Read Библия Церковнославянская Кни́га проро́ка И҆са́їи 62 Bible Online

Кни́га проро́ка И҆са́їи 62 - Библия Церковнославянская bible

Кни́га проро́ка И҆са́їи 62

¹Сїѡ́на ра́ди не ѹ҆молчѹ̀ и҆ ї҆ер҇ли́ма ра́ди не попѹщѹ̀, до́ндеже и҆зы́детъ ѩ҆́кѡ свѣ́тъ пра́вда моѧ̀, и҆ сп҇нїе моѐ ѩ҆́кѡ свѣти́ло разжже́тсѧ.

²И҆ ѹ҆́зрѧтъ ѩ҆зы́цы пра́вдѹ твою̀, и҆ ца́рїе сла́вѹ твою̀, и҆ прозовѹ́тъ тѧ̀ и҆́менемъ но́вымъ, и҆́мже гд҇ь наименѹ́етъ є҆̀.

³И҆ бѹ́деши вѣне́цъ добро́ты въ рѹцѣ̀ гд҇ни и҆ дїади́ма ца́рствїѧ въ рѹцѣ̀ бг҃а твоегѡ̀:

⁴и҆ не прозове́шисѧ ктомѹ̀ ѡ҆ста́вленъ, и҆ землѧ̀ твоѧ̀ ктомѹ̀ не нарече́тсѧ пѹста̀: тебѣ́ бо прозове́тсѧ во́лѧ моѧ̀, и҆ землѧ̀ твоѧ̀ вселе́ннаѧ, ѩ҆́кѡ бл҃говолѝ гд҇ь въ тебѣ̀, и҆ землѧ̀ твоѧ̀ вкѹ́пѣ насели́тсѧ.

⁵И҆ ѩ҆́коже живѧ́й ю҆́ноша съ дѣ́вою, та́кѡ поживѹ́тъ сы́нове твоѝ съ тобо́ю: и҆ бѹ́детъ ѩ҆́коже ра́дѹетсѧ жени́хъ ѡ҆ невѣ́стѣ, та́кѡ возра́дѹетсѧ гд҇ь ѡ҆ тебѣ̀.

⁶И҆ на стѣна́хъ твои́хъ, ї҆ер҇ли́ме, приста́вихъ стра́жы ве́сь де́нь и҆ всю̀ но́щь, и҆̀же до конца̀ не премо́лкнѹтъ помина́юще гд҇а.

⁷Нѣ́сть бо ва́мъ подо́бенъ: а҆́ще и҆спра́виши и҆ сотвори́ши, ї҆ер҇ли́ме, ра́дованїе на землѝ.

⁸Клѧ́тсѧ гд҇ь десни́цею свое́ю и҆ крѣ́постїю мы́шцы своеѧ̀: а҆́ще ктомѹ̀ ѿда́мъ пшени́цѹ твою̀ и҆ пи́щѹ твою̀ врагѡ́мъ твои҄мъ, и҆ а҆́ще ктомѹ̀ и҆спїю́тъ вїно̀ твоѐ сы́нове чѹжді́и, ѡ҆ не́мже трѹди́лсѧ є҆сѝ:

⁹но собира́ющїи снѣдѧ́тъ ѧ҆̀ и҆ похва́лѧтъ гд҇а, и҆ ѡ҆б̾има́ющїи и҆спїю́тъ ѧ҆̀ во дво́рѣхъ ст҃ы́хъ мои́хъ.

¹⁰И҆ди́те враты̀ мои́ми и҆ пѹ́ть сотвори́те лю́демъ мои҄мъ, и҆ ка́менїе, є҆́же на пѹтѝ, размещи́те: воздви́гните зна́менїе на ѩ҆зы́ки.

¹¹Се́ бо, гд҇ь слы́шано сотворѝ до послѣ́днихъ землѝ: рцы́те дще́ри сїѡ́новѣ: сѐ, сп҃си́тель тво́й грѧде́тъ, и҆мѣ́ѧй съ собо́ю мздѹ̀ и҆ дѣ́ло своѐ пред̾ лице́мъ свои́мъ.

¹²И҆ прозове́тъ ѧ҆̀ лю́ди ст҃ы, и҆зба́влєны гд҇емъ: ты́ же прозове́шисѧ взы́сканъ гра́дъ и҆ не ѡ҆ста́вленъ.