Read Библия Церковнославянская Кни́га проро́ка И҆са́їи 21 Bible Online

Кни́га проро́ка И҆са́їи 21 - Библия Церковнославянская bible

Кни́га проро́ка И҆са́їи 21

²стра́шно видѣ́нїе и҆ же́стоко повѣ́дасѧ мнѣ̀: престѹпа́ѧй престѹпа́етъ, и҆ беззако́ннѹѧй беззако́нствѹетъ: на мѧ̀ є҆ламі́тє, и҆ послы̀ пе́рсстїи на мѧ̀ и҆́дѹтъ: нн҃ѣ воздохнѹ̀ и҆ ѹ҆тѣ́шѹ себѐ.

³Сегѡ̀ ра́ди напо́лнишасѧ чрє́сла моѧ҄ разслабле́нїѧ, и҆ бѡлѣ́зни прїѧ́ша мѧ̀ а҆́ки ражда́ющѹю: непра́вдовахъ є҆́же не слы́шати, потща́хсѧ є҆́же не ви́дѣти.

⁴Се́рдце моѐ заблѹжда́етъ, и҆ беззако́нїе погрѹжа́етъ мѧ̀, дѹша̀ моѧ̀ стои́тъ во стра́сѣ.

⁵Ѹ҆гото́вите трапе́зѹ, ѩ҆ди́те, пі́йте: воста́вше, кнѧ҄зи, ѹ҆гото́вите щиты̀,

⁶ѩ҆́кѡ та́кѡ речѐ гд҇ь ко мнѣ̀: ше́дъ поста́ви себѣ̀ стра́жа, и҆ є҆́же а҆́ще ѹ҆́зриши, возвѣстѝ.

⁷И҆ ѹ҆зрѣ́хъ вса́дники кѡ́нныѧ два̀, вса́дника на ѻ҆слѧ́ти и҆ вса́дника на велблю́дѣ. Послѹ́шай слѹ́шанїемъ мно́гимъ

⁸и҆ призовѝ ѹ҆рі́ю на стра́жбѹ гд҇ню. И҆ речѐ: стоѧ́хъ вы́нѹ де́нь, и҆ ѹ҆ по́лчища а҆́зъ стоѧ́хъ всю̀ но́щь,

⁹и҆ сѐ, са́мъ грѧде́тъ (мѹ́жъ) вса́дникъ двоко́нный, и҆ ѿвѣща́въ речѐ: падѐ, падѐ вавѷлѡ́нъ, и҆ всѝ кѹмі́ры є҆гѡ̀ и҆ всѧ҄ рѹкотворє́ннаѧ є҆гѡ̀ сокрѹши́шасѧ на землѝ.

¹⁰Послѹ́шайте, ѡ҆ста́вшїисѧ, и҆ болѣ́знѹющїи, ѹ҆слы́шите: є҆́же слы́шахъ ѿ гд҇а саваѡ́ѳа, бг҃ъ ї҆и҃левъ возвѣстѝ на́мъ. (Видѣ́нїе на ї҆дѹме́ю.)

¹¹Ко мнѣ̀ зовѝ ѿ сиі́ра: стреги́те забра҄ла.

¹²Стрегѹ̀ заѹ́тра и҆ но́щїю. А҆́ще и҆́щеши, и҆щѝ и҆ ѹ҆ менє̀ ѡ҆бита́й.

¹³Въ дѹбра́вѣ въ ве́черъ преспи́ши, и҆лѝ на пѹтѝ деда́новѣ.

¹⁴Во срѣ́тенїе жа́ждѹщемѹ во́дѹ принеси́те, живѹ́щїи во странѣ̀ ѳема́новѣ, со хлѣ҄бы срѣта́йте бѣжа́щыѧ мно́жества ра́ди ѹ҆бїе́нныхъ

¹⁵и҆ мно́жества ра́ди заблѹжда́ющихъ, и҆ мно́жества ра́ди мече́й и҆ мно́жества ра́ди лѹкѡ́въ напрѧже́нныхъ, и҆ мно́жества ра́ди па́дшихъ на сѣ́чи.

¹⁶ѩ҆́кѡ си́це речѐ гд҇ь ко мнѣ̀: є҆щѐ лѣ́то (є҆ди́но), ѩ҆́коже лѣ́то нае́мника, ѡ҆скѹдѣ́етъ сла́ва сынѡ́въ кида́рскихъ,

¹⁷и҆ ѡ҆ста́нокъ лѹкѡ́въ си́льныхъ сынѡ́въ кида́рскихъ бѹ́детъ ма́лъ, ѩ҆́кѡ гд҇ь бг҃ъ ї҆и҃левъ гл҃а.