Read Библия Церковнославянская Кни́га проро́ка И҆са́їи 27 Bible Online

Кни́га проро́ка И҆са́їи 27 - Библия Церковнославянская bible

Кни́га проро́ка И҆са́їи 27

¹Въ то́й де́нь наведе́тъ гд҇ь ме́чь ст҃ы́й и҆ вели́кїй и҆ крѣ́пкїй на дра́конта ѕмі́а бѣжа́ща, на дра́конта ѕмі́а лѹка́ваго, и҆ ѹ҆бїе́тъ дра́конта сѹ́щаго въ мо́ри.

²Въ то́й де́нь вїногра́дъ до́брый, жела́нїе пѣ́ти над̾ ни́мъ:

³а҆́зъ гра́дъ крѣ́пкїй, гра́дъ вою́емый, всѹ́е напою̀ є҆го̀: плѣне́нъ бо бѹ́детъ но́щїю, въ де́нь же паде́тсѧ стѣна̀ є҆гѡ̀: нѣ́сть тогѡ̀, и҆́же не во́зметъ є҆гѡ̀.

⁴Кто́ мѧ приста́витъ стрещѝ сте́блїе на ни́вѣ; ра́ди вражды̀ сеѧ̀ ѿри́нѹхъ и҆̀. Ѹ҆̀бо сегѡ̀ ра́ди сотворѝ гд҇ь бг҃ъ всѧ҄, є҆ли҄ка совѣща̀.

⁵И҆ сгорѣ́хъ, возопїю́тъ живѹ́щїи въ не́мъ: сотвори́мъ ми́ръ є҆мѹ̀, сотвори́мъ ми́ръ,

⁶приходѧ҄щаѧ ча҄да ї҆а҄кѡвлѧ: прозѧ́бнетъ и҆ процвѣте́тъ ї҆и҃ль, и҆ напо́лнитсѧ вселе́ннаѧ плода̀ є҆гѡ̀.

⁷Є҆да̀ ѩ҆́коже то́й поразѝ, и҆ са́мъ си́це ѹ҆ѧзви́тсѧ; и҆ ѩ҆́коже са́мъ ѹ҆бѝ, та́кожде ѹ҆бїе́нъ бѹ́детъ;

⁸Сварѧ́сѧ и҆ ѹ҆корѧ́ѧ ѿпѹ́ститъ ѧ҆̀: не ты́ ли бы́лъ є҆сѝ помышлѧ́ѧ дѹ́хомъ же́стокимъ, ѹ҆би́ти ѧ҆̀ дѹ́хомъ ѩ҆́рости;

⁹Сегѡ̀ ра́ди ѿи́метсѧ беззако́нїе ї҆а́кѡвле, и҆ сїѐ є҆́сть блг҇ве́нїе є҆гѡ̀, є҆гда̀ ѿимѹ̀ грѣ́хъ є҆гѡ̀, є҆гда̀ положа́тъ всѐ ка́менїе тре́бищъ сокрѹше́но а҆́ки пра́хъ дро́бный: и҆ не пребѹ́дѹтъ древеса̀ и҆́хъ, и҆ кѹмі́ры и҆́хъ бѹ́дѹтъ посѣ́чени, а҆́ки дѹбра́ва дале́че.

¹⁰Ѡ҆бита́ющее ста́до ѿпѹще́нно бѹ́детъ, а҆́ки ста́до ѡ҆ста́вленое: и҆ бѹ́детъ мно́го вре́мѧ въ па́жить, и҆ та́мѡ почі́ютъ стада̀.

¹¹И҆ по вре́мени не бѹ́детъ въ не́мъ всѧ́кагѡ ѕла́ка, зане́же и҆́зсхнетъ: жєны̀ грѧдѹ́щыѧ съ позо́рища, прїиди́те: не сѹ́ть бо лю́дїе и҆мѹ́ще смы́сла, сегѡ̀ ра́ди не ѹ҆ще́дритъ сотвори́вый ѧ҆̀, нижѐ созда́вый и҆̀хъ поми́лѹетъ.

¹²И҆ бѹ́детъ въ то́й де́нь, загради́тъ гд҇ь ѡ҆ рове́нника рѣ́чнагѡ, да́же до рїнокорѹ́ры {Є҆вр.: водоте́чи є҆гѵ́петскїѧ.} (гра́да): вы́ же собери́те сы́ны ї҆и҃лєвы по є҆ди́номѹ.

¹³И҆ бѹ́детъ въ то́й де́нь, вострѹ́бѧтъ трѹбо́ю вели́кою, и҆ прїи́дѹтъ погѹблѧ́емїи во странѣ̀ а҆ссѷрі́йстѣй и҆ погѹблѧ́емїи во є҆гѵ́птѣ, и҆ покло́нѧтсѧ гд҇еви на горѣ̀ ст҃ѣ́й во ї҆ер҇ли́мѣ.