Read Библия Церковнославянская Леѵі́тъ 19 Bible Online

Леѵі́тъ 19 - Библия Церковнославянская bible

Леѵі́тъ 19

¹И҆ речѐ гд҇ь къ мѡѷсе́ю, гл҃ѧ:

²глаго́ли всемѹ̀ со́нмѹ сынѡ́въ ї҆и҃левыхъ, и҆ рече́ши къ ни҄мъ: свѧ́ти бѹ́дите, ѩ҆́кѡ а҆́зъ ст҃ъ (є҆́смь) гд҇ь бг҃ъ ва́шъ.

³Кі́йждо ѻ҆тца̀ своегѡ̀ и҆ ма́тере своеѧ̀ да бои́тсѧ, и҆ сѹббѡ҄ты моѧ҄ сохрани́те: а҆́зъ гд҇ь бг҃ъ ва́шъ.

⁴Не послѣ́дѹйте їдѡлѡмъ, и҆ богѡ́въ слїѧ́ныхъ не сотвори́те себѣ̀: а҆́зъ гд҇ь бг҃ъ ва́шъ.

⁵И҆ а҆́ще пожретѐ же́ртвѹ сп҇нїѧ гд҇ѹ, прїѧ́тнѹ ва́мъ пожри́те:

⁶въ ѻ҆́ньже де́нь а҆́ще пожретѐ, (въ то́й де́нь) да снѣ́стсѧ, и҆ на ѹ҆́трїе: и҆ а҆́ще ѡ҆ста́нетсѧ до тре́тїѧгѡ днѐ, на ѻ҆гнѝ да сожже́тсѧ:

⁷а҆́ще же ли ѩ҆де́нїемъ с̾ѧ́стсѧ въ де́нь тре́тїй, не же́ртвенно є҆́сть, не прїи́метсѧ:

⁸и҆ и҆́же ѩ҆́стъ є҆̀, грѣ́хъ прїи́метъ, ѩ҆́кѡ ст҃а҄ѧ гд҇нѧ ѡ҆сквернѝ: и҆ потребѧ́тсѧ дѹ́шы ѩ҆дѹ́щыѧ ѿ люді́й свои́хъ.

⁹И҆ пожина́ющымъ ва́мъ жа́твѹ землѝ ва́шеѧ, да не сконча́ете жа́твы ва́шеѧ, ни́вы твоеѧ̀ пожина́нїѧ: и҆ па́дающихъ кла҄съ ѿ жа́твы твоеѧ̀ да не собере́ши:

¹⁰и҆ вїногра́да твоегѡ̀ втори́цею да не ѡ҆бере́ши, нижѐ грє́знъ вїногра́да твоегѡ̀ да собере́ши: ни́щемѹ и҆ прише́лцѹ да ѡ҆ста́виши ѧ҆̀: а҆́зъ є҆́смь гд҇ь бг҃ъ ва́шъ.

¹¹Не ѹ҆кра́дите, ни солжи́те, нижѐ да ѡ҆клевета́етъ кі́йждо бли́жнѧго.

¹²И҆ не клени́тесѧ и҆́менемъ мои́мъ въ непра́вдѣ, и҆ да не ѡ҆сквернитѐ и҆́мене ст҃а́гѡ бг҃а ва́шегѡ: а҆́зъ гд҇ь бг҃ъ ва́шъ.

¹³Да не ѡ҆би́диши бли́жнѧгѡ: и҆ да не ѿи́меши, и҆ да не прележи́тъ мзда̀ нае́мника твоегѡ̀ ѹ҆ тебє̀ до ѹ҆́трїѧ.

¹⁴Ѕла̀ да не рече́ши глѹхо́мѹ, и҆ пред̾ слѣпы́мъ да не положи́ши претыка́нїѧ: и҆ да ѹ҆бои́шисѧ гд҇а бг҃а твоегѡ̀: а҆́зъ гд҇ь бг҃ъ ва́шъ.

¹⁵Не сотвори́те непра́вды въ сѹдѣ̀: да не прїи́меши лица̀ ни́щагѡ, нижѐ почѹди́шисѧ лицѹ̀ могѹ́щагѡ: по пра́вдѣ да сѹ́диши бли́жнемѹ твоемѹ̀.

¹⁶Да не хо́диши ле́стїю во свое́мъ ѩ҆зы́цѣ, и҆ не воста́неши на кро́вь бли́жнѧгѡ твоегѡ̀: а҆́зъ гд҇ь бг҃ъ ва́шъ.

¹⁷Да не возненави́диши бра́та твоегѡ̀ во ѹ҆мѣ̀ твое́мъ, ѡ҆бличе́нїемъ да ѡ҆бличи́ши бли́жнѧго твоего̀: и҆ не прїи́меши ра́ди є҆гѡ̀ грѣха̀.

¹⁸И҆ да не ѿмща́етъ рѹка̀ твоѧ̀, и҆ да не враждѹ́еши на сы́ны люді́й свои́хъ, и҆ возлю́биши бли́жнѧго своего̀ ѩ҆́кѡ са́мъ себѐ: а҆́зъ гд҇ь бг҃ъ ва́шъ.

¹⁹Зако́нъ мо́й сохрани́те: и҆ скота̀ твоегѡ̀ да не смѣси́ши со ското́мъ и҆на́гѡ ро́да, и҆ вїногра́да твоегѡ̀ да не насади́ши разли́чна: и҆ ри́зы и҆з̾ двѹ́хъ (веще́й) сотка́ныѧ гнѹ́сныѧ да не возложи́ши на сѧ̀.

