Read Библия Церковнославянская Кни́га проро́ка И҆са́їи 52 Bible Online

Кни́га проро́ка И҆са́їи 52 - Библия Церковнославянская bible

Кни́га проро́ка И҆са́їи 52

¹Воста́ни, воста́ни, сїѡ́не, ѡ҆блецы́сѧ во крѣ́пость твою̀, сїѡ́не, и҆ ты̀ ѡ҆блецы́сѧ во сла́вѹ твою̀, ї҆ер҇ли́ме, гра́де ст҃ы́й, ктомѹ̀ не приложи́тъ проитѝ сквозѣ̀ тѧ̀ неѡбрѣ́занный и҆ нечи́стый.

²И҆стрѧсѝ пра́хъ и҆ воста́ни, сѧ́ди, ї҆ер҇ли́ме, совлецы̀ ѹ҆́зѹ вы́и твоеѧ̀, плѣне́наѧ дщѝ сїѡ́нѧ.

³ѩ҆́кѡ сїѧ҄ гл҃етъ гд҇ь: тѹ́не про́дани бы́сте, и҆ не сребро́мъ и҆зба́витесѧ.

⁴Та́кѡ гл҃етъ гд҇ь: во є҆гѵ́петъ снидо́ша лю́дїе моѝ пре́жде, є҆́же прише́лцємъ бы́ти та́мѡ, и҆ во а҆ссѷрі́ю нѹ́ждею ѿведо́шасѧ.

⁵И҆ нн҃ѣ что̀ здѣ̀ є҆стѐ; сїѧ҄ гл҃етъ гд҇ь: ѩ҆́кѡ взѧ́шасѧ лю́дїе моѝ тѹ́не, чѹди́тесѧ и҆ пла́читесѧ. Та́кѡ гл҃етъ гд҇ь: ва́съ ра́ди пр҇нѡ и҆́мѧ моѐ хѹ́литсѧ во ѩ҆зы́цѣхъ.

⁶Сегѡ̀ ра́ди позна́ютъ лю́дїе моѝ и҆́мѧ моѐ въ то́й де́нь, ѩ҆́кѡ а҆́зъ є҆́смь са́мъ гл҃ѧй, тѹ̀ є҆́смь.

⁷Ко́ль красны҄ на гора́хъ но́ги благовѣствѹ́ющихъ ми́ръ, благовѣствѹ́ющихъ блага҄ѧ, ѩ҆́кѡ слы́шано сотворю̀ спасе́нїе твоѐ, глаго́лѧ: сїѡ́не, воц҃ри́тсѧ бг҃ъ тво́й.

⁸ѩ҆́кѡ гла́съ хранѧ́щихъ тѧ̀ вознесе́сѧ, и҆ гла́сомъ вкѹ́пѣ возра́дѹютсѧ: ѩ҆́кѡ ѻ҆́чи ко ѻ҆чесє́мъ воззрѧ́тъ, є҆гда̀ поми́лѹетъ гд҇ь сїѡ́на.

⁹Да ѿры́гнѹтъ весе́лїе вкѹ́пѣ пѹсты҄ни ї҆ер҇ли҄мскїѧ, ѩ҆́кѡ поми́лова гд҇ь люді́й свои́хъ и҆ и҆зба́ви ї҆ер҇ли́ма:

¹⁰и҆ ѿкры́етъ гд҇ь мы́шцѹ свою̀ ст҃ѹ́ю пред̾ всѣ́ми ѩ҆зы҄ки, и҆ ѹ҆́зрѧтъ всѝ концы҄ землѝ сп҇нїе, є҆́же ѿ бг҃а на́шегѡ.

¹¹Ѿстѹпи́те, ѿстѹпи́те, и҆зыди́те ѿсю́дѹ и҆ нечистотѣ̀ не прикаса́йтесѧ, и҆зыди́те ѿ среды̀ є҆гѡ̀, ѿлѹчи́тесѧ, носѧ́щїи сосѹ́ды гд҇ни:

¹²ѩ҆́кѡ не съ мѧте́жемъ и҆зы́дете, нижѐ ѹ҆бѣжа́нїемъ по́йдете: по́йдетъ бо пред̾ ва́ми гд҇ь, и҆ собира́ѧй вы̀ гд҇ь бг҃ъ ї҆и҃левъ.

¹³Сѐ, ѹ҆разѹмѣ́етъ ѻ҆́трокъ мо́й и҆ вознесе́тсѧ и҆ просла́витсѧ ѕѣлѡ̀.

¹⁴ѩ҆́коже ѹ҆жа́снѹтсѧ ѡ҆ тебѣ̀ мно́зи, та́кѡ ѡ҆безсла́витсѧ ѿ человѣ҄къ ви́дъ тво́й, и҆ сла́ва твоѧ̀ ѿ сынѡ́въ человѣ́ческихъ.

¹⁵Та́кѡ ѹ҆дивѧ́тсѧ ѩ҆зы́цы мно́зи ѡ҆ не́мъ, и҆ заградѧ́тъ ца́рїе ѹ҆ста̀ своѧ҄: ѩ҆́кѡ, и҆̀мже не возвѣсти́сѧ ѡ҆ не́мъ, ѹ҆́зрѧтъ, и҆ и҆̀же не слы́шаша, ѹ҆разѹмѣ́ютъ.