Read Библия Церковнославянская Кни́га проро́ка И҆са́їи 22 Bible Online

Кни́га проро́ка И҆са́їи 22 - Библия Церковнославянская bible

Кни́га проро́ка И҆са́їи 22

²Напо́лнисѧ гра́дъ вопїю́щихъ, ѹ҆ѧ́звленнїи твоѝ не мечьмѝ ѹ҆ѧзвле́ни, нижѐ мертвецы̀ твоѝ ѹ҆мерщвле́ни ра́тїю:

³всѝ кнѧ҄зи твоѝ побѣго́ша, и҆ плѣне́ннїи же́стоцѣ сѹ́ть свѧ́зани, и҆ крѣ́пцыи въ тебѣ̀ дале́че ѿбѣжа́ша.

⁴Сегѡ̀ ра́ди реко́хъ: ѡ҆ста́вите менѐ, да го́рцѣ воспла́чѹсѧ: не належи́те ѹ҆тѣша́ти мѧ̀ ѡ҆ сокрѹше́нїи дще́ре ро́да моегѡ̀:

⁵ѩ҆́кѡ де́нь мѧте́жа и҆ па́гѹбы и҆ попра́нїѧ, и҆ смѧте́нїе ѿ гд҇а саваѡ́ѳа: въ де́бри сїѡ́ни скита́ютсѧ, ѿ ма́ла да́же до вели́ка скита́ютсѧ по гора́мъ.

⁶Є҆ламі́тє же взѧ́ша тѹ́лы, и҆ вса́дницы человѣ́цы на ко́нехъ, и҆ собо́ръ ѡ҆полче́нїѧ.

⁷И҆ бѹ́дѹтъ и҆збра҄нны дє́бри твоѧ҄, напо́лнѧтсѧ колесни́цъ, кѡ́нницы же застѹ́пѧтъ врата̀ твоѧ҄

⁸и҆ ѿкры́ютъ врата̀ ї҆ѹ҄дина, и҆ воззрѧ́тъ въ то́й де́нь во и҆збра҄нныѧ до́мы гра́да,

⁹и҆ ѿкры́ютъ сокровє́ннаѧ домѡ́въ краегра́дїѧ даві́дова, и҆ ѹ҆́зрѧтъ, ѩ҆́кѡ мно́жайшїи сѹ́ть, и҆ ѩ҆́кѡ ѿврати́ша во́дѹ дре́внїѧ кѹпѣ́ли во гра́дъ,

¹⁰и҆ ѩ҆́кѡ разори́ша до́мы ї҆ер҇ли҄мли на ѹ҆твержде́нїе стѣнѣ̀ гра́днѣй.

¹¹И҆ сотвори́сте себѣ̀ во́дѹ междѹ̀ двѣма̀ стѣна́ма, внѹтрьѹ́дѹ кѹпѣ́ли дре́внїѧ, и҆ не воззрѣ́сте на сотвори́вшаго ю҆̀ и҆спе́рва, и҆ согра́ждшагѡ ю҆̀ не ви́дѣсте.

¹²И҆ призва̀ гд҇ь, гд҇ь саваѡ́ѳъ въ то́й де́нь пла́чь и҆ рыда́нїе, и҆ ѡ҆стриже́нїе и҆ препоѧ́санїе во врє́тища:

¹³ті́и же сотвори́ша ра́дость и҆ весе́лїе, закала́юще телцы̀ и҆ жрѹ́ще ѻ҆́вцы, ѩ҆́кѡ ѩ҆́сти мѧса̀ и҆ пи́ти вїно̀, глаго́люще: да ѩ҆́мы и҆ пїе́мъ, ѹ҆́трѣ бо ѹ҆́мремъ.

¹⁴И҆ ѿкровє́нна сїѧ҄ сѹ́ть во ѹ҆́шїю гд҇а саваѡ́ѳа, ѩ҆́кѡ не ѡ҆ста́витсѧ ва́мъ то́й грѣ́хъ, до́ндеже ѹ҆́мрете.

