Read Библия Церковнославянская Леѵі́тъ 14 Bible Online

Леѵі́тъ 14 - Библия Церковнославянская bible

Леѵі́тъ 14

²се́й зако́нъ прокаже́нномѹ, въ ѻ҆́ньже де́нь а҆́ще ѡ҆чи́ститсѧ, и҆ приведе́тсѧ къ жерцѹ̀:

³и҆ да и҆зы́детъ жре́цъ внѣ̀ полка̀, и҆ ѹ҆́зритъ жре́цъ, и҆ сѐ, и҆сцѣлѣ̀ ѩ҆́зва прокаже́нїѧ ѿ прокаже́ннагѡ:

⁴и҆ повели́тъ жре́цъ, да во́змѹтсѧ ѡ҆чище́нномѹ два̀ пти҄чища жи҄ва чи҄ста и҆ дре́во ке́дрово, и҆ соска́на червлени́ца и҆ ѵ҆ссѡ́пъ:

⁵и҆ повели́тъ жре́цъ, да зако́лютъ пти́чище є҆ди́но въ сосѹ́дъ гли́нѧнъ, над̾ водо́ю живо́ю,

⁶и҆ живо́е пти́чище да во́зметъ, и҆ дре́во ке́дрово и҆ соска́нѹ червлени́цѹ и҆ ѵ҆ссѡ́пъ, и҆ да ѡ҆мо́читъ и҆̀хъ и҆ пти́чище живо́е въ кро́ви закла́нагѡ пти́чища над̾ водо́ю живо́ю:

⁷и҆ да воскропи́тъ на ѡ҆чи́стившагосѧ ѿ прокаже́нїѧ седми́жды, и҆ чи́стъ бѹ́детъ: и҆ да ѿпѹ́ститъ пти́чище живо́е на по́ле:

⁸и҆ да и҆спере́тъ ѡ҆чи́стивыйсѧ ри҄зы своѧ҄ и҆ да ѡ҆стриже́тъ всѧ҄ власы̀ своѧ҄ и҆ да и҆змы́етсѧ водо́ю, и҆ чи́стъ бѹ́детъ: и҆ по си́хъ да вни́детъ въ по́лкъ и҆ да пребѹ́детъ внѣ̀ до́мѹ своегѡ̀ се́дмь дні́й.

⁹И҆ бѹ́детъ въ де́нь седмы́й, ѡ҆брі́ютсѧ всѝ власы̀ є҆гѡ̀, глава̀ є҆гѡ̀ и҆ брада̀ и҆ брѡ́ви, и҆ всѧ́къ вла́съ є҆гѡ̀ да ѡ҆брі́етсѧ: и҆ да и҆змы́етъ ри҄зы своѧ҄, и҆ да ѡ҆мы́етсѧ тѣ́ло є҆гѡ̀ водо́ю, и҆ чи́стъ бѹ́детъ.

¹⁰И҆ въ де́нь ѻ҆смы́й да во́зметъ два̀ а҆́гнца є҆динолѣ҄тна непорѡ́чна и҆ ѻ҆́вцѹ є҆ди́нѹ є҆динолѣ́тнѹ непоро́чнѹ, и҆ трѝ десѧти҄ны мѹкѝ пшени́чны на же́ртвѹ смѣ́шаныѧ съ є҆ле́емъ и҆ мѣ́рѹ є҆ле́а є҆ди́нѹ:

¹¹и҆ да поста́витъ жре́цъ ѡ҆чища́ѧй человѣ́ка ѡ҆чища́емаго и҆ сїѧ҄ пред̾ гд҇емъ, ѹ҆ две́рїй ски́нїи свидѣ́нїѧ:

¹²и҆ во́зметъ жре́цъ а҆́гнца є҆ди́наго и҆ приведе́тъ є҆го̀ престѹпле́нїѧ ра́ди, и҆ ча́шѹ є҆ле́а, и҆ ѿлѹчи́тъ ѧ҆̀ жре́цъ во ѿлѹче́нїе пред̾ гд҇емъ:

¹³и҆ зако́лютъ а҆́гнца на мѣ́стѣ, и҆дѣ́же закала́ютъ всесожжє́нїѧ и҆ ѩ҆̀же грѣха̀ ра́ди, на мѣ́стѣ свѧ́тѣ: є҆́сть бо є҆́же грѣха̀ ра́ди, ѩ҆́коже и҆ престѹпле́нїѧ ра́ди є҆́сть жерцѹ̀: ст҃а҄ѧ ст҃ы́хъ сѹ́ть:

