Read Библия Церковнославянская Кни́га проро́ка И҆са́їи 11 Bible Online

Кни́га проро́ка И҆са́їи 11 - Библия Церковнославянская bible

Кни́га проро́ка И҆са́їи 11

¹И҆ и҆зы́детъ же́злъ и҆з̾ ко́рене ї҆ессе́ова, и҆ цвѣ́тъ ѿ ко́рене є҆гѡ̀ взы́детъ:

²и҆ почі́етъ на не́мъ дх҃ъ бж҃їй, дх҃ъ премдрости и҆ ра́зѹма, дх҃ъ совѣ́та и҆ крѣ́пости, дх҃ъ вѣ́дѣнїѧ и҆ бл҃гоче́стїѧ:

³и҆спо́лнитъ є҆го̀ дх҃ъ стра́ха бж҃їѧ: не бо сла́вѣ сѹди́ти и҆́мать, нижѐ по глаго́ланїю ѡ҆бличи́тъ,

⁴но сѹ́дитъ пра́вдою смире́нномѹ сѹ́дъ и҆ ѡ҆бличи́тъ пра́востїю смирє́нныѧ землѝ, и҆ порази́тъ зе́млю сло́вомъ ѹ҆́стъ свои́хъ и҆ дх҃омъ ѹ҆сте́нъ ѹ҆бїе́тъ нечести́ваго:

⁵и҆ бѹ́детъ препоѧ́санъ пра́вдою ѡ҆ чре́слѣхъ свои́хъ и҆ и҆́стиною ѡ҆бви́тъ по ре́брамъ свои҄мъ:

⁶и҆ пасти́сѧ бѹ́дѹтъ вкѹ́пѣ во́лкъ со а҆́гнцемъ, и҆ ры́сь почі́етъ со ко́злищемъ, и҆ теле́цъ и҆ ю҆не́цъ и҆ ле́въ вкѹ́пѣ пасти́сѧ бѹ́дѹтъ, и҆ ѻ҆троча̀ ма́ло поведе́тъ ѧ҆̀:

⁷и҆ во́лъ и҆ медвѣ́дь вкѹ́пѣ пасти́сѧ бѹ́дѹтъ, и҆ вкѹ́пѣ дѣ́ти и҆́хъ бѹ́дѹтъ, и҆ ле́въ а҆́ки во́лъ ѩ҆́сти бѹ́детъ плє́вы:

⁸и҆ ѻ҆троча̀ мла́до на пещє́ры а҆́спїдѡвъ и҆ на ло́же и҆сча́дїй а҆́спїдскихъ рѹ́кѹ возложи́тъ:

⁹и҆ не сотворѧ́тъ ѕла̀, ни возмо́гѹтъ погѹби́ти ни кого́же на горѣ̀ ст҃ѣ́й мое́й: ѩ҆́кѡ напо́лнисѧ всѧ̀ землѧ̀ вѣ́дѣнїѧ гд҇нѧ, а҆́ки вода̀ мно́га покры̀ мо́ре.

¹⁰И҆ бѹ́детъ въ де́нь ѻ҆́ный ко́рень ї҆ессе́овъ, и҆ востаѧ́й владѣ́ти ѩ҆зы҄ки, на того̀ ѩ҆зы́цы ѹ҆пова́ти бѹ́дѹтъ: и҆ бѹ́детъ поко́й є҆гѡ̀ че́сть.

¹¹И҆ бѹ́детъ въ де́нь ѻ҆́ный, приложи́тъ гд҇ь показа́ти рѹ́кѹ свою̀, є҆́же возревнова́ти по ѡ҆ста́нкѹ про́чемѹ люді́й, и҆́же а҆́ще ѡ҆ста́нетъ ѿ а҆ссѷрі́ѡвъ и҆ ѿ є҆гѵ́пта, и҆ вавѷлѡ́на и҆ ѿ є҆ѳїо́пїи, и҆ ѿ є҆ламі́тѡвъ и҆ ѿ восто́кѡвъ со́лнца, и҆ ѿ а҆раві́и и҆ ѿ ѻ҆стровѡ́въ морски́хъ.

¹²И҆ воздви́гнетъ зна́менїе въ ѩ҆зы́ки, и҆ собере́тъ поги́бшыѧ ї҆и҃лєвы, и҆ расточє́нныѧ ї҆ѹ҄дины собере́тъ ѿ четы́рехъ кри́лъ землѝ.

¹³И҆ ѿи́метсѧ ре́вность є҆фре́мова, и҆ вразѝ ї҆ѹ҄дины поги́бнѹтъ: є҆фре́мъ не возревнѹ́етъ ї҆ѹ́дѣ, и҆ ї҆ѹ́да не ѡ҆скорби́тъ є҆фре́ма.

¹⁴И҆ полетѧ́тъ въ корабле́хъ и҆ноплеме́нничихъ, мо́ре кѹ́пнѡ плѣнѧ́тъ, и҆ сѹ́щихъ ѿ востѡ́къ со́лнца, и҆ ї҆дѹме́ю: и҆ на мѡа́ва пе́рвѣе рѹ́ки возложа́тъ, сы́нове же а҆ммѡ҄ни пе́рвїи покорѧ́тсѧ.

¹⁵И҆ ѡ҆пѹстоши́тъ гд҇ь мо́ре є҆гѵ́петское и҆ возложи́тъ рѹ́кѹ свою̀ на рѣкѹ̀ дѹ́хомъ преси́льнымъ: и҆ порази́тъ на се́дмь де́брїй, ѩ҆́коже преходи́ти ю҆̀ во ѡ҆бѹве́нїи:

¹⁶и҆ бѹ́детъ проше́ствїе лю́демъ мои҄мъ ѡ҆ста́вшымъ во є҆гѵ́птѣ, и҆ бѹ́детъ ї҆и҃лю, ѩ҆́коже въ де́нь, є҆гда̀ и҆зы́де ѿ землѝ є҆гѵ́петскїѧ.