Read Библия Церковнославянская Кни́га проро́ка И҆са́їи 59 Bible Online

Кни́га проро́ка И҆са́їи 59 - Библия Церковнославянская bible

Кни́га проро́ка И҆са́їи 59

¹Є҆да̀ не мо́жетъ рѹка̀ гд҇нѧ сп҇тѝ; и҆лѝ ѡ҆тѧгчи́лъ є҆́сть слѹ́хъ сво́й, є҆́же не ѹ҆слы́шати;

²Но грѣсѝ ва́ши разлѹча́ютъ междѹ̀ ва́ми и҆ междѹ̀ бг҃омъ, и҆ грѣ҄хъ ра́ди ва́шихъ ѿвратѝ лицѐ своѐ ѿ ва́съ, є҆́же не поми́ловати.

³Рѹ́цѣ во ва́ши ѡ҆сквернє́нѣ кро́вїю, и҆ пе́рсты ва́ши во грѣсѣ́хъ, ѹ҆стнѣ́ же ва́ши возглаго́лаша беззако́нїе, и҆ ѧ҆зы́къ ва́шъ непра́вдѣ поѹча́етсѧ.

⁴Никто́же глаго́летъ пра́вды, нижѐ є҆́сть сѹ́дъ и҆́стиненъ: ѹ҆пова́ютъ на сѹ́єтнаѧ и҆ глаго́лютъ тщє́тнаѧ, ѩ҆́кѡ зачина́ютъ трѹ́дъ и҆ ражда́ютъ беззако́нїе.

⁵ѩ҆́ица а҆́спїдска разби́ша и҆ поста́въ паѹчи́нный ткѹ́тъ, и҆ хотѧ́й ѿ ѩ҆́ицъ и҆́хъ ѩ҆́сти, разби́въ за́портокъ (є҆гѡ̀), ѡ҆брѣ́те и҆ въ не́мъ васїлі́ска.

⁶Поста́въ и҆́хъ не бѹ́детъ на ри́зѹ, и҆ не ѡ҆де́ждѹтсѧ ѿ дѣ́лъ свои́хъ: дѣла́ бо и҆́хъ дѣла̀ беззако́нїѧ.

⁷Но́зѣ же и҆́хъ на ѕло̀ текѹ́тъ, ско́ри пролїѧ́ти кро́вь, и҆ мы҄сли и҆́хъ мы҄сли ѡ҆ ѹ҆бі́йствахъ: сокрѹше́нїе и҆ бѣ́дность во пѹте́хъ и҆́хъ,

⁸и҆ пѹтѝ ми́рнагѡ не позна́ша, и҆ нѣ́сть сѹда̀ во пѹте́хъ и҆́хъ: стєзи́ бо и҆́хъ развращє́ны, по ни́хже хо́дѧтъ, и҆ не вѣ́дѧтъ ми́ра.

⁹Тогѡ̀ ра́ди ѿстѹпѝ ѿ ни́хъ сѹ́дъ, и҆ не пости́гнетъ и҆́хъ пра́вда: ждѹ́щымъ и҆̀мъ свѣ́та, бы́сть и҆̀мъ тма̀, ждѹ́ще зарѝ во мра́цѣ ходи́ша.

¹⁰Ѡ҆сѧ́жѹтъ ѩ҆́кѡ слѣпі́и стѣ́нѹ, ѩ҆́кѡ сѹ́ще без̾ ѻ҆че́съ ѡ҆сѧза́ти бѹ́дѹтъ, и҆ падѹ́тсѧ въ полѹ́дни ѩ҆́кѡ въ полѹ́нощи, ѩ҆́кѡ ѹ҆мира́юще возстенѹ́тъ

¹¹ѩ҆́кѡ медвѣ́дь, и҆ ѩ҆́кѡ го́лѹбь вкѹ́пѣ по́йдѹтъ. Жда́хомъ сѹда̀, и҆ нѣ́сть, спасе́нїе дале́че ѿстѹпѝ ѿ на́съ.

¹²Мно́го бо беззако́нїе на́ше пред̾ тобо́ю, и҆ грѣсѝ на́ши проти́вѹ ста́ша на́мъ: беззакѡ́нїѧ бо на҄ша въ на́съ, и҆ непра҄вды на́шѧ ѹ҆разѹмѣ́хомъ:

¹³нече́ствовахомъ и҆ солга́хомъ и҆ ѿстѹпи́хомъ ѿ послѣ́дованїѧ бг҃а на́шегѡ: глаго́лахомъ непра́вдѹ и҆ не покори́хомсѧ, во ѹ҆тро́бѣ зача́хомъ и҆ поѹчи́хомсѧ ѿ се́рдца на́шегѡ словесє́мъ непра́вєднымъ:

¹⁴и҆ ѡ҆ста́вихомъ созадѝ сѹ́дъ, и҆ пра́вда дале́че ѿстѹпѝ ѿ на́съ: ѩ҆́кѡ и҆знемо́же во пѹте́хъ и҆́хъ и҆́стина, и҆ пра́вымъ (пѹте́мъ) не возмого́ша прейтѝ:

¹⁵и҆ и҆́стина взѧ́сѧ, и҆ преста́виша ѹ҆́мъ сво́й є҆́же смы́слити. И҆ ви́дѣ гд҇ь и҆ негодова̀, ѩ҆́кѡ не бѧ́ше сѹда̀:

¹⁶и҆ ви́дѣ, и҆ не бѧ́ше мѹ́жа, и҆ помы́сли, и҆ не бѧ́ше и҆збавлѧ́ющагѡ: и҆ мстѝ и҆̀мъ мы́шцею свое́ю, и҆ поми́лованїемъ ѹ҆твердѝ.

¹⁷И҆ ѡ҆дѣ́ѧсѧ пра́вдою ѩ҆́кѡ щито́мъ, и҆ возложѝ шле́мъ спасе́нїѧ на главѹ̀, и҆ ѡ҆блече́сѧ въ ри́зѹ ѿмще́нїѧ, и҆ ѻ҆де́ждею свое́ю:

¹⁸ѩ҆́кѡ воздава́ѧй воздаѧ́нїе ѹ҆кори́знѹ сѹпоста́тѡмъ.

¹⁹И҆ ѹ҆боѧ́тсѧ, и҆̀же ѿ за҄падъ, и҆́мене гд҇нѧ, и҆ и҆̀же ѿ востѡ́къ со́лнца, и҆́мене є҆гѡ̀ сла́внагѡ: прїи́детъ бо ѩ҆́кѡ рѣка̀ наси́льнаѧ гнѣ́въ ѿ гд҇а, прїи́детъ со ѩ҆́ростїю.

²⁰И҆ прїи́детъ сїѡ́на ра́ди и҆збавлѧ́ѧй, и҆ ѿврати́тъ нече́стїе ѿ ї҆а́кѡва.

²¹И҆ се́й и҆̀мъ и҆́же ѿ менє̀ завѣ́тъ, речѐ гд҇ь: дх҃ъ мо́й, и҆́же є҆́сть въ тебѣ̀, и҆ гл҃го́лы, ѩ҆̀же а҆́зъ да́хъ во ѹ҆ста̀ твоѧ҄, не ѡ҆скѹдѣ́ютъ ѿ ѹ҆́стъ твои́хъ и҆ ѿ ѹ҆́стъ сѣ́мене твоегѡ̀: рече́ бо гд҇ь ѿнн҃ѣ и҆ во вѣ́къ.