Read Библия Церковнославянская Кни́га проро́ка И҆са́їи 26 Bible Online

Кни́га проро́ка И҆са́їи 26 - Библия Церковнославянская bible

Кни́га проро́ка И҆са́їи 26

¹Въ то́й де́нь воспою́тъ пѣ́снь сїю̀ въ землѝ ї҆ѹде́йстѣй, глаго́люще: сѐ, гра́дъ крѣ́покъ, и҆ спасе́нїе на́мъ положи́тъ стѣ́нѹ и҆ ѡ҆гражде́нїе.

²Ѿве́рзите врата̀, да вни́дѹтъ лю́дїе хранѧ́щїи пра́вдѹ и҆ хранѧ́щїи и҆́стинѹ,

³прїе́млющїи и҆́стинѹ и҆ хранѧ́щїи ми́ръ.

⁴ѩ҆́кѡ на тѧ̀ надѣ́ѧнїемъ надѣ́ѧшасѧ, гд҇и, во вѣ́къ, бж҃е вели́кїй, вѣ́чный,

⁵и҆́же смири́въ низве́лъ є҆сѝ живѹ́щыѧ въ высо́кихъ: гра́ды крѣ҄пкїѧ разори́ши и҆ ѡ҆бни́зиши ѧ҆̀ да́же до землѝ.

⁶И҆ поперѹ́тъ ѧ҆̀ но́ги кро́ткихъ и҆ смире́нныхъ.

⁷Пѹ́ть бл҃гочести́выхъ пра́въ бы́сть, и҆ приѹгото́ванъ пѹ́ть бл҃гочести́выхъ.

⁸Пѹ́ть бо гд҇ень сѹ́дъ: ѹ҆пова́хомъ на и҆́мѧ твоѐ и҆ па́мѧть, є҆ѧ́же жела́етъ дѹша̀ на́ша.

⁹Ѿ но́щи ѹ҆́тренюетъ дѹ́хъ мо́й къ тебѣ̀, бж҃е, занѐ свѣ́тъ повелѣ҄нїѧ твоѧ҄ на землѝ: пра́вдѣ наѹчи́тесѧ, живѹ́щїи на землѝ.

¹⁰Преста́ бо нечести́вый: всѧ́къ, и҆́же не наѹчи́тсѧ пра́вдѣ на землѝ, и҆́стины не сотвори́тъ: да во́зметсѧ нечести́вый, да не ви́дитъ сла́вы гд҇ни.

¹¹Гд҇и, высока̀ твоѧ̀ мы́шца, и҆ не вѣ́дѣша, разѹмѣ́вше же постыдѧ́тсѧ: ре́вность прїи́метъ лю́ди ненака҄занныѧ, и҆ нн҃ѣ ѻ҆́гнь сѹпоста́ты поѧ́стъ.

¹²Гд҇и бж҃е на́шъ, ми́ръ да́ждь на́мъ, всѧ҄ бо возда́лъ є҆сѝ на́мъ.

¹³Гд҇и бж҃е на́шъ, стѧжи́ ны: гд҇и, ра́звѣ тебє̀ и҆но́гѡ не вѣ́мы: и҆́мѧ твоѐ и҆менѹ́емъ.

¹⁴Ме́ртвїи же живота̀ не и҆́мѹтъ ви́дѣти, нижѐ вра́чеве воскресѧ́тъ: сегѡ̀ ра́ди наве́лъ є҆сѝ и҆ погѹби́лъ є҆сѝ, и҆ взѧ́лъ є҆сѝ всѧ́къ мѹ́жескъ по́лъ и҆́хъ.

¹⁵Приложѝ и҆̀мъ ѕла҄, гд҇и, приложѝ ѕла҄ сла҄внымъ землѝ.

¹⁶Гд҇и, въ ско́рби помѧнѹ́хомъ тѧ̀, въ ско́рби ма́лѣ наказа́нїе твоѐ на́мъ.

¹⁷И҆ ѩ҆́кѡ болѧ́щаѧ приближа́етсѧ роди́ти и҆ въ болѣ́зни свое́й воскрича̀, та́кѡ бы́хомъ возлю́бленномѹ твоемѹ̀.

¹⁸Стра́ха ра́ди твоегѡ̀, гд҇и, во чре́вѣ прїѧ́хомъ и҆ поболѣ́хомъ, и҆ роди́хомъ дѹ́хъ сп҇нїѧ твоегѡ̀, є҆го́же сотвори́хомъ на землѝ: не паде́мсѧ, но падѹ́тсѧ всѝ живѹ́щїи на землѝ.

¹⁹Воскре́снѹтъ ме́ртвїи и҆ воста́нѹтъ и҆̀же во гробѣ́хъ, и҆ возра́дѹютсѧ и҆̀же на землѝ: роса́ бо, ѩ҆́же ѿ тебє̀, и҆сцѣле́нїе и҆̀мъ є҆́сть, землѧ́ же нечести́выхъ паде́тъ.

²⁰И҆ди́те, лю́дїе моѝ, вни́дите во хра́минѹ ва́шѹ, затвори́те двє́ри своѧ҄, ѹ҆кры́йтесѧ ма́лѡ є҆ли́кѡ є҆ли́кѡ, до́ндеже мимои́детъ гнѣ́въ гд҇ень.

²¹Се́ бо, гд҇ь ѿ ст҃а́гѡ (мѣ́ста) наво́дитъ гнѣ́въ на живѹ́щыѧ на землѝ: и҆ ѿкры́етъ землѧ̀ кро́вь свою̀ и҆ не покры́етъ и҆збїе́ныхъ.