Read Библия Церковнославянская Кни́га проро́ка И҆са́їи 65 Bible Online

Кни́га проро́ка И҆са́їи 65 - Библия Церковнославянская bible

Кни́га проро́ка И҆са́їи 65

¹ѩ҆вле́нъ бы́хъ не и҆́щѹщымъ менѐ, ѡ҆брѣто́хсѧ не вопроша́ющымъ ѡ҆ мнѣ̀, реко́хъ: сѐ, є҆́смь: ѩ҆зы́кѹ, и҆̀же не призва́ша и҆́мене моегѡ̀.

²Простро́хъ рѹ́цѣ моѝ ве́сь де́нь къ лю́демъ не покарѧ́ющымсѧ и҆ проти́вѹ глаго́лющымъ, и҆̀же не ходи́ша пѹте́мъ и҆́стиннымъ, но в̾слѣ́дъ грѣхѡ́въ свои́хъ.

³Лю́дїе сі́и разгнѣвлѧ́ющїи мѧ̀ пред̾ лице́мъ мои́мъ пр҇нѡ: ті́и жє́ртвы прино́сѧтъ въ вертогра́дѣхъ и҆ кадѧ́тъ во чре́пѣхъ бѣсѡ́мъ, и҆̀же не сѹ́ть,

⁴и҆ во гробѣ́хъ и҆ во пеще́рахъ лежа́тъ со́нїй ра́ди, и҆̀же ѩ҆дѧ́тъ мѧса̀ свина҄ѧ и҆ ю҆хѹ̀ тре́бъ, ѡ҆скверне́ни сосѹ́ди и҆́хъ всѝ:

⁵и҆̀же глаго́лютъ: ѿидѝ ѿ менє̀, не прикосни́сѧ мнѣ̀, ѩ҆́кѡ чи́стъ є҆́смь. Се́й ды́мъ ѩ҆́рости моеѧ̀, ѻ҆́гнь гори́тъ въ не́мъ всѧ҄ дни҄.

⁶Сѐ, написа́сѧ предо мно́ю: не ѹ҆молчѹ̀, до́ндеже ѿда́мъ въ нѣ҄дра и҆̀мъ грѣхѝ и҆́хъ и҆ грѣхѝ ѻ҆тє́цъ и҆́хъ, гл҃етъ гд҇ь:

⁷и҆̀же кадѧ́хѹ на гора́хъ и҆ на хо́лмѣхъ ѹ҆кори́ша мѧ̀, ѿда́мъ дѣла̀ и҆́хъ въ нѣ҄дра и҆̀мъ.

⁸Та́кѡ гл҃етъ гд҇ь: и҆́мже ѡ҆́бразомъ ѡ҆брѣта́етсѧ ѩ҆́года на гре́знѣ, и҆ рекѹ́тъ: не погѹбѝ є҆гѡ̀, ѩ҆́кѡ блг҇ве́нїе є҆́сть въ не́мъ: та́кѡ сотворю̀ слѹжа́щагѡ мѝ ра́ди, не и҆́мамъ всѣ́хъ погѹби́ти ра́ди є҆гѡ̀:

⁹и҆ и҆зведѹ̀ и҆з̾ ї҆а́кѡва сѣ́мѧ и҆ и҆з̾ ї҆ѹ́ды, и҆ наслѣ́дитъ го́рѹ ст҃ѹ́ю мою̀, и҆ наслѣ́дѧтъ и҆збра́ннїи моѝ и҆ рабѝ моѝ и҆ вселѧ́тсѧ та́мѡ.

¹⁰И҆ бѹ́дѹтъ во дѹбра́вѣ ѡ҆гра҄ды стадѡ́мъ, и҆ ю҆до́ль а҆хѡ́рскаѧ въ поко́ище говѧ́дѡвъ лю́демъ мои҄мъ, и҆̀же взыска́ша менѐ.

¹¹Вы́ же, ѡ҆ста́вившїи мѧ̀ и҆ забыва́ющїи го́рѹ ст҃ѹ́ю мою̀, и҆ ѹ҆готовлѧ́ющїи де́мѡнѹ трапе́зѹ и҆ и҆сполнѧ́ющїи ща́стїю растворе́нїе,

¹²а҆́зъ преда́мъ ва́съ под̾ ме́чь, всѝ закла́нїемъ паде́те: ѩ҆́кѡ зва́хъ ва́съ, и҆ не послѹ́шасте, гл҃ахъ, и҆ преслѹ́шасте и҆ сотвори́сте лѹка́вое предо мно́ю, и҆ ѩ҆̀же не хотѣ́хъ, и҆збра́сте.

