Read Библия Церковнославянская Леѵі́тъ 11 Bible Online

Леѵі́тъ 11 - Библия Церковнославянская bible

Леѵі́тъ 11

¹И҆ речѐ гд҇ь къ мѡѷсе́ю и҆ а҆арѡ́нѹ, гл҃ѧ:

²рцы́те сынѡ́мъ ї҆и҃лєвымъ, глаго́люще: сі́и ско́ти, и҆̀хже и҆́мате ѩ҆́сти ѿ всѣ́хъ скотѡ́въ, и҆̀же на землѝ:

³всѧ́къ ско́тъ раздвоѧ́ющь копы́то и҆ па́знѡкти и҆мѣ́ющь на дво́е, и҆ ѿрыга́ѧй жва́нїе въ скотѣ́хъ, сїѧ҄ да ѩ҆́сте:

⁴то́кмѡ ѿ си́хъ да не снѣ́сте ѿ ѿрыга́ющихъ жва́нїе и҆ ѿ раздвоѧ́ющихъ кѡпы́та и҆ дѣлѧ́щихъ па́знѡкти: велблю́да, ѩ҆́кѡ се́й и҆зно́ситъ жва́нїе, но па́знѡктей не дѣли́тъ на дво́е, нечи́стъ се́й ва́мъ:

⁵и҆ хїрогрѵ́лѧ, ѩ҆́кѡ и҆зно́ситъ жва́нїе, а҆ па́знѡктей не дѣли́тъ, нечи́стъ се́й ва́мъ:

⁶и҆ за́ѧца, и҆́же ѿрыга́етъ жва́нїе, но па́знѡктей не дѣли́тъ на дво́е, нечи́стъ се́й ва́мъ:

⁷и҆ свинїѝ, ѩ҆́кѡ дѣли́тъ па́знѡкти на дво́е и҆ копы́то раздвоѧ́етъ, но не ѿрыга́етъ жва́нїѧ, нечиста̀ сїѧ̀ ва́мъ:

⁸ѿ мѧ́съ и҆́хъ да не ѩ҆́сте и҆ мертвечи́нѣ и҆́хъ да не прикаса́етесѧ, нечи҄ста сїѧ҄ ва́мъ.

⁹И҆ сїѧ҄ да ѩ҆́сте ѿ всѣ́хъ, ѩ҆̀же въ вода́хъ: всѧ҄, и҆̀мже сѹ́ть пе́рїе и҆ чешѹѧ̀ въ вода́хъ, и҆ въ морѧ́хъ и҆ въ є҆зе́рахъ, сїѧ҄ да ѩ҆́сте:

¹⁰и҆ всѣ҄мъ, и҆̀мже нѣ́сть пе́рїѧ ни чешѹѝ въ вода́хъ, и҆ въ морѧ́хъ и҆ въ є҆зе́рахъ, ѿ всѣ́хъ, ѩ҆̀же и҆зно́сѧтъ во́ды, и҆ всѧ́ка дѹша̀ живѹ́щаѧ въ водѣ̀, скве́рна є҆́сть, и҆ сквє́рна да бѹ́дѹтъ ва́мъ:

¹¹ѿ мѧ́съ и҆́хъ да не ѩ҆ди́те и҆ мертвечи́ны и҆́хъ гнѹша́йтесѧ:

¹²и҆ всѧ҄, и҆̀мже нѣ́сть пе́рїѧ и҆ чешѹѝ, и҆̀же въ вода́хъ, сквє́рна сїѧ҄ сѹ́ть ва́мъ.

¹³И҆ си́хъ гнѹша́йтесѧ ѿ пти́цъ, и҆ да не ѩ҆́сте и҆́хъ, гнѹ́сни сѹ́ть: ѻ҆рла̀ и҆ грѵ́фа и҆ морска́гѡ ѻ҆рла̀,

¹⁴и҆ неѧ́сыти и҆ ї҆кті́на и҆ подо́бныхъ си҄мъ:

¹⁵и҆ стрѹ́ѳа и҆ совы̀, и҆ сѹхола́плѧ и҆ подо́бныхъ и҆̀мъ:

¹⁶и҆ всѧ́кагѡ вра́на и҆ подо́бныхъ є҆мѹ̀: и҆ ѩ҆́стреба и҆ подо́бныхъ є҆мѹ̀:

¹⁷и҆ вра́на нощна́гѡ и҆ лили́ка и҆ ївїна,

¹⁸и҆ порфѷрїѡ́на и҆ пелека́на и҆ ле́бедѧ,

¹⁹и҆ є҆рѡді́а и҆ харадрїо́на и҆ подо́бныхъ є҆мѹ̀: и҆ вдо́да и҆ нощна́гѡ нетопырѧ̀.

