Read Библия Церковнославянская Леѵі́тъ 22 Bible Online

Леѵі́тъ 22 - Библия Церковнославянская bible

Леѵі́тъ 22

¹И҆ речѐ гд҇ь къ мѡѷсе́ю, гл҃ѧ:

²рцы̀ а҆арѡ́нѹ и҆ сынѡ́мъ є҆гѡ̀, да внима́ютъ ѿ ст҃ы́нь сынѡ́въ ї҆и҃левыхъ, и҆ да не ѡ҆сквернѧ́тъ и҆́мене ст҃а́гѡ моегѡ̀, є҆ли҄ка ѻ҆нѝ ѡ҆свѧща́ютъ мѝ: а҆́зъ гд҇ь.

³Рцы̀ и҆̀мъ: въ ро́ды ва́шѧ всѧ́къ человѣ́къ, и҆́же а҆́ще пристѹ́питъ ѿ всѧ́кагѡ сѣ́мене ва́шегѡ ко ст҃ы҄мъ, є҆ли҄ка а҆́ще ѡ҆свѧтѧ́тъ сы́нове ї҆и҃лєвы гд҇ѹ, и҆ нечистота̀ є҆гѡ̀ на не́мъ бѹ́детъ, потреби́тсѧ дѹша̀ ѻ҆́наѧ ѿ менє̀: а҆́зъ гд҇ь бг҃ъ ва́шъ.

⁴И҆ человѣ́къ ѿ сѣ́мене а҆арѡ́на жерца̀, и҆ се́й прокаже́нъ, и҆лѝ сѣ́мѧ и҆злива́етъ, ѿ ст҃ы́хъ да не снѣ́стъ, до́ндеже ѡ҆чи́ститсѧ: и҆ прикаса́ѧйсѧ всѧ́кой нечистотѣ̀ дѹшѝ, и҆лѝ человѣ́къ, є҆мѹ́же а҆́ще и҆зы́детъ ѿ є҆гѡ̀ ло́жа сѣ́мѧ,

⁵и҆лѝ и҆́же а҆́ще прико́снетсѧ всѧ́комѹ га́дѹ нечи́стѹ, и҆́же ѡ҆скверни́тъ є҆го̀, и҆лѝ человѣ́кѹ, и҆́же ѡ҆скверни́тъ є҆го̀, по всѧ́кой нечистотѣ̀ є҆гѡ̀:

⁶дѹша̀, ѩ҆́же а҆́ще прико́снетсѧ и҆́хъ, нечиста̀ бѹ́детъ до ве́чера: да не снѣ́стъ ѿ ст҃ы́хъ, а҆́ще не ѡ҆мы́етъ тѣ́ла своегѡ̀ водо́ю,

⁷и҆ за́йдетъ со́лнце, и҆ чи́стъ бѹ́детъ: и҆ тогда̀ да снѣ́стъ ѿ ст҃ы́хъ, ѩ҆́кѡ хлѣ́бъ є҆гѡ̀ є҆́сть.

⁸Мертвечи́ны и҆ ѕвѣроѧ́дины да не снѣ́стъ, є҆́же ѡ҆скверни́тисѧ є҆мѹ̀ въ ни́хъ: а҆́зъ гд҇ь.

⁹И҆ да сохранѧ́тъ повелѣ҄нїѧ моѧ҄, да не прїи́мѹтъ си́хъ ра́ди грѣха̀, и҆ и҆́змрѹтъ за ни́хъ, а҆́ще ѡ҆сквернѧ́тъ и҆̀хъ: а҆́зъ гд҇ь бг҃ъ ѡ҆сщ҃а́ѧй и҆̀хъ.

¹⁰И҆ всѧ́къ и҆ноплеме́нникъ да не снѣ́стъ ст҃ы́нь: присе́лникъ ї҆ере́евъ и҆лѝ нае́мникъ да не снѣ́стъ ст҃ы́нь.

¹¹А҆́ще же жре́цъ пристѧ́жетъ дѹ́шѹ пристѧжа́нѹю сребро́мъ, сїѧ̀ да снѣ́стъ хлѣ́бы є҆гѡ̀: и҆ домоча́дцы є҆гѡ̀, и҆ сі́и да снѣдѧ́тъ хлѣ́бы є҆гѡ̀.

¹²И҆ дще́рь человѣ́ка жерца̀, а҆́ще посѧ́гнетъ за мѹ́жа и҆ноплеме́нника, сїѧ̀ ѿ нача́ткѡвъ ст҃ы́хъ да не снѣ́стъ.

¹³И҆ дще́рь жерца̀ а҆́ще бѹ́детъ вдова̀ и҆лѝ ѿпѹще́на, плода́ же не бѹ́детъ є҆́й, возврати́тсѧ въ до́мъ ѻ҆тца̀ своегѡ̀, по ю҆́ности свое́й, ѿ хлѣ́бѡвъ ѻ҆тца̀ своегѡ̀ да снѣ́стъ: всѧ́къ же и҆ноплеме́нникъ да не снѣ́стъ ѿ ни́хъ.

¹⁴И҆ человѣ́къ, и҆́же а҆́ще ѩ҆́стъ ст҃а҄ѧ по невѣ́дѣнїю, и҆ да приложи́тъ пѧ́тѹю свою̀ ча́сть ко и҆́стомѹ, и҆ да да́стъ сїѐ жерцѹ̀ ст҃о́е.

