Read Библия Церковнославянская Кни́га проро́ка И҆са́їи 29 Bible Online

Кни́га проро́ка И҆са́їи 29 - Библия Церковнославянская bible

Кни́га проро́ка И҆са́їи 29

¹Го́ре гра́дѹ а҆рїи́лѹ, на́ньже даві́дъ воева̀. Собери́те жи҄та ѿ го́да до го́да, снѣ́сте бо вкѹ́пѣ съ мѡа́вомъ:

²ѡ҆ѕло́блю бо а҆рїи́ла, и҆ бѹ́детъ крѣ́пость є҆гѡ̀ и҆ бога́тство мнѣ̀:

³и҆ ѡ҆бсѧ́дѹ тѧ̀ а҆́ки даві́дъ, и҆ поста́влю ѡ҆́крестъ тебє̀ ѻ҆стро́гъ, и҆ сограждѹ̀ столпы̀.

⁴И҆ смирѧ́тсѧ словеса̀ твоѧ҄ до землѝ, и҆ въ зе́млю вни́дѹтъ словеса̀ твоѧ҄: и҆ бѹ́детъ гла́съ тво́й а҆́ки гласѧ́щихъ ѿ землѝ, и҆ ко землѝ и҆знемо́жетъ гла́съ тво́й.

⁵И҆ бѹ́детъ ѩ҆́кѡ пе́рсть ѿ колесѐ бога́тство нечести́выхъ, и҆ а҆́ки пра́хъ летѧ́й мно́жество ѹ҆тѣснѧ́ющихъ тѧ̀, и҆ бѹ́детъ а҆́ки черта̀ внеза́пѹ ѿ гд҇а саваѡ́ѳа.

⁶Присѣще́нїе бо бѹ́детъ со гро́момъ и҆ съ трѹ́сомъ и҆ гла́сомъ вели́кимъ, бѹ́рѧ несо́ма и҆ пла́мень ѻ҆́гненный поѧда́ѧй.

⁷И҆ бѹ́детъ а҆́ки со́нїе ви́дѧй во снѣ̀ но́щїю, бога́тство всѣ́хъ ѩ҆зы́кѡвъ, є҆ли́цы воева́ша на а҆рїи́ла, и҆ всѝ, и҆̀же воева́ша на ї҆ер҇ли́ма, и҆ всѝ со́браннїи на́нь и҆ ѡ҆ѕлоблѧ́ющїи є҆го̀.

⁸И҆ бѹ́дѹтъ а҆́ки во снѣ̀ ѩ҆дѹ́щїи и҆ пїю́щїи, и҆ воста́вшымъ, то́щь и҆́хъ со́нъ: и҆ ѩ҆́коже во снѣ̀ жа́ждай а҆́ки пїѧ́й, воспрѧнѹ́въ же є҆щѐ жа́ждетъ, дѹша́ же є҆гѡ̀ вотщѐ надѣ́ѧсѧ: та́кѡ бѹ́детъ бога́тство всѣ́хъ ѩ҆зы́кѡвъ, є҆ли́цы воева́ша на го́рѹ сїѡ́ню.

⁹Разслабѣ́йте и҆ ѹ҆жасни́тесѧ, и҆ ѹ҆пі́йтесѧ не сїке́ромъ, ни вїно́мъ,

¹⁰ѩ҆́кѡ напоѝ ва́съ гд҇ь дѹ́хомъ ѹ҆миле́нїѧ, и҆ смежи́тъ ѻ҆́чи и҆́хъ и҆ проро́кѡвъ и҆́хъ и҆ кнѧзе́й и҆́хъ, ви́дѧщихъ сокровє́ннаѧ.

¹¹И҆ бѹ́дѹтъ ва́мъ всѧ҄ сїѧ҄ словеса̀, а҆́ки словеса̀ кни́ги запечатлѣ́нныѧ сеѧ̀, ю҆́же а҆́ще дадѹ́тъ человѣ́кѹ вѣ́дѹщемѹ писа҄нїѧ, глаго́люще: прочтѝ сїѐ. И҆ рече́тъ: не могѹ̀ прочестѝ, запечатлѣ́нна бо.

¹²И҆ да́стсѧ кни́га сїѧ̀ въ рѹ́цѣ человѣ́кѹ не вѣ́дѹщемѹ писа҄нїѧ, и҆ рече́тсѧ є҆мѹ̀: прочтѝ сїѐ. И҆ рече́тъ: не вѣ́мъ писа҄нїѧ.

