етъ гд҇ь саваѡ́ѳъ: не бо́йтесѧ, лю́дїе моѝ, ѿ а҆ссѷрі́анъ, живѹ́щїи въ сїѡ́нѣ, ѩ҆́кѡ жезло́мъ порази́тъ тѧ̀: ѩ҆́звѹ бо наво́дитъ на тѧ̀, є҆́же ви́дѣти пѹ́ть є҆гѵ́пта.

²⁵Є҆ще́ бо ма́лѡ, и҆ преста́нетъ гнѣ́въ, ѩ҆́рость же моѧ̀ на совѣ́тъ и҆́хъ:

²⁶и҆ воздви́гнетъ бг҃ъ си́лъ на нѧ̀ ѩ҆́звѹ, ѩ҆́кѡ ѩ҆́звѹ мадїа́млю на мѣ́стѣ ско́рби, и҆ ѩ҆́рость є҆гѡ̀ на пѹ́ть и҆́же къ мо́рю, на пѹ́ть и҆́же во є҆гѵ́петъ:

²⁷и҆ бѹ́детъ въ то́й де́нь, ѿи́метсѧ и҆́го є҆гѡ̀ ѿ ра́мене твоегѡ̀ и҆ стра́хъ є҆гѡ̀ ѿ тебє̀, и҆ согнїе́тъ и҆́го ѿ ра́менъ ва́шихъ.

²⁸Прїи́детъ бо во гра́дъ а҆гга́й, и҆ пре́йдетъ въ магеддѡ̀, и҆ въ махма́сѣ положи́тъ сосѹ́ды своѧ҄.

²⁹И҆ мине́тъ де́брь, и҆ прїи́детъ во а҆гга́й: стра́хъ прїи́метъ рамѹ̀ гра́дъ саѹ́ловъ,

³⁰побѣ́гнетъ дще́рь галі́млѧ, ѹ҆слы́шитсѧ въ лаїсѣ̀, ѹ҆слы́шитсѧ во а҆наѳѡ́ѳѣ.

³¹И҆ ѹ҆жасе́сѧ мадеми́на и҆ живѹ́щїи во гїви́мѣ.

³²Ѹ҆тѣша́йте дне́сь є҆́же на пѹтѝ пребы́ти: ѹ҆тѣша́йте рѹко́ю го́рѹ дще́рь сїѡ́ню, и҆ хо́лми, и҆̀же во ї҆ер҇ли́мѣ:

³³сѐ, влдка гд҇ь саваѡ́ѳъ смѧте́тъ сла҄вныѧ со крѣ́постїю, и҆ высо́цїи ѹ҆кори́зною сокрѹша́тсѧ, и҆ высо́цыи смирѧ́тсѧ,

³⁴и҆ падѹ́тъ высо́цыи мече́мъ, лїва́нъ же съ высо́кими паде́тсѧ.