¹⁵Си́це гл҃етъ гд҇ь саваѡ́ѳъ: и҆дѝ въ кѹ́щѹ ко сомна́нѹ строи́телю до́мѹ и҆ рцы̀ є҆мѹ̀:

¹⁶что̀ ты̀ здѣ̀, и҆ что̀ тебѣ̀ здѣ̀, ѩ҆́кѡ и҆стеса́лъ є҆сѝ себѣ̀ здѣ̀ гро́бъ и҆ сотвори́лъ є҆сѝ себѣ̀ на высо́цѣ гро́бъ, и҆ написа́лъ є҆сѝ себѣ̀ на ка́мени кѹ́щѹ;

¹⁷Сѐ, нн҃ѣ гд҇ь саваѡ́ѳъ и҆зве́ржетъ и҆ сотре́тъ мѹ́жа, и҆ ѿи́метъ ѹ҆́тварь твою̀ и҆ вѣне́цъ тво́й сла́вный,

¹⁸и҆ пове́ржетъ тѧ̀ во странѹ̀ вели́кѹ и҆ безмѣ́рнѹ, и҆ та́мѡ ѹ҆́мреши: и҆ положи́тъ колесни́цѹ твою̀ до́брѹю въ безче́стїе и҆ до́мъ кнѧ́зѧ твоегѡ̀ въ попра́нїе:

¹⁹и҆ и҆зве́ржешисѧ ѿ строи́телства твоегѡ̀ и҆ ѿ степе́не твоегѡ̀.

²⁰И҆ бѹ́детъ въ то́й де́нь, и҆ призовѹ̀ раба̀ моего̀ є҆лїакі́ма сы́на хелкі́ева

²¹и҆ ѡ҆блекѹ̀ є҆го̀ во ѹ҆́тварь твою̀, и҆ вѣне́цъ тво́й да́мъ є҆мѹ̀ и҆ держа́вѹ твою̀, и҆ строи́телство твоѐ да́мъ въ рѹ́цѣ є҆гѡ̀, и҆ бѹ́детъ ѩ҆́кѡ ѻ҆те́цъ живѹ́щымъ во ї҆ер҇ли́мѣ и҆ живѹ́щымъ во ї҆ѹде́и.

²²И҆ да́мъ є҆мѹ̀ сла́вѹ даві́довѹ, и҆ ѡ҆бвладѣ́етъ, и҆ не бѹ́детъ противоглаго́лющагѡ: и҆ да́мъ є҆мѹ̀ клю́чь до́мѹ даві́дова на ра́мо є҆гѡ̀, и҆ ѿве́рзетъ, и҆ не бѹ́детъ затворѧ́ющагѡ, и҆ затво́ритъ, и҆ не бѹ́детъ ѿверза́ющагѡ.

²³И҆ поста́влю є҆го̀ кнѧ́зѧ на мѣ́стѣ вѣ́рнѣ, и҆ бѹ́детъ на престо́лѣ сла́вы до́мѹ ѻ҆тца̀ своегѡ̀.

²⁴И҆ бѹ́детъ ѹ҆пова́ѧй на него̀ всѧ́къ сла́вный въ домѹ̀ ѻ҆тца̀ є҆гѡ̀, ѿ ма́ла да́же до вели́ка: и҆ бѹ́дѹтъ зави́сѧще на не́мъ.

²⁵Въ то́й де́нь, сїѧ҄ гл҃етъ гд҇ь саваѡ́ѳъ, подви́гнетсѧ человѣ́къ ѹ҆твержде́нъ на мѣ́стѣ вѣ́рнѣ, и҆ ѿи́метсѧ, и҆ паде́тъ, и҆ потреби́тсѧ сла́ва, ѩ҆́же на не́мъ, ѩ҆́кѡ гд҇ь гл҃а.