¹⁴и҆ во́зметъ жре́цъ ѿ кро́ве ѩ҆́же престѹпле́нїѧ ра́ди, и҆ возложи́тъ жре́цъ на ѡ҆бѹ́шїе ѹ҆́ха ѡ҆чища́емагѡ десна́гѡ, и҆ на кра́й рѹкѝ є҆гѡ̀ десны́ѧ, и҆ на кра́й ногѝ є҆гѡ̀ десны́ѧ:

¹⁵и҆ взе́мъ жре́цъ ѿ ча́ши є҆ле́а, возлїе́тъ на рѹ́кѹ лѣ́вѹю свою̀:

¹⁶и҆ да ѡ҆мо́читъ жре́цъ пе́рстъ сво́й десны́й въ є҆ле́й, и҆́же є҆́сть въ рѹцѣ̀ є҆гѡ̀ лѣ́вѣй, и҆ да воскропи́тъ ѿ є҆ле́а пе́рстомъ седми́жды пред̾ гд҇емъ:

¹⁷ѡ҆ста́вшїйсѧ же є҆ле́й, и҆́же въ рѹцѣ̀ є҆гѡ̀, да возложи́тъ жре́цъ на ѡ҆бѹ́шїе ѹ҆́ха ѡ҆чища́емагѡ десна́гѡ, и҆ на кра́й рѹкѝ є҆гѡ̀ десны́ѧ, и҆ на кра́й ногѝ є҆гѡ̀ десны́ѧ, на мѣ́сто кро́ве ѩ҆́же престѹпле́нїѧ ра́ди:

¹⁸ѡ҆ста́вшїйсѧ же є҆ле́й, и҆́же въ рѹцѣ̀ жерца̀, да возложи́тъ жре́цъ на главѹ̀ ѡ҆чище́нномѹ: и҆ помо́литсѧ ѡ҆ не́мъ жре́цъ пред̾ гд҇емъ:

¹⁹и҆ сотвори́тъ жре́цъ є҆́же грѣха̀ ра́ди, и҆ помо́литсѧ жре́цъ ѿ ѡ҆чища́ющемсѧ ѿ грѣха̀ своегѡ̀: и҆ по се́мъ зако́летъ жре́цъ всесожже́нїе:

²⁰и҆ вознесе́тъ жре́цъ всесожже́нїе и҆ же́ртвѹ на ѻ҆лта́рь пред̾ гд҇емъ, и҆ помо́литсѧ ѡ҆ не́мъ жре́цъ, и҆ ѡ҆чи́ститсѧ.

²¹А҆́ще же ѹ҆бо́гъ є҆́сть, и҆ рѹка̀ є҆гѡ̀ не дости́гнетъ, да во́зметъ а҆́гнца є҆динолѣ́тнаго є҆ди́наго, въ ѻ҆́ньже престѹпи́лъ на ѿлѹче́нїе, ѩ҆́кѡ помоли́тисѧ ѡ҆ не́мъ, и҆ десѧти́нѹ мѹкѝ пшени́чны смѣ́шаны съ є҆ле́емъ въ же́ртвѹ, и҆ ча́шѹ є҆ле́а є҆ди́нѹ,

²²и҆ два̀ гѡ́рличища, и҆лѝ два̀ птєнца̀ голѹби҄на, є҆ли҄ка ѡ҆брѣ́те рѹка̀ є҆гѡ̀, и҆ да бѹ́детъ є҆ди́нъ грѣха̀ ра́ди, и҆ дрѹгі́й во всесожже́нїе:

²³и҆ да принесе́тъ ѧ҆̀ въ де́нь ѻ҆смы́й, во є҆́же ѡ҆чи́стити є҆го̀, къ жерцѹ̀, пред̾ двє́ри ски́нїи свидѣ́нїѧ пред̾ гд҇а:

²⁴и҆ взе́мъ жре́цъ а҆́гнца и҆́же престѹпле́нїѧ ра́ди, и҆ ча́шѹ є҆ле́а, возложи́тъ ѧ҆̀ возложе́нїе пред̾ гд҇емъ,

²⁵и҆ зако́летъ а҆́гнца и҆́же престѹпле́нїѧ ра́ди, и҆ во́зметъ жре́цъ ѿ кро́ве ѩ҆́же престѹпле́нїѧ ра́ди, и҆ возложи́тъ на ѡ҆бѹ́шїе ѹ҆́ха ѡ҆чища́емагѡ десна́гѡ, и҆ на кра́й рѹкѝ є҆гѡ̀ десны́ѧ, и҆ на кра́й ногѝ є҆гѡ̀ десны́ѧ:

