Read Библия Церковнославянская Кни́га проро́ка И҆са́їи 8 Bible Online

Кни́га проро́ка И҆са́їи 8 - Библия Церковнославянская bible

Кни́га проро́ка И҆са́їи 8

¹И҆ речѐ гд҇ь ко мнѣ̀: прїимѝ себѣ̀ сви́токъ но́въ вели́къ и҆ напишѝ въ не́мъ писа́ломъ человѣ́чимъ, є҆́же ско́рѡ плѣне́нїе сотвори́ти коры́стей, приспѣ́ бо:

²и҆ свидѣ҄тели мнѣ̀ сотворѝ вѣ҄рны человѣ́ки, ѹ҆рі́ю ї҆ере́а и҆ заха́рїю сы́на варахі́ина.

³И҆ пристѹпи́хъ ко про҇ро́чицѣ, и҆ во чре́вѣ зача́тъ и҆ родѝ сы́на. И҆ речѐ гд҇ь мнѣ̀: нарцы̀ и҆́мѧ є҆мѹ̀: [ско́рѡ плѣнѝ, на́глѡ расхи́ти,]

⁴занѐ пре́жде не́же разѹмѣ́ти ѻ҆троча́ти назва́ти ѻ҆тца̀ и҆лѝ ма́терь, прїи́метъ си́лѹ дама́сковѹ, и҆ кѡры́сти самарї҄йскїѧ пред̾ царе́мъ а҆ссѷрі́йскимъ.

⁵И҆ приложѝ гд҇ь гл҃ати ко мнѣ̀ є҆щѐ, гл҃ѧ:

⁶поне́же не восхотѣ́ша лю́дїе сі́и воды̀ сїлѡа́мли текѹ́щїѧ ти́сѣ, но восхотѣ́ша и҆мѣ́ти рассѡ́на и҆ сы́на ромелі́ева царѧ̀ над̾ ва́ми,

⁷сегѡ̀ ра́ди сѐ, возво́дитъ гд҇ь на вы̀ во́дѹ рѣкѝ си́льнѹ и҆ мно́гѹ, царѧ̀ а҆ссѷрі́йска и҆ сла́вѹ є҆гѡ̀: и҆ взы́детъ на всѧ́кѹ де́брь ва́шѹ, и҆ ѡ҆бы́детъ всѧ́кѹ стѣ́нѹ ва́шѹ,

⁸и҆ ѿи́метъ ѿ ї҆ѹде́и человѣ́ка, и҆́же возмо́жетъ главѹ̀ воздви́гнѹти, и҆лѝ могѹ́щаго что̀ соверши́ти: и҆ бѹ́детъ по́лкъ є҆гѡ̀, во є҆́же напо́лнити ширинѹ̀ страны̀ твоеѧ̀, [съ на́ми бг҃ъ!]

⁹Разѹмѣ́йте, ѩ҆зы́цы, и҆ покарѧ́йтесѧ, ѹ҆слы́шите да́же до послѣ́днихъ землѝ: могѹ́щїи, покарѧ́йтесѧ: а҆́ще бо па́ки возмо́жете, па́ки побѣ́ждени бѹ́дете,

¹⁰и҆ и҆́же а҆́ще совѣ́тъ совѣща́ете, разори́тъ гд҇ь, и҆ сло́во, є҆́же а҆́ще возглаго́лете, не пребѹ́детъ въ ва́съ, ѩ҆́кѡ съ на́ми бг҃ъ.

¹¹Та́кѡ гл҃етъ гд҇ь: крѣ́пкою рѹко́ю не покарѧ́ютсѧ хожде́нїю пѹтѝ люді́й си́хъ, глаго́люще:

¹²да не когда̀ рекѹ́тъ: же́стоко: все́ бо, є҆́же а҆́ще рекѹ́тъ лю́дїе сі́и, же́стоко є҆́сть: стра́ха же и҆́хъ не ѹ҆бо́йтесѧ, нижѐ возмѧти́тесѧ.

¹³Гд҇а си́лъ, того̀ ѡ҆свѧти́те, и҆ то́й бѹ́детъ тебѣ̀ въ стра́хъ.

¹⁴И҆ а҆́ще бѹ́деши ѹ҆пова́ѧ на него̀, бѹ́детъ тебѣ̀ во ѡ҆сщ҃е́нїе, а҆ не ѩ҆́коже ѡ҆ ка́мень претыка́нїѧ преткне́шисѧ, нижѐ ѩ҆́кѡ ѡ҆ ка́мень паде́нїѧ: до́мове же ї҆а҄кѡвли въ прѹ́глѣ, и҆ въ раздо́лїи сѣдѧ́щїи во ї҆ер҇ли́мѣ.

¹⁵Сегѡ̀ ра́ди и҆знемо́гѹтъ въ ни́хъ мно́зи, и҆ падѹ́тъ, и҆ сокрѹша́тсѧ, и҆ прибли́жатсѧ, и҆ ѩ҆́ти бѹ́дѹтъ человѣ́цы въ тверды́ни сѹ́ще.

¹⁶Тогда̀ ѩ҆вле́ни бѹ́дѹтъ печатлѣ́ющїи зако́нъ, є҆́же не ѹ҆чи́тисѧ.

¹⁷И҆ рече́тъ: пождѹ̀ бг҃а ѿвра́щшагѡ лицѐ своѐ ѿ до́мѹ ї҆а́кѡвлѧ и҆ ѹ҆пова́ѧ бѹ́дѹ на́нь.

¹⁸Сѐ, а҆́зъ и҆ дѣ́ти, ѩ҆̀же мѝ дадѐ бг҃ъ: и҆ бѹ́дѹтъ зна́мєнїѧ и҆ чѹдеса̀ въ домѹ̀ ї҆и҃левѣ ѿ гд҇а саваѡ́ѳа, и҆́же ѡ҆бита́етъ на горѣ̀ сїѡ́нъ.

¹⁹И҆ а҆́ще рекѹ́тъ къ ва́мъ: и҆зыщи́те чревоволше́бникѡвъ и҆ ѿ землѝ возглаша́ющихъ, тщесло́вѹющихъ, и҆̀же ѿ чре́ва глаша́ютъ, не ѩ҆зы́къ ли къ бг҃ѹ своемѹ̀ взы́щетъ; что̀ и҆спытѹ́ютъ мє́ртвыѧ ѡ҆ живы́хъ;

²⁰Зако́нъ бо въ по́мощь дадѐ, да рекѹ́тъ не ѩ҆́коже сло́во сїѐ, за́ньже не лѣ́ть да́ры даѧ́ти.

²¹И҆ прїи́детъ на вы̀ же́стокъ гла́дъ, и҆ бѹ́детъ, є҆гда̀ вза́лчете, ско́рбни бѹ́дете и҆ ѕло̀ рече́те кнѧ́зю и҆ ѻ҆те́чествѹ:

²²и҆ воззрѧ́тъ на не́бо горѣ̀, и҆ на зе́млю ни́зѹ при́зрѧтъ, и҆ сѐ, скѹ́дость тѣ́сна и҆ тма̀, ско́рбь и҆ тѣснота̀ и҆ тма̀, ѩ҆́коже не ви́дѣти: и҆ не ѡ҆скѹдѣ́етъ въ тѣ́снотѣ сы́й да́же до вре́мене.