²⁰И҆ а҆́ще кто̀ бѹ́детъ съ жено́ю ло́жемъ сѣ́мене, и҆ сїѧ̀ бѧ́ше раба̀ храни́ма мѹ́жѹ, и҆ цѣно́ю не и҆скѹплена̀ и҆лѝ свобо́да не дана̀ є҆́й, нака҄заны да бѹ́дѹтъ: не ѹ҆́мрѹтъ, ѩ҆́кѡ не свободи́сѧ:

²¹и҆ да приведе́тъ за престѹпле́нїе своѐ гд҇ѹ къ две́ремъ ски́нїи свидѣ́нїѧ ѻ҆вна̀ престѹпле́нїѧ,

²²и҆ да помо́литсѧ ѡ҆ не́мъ жре́цъ ѻ҆вно́мъ престѹпле́нїѧ пред̾ гд҇емъ ѡ҆ грѣсѣ̀ и҆́мже согрѣшѝ, и҆ ѡ҆ста́витсѧ є҆мѹ̀ грѣ́хъ, є҆го́же сотворѝ.

²³Є҆гда́ же вни́дете въ зе́млю, ю҆́же гд҇ь бг҃ъ ва́шъ дае́тъ ва́мъ, и҆ насади́те всѧ́ко дре́во снѣ́дное, и҆ ѡ҆чи́стите нечистотѹ̀ є҆гѡ̀, пло́дъ є҆гѡ̀ трѝ лѣ҄та нечи́стъ да бѹ́детъ ва́мъ, да не снѣ́стсѧ:

²⁴въ лѣ́то же четве́ртое бѹ́детъ всѧ́къ пло́дъ є҆гѡ̀ ст҃ъ, похва́ленъ гд҇ѹ:

²⁵въ лѣ́то же пѧ́тое да снѣ́сте пло́дъ є҆гѡ̀, прибы́токъ ва́мъ плоды̀ є҆гѡ̀: а҆́зъ гд҇ь бг҃ъ ва́шъ.

²⁶Не ѩ҆ди́те на гора́хъ, и҆ не вражи́те, и҆ ни срѧ́ща смотри́те ѿ пти́цъ.

²⁷Не сотвори́те ѡ҆бстриже́нїѧ крѹго́мъ ѿ вла҄съ гла́въ ва́шихъ, нижѐ брі́ете бра́дъ ва́шихъ.

²⁸И҆ крое́нїѧ не сотвори́те на тѣ́лѣ ва́шемъ ѡ҆ дѹшѝ: и҆ ѩ҆́звъ настрека́нныхъ да не сотворитѐ въ ва́съ: а҆́зъ гд҇ь бг҃ъ ва́шъ.

²⁹Да не ѡ҆скверни́ши дще́ре твоеѧ̀ є҆́же блѹди́ти є҆́й: и҆ да не прелюбы̀ дѣ́етъ землѧ̀, и҆ напо́лнитсѧ землѧ̀ беззако́нїй.

³⁰Сѹббѡ҄ты моѧ҄ сохрани́те, и҆ ѿ ст҃ы́хъ мои́хъ ѹ҆бо́йтесѧ: а҆́зъ гд҇ь.

³¹Не послѣ́дѹйте ѹ҆трѡ́бнымъ ба́снемъ, и҆ къ волхвѡ́мъ не прилѣпи́тесѧ, ѡ҆скверни́тисѧ въ ни́хъ: а҆́зъ гд҇ь бг҃ъ ва́шъ.

³²Пред̾ лице́мъ сѣда́гѡ воста́ни и҆ почтѝ лицѐ ста́рчо, и҆ да ѹ҆бои́шисѧ гд҇а бг҃а твоегѡ̀: а҆́зъ гд҇ь бг҃ъ ва́шъ.

³³А҆́ще же кто̀ прїи́детъ къ ва́мъ пришле́цъ въ зе́млю ва́шѹ, не стѹжи́те є҆мѹ̀:

³⁴ѩ҆́коже тѹзе́мецъ бѹ́детъ въ ва́съ пришле́цъ, и҆́же прїи́детъ къ ва́мъ, и҆ возлю́биши є҆го̀ ѩ҆́кѡ са́мъ себѐ: ѩ҆́кѡ (и҆ вы̀) прише́лцы бѣ́сте въ землѝ є҆гѵ́петстѣй: а҆́зъ гд҇ь бг҃ъ ва́шъ.

³⁵Не сотвори́те непра́вды въ сѹдѣ̀, въ мѣ́рахъ и҆ въ вѣ́сахъ и҆ въ мѣ́рилѣхъ:

³⁶мѣ҄рила пра́вєдна и҆ вѣ́сы пра́вєдны и҆ мѣ́ра пра́ведна да бѹ́детъ въ ва́съ: а҆́зъ є҆́смь гд҇ь бг҃ъ ва́шъ, и҆зведы́й ва́съ ѿ землѝ є҆гѵ́петскїѧ.

³⁷И҆ сохрани́те ве́сь зако́нъ мо́й и҆ всѧ҄ повелѣ҄нїѧ моѧ҄, и҆ сотвори́те ѧ҆̀: а҆́зъ гд҇ь бг҃ъ ва́шъ.