¹³Сегѡ̀ ра́ди та́кѡ гл҃етъ гд҇ь: сѐ, рабо́тающїи мѝ ѩ҆́сти бѹ́дѹтъ, вы́ же вза́лчете: сѐ, рабо́тающїи мѝ пи́ти бѹ́дѹтъ, вы́ же возжа́ждете:

¹⁴сѐ, рабо́тающїи мѝ возра́дѹютсѧ, вы́ же посрамите́сѧ: сѐ, рабо́тающїи мѝ возвеселѧ́тсѧ въ весе́лїи се́рдца, вы́ же возопїе́те въ болѣ́зни се́рдца ва́шегѡ и҆ ѿ сокрѹше́нїѧ дѹ́ха воспла́четесѧ.

¹⁵Ѡ҆ста́вите бо и҆́мѧ ва́ше въ насыще́нїе и҆збра҄ннымъ мои҄мъ, ва́съ же и҆збїе́тъ гд҇ь: рабо́тающымъ же мнѣ̀ нарече́тсѧ и҆́мѧ но́вое,

¹⁶є҆́же блг҇ви́тсѧ на землѝ, благословѧ́тъ бо бг҃а и҆́стиннаго: и҆ кленѹ́щїисѧ на землѝ клѧ́тисѧ бѹ́дѹтъ бг҃омъ и҆́стиннымъ, забѹ́дѹтъ бо печа́ль свою̀ пе́рвѹю, и҆ не взы́детъ и҆̀мъ на се́рдце.

¹⁷Бѹ́детъ бо не́бо но́во и҆ землѧ̀ нова̀, и҆ не помѧнѹ́тъ пре́жнихъ, нижѐ взы́дѹтъ на се́рдце и҆́хъ,

¹⁸но ра́дость и҆ весе́лїе ѡ҆брѧ́щѹтъ на не́й, ѩ҆́кѡ сѐ, а҆́зъ творю̀ весе́лїе ї҆ер҇ли́мѹ и҆ лю́демъ мои҄мъ ра́дость.

¹⁹И҆ возвеселю́сѧ ѡ҆ ї҆ер҇ли́мѣ и҆ возра́дѹюсѧ ѡ҆ лю́дехъ мои́хъ, и҆ ксемѹ̀ не ѹ҆слы́шитсѧ въ не́мъ гла́съ пла́ча, ни гла́съ во́плѧ,

²⁰нижѐ бѹ́детъ та́мѡ младе́нецъ, ни ста́рецъ, и҆́же не и҆спо́лнитъ лѣ́тъ свои́хъ: бѹ́детъ бо ю҆́ный ста̀ лѣ́тъ, ѹ҆мира́ѧй же грѣ́шникъ ста̀ лѣ́тъ и҆ про́клѧтъ бѹ́детъ.

²¹И҆ сози́ждѹтъ до́мы и҆ са́ми вселѧ́тсѧ, и҆ насадѧ́тъ вїногра́ды и҆ са́ми снѣдѧ́тъ плоды̀ и҆́хъ.

²²Не сози́ждѹтъ, да и҆ні́и вселѧ́тсѧ, и҆ не насадѧ́тъ, да и҆ні́и снѣдѧ́тъ: ѩ҆́коже бо дні́е дре́ва жи́зни, бѹ́дѹтъ дні́е люді́й мои́хъ: дѣла́ бо трѹдѡ́въ и҆́хъ ѡ҆бетша́ютъ.

²³И҆збра́ннїи же моѝ не и҆́мѹтъ трѹди́тисѧ вотщѐ, нижѐ породѧ́тъ ча҄дъ на проклѧ́тїе, ѩ҆́кѡ сѣ́мѧ блг҇ве́но є҆́сть бг҃омъ, и҆ внѹ́цы и҆́хъ съ ни́ми бѹ́дѹтъ.

²⁴И҆ бѹ́детъ, пре́жде не́же воззва́ти и҆̀мъ, а҆́зъ ѹ҆слы́шѹ и҆̀хъ, є҆щѐ глаго́лющымъ и҆̀мъ, рекѹ̀: что́ є҆сть;

²⁵Тогда̀ во́лцы и҆ а҆́гнцы и҆́мѹтъ пасти́сѧ вкѹ́пѣ, и҆ ле́въ ѩ҆́кѡ во́лъ снѣ́сть плє́вы, и҆ ѕмїѧ̀ зе́млю ѩ҆́кѡ хлѣ́бъ: не повредѧ́тъ, нижѐ погѹбѧ́тъ на горѣ̀ ст҃ѣ́й мое́й, гл҃етъ гд҇ь.