Read Библия Церковнославянская Леѵі́тъ 20 Bible Online

Леѵі́тъ 20 - Библия Церковнославянская bible

Леѵі́тъ 20

¹И҆ речѐ гд҇ь къ мѡѷсе́ю, гл҃ѧ:

²рцы̀ сынѡ́мъ ї҆и҃лєвымъ, глаго́лѧ: а҆́ще кто̀ ѿ сынѡ́въ ї҆и҃левыхъ, и҆лѝ ѿ прибы́вшихъ прише́лцєвъ во ї҆и҃ли, и҆́же а҆́ще да́стъ ѿ сѣ́мене своегѡ̀ моло́хѹ, сме́ртїю да ѹ҆́мретъ: лю́дїе землѝ да побїю́тъ є҆го̀ ка́менїемъ:

³и҆ а҆́зъ ѹ҆твержѹ̀ лицѐ моѐ на человѣ́ка того̀ и҆ погѹблю̀ є҆го̀ ѿ люді́й є҆гѡ̀, ѩ҆́кѡ ѿ сѣ́мене своегѡ̀ дадѐ моло́хѹ, да ѡ҆скверни́тъ ст҃ы́ню мою̀ и҆ ѡ҆скверни́тъ и҆́мѧ ѡ҆сщ҃е́нныхъ мнѣ̀.

⁴А҆́ще же презрѣ́нїемъ пре́зрѧтъ тѹзе́мцы землѝ ѻ҆чи́ма свои́ма ѿ человѣ́ка тогѡ̀, внегда̀ да́ти є҆мѹ̀ ѿ сѣ́мене своегѡ̀ моло́хѹ, є҆́же не ѹ҆би́ти є҆го̀:

⁵и҆ ѹ҆твержѹ̀ лицѐ моѐ на человѣ́ка того̀ и҆ на сро́дники є҆гѡ̀, и҆ погѹблю̀ є҆го̀ и҆ всѣ́хъ є҆диномы́слѧщихъ съ ни́мъ, є҆́же соблѹжда́ти є҆мѹ̀ со їдѡлы ѿ люді́й свои́хъ.

⁶И҆ дѹша̀ ѩ҆́же а҆́ще послѣ́дѹетъ ѹ҆трѡ́бнымъ ба́снемъ и҆лѝ волхвѡ́мъ, ѩ҆́кѡ соблѹди́ти в̾слѣ́дъ и҆́хъ, ѹ҆твержѹ̀ лицѐ моѐ на дѹ́шѹ тѹ̀ и҆ погѹблю̀ ю҆̀ ѿ люді́й є҆ѧ̀.

⁷И҆ бѹ́дете свѧ́ти, ѩ҆́кѡ а҆́зъ ст҃ъ гд҇ь бг҃ъ ва́шъ.

⁸И҆ сохрани́те повелѣ҄нїѧ моѧ҄ и҆ сотвори́те ѧ҆̀: а҆́зъ гд҇ь ѡ҆сщ҃а́ѧй ва́съ.

⁹Человѣ́къ человѣ́къ, и҆́же а҆́ще ѕло̀ рече́тъ ѻ҆тцѹ̀ своемѹ̀ и҆лѝ ма́тери свое́й, сме́ртїю да ѹ҆́мретъ: ѻ҆тцѹ̀ своемѹ̀ и҆лѝ ма́тери свое́й ѕлѣ̀ речѐ, пови́ненъ бѹ́детъ.

¹⁰Человѣ́къ человѣ́къ, и҆́же а҆́ще прелюбы̀ содѣ́етъ съ мѹ́жнею жено́ю, и҆лѝ кто̀ прелюбы̀ содѣ́етъ съ жено́ю бли́жнѧгѡ своегѡ̀, сме́ртїю да ѹ҆́мрѹтъ прелюбодѣ́й и҆ прелюбодѣ́йца.

¹¹И҆ и҆́же а҆́ще пребѹ́детъ съ жено́ю ѻ҆тца̀ своегѡ̀, срамотѹ̀ ѻ҆тца̀ своегѡ̀ ѿкры́лъ є҆́сть, сме́ртїю да ѹ҆́мрѹтъ ѻ҆́ба, пови́нни сѹ́ть.

¹²И҆ а҆́ще кто̀ бѹ́детъ съ невѣ́сткою свое́ю, сме́ртїю да ѹ҆́мрѹтъ ѻ҆́ба, нече́ствоваша бо, пови́нни сѹ́ть.

¹³И҆ а҆́ще кто̀ бѹ́детъ съ мѹ́жескимъ по́ломъ ло́жемъ же́нскимъ, гнѹ́сность сотвори́ша ѻ҆́ба, сме́ртїю да ѹ҆́мрѹтъ, пови́нни сѹ́ть:

¹⁴и҆́же а҆́ще по́йметъ женѹ̀ и҆ ма́терь є҆ѧ̀, беззако́нїе є҆́сть, ѻ҆гне́мъ да сожгѹ́тъ є҆го̀ и҆ ѡ҆́ныѧ, и҆ не бѹ́детъ беззако́нїе въ ва́съ.

