Read Библия Церковнославянская Кни́га проро́ка И҆са́їи 14 Bible Online

Кни́га проро́ка И҆са́їи 14 - Библия Церковнославянская bible

Кни́га проро́ка И҆са́їи 14

¹Ско́рѡ и҆́детъ и҆ не ѹ҆ме́длитъ: и҆ поми́лѹетъ гд҇ь ї҆а́кѡва и҆ и҆збере́тъ па́ки ї҆и҃лѧ, и҆ почі́ютъ на землѝ свое́й, и҆ пришле́цъ приложи́тсѧ къ ни҄мъ и҆ приложи́тсѧ къ до́мѹ ї҆а́кѡвлю,

²и҆ по́ймѹтъ и҆̀хъ ѩ҆зы́цы и҆ введѹ́тъ на мѣ́сто и҆́хъ, и҆ наслѣ́дѧтъ и҆ ѹ҆мно́жатсѧ на землѝ бж҃їи въ рабы҄ и҆ рабы҄ни: и҆ бѹ́дѹтъ плѣне́ни плѣни́вшїи ѧ҆̀, и҆ ѡ҆блада́ни бѹ́дѹтъ ѡ҆блада́вшїи и҆́ми.

³И҆ бѹ́детъ въ то́й де́нь, ѹ҆поко́итъ тѧ̀ гд҇ь ѿ болѣ́зни и҆ ѩ҆́рости твоеѧ̀ и҆ ѿ рабо́ты жесто́кїѧ, є҆́юже рабо́талъ є҆сѝ и҆̀мъ.

⁴И҆ прїи́меши пла́чь се́й {Є҆вр.: при́тчѹ сїю̀.} на царѧ̀ вавѷлѡ́нска и҆ рече́ши въ то́й де́нь: ка́кѡ преста̀ и҆стѧзѹ́ѧй и҆ преста̀ понѹжда́ѧй;

⁵Сокрѹшѝ бг҃ъ ѩ҆ре́мъ грѣ́шникѡвъ, ѩ҆ре́мъ кнѧзе́й,

⁶порази́въ ѩ҆зы́къ ѩ҆́ростїю, ѩ҆́звою неисцѣ́льною, поража́ѧй ѩ҆зы́къ ѩ҆́звою ѩ҆́рости, є҆́юже не пощадѣ̀, почѝ ѹ҆пова́ющи.

⁷Всѧ̀ землѧ̀ вопїе́тъ со весе́лїемъ,

⁸и҆ древа̀ лїва́нѡва возвесели́шасѧ ѡ҆ тебѣ̀ и҆ ке́дръ лїва́нскїй: ѡ҆не́лѣже ты̀ ѹ҆снѹ́лъ є҆сѝ, не взы́де посѣка́ѧй на́съ.

⁹А҆́дъ до́лѣ ѡ҆горчи́сѧ, срѣ́тъ тѧ̀: воста́ша съ тобо́ю всѝ и҆споли́ни ѡ҆блада́вшїи земле́ю, подвиза́вшїи ѿ престо́лѡвъ свои́хъ всѣ́хъ царе́й ѩ҆зы́ческихъ.

¹⁰Всѝ ѿвѣща́ютъ и҆ рекѹ́тъ тебѣ̀: и҆ ты̀ плѣне́нъ є҆сѝ, ѩ҆́коже и҆ мы̀: и҆ въ на́съ вмѣне́нъ є҆сѝ.

¹¹Сни́де сла́ва твоѧ̀ во а҆́дъ, мно́гое весе́лїе твоѐ: под̾ тобо́ю посте́лютъ гни́лость, и҆ покро́въ тво́й че́рвь.

¹²Ка́кѡ спадѐ съ небесѐ денни́ца восходѧ́щаѧ заѹ́тра; сокрѹши́сѧ на землѝ посыла́ѧй ко всѣ҄мъ ѩ҆зы́кѡмъ.

¹³Ты́ же ре́клъ є҆сѝ во ѹ҆мѣ̀ твое́мъ: на не́бо взы́дѹ, вы́ше ѕвѣ́здъ небе́сныхъ поста́влю престо́лъ мо́й, сѧ́дѹ на горѣ̀ высо́цѣ, на гора́хъ высо́кихъ, ѩ҆̀же къ сѣ́верѹ:

¹⁴взы́дѹ вы́ше ѡ҆́блакъ, бѹ́дѹ подо́бенъ вы́шнемѹ.

¹⁵Нн҃ѣ же во а҆́дъ сни́деши и҆ во ѡ҆снѡва́нїѧ землѝ.

¹⁶Ви́дѣвшїи тѧ̀ ѹ҆дивѧ́тсѧ ѡ҆ тебѣ̀ и҆ рекѹ́тъ: се́й человѣ́къ раздража́ѧй зе́млю, потрѧса́ѧй цари҄,

¹⁷положи́вый вселе́ннѹю всю̀ пѹ́стѹ и҆ гра́ды є҆ѧ̀ разсы́па, плѣне́ныхъ не разрѣшѝ.

