Read Библия Церковнославянская Леѵі́тъ 15 Bible Online

Леѵі́тъ 15 - Библия Церковнославянская bible

Леѵі́тъ 15

¹И҆ речѐ гд҇ь къ мѡѷсе́ю и҆ а҆арѡ́нѹ, гл҃ѧ:

²глаго́ли сынѡ́мъ ї҆и҃лєвымъ и҆ рече́ши къ ни҄мъ: мѹ́жѹ, мѹ́жѹ, є҆мѹ́же а҆́ще бѹ́детъ и҆злїѧ́нїе ѿ тѣ́ла є҆гѡ̀, и҆злїѧ́нїе є҆гѡ̀ нечи́сто є҆́сть.

³И҆ се́й зако́нъ нечистоты̀ є҆гѡ̀: и҆злива́ѧй сѣ́мѧ и҆з̾ тѣ́ла своегѡ̀, ѿ и҆злїѧ́нїѧ, и҆́мже соста́влено є҆́сть тѣ́ло є҆гѡ̀ и҆злїѧ́нїемъ, сїѧ̀ нечистота̀ є҆гѡ̀ въ не́мъ: всѧ҄ дни҄ и҆злїѧ́нїѧ тѣ́ла є҆гѡ̀, и҆́мже соста́влено тѣ́ло є҆гѡ̀ и҆злїѧ́нїемъ є҆гѡ̀, нечистота̀ є҆гѡ̀ є҆́сть:

⁴всѧ́ко ло́же, на не́мже а҆́ще лѧ́жетъ и҆злива́ѧй сѣ́мѧ, нечи́сто є҆́сть: и҆ всѧ́къ сосѹ́дъ, на не́мже а҆́ще сѧ́детъ верхѹ̀ є҆гѡ̀ и҆злива́ѧй сѣ́мѧ, нечи́стъ бѹ́детъ:

⁵и҆ человѣ́къ, и҆́же а҆́ще прико́снетсѧ ло́жа є҆гѡ̀, да и҆спере́тъ ри҄зы своѧ҄ и҆ да ѡ҆мы́етъ тѣ́ло своѐ водо́ю, и҆ нечи́стъ бѹ́детъ до ве́чера:

⁶и҆ сѣдѧ́й на сосѹ́дѣ, на не́мже а҆́ще сѧ́детъ верхѹ̀ є҆гѡ̀ и҆злива́ѧй сѣ́мѧ, да и҆спере́тъ ри҄зы своѧ҄ и҆ да ѡ҆мы́етсѧ водо́ю, и҆ нечи́стъ бѹ́детъ до ве́чера:

⁷и҆ прикоснѹ́выйсѧ къ пло́ти и҆злива́ющагѡ сѣ́мѧ да и҆спере́тъ ри҄зы своѧ҄ и҆ да ѡ҆мы́етсѧ водо́ю, и҆ нечи́стъ бѹ́детъ до ве́чера.

⁸А҆́ще же плю́нетъ и҆злива́ѧй сѣ́мѧ на чи́стаго, да и҆спере́тъ ри҄зы своѧ҄ и҆ да и҆змы́етсѧ водо́ю, и҆ нечи́стъ бѹ́детъ до ве́чера:

⁹и҆ всѧ́ко сѣдло̀ ѻ҆́слее, на не́же а҆́ще всѧ́детъ верхѹ̀ є҆гѡ̀ и҆злива́ѧй сѣ́мѧ, нечи́сто бѹ́детъ до ве́чера:

¹⁰и҆ всѧ́къ прикоснѹ́выйсѧ всѣ҄мъ, ѩ҆̀же сѹ́ть под̾ ни́мъ, нечи́стъ бѹ́детъ до ве́чера: и҆ взе́млѧй ѧ҆̀ да и҆спере́тъ ри҄зы своѧ҄ и҆ ѡ҆мы́етсѧ водо́ю, и҆ нечи́стъ бѹ́детъ до ве́чера:

¹¹и҆ є҆ли҄кимъ а҆́ще ко́снетсѧ и҆злива́ѧй сѣ́мѧ и҆ рѹ́къ свои́хъ не ѡ҆мы́етъ водо́ю, да и҆спере́тъ ри҄зы своѧ҄ и҆ ѡ҆мы́етъ тѣ́ло водо́ю, и҆ нечи́стъ бѹ́детъ до ве́чера:

¹²и҆ сосѹ́дъ гли́нѧнъ, є҆мѹ́же а҆́ще прико́снетсѧ и҆злива́ѧй сѣ́мѧ, да разбїе́тсѧ: а҆ сосѹ́дъ древѧ́ный да и҆змы́етсѧ водо́ю, и҆ чи́стъ бѹ́детъ.