²⁰И҆ всѧ҄ га́ды пти҄чїѧ, и҆̀же хо́дѧтъ на четы́рехъ, ме́рзость є҆́сть ва́мъ:

²¹но сїѧ҄ да ѩ҆́сте ѿ всѣ́хъ га҄дъ пти́чныхъ, и҆̀же хо́дѧтъ четверонѡ́жны, и҆̀же и҆́мѹтъ го́лєни вы́ше плеснѹ҄ своє́ю, скака́ти и҆́ми по землѝ:

²²и҆ сїѧ҄ да ѩ҆́сте <font color=grey>{Въ Ѻ҆стро́жской, и҆ съ неѧ̀ печа́танной пре́жде въ москвѣ̀, пред̾ си́мъ сло́вомъ [ѩ҆́сте], приложено̀ [не], но тогѡ̀ во всѣ́хъ гре́ч. не и҆мѣ́етсѧ.}</font> ѿ си́хъ: врѹ́ха и҆ подѡ́бнаѧ є҆мѹ̀, и҆ а҆тта́ка и҆ подѡ́бнаѧ є҆мѹ̀, ѻ҆фїо́маха и҆ є҆́же подо́бно къ немѹ̀, и҆ а҆крі́дѹ и҆ подѡ́бнаѧ є҆́й:

²³и҆ всѧ́къ га́дъ ѿ пти́цъ, и҆̀мже сѹ́ть четы́ри но́ги, ме́рзость є҆́сть ва́мъ, и҆ въ си́хъ да не ѡ҆скверните́сѧ:

²⁴всѧ́къ прикаса́ѧйсѧ мертвечи́нѣ и҆́хъ нечи́стъ бѹ́детъ до ве́чера:

²⁵и҆ всѧ́къ взе́млѧй мертвечи́нѹ и҆́хъ да и҆змы́етъ ри҄зы своѧ҄ и҆ нечи́стъ бѹ́детъ до ве́чера.

²⁶Во всѣ́хъ скотѣ́хъ, и҆́же раздвоѧ́етъ копы́то и҆ па́знѡкти и҆мѣ́етъ, а҆ жва́нїѧ не ѿрыга́етъ, нечи҄ста да бѹ́дѹтъ ва́мъ: всѧ́къ прикаса́ѧйсѧ мертвечи́нѣ и҆́хъ нечи́стъ бѹ́детъ да́же до ве́чера:

²⁷и҆ всѧ́къ и҆́же хо́дитъ на ла́пахъ, во всѣ́хъ ѕвѣре́хъ, и҆̀же хо́дѧтъ на четы́рехъ, нечи҄ста бѹ́дѹтъ ва́мъ: всѧ́къ прикаса́ѧйсѧ мертвечи́нѣ и҆́хъ нечи́стъ бѹ́детъ до ве́чера:

²⁸и҆ взе́млѧй мертвечи́нѹ и҆́хъ да и҆спере́тъ ри҄зы своѧ҄ и҆ нечи́стъ бѹ́детъ до ве́чера: нечи҄ста сїѧ҄ бѹ́дѹтъ ва́мъ.

²⁹И҆ сїѧ҄ ва́мъ нечи҄ста ѿ га҄дъ плѣ́жѹщихъ по землѝ: ла́сица и҆ мы́шъ и҆ крокоди́лъ земны́й,

³⁰мѷга́ли и҆ хамелеѡ́нъ, и҆ халавѡ́тисъ и҆ ѩ҆́щеръ и҆ кроторы́ѧ:

³¹сі́и нечи́сти ва́мъ ѿ всѣ́хъ га҄дъ плѣ́жѹщихъ по землѝ: всѧ́къ прикаса́ѧйсѧ мертвечи́нѣ и҆́хъ нечи́стъ бѹ́детъ до ве́чера.

³²И҆ всѧ́ко, въ не́же а҆́ще впаде́тъ ѿ ни́хъ нѣ́что ѿ мертвечи́ны и҆́хъ, нечи́стъ бѹ́детъ всѧ́къ сосѹ́дъ древѧ́нъ, и҆лѝ ри́за, и҆лѝ ко́жа, и҆лѝ вре́тище: всѧ́кїй сосѹ́дъ, въ не́мже твори́тсѧ дѣ́ло, въ водѣ̀ погрѹзи́тсѧ и҆ нечи́стъ бѹ́детъ до ве́чера, и҆ по си́хъ чи́стъ бѹ́детъ:

³³и҆ всѧ́къ сосѹ́дъ гли́нѧнъ, въ ѻ҆́ньже а҆́ще впаде́тъ ѿ си́хъ внѹ́трь, є҆ли҄ка сѹ́ть въ не́мъ, нечи҄ста бѹ́дѹтъ, и҆ сосѹ́дъ да разбїе́тсѧ.

