Read Библия Церковнославянская Кни́га проро́ка И҆са́їи 56 Bible Online

Кни́га проро́ка И҆са́їи 56 - Библия Церковнославянская bible

Кни́га проро́ка И҆са́їи 56

¹Сїѧ҄ гл҃етъ гд҇ь: сохрани́те сѹ́дъ и҆ сотвори́те пра́вдѹ, прибли́жисѧ бо сп҇нїе моѐ прїитѝ и҆ мл҇ть моѧ̀ ѿкры́тисѧ.

²Блаже́нъ мѹ́жъ творѧ́й сїѧ҄, и҆ человѣ́къ держа́йсѧ и҆́хъ, и҆ хранѧ́й сѹббѡ҄ты не ѡ҆сквернѧ́ти, и҆ блюды́й рѹ́цѣ своѝ не твори́ти непра́вды.

³Да не глаго́летъ и҆ноплеме́нникъ приложи́выйсѧ ко гд҇еви: є҆да̀ ѿлѹчи́тъ мѧ̀ гд҇ь ѿ люді́й свои́хъ; и҆ да не глаго́летъ ка́женикъ, ѩ҆́кѡ а҆́зъ є҆́смь дре́во сѹ́хо.

⁴Сїѧ҄ гл҃етъ гд҇ь ка́женикѡмъ: є҆ли́цы сохранѧ́тъ сѹббѡ҄ты моѧ҄ и҆ и҆зберѹ́тъ, ѩ҆̀же а҆́зъ хощѹ̀, и҆ содержа́тъ завѣ́тъ мо́й,

⁵да́мъ и҆̀мъ въ домѹ̀ мое́мъ и҆ во ѡ҆гра́дѣ мое́й мѣ́сто и҆мени́то, лѹ́чшее ѿ сынѡ́въ и҆ дще́рей, и҆́мѧ вѣ́чно да́мъ и҆̀мъ, и҆ не ѡ҆скѹдѣ́етъ:

⁶и҆ и҆ноплеме́нникѡмъ приложи́вшымсѧ гд҇еви рабо́тати є҆мѹ̀ и҆ люби́ти и҆́мѧ гд҇не, є҆́же бы́ти є҆мѹ̀ въ рабы҄ и҆ рабы҄ни, и҆ всѧ҄ снабдѧ́щыѧ сѹббѡ҄ты моѧ҄ не ѡ҆сквернѧ́ти и҆ держа́щыѧ завѣ́тъ мо́й,

⁷введѹ̀ ѧ҆̀ въ го́рѹ ст҃ѹ́ю мою̀ и҆ возвеселю̀ ѧ҆̀ въ домѹ̀ мл҃твы моеѧ̀: всесожжє́нїѧ и҆́хъ и҆ жє́ртвы и҆́хъ бѹ́дѹтъ прїѧ҄тны на тре́бницѣ мое́мъ: до́мъ бо мо́й до́мъ моли́твы нарече́тсѧ всѣ҄мъ ѩ҆зы́кѡмъ,

⁸гл҃етъ гд҇ь, собира́ѧй разсѣ҄ѧныѧ ї҆и҃лєвы, ѩ҆́кѡ соберѹ̀ къ немѹ̀ собо́ръ.

⁹Всѝ ѕвѣ́рїе ди́вїи, прїиди́те, ѩ҆ди́те, всѝ ѕвѣ́рїе дѹбра́внїи.

¹⁰Ви́дите, ѩ҆́кѡ всѝ ѡ҆слѣпо́ша, не разѹмѣ́ша смы́слити, всѝ псѝ нѣмі́и не возмо́гѹтъ ла́ѧти, ви́дѧще сны̀ на ло́жи, лю́бѧще дрема́ти,

¹¹и҆ псѝ безстѹ́днїи дѹше́ю, не вѣ́дѧще сы́тости: и҆ сѹ́ть лѹка́ви, не вѣ́дѧще смы́сла, всѝ пѹтє́мъ свои҄мъ послѣ́доваша, кі́йждо ѹ҆клони́шасѧ въ лихои́мство своѐ, ѿ пе́рвагѡ и҆ до послѣ́днѧгѡ.

¹²Прїиди́те, да во́змемъ вїно̀ и҆ напо́лнимсѧ пїѧ́нства, и҆ бѹ́детъ ѩ҆́кѡ дне́сь, та́кѡ и҆ заѹ́тра, и҆ мно́гѡ мно́жае.