¹³А҆́ще же ѡ҆чи́ститсѧ и҆злива́ѧй сѣ́мѧ ѿ и҆злїѧ́нїѧ своегѡ̀, и҆ и҆счи́слитъ себѣ̀ се́дмь дні́й на ѡ҆чище́нїе своѐ, и҆ и҆спере́тъ ри҄зы своѧ҄ и҆ ѡ҆мы́етъ тѣ́ло своѐ водо́ю живо́ю, и҆ чи́стъ бѹ́детъ:

¹⁴и҆ въ де́нь ѻ҆смы́й да во́зметъ себѣ̀ два̀ гѡ́рличища и҆лѝ два̀ птєнца̀ голѹби҄на, и҆ да принесе́тъ ѧ҆̀ пред̾ гд҇а къ две́ремъ ски́нїи свидѣ́нїѧ, и҆ да́стъ ѧ҆̀ жерцѹ̀:

¹⁵и҆ сотвори́тъ ѧ҆̀ жре́цъ є҆ди́нъ грѣха̀ ра́ди, и҆ дрѹгі́й во всесожже́нїе: и҆ да помо́литсѧ ѡ҆ не́мъ жре́цъ пред̾ гд҇емъ ѡ҆ и҆злїѧ́нїи є҆гѡ̀.

¹⁶И҆ человѣ́къ, є҆мѹ́же а҆́ще и҆зы́детъ ѿ ло́жа є҆гѡ̀ сѣ́мѧ, и҆ да ѡ҆мы́етъ водо́ю всѐ тѣ́ло своѐ, и҆ нечи́стъ бѹ́детъ до ве́чера:

¹⁷и҆ всѧ́ка ри́за и҆ всѧ́ка ко́жа, на не́йже а҆́ще бѹ́детъ ло́же сѣ́менное, да и҆змы́етсѧ водо́ю, и҆ нечиста̀ бѹ́детъ до ве́чера.

¹⁸И҆ а҆́ще лѧ́жетъ мѹ́жъ съ жено́ю свое́ю на ло́жи сѣ́мене, да и҆змы́ютсѧ водо́ю, и҆ нечи҄сты бѹ́дѹтъ до ве́чера.

¹⁹И҆ жена̀ ѩ҆́же а҆́ще бѹ́детъ кро́вь точа́щи, и҆ бѹ́детъ тече́нїе є҆ѧ̀ въ тѣлесѝ є҆ѧ̀, се́дмь дні́й да бѹ́детъ въ скве́рнѣ свое́й: и҆ всѧ́къ прикаса́ѧйсѧ є҆́й нечи́стъ бѹ́детъ до ве́чера:

²⁰и҆ всѐ, на не́мже а҆́ще сѣди́тъ въ тече́нїи свое́мъ, нечи́сто бѹ́детъ, и҆ всѧ́ко, на не́же а҆́ще присѧ́детъ (ѻ҆на̀), нечи́сто бѹ́детъ:

²¹и҆ всѧ́къ, и҆́же а҆́ще прико́снетсѧ ло́жа є҆ѧ̀, да и҆спере́тъ ри҄зы своѧ҄ и҆ да и҆змы́етъ водо́ю тѣ́ло своѐ, и҆ нечи́стъ бѹ́детъ до ве́чера:

²²и҆ всѧ́къ прикаса́ѧйсѧ всѧ́комѹ сосѹ́дѹ, на не́мже а҆́ще сѧ́детъ, да и҆спере́тъ ри҄зы своѧ҄ и҆ да и҆змы́етсѧ водо́ю, и҆ нечи́стъ бѹ́детъ до ве́чера:

²³а҆́ще же на ло́жи є҆́й сѹ́щей, и҆лѝ на сосѹ́дѣ, на не́мже а҆́ще сѧ́детъ (ѻ҆на̀), є҆гда̀ прико́снетсѧ кто̀ є҆́й, нечи́стъ бѹ́детъ до ве́чера.

