Read Библия Церковнославянская Кни́га проро́ка И҆са́їи 18 Bible Online

Кни́га проро́ка И҆са́їи 18 - Библия Церковнославянская bible

Кни́га проро́ка И҆са́їи 18

¹Го́ре корабє́лнымъ кри́ламъ землѝ, ѩ҆̀же ѡ҆б̾ ѻ҆нѹ̀ странѹ̀ рѣ́къ є҆ѳїо́пскихъ.

²Посыла́ѧй по мо́рю послы̀ въ зало́гъ и҆ посла҄нїѧ кни҄жнаѧ верхѹ̀ воды̀: по́йдѹтъ бо вѣ҄стницы ле́гцы ко ѩ҆зы́кѹ высо́кѹ и҆ къ лю́демъ стра҄ннымъ и҆ стрѡпти́вымъ. Кто̀ да́лѣе и҆́хъ; ѩ҆зы́къ безнаде́женъ и҆ попра́нъ.

³Нн҃ѣ рѣ́ки зємны́ѧ всѧ҄ а҆́ки страна̀ населе́на насели́тсѧ, страна̀ и҆́хъ а҆́ки зна́менїе ѿ горы̀ воздви́гнетсѧ, а҆́ки гла́съ трѹбы̀ ѹ҆слы́шанъ бѹ́детъ.

⁴ѩ҆́кѡ та́кѡ мѝ речѐ гд҇ь: ѹ҆твержде́нїе бѹ́детъ въ мое́мъ гра́дѣ, а҆́ки свѣ́тъ зно́ѧ полѹ́деннагѡ и҆ а҆́ки ѡ҆́блакъ ро́сный въ де́нь жа́твы бѹ́детъ.

⁵Пре́жде жа́твы, є҆гда̀ соверши́тсѧ цвѣ́тъ, и҆ гре́знъ произы́детъ по цвѣ́тѣ недозрѣ́лъ: и҆ ѿи́метъ гро́здїе ма́лое серпа́ми и҆ ло́зїе ѿи́метъ и҆ посѣче́тъ,

⁶и҆ ѡ҆ста́витъ вкѹ́пѣ пти́цамъ небє́снымъ и҆ ѕвѣрє́мъ земны҄мъ: и҆ соберѹ́тсѧ на нѧ̀ пти҄цы небє́сныѧ, и҆ всѝ ѕвѣ́рїе землѝ на́нь прїи́дѹтъ.

⁷Въ то̀ вре́мѧ принесѹ́тсѧ да́ры гд҇ѹ саваѡ́ѳѹ ѿ люді́й ѡ҆скорбле́ныхъ и҆ ѿто́рженыхъ и҆ ѿ люді́й вели́кихъ, ѿнн҃ѣ и҆ въ вѣ́чное вре́мѧ: ѩ҆зы́къ надѣ́ющьсѧ и҆ попра́нъ, и҆́же є҆́сть въ ча҄сти рѣ́чнѣй страны̀ своеѧ̀, на мѣ́сто, и҆дѣ́же и҆́мѧ гд҇а саваѡ́ѳа, на го́рѹ сїѡ́ню.