Read Библия Церковнославянская Кни́га проро́ка И҆са́їи 48 Bible Online

Кни́га проро́ка И҆са́їи 48 - Библия Церковнославянская bible

Кни́га проро́ка И҆са́їи 48

¹Ѹ҆слы́шите сїѧ҄, до́ме ї҆а́кѡвль, прозва́ннїи и҆́менемъ ї҆и҃левымъ и҆ и҆зше́дшїи и҆з̾ ї҆ѹ́ды, кленѹ́щїисѧ и҆́менемъ гд҇а бг҃а ї҆и҃лева, помина́ющїи не со и҆́стиною, нижѐ со пра́вдою,

²и҆ придержа́щїисѧ и҆́мени гра́да ст҃а́гѡ, и҆ ѡ҆ бз҃ѣ ї҆и҃левѣ подтвержда́ющїисѧ: гд҇ь саваѡ́ѳъ и҆́мѧ є҆мѹ̀.

³Прє́жднѧѧ є҆щѐ возвѣсти́хъ, и҆ и҆з̾ ѹ҆́стъ мои́хъ и҆зыдо́ша, и҆ слы́шано бы́сть: внеза́пѹ сотвори́хъ, и҆ на́йде.

⁴Вѣ́мъ, ѩ҆́кѡ же́стокъ є҆сѝ, и҆ жи́ла желѣ́зна вы́ѧ твоѧ̀, и҆ чело̀ твоѐ мѣ́дѧно.

⁵И҆ возвѣсти́хъ тѝ, ѩ҆̀же дре́вле, пре́жде не́же прїитѝ на тѧ̀: слы҄шана тебѣ̀ сотвори́хъ, да не когда̀ рече́ши, ѩ҆́кѡ їдѡли мнѣ̀ сїѧ҄ сотвори́ша, и҆ не рцы̀, ѩ҆́кѡ и҆зва҄ѧннаѧ и҆ слїѧ҄ннаѧ заповѣ́даша мнѣ̀.

⁶Слы́шасте всѧ҄, и҆ вы̀ не разѹмѣ́сте: но и҆ слы҄шана тебѣ̀ сотвори́хъ нѡ́ваѧ ѿнн҃ѣ, ѩ҆̀же и҆́мѹтъ бы́ти:

⁷и҆ не ре́клъ є҆сѝ: нн҃ѣ быва́ютъ, а҆ не пре́жде, и҆ не въ прє́жднїѧ дни҄ слы́шалъ є҆сѝ сїѧ҄: не рцы̀: є҆́й, вѣ́мъ сїѧ҄.

⁸Не вѣ́дѣлъ є҆сѝ, нижѐ разѹмѣ́лъ є҆сѝ, нижѐ и҆спе́рва ѿверзо́хъ ѹ҆шеса̀ твоѧ҄: вѣ́дѣхъ бо, ѩ҆́кѡ ѿверга́ѧ ѿри́неши и҆ беззако́нникъ є҆щѐ ѿ чре́ва прозове́шисѧ.

⁹И҆́мене моегѡ̀ ра́ди покажѹ́ ти ѩ҆́рость мою̀, и҆ сла҄внаѧ моѧ҄ наведѹ̀ на тѧ̀, да не потреблю̀ тебѐ.

¹⁰Сѐ, прода́хъ тѧ̀ не сребра̀ ра́ди: и҆з̾ѧ́хъ же тѧ̀ и҆з̾ пе́щи ѹ҆бо́жества.

¹¹Менє̀ ра́ди сотворю̀ тѝ, ѩ҆́кѡ моѐ и҆́мѧ ѡ҆сквернѧ́етсѧ, и҆ сла́вы моеѧ̀ и҆но́мѹ не да́мъ.

¹²Послѹ́шай менѐ, ї҆а́кѡве и҆ ї҆и҃лю, є҆го́же а҆́зъ призыва́ю: а҆́зъ є҆́смь пе́рвый и҆ а҆́зъ є҆́смь во вѣ́къ.

¹³И҆ рѹка̀ моѧ̀ ѡ҆снова̀ зе́млю, и҆ десни́ца моѧ̀ ѹ҆твердѝ не́бо: призовѹ̀ ѧ҆̀, и҆ ста́нетъ вкѹ́пѣ,

¹⁴и҆ соберѹ́тсѧ всѝ и҆ ѹ҆слы́шатъ: кто̀ и҆̀мъ возвѣстѝ сїѧ҄; любѧ̀ тѧ̀ сотвори́хъ во́лю твою̀ над̾ вавѷлѡ́номъ, є҆́же ѿѧ́ти пле́мѧ халде́йско.

¹⁵А҆́зъ гл҃ахъ, а҆́зъ призва́хъ, приведо́хъ и҆̀, и҆ благопоспѣши́тъ пѹ́ть є҆гѡ̀.

¹⁶Пристѹпи́те ко мнѣ̀ и҆ слы́шите сїѧ҄, и҆спе́рва не ѡ҆́тай гл҃ахъ: є҆гда̀ быва́хѹ, та́мѡ бѣ́хъ, и҆ нн҃ѣ гд҇ь гд҇ь посла́ мѧ и҆ дх҃ъ є҆гѡ̀.

¹⁷Та́кѡ гл҃етъ гд҇ь, и҆зба́вивый тѧ̀, ст҃ы́й ї҆и҃левъ: а҆́зъ є҆́смь гд҇ь бг҃ъ тво́й, наѹчи́хъ тѧ̀, є҆́же ѡ҆брѣстѝ тебѣ̀ пѹ́ть, по немѹ́же по́йдеши.

¹⁸И҆ а҆́ще бы є҆сѝ послѹ́шалъ за́повѣдїй мои́хъ, то̀ бы́лъ бы ѹ҆́бѡ а҆́ки рѣка̀ ми́ръ тво́й, и҆ пра́вда твоѧ̀ ѩ҆́кѡ волна̀ морска́ѧ,

¹⁹и҆ бы́ло бы ѩ҆́кѡ песо́къ сѣ́мѧ твоѐ, и҆ и҆сча҄дїѧ чре́ва твоегѡ̀ ѩ҆́кѡ пе́рсть землѝ: нижѐ нн҃ѣ потреби́шисѧ, нижѐ поги́бнетъ и҆́мѧ твоѐ предо мно́ю.

²⁰И҆зы́ди ѿ вавѷлѡ́на, бѣжа́й ѿ халде́євъ: гла́съ ра́дости возвѣсти́те, и҆ да слы́шано бѹ́детъ сїѐ, возвѣсти́те да́же до послѣ́днихъ землѝ, глаго́лите: и҆зба́ви гд҇ь раба̀ своего̀ ї҆а́кѡва.

²¹И҆ а҆́ще вжа́ждѹтъ, пѹсты́нею проведе́тъ и҆̀хъ и҆ во́дѹ и҆з̾ ка́мене и҆зведе́тъ и҆̀мъ: разсѧ́детсѧ ка́мень, и҆ потече́тъ вода̀, и҆ и҆спїю́тъ лю́дїе моѝ.

²²Нѣ́сть ра́доватисѧ нечести҄вымъ, гл҃етъ гд҇ь.