¹⁵И҆ и҆́же а҆́ще да́стъ ло́же своѐ четвероно́жномѹ, сме́ртїю да ѹ҆́мретъ, четвероно́жное же ѹ҆бїе́те.

¹⁶И҆ жена̀ ѩ҆́же а҆́ще пристѹ́питъ ко всѧ́комѹ скотѹ̀, є҆́же бы́ти съ ни́мъ, да ѹ҆бїе́те женѹ̀ и҆ ско́тъ, сме́ртїю да ѹ҆́мрѹтъ, пови́нни сѹ́ть.

¹⁷И҆́же а҆́ще по́йметъ сестрѹ̀ свою̀ ѿ ѻ҆тца̀ своегѡ̀ и҆лѝ ѿ ма́тере своеѧ̀, и҆ ѹ҆ви́дитъ срамотѹ̀ є҆ѧ̀, и҆ ѻ҆на̀ ѹ҆ви́дитъ срамотѹ̀ є҆гѡ̀, ѹ҆кори́зна є҆́сть, да потребѧ́тсѧ пред̾ сы҄ны ро́да и҆́хъ: срамотѹ̀ сестры̀ своеѧ̀ ѿкры̀, грѣ́хъ прїи́мѹтъ.

¹⁸И҆ мѹ́жъ и҆́же бѹ́детъ съ жено́ю скверна́вою и҆ ѿкры́етъ срамотѹ̀ є҆ѧ̀, тече́нїе є҆ѧ̀ ѿкры̀, и҆ ѻ҆на̀ ѿкры̀ тече́нїе кро́ве своеѧ̀, да потребѧ́тсѧ ѻ҆́ба ѿ ро́да и҆́хъ.

¹⁹И҆ срамотѹ̀ сестры̀ ѻ҆тца̀ твоегѡ̀ и҆ сестры̀ ма́тере твоеѧ̀ да не ѿкры́еши: ѹ҆́жичество бо ѿкры̀, грѣ́хъ понесѹ́тъ.

²⁰И҆́же а҆́ще бѹ́детъ со сро́дницею свое́ю, срамотѹ̀ сродства̀ своегѡ̀ ѿкры̀, безча́дни и҆́змрѹтъ.

²¹И҆ человѣ́къ и҆́же а҆́ще по́йметъ женѹ̀ бра́та своегѡ̀, нечистота̀ є҆́сть: срамотѹ̀ бра́та своегѡ̀ ѿкры́лъ є҆́сть, безча́дни и҆́змрѹтъ.

²²И҆ сохрани́те всѧ҄ повелѣ҄нїѧ моѧ҄ и҆ всѧ҄ сѹдбы҄ моѧ҄ и҆ сотвори́те ѧ҆̀, и҆ не вознегодѹ́етъ на ва́съ землѧ̀, въ ню́же а҆́зъ введѹ́ вы та́мѡ всели́тисѧ на не́й.

²³И҆ не ходи́те въ зако́ны ѩ҆зы́чєскїѧ, и҆̀хже а҆́зъ и҆згоню̀ ѿ ва́съ: ѩ҆́кѡ сїѧ҄ всѧ҄ сотвори́ша, и҆ возгнѹша́хсѧ и҆́ми.

²⁴И҆ рѣ́хъ къ ва́мъ: вы̀ наслѣ́дите зе́млю и҆́хъ, и҆ а҆́зъ да́мъ ва́мъ ю҆̀ въ притѧжа́нїе, зе́млю текѹ́щѹю ме́домъ и҆ млеко́мъ, а҆́зъ гд҇ь бг҃ъ ва́шъ, ѿлѹчи́вый ва́съ ѿ всѣ́хъ ѩ҆зы҄къ.

²⁵И҆ ѿлѹчи́те себѣ̀ междѹ̀ скѡты̀ чи́стыми и҆ междѹ̀ скѡты̀ нечи́стыми, и҆ междѹ̀ пти́цами чи́стыми и҆ нечи́стыми: и҆ не ѡ҆сквернитѐ дѹ́шъ ва́шихъ въ скотѣ́хъ и҆ въ пти́цахъ и҆ во всѣ́хъ гадѣ́хъ земны́хъ, ѩ҆̀же а҆́зъ ѿлѹчи́хъ ва́мъ въ нечистотѣ̀,

²⁶и҆ бѹ́дете мѝ свѧ́ти, ѩ҆́кѡ а҆́зъ ст҃ъ є҆́смь гд҇ь бг҃ъ ва́шъ, ѿлѹчи́вый ва́съ ѿ всѣ́хъ ѩ҆зы҄къ бы́ти мои́ми.

²⁷И҆ мѹ́жъ и҆лѝ жена̀ и҆́же а҆́ще бѹ́детъ ѿ ни́хъ чревоба́сникъ и҆лѝ волше́бникъ, сме́ртїю да ѹ҆́мрѹтъ ѻ҆́ба: ка́менїемъ да побїе́те и҆̀хъ, пови́нни сѹ́ть.