Read Библия Церковнославянская Кни́га проро́ка И҆са́їи 64 Bible Online

Кни́га проро́ка И҆са́їи 64 - Библия Церковнославянская bible

Кни́га проро́ка И҆са́їи 64

¹А҆́ще ѿве́рзеши нб҃о, тре́петъ прїи́мѹтъ ѿ тебє̀ го́ры и҆ раста́ютъ,

²ѩ҆́кѡ та́етъ во́скъ ѿ лица̀ ѻ҆гнѧ̀, и҆ попали́тъ ѻ҆́гнь сѹпоста́ты, и҆ ѩ҆вле́но бѹ́детъ и҆́мѧ твоѐ въ сопроти́вныхъ твои́хъ: ѿ лица̀ твоегѡ̀ ѩ҆зы́цы возмѧтѹ́тсѧ:

³є҆гда̀ сотвори́ши сла҄внаѧ, тре́петъ прїи́мѹтъ ѿ тебє̀ го́ры.

⁴Ѿ вѣ́ка не слы́шахомъ, нижѐ ѻ҆́чи на́ши ви́дѣша бг҃а, ра́звѣ тебє̀, и҆ дѣла̀ твоѧ҄, ѩ҆̀же сотвори́ши ждѹ́щымъ мл҇ти.

⁵Мл҇ть бо срѧ́щетъ творѧ́щихъ пра́вдѹ, и҆ пѹти҄ твоѧ҄ помѧнѹ́тсѧ: сѐ, ты̀ разгнѣ́валсѧ є҆сѝ, и҆ мы̀ согрѣши́хомъ.

⁶Сегѡ̀ ра́ди заблѹди́хомъ и҆ бы́хомъ ѩ҆́кѡ нечи́сти всѝ мы̀, ѩ҆́коже по́ртъ нечи҄стыѧ всѧ̀ пра́вда на́ша, и҆ ѿпадо́хомъ ѩ҆́кѡ ли́ствїе беззако́нїй ра́ди на́шихъ: та́кѡ вѣ́тръ восхи́титъ на́съ.

⁷И҆ нѣ́сть призыва́ѧй и҆́мѧ твоѐ и҆ помѧнѹ́вый ѹ҆держа́ти тѧ̀: ѩ҆́кѡ ѿврати́лъ є҆сѝ лицѐ твоѐ ѿ на́съ и҆ пре́далъ ны̀ є҆сѝ беззако́нїй ра́ди на́шихъ.

⁸И҆ нн҃ѣ, гд҇и, ѻ҆ц҃ъ на́шъ є҆сѝ ты̀, мы́ же бре́нїе, дѣла̀ рѹкѹ̀ твоє́ю всѝ:

⁹не прогнѣ́вайсѧ на ны̀ ѕѣлѡ̀ и҆ не помѧнѝ во вре́мѧ беззако́нїй на́шихъ, и҆ нн҃ѣ при́зри, ѩ҆́кѡ лю́дїе твоѝ всѝ мы̀.

¹⁰Гра́дъ ст҃и́лища твоегѡ̀ бы́сть пѹ́стъ, сїѡ́нъ ѩ҆́коже пѹсты́нѧ бы́сть, ї҆ер҇ли́мъ на проклѧ́тїе:

¹¹до́мъ ст҃ы́й на́шъ и҆ сла́ва, ю҆́же благослови́ша ѻ҆тцы̀ на́ши, бы́сть ѻ҆гне́мъ пожже́нъ, и҆ всѧ҄ сла҄внаѧ на҄ша кѹ́пнѡ падо́ша.

¹²И҆ ѿ всѣ́хъ си́хъ терпѣ́лъ є҆сѝ, гд҇и, и҆ молча́лъ, и҆ смири́лъ є҆сѝ ны̀ ѕѣлѡ̀.