¹⁸Всѝ ца́рїе ѩ҆зы́кѡвъ ѹ҆спо́ша въ че́сти, кі́йждо въ домѹ̀ свое́мъ.

¹⁹Ты́ же пове́рженъ бѹ́деши въ гора́хъ, ѩ҆́кѡ мертве́цъ ме́рзкїй со мно́гими мертвєцы̀ и҆зсѣ́чеными мече́мъ, сходѧ́щими во а҆́дъ.

²⁰ѩ҆́коже ри́за въ кро́ви намоче́на не бѹ́детъ чиста̀, та́кожде и҆ ты̀ не бѹ́деши чи́стъ, занѐ зе́млю мою̀ погѹби́лъ є҆сѝ и҆ лю́ди моѧ҄ и҆зби́лъ є҆сѝ: не пребѹ́деши въ вѣ́чное вре́мѧ, сѣ́мѧ ѕло́е.

²¹Ѹ҆гото́ви ча҄да твоѧ҄ на ѹ҆бїе́нїе грѣха́ми ѻ҆тца̀ твоегѡ̀, да воста́нѹтъ и҆ наслѣ́дѧтъ зе́млю и҆ напо́лнѧтъ зе́млю ра́тьми.

²²И҆ воста́нѹ на нѧ̀, гл҃етъ гд҇ь саваѡ́ѳъ, и҆ погѹблю̀ и҆́мѧ и҆́хъ, и҆ ѡ҆ста́нокъ, и҆ сѣ́мѧ: сїѧ҄ гл҃етъ гд҇ь.

²³И҆ положѹ̀ вавѷлѡ́на пѹ́ста, ѩ҆́кѡ вогнѣзди́тисѧ є҆жє́мъ, и҆ бѹ́детъ ни во что́же: и҆ положѹ̀ и҆̀ бре́нїѧ про́пасть въ па́гѹбѹ.

²⁴Сїѧ҄ гл҃етъ гд҇ь саваѡ́ѳъ: ѩ҆́коже гл҃ахъ, та́кѡ бѹ́детъ, и҆ ѩ҆́коже совѣща́хъ, та́кѡ пребѹ́детъ,

²⁵є҆́же погѹби́ти а҆ссѷрі́анъ на землѝ мое́й и҆ на гора́хъ мои́хъ: и҆ бѹ́дѹтъ въ попра́нїе, и҆ ѿи́метсѧ ѿ ни́хъ ѩ҆ре́мъ и҆́хъ, и҆ сла́ва {Є҆вр.: бре́мѧ.} и҆́хъ ѿ ра́менъ и҆́хъ ѿи́метсѧ.

²⁶Се́й совѣ́тъ, є҆го́же совѣща̀ гд҇ь на всю̀ вселе́ннѹю, и҆ сїѧ̀ рѹка̀ на всѧ҄ ѩ҆зы́ки вселе́нныѧ:

²⁷ѩ҆̀же бо бг҃ъ ст҃ы́й совѣща̀, кто̀ разори́тъ; и҆ рѹ́кѹ є҆гѡ̀ высо́кѹю кто̀ ѿврати́тъ;

²⁸Въ лѣ́то, въ не́же ѹ҆́мре а҆ха́зъ ца́рь, бы́сть глаго́лъ се́й:

²⁹не ра́дѹйтесѧ, всѝ и҆ноплемє́нницы, сокрѹши́сѧ бо ѩ҆ре́мъ бїю́щагѡ вы̀: ѿ сѣ́мене бо ѕмїи́на и҆зы́дѹтъ и҆сча҄дїѧ а҆́спїдѡвъ, и҆ и҆сча҄дїѧ и҆́хъ и҆зы́дѹтъ ѕмїи҄ парѧ́щїи:

³⁰и҆ ѹ҆пасѹ́тсѧ ѹ҆бо́зїи и҆́мъ, ни́щїи же человѣ́цы въ ми́рѣ почі́ютъ: и҆ потреби́тъ гла́домъ сѣ́мѧ твоѐ, и҆ ѡ҆ста́нокъ тво́й и҆збїе́тъ.

³¹Воспла́читесѧ, врата̀ градѡ́въ, да возопїю́тъ гра́ды смѧте́ннїи, и҆ноплемє́нницы всѝ, занѐ ды́мъ ѿ сѣ́вера и҆́детъ, и҆ нѣ́сть, и҆́же пребѹ́детъ.

³²И҆ что̀ ѿвѣща́ютъ ца́рїе ѩ҆зы́кѡвъ; ѩ҆́кѡ гд҇ь ѡ҆снова̀ сїѡ́на, и҆ тѣ́мъ спасѹ́тсѧ смире́ннїи люді́й є҆гѡ̀.