Read Библия Церковнославянская Кни́га проро́ка И҆са́їи 23 Bible Online

Кни́га проро́ка И҆са́їи 23 - Библия Церковнославянская bible

Кни́га проро́ка И҆са́їи 23

²Комѹ̀ подо́бни бы́ша живѹ́щїи во ѻ҆́стровѣ, кѹпцы̀ фі́нїчестїи, преходѧ́щїи мо́ре;

³Въ водѣ̀ мно́зѣ сѣ́мѧ кѹпе́ческо, а҆́ки жа́твѣ вноси́мѣй кѹпцы̀ ѩ҆зы́честїи.

⁴Ѹ҆срами́сѧ, сїдѡ́не, речѐ мо́ре. Крѣ́пость же морска́ѧ речѐ: не болѣ́хъ, ни породи́хъ, ни вскорми́хъ ю҆́ношъ, нижѐ вознесо́хъ дѣви́цъ.

⁵Є҆гда́ же слы́шано бѹ́детъ во є҆гѵ́птѣ, прїи́метъ ѧ҆̀ болѣ́знь ѡ҆ тѵ́рѣ.

⁶И҆ди́те въ кархидо́нъ, пла́читесѧ, живѹ́щїи во ѻ҆́стровѣ се́мъ.

⁷Не сїе́ ли бѣ̀ велича́нїе ва́мъ и҆спе́рва, пре́жде не́же пре́данѹ бы́ти є҆мѹ̀;

⁸Кто̀ сїѧ҄ совѣща̀ на тѵ́ра; є҆да̀ хѹ́ждшїй є҆́сть, и҆лѝ не крѣ́пкїй є҆́сть; кѹпцы̀ є҆гѡ̀ сла́внїи кнѧ҄зи землѝ.

⁹Гд҇ь саваѡ́ѳъ совѣща̀ разсы́пати всѧ́кѹю горды́ню сла́вныхъ и҆ ѡ҆безче́стити всѧ́кое сла́вное на землѝ.

¹⁰Дѣ́лай зе́млю твою̀, и҆́бо корабли҄ ктомѹ̀ не прїи́дѹтъ ѿ кархидо́на.

¹¹И҆ рѹка̀ твоѧ̀ ктомѹ̀ не ѹ҆крѣпѣ́етъ по мо́рю, разгнѣвлѧ́ющаѧ царе́й. Гд҇ь саваѡ́ѳъ заповѣ́да ѡ҆ ханаа́нѣ, є҆́же погѹби́ти крѣ́пость є҆гѡ̀.

¹²И҆ рекѹ́тъ: ктомѹ̀ не приложи́те ѹ҆карѧ́ти и҆ ѡ҆би́дѣти дще́рь сїдѡ́ню: и҆ а҆́ще ѿи́деши ко китїи́ѡмъ, нижѐ та́мѡ бѹ́детъ тебѣ̀ поко́й:

¹³и҆ въ зе́млю халде́йскѹ, но и҆ та̀ ѡ҆пѹстѣ́ла ѿ а҆ссѷрі́анъ, ѩ҆́кѡ стѣна̀ є҆ѧ̀ паде́сѧ.

¹⁴Пла́читесѧ, корабли҄ кархидо́нстїи, ѩ҆́кѡ поги́бе тверды́нѧ ва́ша.

¹⁵И҆ бѹ́детъ въ то́й де́нь, ѡ҆ста́вленъ бѹ́детъ тѵ́ръ се́дмьдесѧтъ лѣ́тъ, ѩ҆́коже вре́мѧ (є҆ди́нагѡ) царѧ̀, ѩ҆́кѡ вре́мѧ человѣ́ческо: и҆ по седми́десѧтихъ лѣ́тѣхъ бѹ́детъ тѵ́ръ ѩ҆́кѡ пѣ́снь блѹдни́цы.

¹⁶Возмѝ гѹ́сли, ѡ҆быдѝ гра́дъ, блѹдни́ца забве́наѧ, до́брѣ погѹдѝ, мно́гѡ воспо́й, да па́мѧть твоѧ̀ бѹ́детъ.

¹⁷И҆ бѹ́детъ по седми́десѧтихъ лѣ́тѣхъ, присѣще́нїе сотвори́тъ бг҃ъ тѵ́рѹ, и҆ па́ки возста́витсѧ на пре́жднее и҆ бѹ́детъ то́ржище всѣ҄мъ ца́рствамъ вселе́нныѧ на лицы̀ землѝ.

¹⁸И҆ бѹ́детъ є҆гѡ̀ кѹ́плѧ и҆ мзда̀ ст҃о гд҇еви, не и҆̀мъ со́брано бѹ́детъ, но живѹ́щымъ пред̾ гд҇емъ, всѧ̀ кѹ́плѧ є҆гѡ̀, ѩ҆́сти и҆ пи́ти и҆ напо́лнитисѧ, и҆ въ сы́тость, на па́мѧть пред̾ гд҇емъ.