³⁴И҆ всѧ́ка снѣ́дь ю҆́же ѩ҆́сте, на ню́же а҆́ще возлїе́тсѧ вода̀, нечи́ста бѹ́детъ ва́мъ: и҆ всѧ́кое питїѐ, є҆́же пїе́те во всѧ́комъ сосѹ́дѣ, нечи́сто бѹ́детъ (ва́мъ):

³⁵и҆ всѐ, є҆́же а҆́ще впаде́тъ въ нѐ ѿ мертвечи́ны и҆́хъ, нечи́сто бѹ́детъ: пє́щи и҆ ѻ҆гни҄ща да сокрѹша́тсѧ, нечи҄ста сїѧ҄ сѹ́ть и҆ нечи҄ста бѹ́дѹтъ ва́мъ.

³⁶Кромѣ̀ и҆стѡ́чникъ водны́хъ, и҆ потѡ́къ, и҆ собра́нїй водны́хъ, бѹ́дѹтъ чи́сти: а҆ и҆́же прикаса́етсѧ мертвечи́намъ и҆́хъ, нечи́стъ бѹ́детъ.

³⁷А҆́ще же впаде́тъ ѿ мертвечи́ны и҆́хъ на всѧ́ко сѣ́мѧ сѣ́мѧнное, є҆́же сѣ́етсѧ, чи́сто бѹ́детъ:

³⁸а҆́ще же возлїе́тсѧ вода̀ на всѧ́ко сѣ́мѧ, и҆ впаде́тъ ѿ мертвечи́ны и҆́хъ на нѐ, нечи́сто бѹ́детъ ва́мъ.

³⁹А҆́ще же ѹ҆́мретъ ѿ скота̀, є҆го́же ва́мъ ѩ҆́сти, прикаса́ѧйсѧ мертвечи́нѣ є҆гѡ̀, нечи́стъ бѹ́детъ до ве́чера:

⁴⁰и҆ ѩ҆ды́й ѿ мертвечи́нъ си́хъ да и҆спере́тъ ри҄зы своѧ҄ и҆ нечи́стъ бѹ́детъ до ве́чера: и҆ взе́млѧй мертвечи́нѹ и҆́хъ да и҆змы́етъ ри҄зы своѧ҄ и҆ и҆змы́етсѧ водо́ю, и҆ нечи́стъ бѹ́детъ до ве́чера.

⁴¹И҆ всѧ́къ га́дъ плѣ́жѹщїй по землѝ ме́рзость ва́мъ є҆́сть сїѐ, да не снѣ́стсѧ.

⁴²И҆ всѧ́ко ходѧ́щее на чре́вѣ, и҆ всѧ́ко ходѧ́щее на четы́рехъ всегда̀, и҆ (всѧ́ко) многоно́жное во всѣ́хъ га́дѣхъ, и҆̀же плѣ́жѹтъ по землѝ, да не снѣ́сте є҆̀, ѩ҆́кѡ ме́рзость ва́мъ є҆́сть:

⁴³и҆ да не ѡ҆мерзитѐ дѹ́шъ ва́шихъ во всѣ́хъ га́дѣхъ плѣ́жѹщихъ по землѝ, и҆ да не ѡ҆скверните́сѧ и҆́ми, и҆ да не бѹ́дете нечи́сти въ ни́хъ,

⁴⁴ѩ҆́кѡ а҆́зъ є҆́смь гд҇ь бг҃ъ ва́шъ: и҆ да ѡ҆свѧтите́сѧ и҆ бѹ́дете свѧ́ти, ѩ҆́кѡ ст҃ъ є҆́смь а҆́зъ гд҇ь бг҃ъ ва́шъ: и҆ да не ѡ҆скверни́те дѹ́шъ ва́шихъ во всѣ́хъ га́дѣхъ дви́жѹщихсѧ по землѝ,

⁴⁵ѩ҆́кѡ а҆́зъ є҆́смь гд҇ь, и҆зведы́й ва́съ и҆з̾ землѝ є҆гѵ́петскїѧ, да бѹ́дѹ ва́мъ бг҃ъ, и҆ бѹ́дете свѧ́ти, ѩ҆́кѡ ст҃ъ є҆́смь а҆́зъ гд҇ь.

⁴⁶Се́й зако́нъ ѡ҆ скотѣ́хъ и҆ ѡ҆ пти́цахъ, и҆ всѧ́кой дѹшѝ дви́жѹщейсѧ въ вода́хъ и҆ всѧ́кой дѹшѝ пресмыка́ющейсѧ по землѝ,

⁴⁷разлѹчи́ти междѹ̀ нечи́стыми и҆ междѹ̀ чи́стыми, и҆ наѹчи́ти сы́ны ї҆и҃лєвы междѹ̀ ѡ҆живлѧ́ющими ѩ҆дѡ́маѧ и҆ междѹ̀ ѡ҆живлѧ́ющими не ѩ҆дѡ́маѧ.