¹⁵И҆ да не ѡ҆сквернѧ́тъ ст҃ы́нь сынѡ́въ ї҆и҃левыхъ, и҆̀хже ѻ҆нѝ ѿдѣлѧ́ютъ гд҇ѹ:

¹⁶и҆ да не наведѹ́тъ на себѐ беззако́нїе престѹпле́нїѧ, внегда̀ ѩ҆́сти и҆̀мъ ст҃ы́ню и҆́хъ, ѩ҆́кѡ а҆́зъ гд҇ь ѡ҆сщ҃а́ѧй и҆̀хъ.

¹⁷И҆ речѐ гд҇ь къ мѡѷсе́ю, гл҃ѧ:

¹⁸глаго́ли а҆арѡ́нѹ и҆ сынѡ́мъ є҆гѡ̀ и҆ всемѹ̀ со́нмѹ ї҆и҃левѹ и҆ рече́ши къ ни҄мъ: человѣ́къ человѣ́къ ѿ сынѡ́въ ї҆и҃левыхъ, и҆лѝ ѿ пришлє́цъ прилежа́щихъ къ ни҄мъ во ї҆и҃ли, и҆́же а҆́ще принесе́тъ да́ры своѧ҄ по всѧ́комѹ и҆сповѣ́данїю своемѹ̀, и҆лѝ по всѧ́комѹ и҆зволе́нїю своемѹ̀, є҆ли҄ка а҆́ще принесѹ́тъ гд҇ѹ на всесожже́нїе,

¹⁹прїѧ҄тны ва́мъ непорѡ́чны мѹ́жескъ по́лъ ѿ ста́дъ волѡ́въ, и҆лѝ ѿ ѻ҆ве́цъ и҆ ѿ ко́зъ:

²⁰всѣ́хъ, є҆ли҄ка а҆́ще и҆́мѹтъ поро́къ на себѣ̀, да не принесѹ́тъ гд҇ѹ, поне́же непрїѧ́тно бѹ́детъ ва́мъ.

²¹И҆ человѣ́къ и҆́же а҆́ще принесе́тъ же́ртвѹ сп҇нїѧ гд҇ѹ, ѿлѹчи́въ ѡ҆бѣ́тъ и҆лѝ по и҆зволе́нїю, и҆лѝ въ пра́здники ва́шѧ, ѿ ста́дъ волѡ́въ и҆лѝ ѿ ѻ҆ве́цъ, непоро́чно да бѹ́детъ въ прїѧ́тїе, всѧ́къ поро́къ да не бѹ́детъ на не́мъ:

²²слѣ́по, и҆лѝ сокрѹше́но, и҆лѝ ѧ҆зы́къ ѹ҆рѣ́занъ и҆мѹ́що, и҆лѝ черви́во, и҆лѝ кра́стово, и҆лѝ лиша́во, да не принесѹ́тъ тѣ́хъ гд҇ѹ, и҆ въ же́ртвѹ не дади́те ѿ ни́хъ на ѻ҆лта́рь гд҇ви:

²³и҆ телца̀ и҆лѝ ѻ҆́вцѹ ѹ҆хорѣ́знѹ, и҆лѝ безхво́стнѹ, въ заколе́нїе сотвори́ши ѧ҆̀ себѣ̀ (по и҆зволе́нїю), въ ѡ҆бѣ́тъ же тво́й да не прїи́метсѧ:

²⁴є҆мѹ́же сѹ́ть ѩ҆́тра сокрѹшє́на, и҆ є҆мѹ́же разда́влєна, и҆ и҆зрѣ҄зана, и҆ и҆сто́ржєна, да не принесе́те си́хъ гд҇ѹ, и҆ въ землѝ ва́шей да не сотвори́те.

²⁵И҆ ѿ рѹкѝ и҆ноплеме́нника да не принесе́те дарѡ́въ бг҃ѹ ва́шемѹ ѿ всѣ́хъ си́хъ, ѩ҆́кѡ вреждє́нїѧ сѹ́ть на ни́хъ, поро́къ на ни́хъ, не прїи́мѹтсѧ сїѧ҄ ѿ ва́съ.

²⁶И҆ речѐ гд҇ь къ мѡѷсе́ю, гл҃ѧ:

²⁷теле́цъ, и҆лѝ ѻ҆вча̀, и҆лѝ козлѧ̀, є҆гда̀ роди́тсѧ, да бѹ́детъ се́дмь дні́й под̾ ма́терїю свое́ю, въ де́нь же ѻ҆смы́й и҆ да́лѣе принесе́тсѧ въ да́ръ, прино́съ гд҇ѹ:

²⁸и҆ телца̀ и҆ ѻ҆вча́те вкѹ́пѣ съ ма́терїю да не зако́лете въ є҆ди́нъ де́нь.

²⁹А҆́ще же пожре́ши же́ртвѹ ѡ҆бѣ́тъ ра́дованїѧ гд҇ви, прїѧ́тнѡ ва́мъ пожри́те є҆̀:

³⁰сїѧ̀ въ то́йже де́нь да снѣ́стсѧ, да не ѡ҆ста́вите ѿ мѧ́съ на ѹ҆́трїе: а҆́зъ є҆́смь гд҇ь.

³¹И҆ сохрани́те за́пѡвѣди моѧ҄ и҆ сотвори́те ѧ҆̀: а҆́зъ гд҇ь:

³²и҆ не ѡ҆скверни́те и҆́мене ст҃а́гѡ, и҆ ѡ҆сщ҃ѹ́сѧ посредѣ̀ сынѡ́въ ї҆и҃левыхъ: а҆́зъ гд҇ь ѡ҆сщ҃а́ѧй ва́съ,

³³и҆зведы́й вы̀ и҆з̾ землѝ є҆гѵ́петскїѧ, ѩ҆́кѡ бы́ти ва́мъ въ бг҃а: а҆́зъ гд҇ь.