Read Библия Церковнославянская Кни́га проро́ка И҆са́їи 9 Bible Online

Кни́га проро́ка И҆са́їи 9 - Библия Церковнославянская bible

Кни́га проро́ка И҆са́їи 9

¹Сїѐ пре́жде и҆спі́й, ско́рѡ творѝ, страно̀ завѹлѡ́нѧ и҆ землѐ нефѳалі́млѧ, и҆ про́чїи при мо́ри живѹ́щїи, и҆ ѡ҆б̾ ѻ҆нѹ̀ странѹ̀ ї҆ѻрда́на, галїле́а ѩ҆зы́кѡвъ.

²Лю́дїе ходѧ́щїи во тмѣ̀ ви́дѣша свѣ́тъ ве́лїй: живѹ́щїи во странѣ̀ и҆ сѣ́ни сме́ртнѣй, свѣ́тъ возсїѧ́етъ на вы̀.

³Мно́жайшїи лю́дїе, ѩ҆̀же и҆зве́лъ є҆сѝ, въ весе́лїи твое́мъ: и҆ возвеселѧ́тсѧ пред̾ тобо́ю, ѩ҆́коже веселѧ́щїисѧ въ жа́твѹ, и҆ ѩ҆́коже веселѧ́тсѧ дѣлѧ́щїи коры҄сти.

⁴Занѐ ѿѧ́тсѧ ѩ҆ре́мъ лежа́й на ни́хъ, и҆ же́злъ, и҆́же на вы́и и҆́хъ: же́злъ бо и҆стѧзѹ́ющихъ разсы́па гд҇ь, ѩ҆́коже въ де́нь, и҆́же на мадїа́ма.

⁵ѩ҆́кѡ всѧ́кѹю ѻ҆де́ждѹ со́браннѹ ле́стїю и҆ ри́зѹ съ примире́нїемъ ѿдадѹ́тъ, и҆ восхотѧ́тъ, да бы́ша ѻ҆гне́мъ сожже́ны бы́ли.

⁶ѩ҆́кѡ ѻ҆троча̀ роди́сѧ на́мъ, сн҃ъ, и҆ даде́сѧ на́мъ, є҆гѡ́же нача́лство бы́сть на ра́мѣ є҆гѡ̀: и҆ нарица́етсѧ и҆́мѧ є҆гѡ̀: вели́ка совѣ́та а҆́гг҃лъ, чѹ́денъ, совѣ́тникъ, бг҃ъ крѣ́пкїй, властели́нъ, кн҃зь ми́ра, ѻ҆ц҃ъ бѹ́дѹщагѡ вѣ́ка: приведѹ́ бо ми́ръ на кнѧ҄зи, ми́ръ и҆ здра́вїе є҆мѹ̀.

⁷И҆ ве́лїе нача́лство є҆гѡ̀, и҆ ми́ра є҆гѡ̀ нѣ́сть предѣ́ла на пр҇то́лѣ дв҃довѣ и҆ на цр҇твѣ є҆гѡ̀, и҆спра́вити є҆̀ и҆ застѹпи́ти є҆го̀ въ сѹдѣ̀ и҆ пра́вдѣ, ѿнн҃ѣ и҆ до вѣ́ка: ре́вность гд҇а саваѡ́ѳа сотвори́тъ сїѧ҄.

⁸Сме́рть {Є҆вр.: сло́во.} посла̀ гд҇ь на ї҆а́кѡва, и҆ прїи́де на ї҆и҃лѧ:

⁹и҆ ѹ҆разѹмѣ́ютъ всѝ лю́дїе є҆фре́мѡвы и҆ живѹ́щїи въ самарі́и, въ досажде́нїи и҆ высо́цѣмъ се́рдцы глаго́люще:

¹⁰плї҄нѳы падо́ша, но прїиди́те, и҆зсѣче́мъ ка́менїе и҆ посѣче́мъ черни́чїе и҆ ке́дры, и҆ сози́ждемъ себѣ̀ сто́лпъ.

¹¹И҆ разрѹши́тъ бг҃ъ востаю́щыѧ на го́рѹ сїѡ́ню, и҆ врагѝ є҆гѡ̀ разсы́плетъ:

¹²сѷрі́ю ѿ востѡ́къ со́лнца и҆ є҆́ллины ѿ за́пада со́лнца, поѧда́ющыѧ ї҆и҃лѧ всѣ́ми ѹ҆сты҄. Во всѣ́хъ си́хъ не ѿврати́сѧ ѩ҆́рость є҆гѡ̀, но є҆щѐ рѹка̀ є҆гѡ̀ высока̀.

¹³И҆ лю́дїе не ѡ҆брати́шасѧ, до́ндеже ѩ҆́звени бы́ша, и҆ гд҇а не взыска́ша.

¹⁴И҆ ѿѧ́тъ гд҇ь ѿ ї҆и҃лѧ главѹ̀ и҆ ѡ҆́шибъ, вели́ка и҆ ма́ла, во є҆ди́нъ де́нь:

¹⁵ста́рца и҆ чѹдѧ́щихсѧ ли́цамъ, сїѐ нача́ло: и҆ проро́ка ѹ҆ча́ща беззакѡ́ннаѧ, се́й ѡ҆́шибъ.

¹⁶И҆ бѹ́дѹтъ блажа́щїи люді́й си́хъ льстѧ́ше, и҆ льстѧ́тъ, ѩ҆́кѡ да поглотѧ́тъ ѧ҆̀.

¹⁷Сегѡ̀ ра́ди ѡ҆ ю҆́ношахъ и҆́хъ не возвесели́тсѧ гд҇ь, и҆ сиро́тъ и҆́хъ и҆ вдови́цъ и҆́хъ не поми́лѹетъ: ѩ҆́кѡ всѝ беззако́ннїи и҆ лѹка́вїи, и҆ всѧ҄каѧ ѹ҆ста̀ глаго́лютъ непра́вдѹ. Во всѣ́хъ си́хъ не ѿврати́сѧ ѩ҆́рость є҆гѡ̀, но є҆щѐ рѹка̀ є҆гѡ̀ высока̀.

¹⁸И҆ разгори́тсѧ ѩ҆́кѡ ѻ҆́гнь беззако́нїе, и҆ ѩ҆́кѡ тро́скотъ сѹхі́й поѧде́нъ бѹ́детъ ѻ҆гне́мъ, и҆ разгори́тсѧ въ ча́щахъ дѹбра́вныхъ и҆ поѧ́стъ, ѩ҆̀же ѡ҆́крестъ холмѡ́въ всѧ҄.

¹⁹За ѩ҆́рость гнѣ́ва гд҇нѧ сгорѣ̀ всѧ̀ землѧ̀, и҆ бѹ́дѹтъ лю́дїе ѩ҆́кѡ ѻ҆гне́мъ пожже́ни: человѣ́къ бра́та своегѡ̀ не поми́лѹетъ,

²⁰но ѹ҆клони́тсѧ на де́сно, ѩ҆́кѡ вза́лчетъ, и҆ снѣ́сть ѿ шѹ́їихъ, и҆ не насы́титсѧ человѣ́къ ѩ҆ды́й плѡ́ти мы́шцы своеѧ̀: снѣ́сть бо манассі́й є҆фре́мово, и҆ є҆фре́мъ манассі́ино, ѩ҆́кѡ вкѹ́пѣ повою́ютъ ї҆ѹ́дѹ.

²¹Во всѣ́хъ си́хъ не ѿврати́сѧ ѩ҆́рость (є҆гѡ̀), но є҆щѐ рѹка̀ є҆гѡ̀ высока̀.