Read Библия Церковнославянская Кни́га проро́ка И҆са́їи 33 Bible Online

Кни́га проро́ка И҆са́їи 33 - Библия Церковнославянская bible

Кни́га проро́ка И҆са́їи 33

¹Го́ре ѡ҆би́дѧщымъ ва́съ! ва́съ никто́же и҆з̾ѡби́дитъ, и҆ ѿверга́ѧй ва́съ не ѿве́ржетъ: плѣне́ни бѹ́дѹтъ ѿмета́ющїи (ва́съ) и҆ предадѧ́тсѧ, и҆ ѩ҆́кѡ мо́лїе въ ри́зѣ, та́кѡ побѣжде́ни бѹ́дѹтъ.

²Гд҇и, поми́лѹй ны̀, на тѧ́ бо ѹ҆пова́хомъ: бы́сть пле́мѧ непокарѧ́ющихсѧ въ па́гѹбѹ, сп҇нїе же на́ше во вре́мѧ печа́ли.

³Гла́сомъ стра́ха твоегѡ̀ ѹ҆жасо́шасѧ лю́дїе ѿ стра́ха твоегѡ̀, и҆ разсѣ́ѧшасѧ ѩ҆зы́цы.

⁴Нн҃ѣ же соберѹ́тсѧ кѡры́сти ва́шѧ ма́лагѡ и҆ вели́кагѡ: ѩ҆́коже а҆́ще кто̀ собере́тъ прѹ́ги, та́кѡ нарѹга́ютсѧ ва́мъ.

⁵Ст҃ъ бг҃ъ живы́й въ вы́шнихъ, напо́лнисѧ сїѡ́нъ сѹда̀ и҆ пра́вды.

⁶Въ зако́нѣ предадѧ́тсѧ, въ сокро́вищихъ сп҇нїе на́ше, та́мѡ премѹ́дрость и҆ хи́трость и҆ бл҃гоче́стїе ко гд҇еви: сїѧ҄ сѹ́ть сокрѡ́вища пра́вды.

⁷Сѐ, нн҃ѣ во стра́сѣ ва́шемъ ті́и ѹ҆боѧ́тсѧ: и҆́хже боѧ́стесѧ, возопїю́тъ ѿ ва́съ: вѣ҄стницы бо по́слани бѹ́дѹтъ го́рцѣ пла́чѹщесѧ, просѧ́ще ми́ра.

⁸Ѡ҆пѹстѣ́ютъ бо си́хъ пѹтїѐ: преста̀ стра́хъ ѩ҆зы́кѡвъ, и҆ завѣ́тъ и҆́же къ ни҄мъ взе́млетсѧ, и҆ не вмѣнитѐ и҆́хъ въ человѣ́ки.

⁹Воспла́касѧ землѧ̀, посра́мленъ лїва́нъ, бла́то бы́сть са́рѡнь: ѩ҆вле́на бѹ́детъ галїле́а и҆ херме́ль.

¹⁰Нн҃ѣ воскр҇нѹ, гл҃етъ гд҇ь, нн҃ѣ просла́влюсѧ, нн҃ѣ вознесѹ́сѧ.

¹¹Нн҃ѣ ѹ҆́зрите, нн҃ѣ ѡ҆щѹтитѐ, тще́тна бѹ́детъ крѣ́пость дѹ́ха ва́шегѡ: ѻ҆́гнь вы̀ поѧ́стъ.

¹²И҆ бѹ́дѹтъ ѩ҆зы́цы пожже́ни, а҆́ки те́рнїе на ни́вѣ разме́тано и҆ пожже́но.

¹³Ѹ҆слы́шатъ да́льнїи, ѩ҆̀же сотвори́хъ, (гл҃етъ гд҇ь,) ѹ҆вѣ́дѧтъ приближа́ющїисѧ крѣ́пость мою̀.