²⁶и҆ ѿ є҆ле́а возлїе́тъ жре́цъ на рѹ́кѹ свою̀ лѣ́вѹю,

²⁷и҆ воскропи́тъ жре́цъ пе́рстомъ свои́мъ десны́мъ ѿ є҆ле́а, и҆́же въ рѹцѣ̀ є҆гѡ̀ лѣ́вѣй, седми́жды пред̾ гд҇емъ:

²⁸и҆ возложи́тъ жре́цъ ѿ є҆ле́а сѹ́щагѡ въ рѹцѣ̀ є҆гѡ̀ на ѡ҆бѹ́шїе ѹ҆́ха ѡ҆чища́емагѡ десна́гѡ, и҆ на кра́й рѹкѝ є҆гѡ̀ десны́ѧ, и҆ на кра́й ногѝ є҆гѡ̀ десны́ѧ, на мѣ́стѣ кро́ве ѩ҆́же престѹпле́нїѧ ра́ди:

²⁹ѡ҆ста́вшеесѧ же ѿ є҆ле́а, є҆́же є҆́сть въ рѹцѣ̀ жерца̀, да возложи́тъ на главѹ̀ ѡ҆чи́стившемѹсѧ: и҆ помо́литсѧ ѡ҆ не́мъ жре́цъ пред̾ гд҇емъ,

³⁰и҆ сотвори́тъ є҆ди́нѹ ѿ го́рлицъ, и҆лѝ ѿ птенцє́въ голѹби́ныхъ, ѩ҆́коже ѡ҆брѣ́те рѹка̀ є҆гѡ̀,

³¹є҆ди́нѹ грѣха̀ ра́ди, и҆ дрѹгѹ́ю во всесожже́нїе съ же́ртвою: и҆ помо́литсѧ жре́цъ ѡ҆ ѡ҆чища́емѣмъ пред̾ гд҇емъ.

³²Се́й зако́нъ въ не́мже є҆́сть ѩ҆́зва прокаже́нїѧ, и҆ не ѡ҆брѣта́ющемѹ рѹко́ю во ѡ҆чище́нїе своѐ.

³³И҆ речѐ гд҇ь къ мѡѷсе́ю и҆ а҆арѡ́нѹ, гл҃ѧ:

³⁴є҆гда̀ вни́дете въ зе́млю ханаа́нскѹ, ю҆́же а҆́зъ даю̀ ва́мъ въ притѧжа́нїе, и҆ да́мъ ѩ҆́звѹ прокаже́нїѧ въ домѣ́хъ землѝ притѧжа́нныѧ ва́мъ:

³⁵и҆ прїи́детъ, є҆гѡ́же до́мъ, и҆ повѣ́сть жерцѹ̀ глаго́лѧ: а҆́ки ѩ҆́зва ѩ҆влѧ́етсѧ въ домѹ̀ мое́мъ.

³⁶И҆ повели́тъ жре́цъ и҆спраздни́ти сосѹ́ды до́мѹ, пре́жде не́же вни́ти жерцѹ̀ ви́дѣти ѩ҆́звѹ, и҆ да не бѹ́дѹтъ нечи҄ста всѧ҄ ѩ҆̀же въ домѹ̀. По си́хъ же вни́детъ жре́цъ соглѧ́дати до́мъ:

³⁷и҆ ѹ҆́зритъ жре́цъ ѩ҆́звѹ, и҆ сѐ, ѩ҆́зва на стѣна́хъ до́мѹ ѹ҆до́лїѧ зеленѣ́ющаѧсѧ и҆лѝ червленѣ́ющаѧсѧ, и҆ ѡ҆бли́чїе и҆́хъ хѹдѣ́е стѣ́нъ:

³⁸и҆зше́дъ жре́цъ и҆з̾ до́мѹ къ две́ремъ до́мѹ, и҆ ѿлѹчи́тъ жре́цъ до́мъ на се́дмь дні́й.

