Read Библия Церковнославянская Кни́га проро́ка И҆са́їи 31 Bible Online

Кни́га проро́ка И҆са́їи 31 - Библия Церковнославянская bible

Кни́га проро́ка И҆са́їи 31

¹Го́ре сходѧ́щымъ во є҆гѵ́петъ по́мощи ра́ди, ѹ҆пова́ющымъ на ко́ни и҆ на колесни҄цы: сѹ́ть бо мнѡ́га, и҆ ко́нническое мно́жество мно́го ѕѣлѡ̀: и҆ не бѣ́ша ѹ҆пова́юще на ст҃а́го ї҆и҃лева, и҆ бг҃а не взыска́ша.

²То́йже премдрѣ наведѐ на ни́хъ ѕла҄ѧ, и҆ сло́во є҆гѡ̀ не ѿри́нетсѧ, и҆ воста́нетъ на до́мы человѣ́кѡвъ ѕлы́хъ и҆ на наде́ждѹ и҆́хъ тще́тнѹю,

³є҆гѵ́птѧнина человѣ́ка, а҆ не бг҃а, кѡ́нски плѡ́ти, и҆ не бѹ́детъ по́мощи: гд҇ь же наведе́тъ рѹ́кѹ свою̀ на нѧ̀, и҆ ѹ҆трѹдѧ́тсѧ помага́ющїи, и҆ всѝ вкѹ́пѣ поги́бнѹтъ.

⁴Зане́же та́кѡ речѐ мнѣ̀ гд҇ь: ѩ҆́коже возреве́тъ ле́въ, и҆лѝ льви́чищь ѡ҆ лови́твѣ, ю҆́же и҆́метъ, и҆ возопїе́тъ над̾ не́ю, до́ндеже напо́лнѧтсѧ го́ры гла́са є҆гѡ̀, и҆ побѣди́шасѧ и҆ мно́жества ѩ҆́рости ѹ҆боѧ́шасѧ: та́кѡ гд҇ь саваѡ́ѳъ сни́детъ на го́рѹ сїѡ́ню и҆ на го́ры є҆гѡ̀ воева́ти.

⁵ѩ҆́коже пти҄цы парѧ́щыѧ, си́це защи́титъ гд҇ь саваѡ́ѳъ ѡ҆ ї҆ер҇ли́мѣ, защи́титъ и҆ и҆зба́витъ, и҆ снабди́тъ и҆ сп҃се́тъ.

⁶Ѡ҆брати́тесѧ, совѣщава́ющїи глѹбо́къ совѣ́тъ и҆ беззако́ненъ, сы́нове ї҆и҃лєвы:

⁷ѩ҆́кѡ въ то́й де́нь ѿве́ргѹтъ человѣ́цы рѹкотворє́ннаѧ своѧ҄ срє́брѧнаѧ и҆ рѹкотворє́ннаѧ злата҄ѧ, ѩ҆̀же сотвори́ша рѹ́ки и҆́хъ.

⁸И҆ паде́тъ а҆ссѹ́ръ не мече́мъ человѣ́ческимъ, ни ме́чь мѹ́жескїй поѧ́стъ є҆го̀, и҆ побѣ́гнетъ не ѿ лица̀ меча̀: ю҆́нѡты же бѹ́дѹтъ въ побѣжде́нїе.

⁹Ка́менїемъ бо ѡ҆б̾и́мѹтсѧ ѩ҆́кѡ ѻ҆стро́гомъ и҆ побѣжде́ни бѹ́дѹтъ, а҆ бѣжа́й плѣне́нъ бѹ́детъ. Сїѧ҄ гл҃етъ гд҇ь: (бл҃же́нъ,) и҆́же и҆мѣ́етъ пле́мѧ въ сїѡ́нѣ и҆ ю҆́жики во ї҆ер҇ли́мѣ.