¹⁴Ѿстѹпи́ша, и҆̀же въ сїѡ́нѣ, беззакѡ́нницы, прїи́метъ тре́петъ нечести҄выѧ: кто̀ возвѣсти́тъ ва́мъ, ѩ҆́кѡ ѻ҆́гнь гори́тъ; кто̀ возвѣсти́тъ ва́мъ мѣ́сто вѣ́чное;

¹⁵Ходѧ́й въ пра́вдѣ, глаго́лѧй пра́вый пѹ́ть, ненави́дѧй беззако́нїѧ и҆ непра́вды и҆ рѹ́цѣ ѿтрѧса́ѧй ѿ дарѡ́въ: ѡ҆тѧгчава́ѧй ѹ҆́шы, да не ѹ҆слы́шитъ сѹда̀ кро́ве: смежа́ѧй ѻ҆́чи, да не ѹ҆́зритъ непра́вды,

¹⁶се́й всели́тсѧ во высо́цѣ пеще́рѣ ка́мене крѣ́пкагѡ: хлѣ́бъ є҆мѹ̀ да́стсѧ, и҆ вода̀ є҆гѡ̀ вѣ́рна.

¹⁷Цр҃ѧ̀ со сла́вою ѹ҆́зрите, и҆ ѻ҆́чи ва́ши ѹ҆́зрѧтъ зе́млю и҆здале́ча,

¹⁸дѹша̀ ва́ша поѹчи́тсѧ стра́хѹ гд҇ню: гдѣ̀ сѹ́ть книгѡ́чїи; гдѣ̀ сѹ́ть совѣщава́ющїи; гдѣ̀ є҆́сть и҆счита́ѧй пита́ємыѧ ма҄лы и҆ вели҄ки лю́ди;

¹⁹И҆̀мже не совѣща́ше, нижѐ вѣ́дѧше глѹбо́кїй гла́съ и҆мѹ́щагѡ, ѩ҆́кѡ не слы́шати лю́демъ ѹ҆ничтожє́нымъ, и҆ нѣ́сть слы́шащемѹ смы́сла.

²⁰Сѐ, сїѡ́нъ гра́дъ, спасе́нїе на́ше, ѻ҆́чи твоѝ ѹ҆́зрѧтъ, ї҆ер҇ли́ме, гра́де бога́тый, кѹ́щы не поколе́блютсѧ, нижѐ подви́гнѹтсѧ ко́лїе хра́мины є҆гѡ̀ въ вѣ́чное вре́мѧ, и҆ ѹ҆́жѧ є҆гѡ̀ не прето́ргнѹтсѧ.

²¹ѩ҆́кѡ и҆́мѧ гд҇не вели́ко ва́мъ є҆́сть, мѣ́сто ва́мъ бѹ́детъ, рѣ́ки и҆ ровє́нницы широ́цы и҆ простра́нни: не по́йдеши по семѹ̀ пѹтѝ, нижѐ по́йдетъ кора́бль пловѹ́щь:

²²бг҃ъ бо мо́й вели́къ є҆́сть: не мине́тъ менѐ гд҇ь сѹдїѧ̀ на́шъ, гд҇ь кн҃зь на́шъ, гд҇ь цр҃ь на́шъ, гд҇ь то́й на́съ сп҃се́тъ.

²³Прерва́шасѧ ѹ҆́жѧ твоѧ҄, ѩ҆́кѡ не ѹ҆крѣпи́шасѧ: що́гла твоѧ̀ преклони́сѧ, не распѹ́ститъ вѣ́трилъ, не воздви́гнетъ зна́менїѧ, до́ндеже преда́стсѧ на плѣне́нїе: тѣ́мже мно́зи хромі́и плѣ́нъ сотворѧ́тъ,

²⁴и҆ не рекѹ́тъ: трѹжда́емсѧ, лю́дїе живѹ́щїи въ ни́хъ, ѡ҆ста́висѧ бо и҆̀мъ грѣ́хъ.