Read Библия Церковнославянская Кни́га проро́ка И҆са́їи 55 Bible Online

Кни́га проро́ка И҆са́їи 55 - Библия Церковнославянская bible

Кни́га проро́ка И҆са́їи 55

¹Жа́ждѹщїи, и҆ди́те на во́дѹ, и҆ є҆ли́цы не и҆́мате сребра̀, ше́дше кѹпи́те, и҆ ѩ҆ди́те (и҆ пі́йте) без̾ сребра̀ и҆ цѣны̀ вїно̀ и҆ тѹ́къ.

²Вскѹ́ю цѣнитѐ сребро̀ не въ хлѣ́бы, и҆ трѹ́дъ ва́шъ не въ сы́тость; Послѹ́шайте менѐ, и҆ снѣ́сте блага҄ѧ, и҆ наслади́тсѧ во благи́хъ дѹша̀ ва́ша.

³Внемли́те ѹ҆ши́ма ва́шима и҆ послѣ́дѹйте пѹтє́мъ мои҄мъ: послѹ́шайте менѐ, и҆ жива̀ бѹ́детъ во благи́хъ дѹша̀ ва́ша, и҆ завѣща́ю ва́мъ завѣ́тъ вѣ́ченъ, преподѡ́бнаѧ даві́дѡва вѣ҄рнаѧ.

⁴Сѐ, свидѣ́телство во ѩ҆зы́цѣхъ да́хъ є҆го̀, кнѧ́зѧ и҆ повели́телѧ ѩ҆зы́кѡмъ.

⁵Сѐ, ѩ҆зы́цы, и҆̀же не вѣ́дѧхѹ тебѐ, призовѹ́тъ тѧ̀, и҆ лю́дїе, и҆̀же не позна́ша тебѐ, ко тебѣ̀ прибѣ́гнѹтъ ра́ди гд҇а бг҃а твоегѡ̀, ст҃а́гѡ ї҆и҃лева, ѩ҆́кѡ просла́ви тѧ̀.

⁶Взыщи́те гд҇а, и҆ внегда̀ ѡ҆брѣстѝ ва́мъ того̀, призови́те: є҆гда́ же прибли́житсѧ къ ва́мъ,

⁷да ѡ҆ста́витъ нечести́вый пѹти҄ своѧ҄, и҆ мѹ́жъ беззако́ненъ совѣ́ты своѧ҄, и҆ да ѡ҆брати́тсѧ ко гд҇ѹ, и҆ поми́лованъ бѹ́детъ, ѩ҆́кѡ попремно́гѹ ѡ҆ста́витъ грѣ́хи ва́шѧ.

⁸Не сѹ́ть бо совѣ́ти моѝ ѩ҆́коже совѣ́ти ва́ши, нижѐ ѩ҆́коже пѹтїѐ ва́ши пѹтїѐ моѝ, гл҃етъ гд҇ь.

⁹Но ѩ҆́коже ѿстои́тъ не́бо ѿ землѝ, та́кѡ ѿстои́тъ пѹ́ть мо́й ѿ пѹті́й ва́шихъ, и҆ помышлє́нїѧ ва҄ша ѿ мы́сли моеѧ̀.

¹⁰ѩ҆́коже бо а҆́ще сни́детъ до́ждь и҆лѝ снѣ́гъ съ небесѐ, и҆ не возврати́тсѧ, до́ндеже напои́тъ зе́млю, и҆ роди́тъ, и҆ прозѧ́бнетъ, и҆ да́стъ сѣ́мѧ сѣ́ющемѹ и҆ хлѣ́бъ въ снѣ́дь:

¹¹та́кѡ бѹ́детъ гл҃го́лъ мо́й, и҆́же а҆́ще и҆зы́детъ и҆з̾ ѹ҆́стъ мои́хъ, не возврати́тсѧ ко мнѣ̀ то́щь, до́ндеже соверши́тъ (всѧ҄), є҆ли҄ка восхотѣ́хъ, и҆ поспѣшѹ̀ пѹти҄ твоѧ҄ и҆ за́пѡвѣди моѧ҄.

¹²Со весе́лїемъ бо и҆зы́дете и҆ съ ра́достїю наѹчите́сѧ: го́ры бо и҆ хо́лми возска́чѹтъ ждѹ́ще ва́съ съ ра́достїю, и҆ всѧ҄ древеса̀ сє́лнаѧ воспле́щѹтъ вѣ́твьми:

¹³и҆ вмѣ́стѡ дра́чїѧ взы́детъ кѷпарі́съ, и҆ вмѣ́стѡ кропи́вы взы́детъ мѷрсі́на: и҆ бѹ́детъ гд҇ь во и҆́мѧ и҆ во зна́менїе вѣ́чное, и҆ не ѡ҆скѹдѣ́етъ.