³⁹И҆ возврати́тсѧ жре́цъ въ седмы́й де́нь, и҆ ѹ҆́зритъ до́мъ, и҆ сѐ, разсы́пасѧ ѩ҆́зва по стѣна́мъ до́мѹ:

⁴⁰и҆ повели́тъ жре́цъ, да и҆з̾и́мѹтъ ка́менїе, на ни́хже є҆́сть ѩ҆́зва, и҆ да и҆знесѹ́тъ є҆̀ во́нъ и҆з̾ гра́да на мѣ́сто нечи́сто:

⁴¹и҆ да пострѹ́жѹтъ и҆звнѹтрѝ до́мъ ѡ҆́крестъ, и҆ и҆зсы́плютъ пе́рсть состро́ганѹю внѣ̀ гра́да на мѣ́сто нечи́сто:

⁴²и҆ да во́змѹтъ ка́менїе и҆́но ѡ҆стро́гано, и҆ вло́жатъ ѧ҆̀ вмѣ́стѡ ка́менїѧ: и҆ пе́рсть и҆́нѹ да во́змѹтъ, и҆ пома́жѹтъ до́мъ.

⁴³А҆́ще же па́ки на́йдетъ ѩ҆́зва, и҆ ѩ҆ви́тсѧ въ домѹ̀ по и҆знесе́нїи ка́менїѧ и҆ по ѡ҆строга́нїи до́мѹ и҆ по пома́занїи,

⁴⁴и҆ вни́детъ жре́цъ, и҆ ѹ҆́зритъ: а҆́ще разсы́пасѧ ѩ҆́зва въ домѹ̀, прокаже́нїе пребыва́ющее є҆́сть въ домѹ̀, нечи́стъ є҆́сть:

⁴⁵и҆ разорѧ́тъ до́мъ, и҆ древа̀ є҆гѡ̀ и҆ ка́менїе є҆гѡ̀ и҆ всю̀ пе́рсть до́мѹ и҆знесѹ́тъ внѣ̀ гра́да, на мѣ́сто нечи́сто.

⁴⁶И҆ входѧ́й въ до́мъ всѧ҄ дни҄, въ нѧ́же є҆́сть ѿлѹче́нъ, нечи́стъ бѹ́детъ до ве́чера:

⁴⁷и҆ спѧ́й въ домѹ̀ да и҆спере́тъ ри҄зы своѧ҄ и҆ нечи́стъ бѹ́детъ до ве́чера: и҆ ѩ҆ды́й въ домѹ̀ да и҆спере́тъ ри҄зы своѧ҄ и҆ нечи́стъ бѹ́детъ до ве́чера.

⁴⁸А҆́ще же прише́дый вни́детъ жре́цъ, и҆ ѹ҆ви́дитъ: и҆ сѐ, разсы́панїемъ не разсы́пасѧ ѩ҆́зва въ домѹ̀ но пома́занїи до́мѹ, да ѡ҆чи́ститъ жре́цъ до́мъ, ѩ҆́кѡ и҆сцѣлѣ̀ ѩ҆́зва:

⁴⁹и҆ во́зметъ ѡ҆чи́стити до́мъ, два̀ пти҄чища жи҄ва чи҄ста и҆ дре́во ке́дрово, и҆ соска́нѹ червлени́цѹ и҆ ѵ҆ссѡ́пъ:

⁵⁰и҆ да зако́летъ пти́чище є҆ди́но въ сосѹ́дъ гли́нѧнъ над̾ водо́ю живо́ю:

⁵¹и҆ во́зметъ дре́во ке́дрово и҆ соска́нїе червле́ное, и҆ ѵ҆ссѡ́пъ и҆ пти́чище живо́е, и҆ да ѡ҆мо́читъ є҆̀ въ кро́вь пти́чища закла́нагѡ над̾ водо́ю живо́ю, и҆ да ѡ҆кропи́тъ и҆́ми въ домѹ̀ седми́жды:

⁵²и҆ ѡ҆чи́ститъ до́мъ кро́вїю пти́чищною и҆ водо́ю живо́ю, и҆ пти́чищемъ живы́мъ и҆ дре́вомъ ке́дровымъ, и҆ ѵ҆ссѡ́помъ и҆ соска́ною червлени́цею:

⁵³и҆ да ѿпѹ́ститъ пти́чище живо́е внѣ̀ гра́да на по́ле и҆ помо́литсѧ ѡ҆ до́мѣ, и҆ чи́стъ бѹ́детъ.

⁵⁴Се́й зако́нъ ѡ҆ всѧ́кой ѩ҆́звѣ прокаже́нїѧ и҆ вре́да,

⁵⁵и҆ прокаже́нїѧ ри́зы и҆ до́мѹ,

⁵⁶и҆ стрѹ́па, и҆ зна́менїѧ, и҆ блеща́щагѡсѧ,

⁵⁷и҆ повѣ́дати въ ѻ҆́ньже де́нь нечи́сто, и҆ въ ѻ҆́ньже де́нь ѡ҆чи́ститсѧ: се́й зако́нъ прокаже́нїѧ.