²⁴А҆́ще же кто̀ бѹ́детъ на ло́жи съ не́ю, и҆ бѹ́детъ нечистота̀ є҆ѧ̀ на не́мъ, нечи́стъ бѹ́детъ се́дмь дні́й: и҆ всѧ́ко ло́же, на не́мже а҆́ще лѧ́жетъ, нечи́сто бѹ́детъ.

²⁵И҆ жена̀ а҆́ще то́читъ тече́нїе кро́ве дни҄ мнѡ́ги, не во вре́мѧ скве́рны є҆ѧ̀, а҆́ще и҆ тече́тъ по ѡ҆скверне́нїи є҆ѧ̀, всѧ҄ дни҄ тече́нїѧ нечистоты̀ є҆ѧ̀, ѩ҆́коже дни҄ скве́рны є҆ѧ̀, нечиста̀ бѹ́детъ:

²⁶и҆ всѧ́ко ло́же, на не́мже а҆́ще лѧ́жетъ всѧ҄ дни҄ тече́нїѧ є҆ѧ̀, по ло́жи скве́рны є҆ѧ̀ бѹ́детъ є҆́й: и҆ всѧ́къ сосѹ́дъ, на не́мже а҆́ще сѧ́детъ, нечи́стъ бѹ́детъ по нечистотѣ̀ скве́рны є҆ѧ̀:

²⁷и҆ всѧ́къ прикаса́ѧйсѧ є҆́й нечи́стъ бѹ́детъ, да и҆спере́тъ ри҄зы своѧ҄ и҆ ѡ҆мы́етъ водо́ю тѣ́ло своѐ, и҆ нечи́стъ бѹ́детъ до ве́чера.

²⁸А҆́ще же ѡ҆чи́ститсѧ ѿ тече́нїѧ своегѡ̀, да сочте́тъ себѣ̀ се́дмь дні́й, и҆ по си́хъ чиста̀ бѹ́детъ:

²⁹и҆ во ѻ҆смы́й де́нь да во́зметъ себѣ̀ два̀ гѡ́рличища и҆лѝ два̀ птєнца̀ голѹби҄на, и҆ принесе́тъ ѧ҆̀ къ жерцѹ̀ къ две́ремъ ски́нїи свидѣ́нїѧ,

³⁰и҆ да сотвори́тъ жре́цъ, є҆ди́нъ грѣха̀ ра́ди и҆ дрѹгі́й во всесожже́нїе, и҆ да помо́литсѧ ѡ҆ не́й жре́цъ пред̾ гд҇емъ ѡ҆ тече́нїи нечистоты̀ є҆ѧ̀.

³¹И҆ благоговѣ҄йны сотвори́те сы́ны ї҆и҃лєвы ѿ нечисто́тъ и҆́хъ: и҆ да не ѹ҆́мрѹтъ нечистоты̀ ра́ди своеѧ̀, внегда̀ ѡ҆скверни́ти и҆̀мъ ски́нїю мою̀ ѩ҆́же въ ни́хъ.

³²Се́й зако́нъ и҆злива́ющемѹ сѣ́мѧ, и҆ а҆́ще комѹ̀ и҆зы́детъ и҆з̾ негѡ̀ ло́же сѣ́менное, ѩ҆́коже ѡ҆скверни́тисѧ въ не́мъ,

³³и҆ точа́щей кро́вь въ скве́рнѣ свое́й, и҆ и҆злива́ющемѹ сѣ́мѧ во и҆злїѧ́нїи свое́мъ мѹ́жескѹ по́лѹ и҆лѝ же́нскѹ, и҆ мѹ́жѹ, и҆́же а҆́ще поспи́тъ со скверна́вою.