¹³И҆ речѐ гд҇ь: приближа́ютсѧ мнѣ̀ лю́дїе сі́и ѹ҆сты҄ свои́ми и҆ ѹ҆стна́ми свои́ми почита́ютъ мѧ̀, се́рдце же и҆́хъ дале́че ѿстои́тъ ѿ менє̀: всѹ́е же почита́ютъ мѧ̀, ѹ҆ча́ще за́повѣдемъ человѣ́чєскимъ и҆ ѹ҆че́нїємъ.

¹⁴Сегѡ̀ ра́ди сѐ, а҆́зъ приложѹ̀, є҆́же пресели́ти лю́ди сїѧ҄, и҆ преста́влю ѧ҆̀, и҆ погѹблю̀ премѹ́дрость премѹ́дрыхъ и҆ ра́зѹмъ разѹ́мныхъ сокры́ю.

¹⁵Го́ре творѧ́щымъ глѹбо́кѡ совѣ́тъ, а҆ не гд҇емъ: го́ре въ та́йнѣ совѣ́тъ творѧ́щымъ, и҆ бѹ́дѹтъ во тмѣ̀ дѣла̀ и҆́хъ, и҆ рекѹ́тъ: кто́ ны ви́дѣ, и҆ кто́ ны ѹ҆разѹмѣ́етъ, ѩ҆̀же мы̀ твори́мъ;

¹⁶Не ѩ҆́коже ли бре́нїе скѹде́льника вмѣните́сѧ; Є҆да̀ рече́тъ зда́нїе созда́вшемѹ є҆̀: не ты̀ мѧ̀ созда́лъ є҆сѝ; и҆лѝ творе́нїе сотво́ршемѹ: не разѹ́мнѡ мѧ̀ сотвори́лъ є҆сѝ;

¹⁷Не є҆ще́ ли ма́лѡ, и҆ приложи́тсѧ лїва́нъ, а҆́ки гора̀ херме́ль, и҆ херме́ль въ дѹбра́вѹ вмѣни́тсѧ;

¹⁸И҆ ѹ҆слы́шатъ въ де́нь ѻ҆́ный глѹсі́и словеса̀ кни́ги (сеѧ̀), и҆ и҆̀же во тмѣ̀ и҆ и҆̀же во мглѣ̀ ѻ҆́чи слѣпы́хъ ѹ҆́зрѧтъ.

¹⁹И҆ возра́дѹютсѧ ни́щїи ра́ди гд҇а въ весе́лїи, и҆ ѿча́ѧвшїисѧ человѣ́цы и҆спо́лнѧтсѧ весе́лїѧ.

²⁰И҆счезѐ беззако́нникъ, и҆ поги́бе го́рдый, и҆ потреби́шасѧ всѝ беззако́ннѹющїи во ѕло́бѣ

²¹и҆ творѧ́щїи согрѣша́ти человѣ́ки во сло́вѣ: всѣ҄мъ же ѡ҆блича́ющымъ во вратѣ́хъ претыка́нїе положа́тъ, поне́же соврати́ша въ непра́вдахъ првднаго.

²²Сегѡ̀ ра́ди та́кѡ гл҃етъ гд҇ь на до́мъ ї҆а́кѡвль, є҆го́же ѡ҆предѣлѝ ѿ а҆враа́ма: не нн҃ѣ постыди́тсѧ ї҆а́кѡвъ, нижѐ нн҃ѣ лицѐ своѐ и҆змѣни́тъ ї҆и҃ль:

²³но є҆гда̀ ѹ҆ви́дѧтъ ча҄да и҆́хъ дѣла̀ моѧ҄, менє̀ ра́ди ѡ҆свѧтѧ́тъ и҆́мѧ моѐ и҆ ѡ҆свѧтѧ́тъ ст҃а́го ї҆а́кѡвлѧ, и҆ бг҃а ї҆и҃лева ѹ҆боѧ́тсѧ.

²⁴И҆ ѹ҆разѹмѣ́ютъ заблѹжда́ющїи дѹ́хомъ смы́слъ, и҆ ро́пщѹщїи наѹча́тсѧ послѹ́шати, и҆ ѧ҆зы́цы нѣмотствѹ́ющїи наѹча́тсѧ глаго́лати ми́ръ.