Read Библия Церковнославянская Леѵі́тъ 23 Bible Online

Леѵі́тъ 23 - Библия Церковнославянская bible

Леѵі́тъ 23

²глаго́ли сынѡ́мъ ї҆и҃лєвымъ и҆ рече́ши къ ни҄мъ: пра́здницы гд҇ни, ѩ҆̀же нарече́те нарѡ́читыѧ ст҃ы҄ѧ, сі́и сѹ́ть пра́здницы моѝ:

³въ ше́сть дні́й да сотвори́ши дѣла̀, и҆ въ де́нь седмы́й сѹббѡ́та, поко́й нарече́нный ст҃ъ гд҇ви, всѧ́кагѡ дѣ́ла да не сотворитѐ: сѹббѡ́та є҆́сть гд҇ви во все́мъ ѡ҆бита́нїи ва́шемъ.

⁴Сі́и пра́здницы гд҇ѹ наречє́ны ст҃и, ѩ҆̀же нарече́те сїѧ҄ во времена̀ и҆́хъ:

⁵въ пе́рвѣмъ мц҇ѣ въ четвертыйна́десѧть де́нь мц҇а, междѹ̀ вече́рними, [па́сха] гд҇ѹ:

⁶и҆ въ пѧтыйна́десѧть де́нь мц҇а пе́рвагѡ [пра́здникъ ѡ҆прѣсно́кѡвъ] гд҇ѹ: се́дмь дні́й ѡ҆прѣсно́ки да ѩ҆́сте.

⁷И҆ де́нь пе́рвый нарече́нъ ст҃ъ бѹ́детъ ва́мъ: всѧ́кагѡ дѣ́ла рабо́тнѧ не сотвори́те:

⁸и҆ да принесе́те всесожжє́нїѧ гд҇ѹ се́дмь дні́й, и҆ де́нь седмы́й нарече́нъ ст҃ъ бѹ́детъ ва́мъ: всѧ́кагѡ дѣ́ла рабо́тнѧ не сотвори́те.

⁹И҆ речѐ гд҇ь къ мѡѷсе́ю, гл҃ѧ:

¹⁰глаго́ли сынѡ́мъ ї҆и҃лєвымъ и҆ рече́ши къ ни҄мъ: є҆гда̀ вни́дете въ зе́млю, ю҆́же а҆́зъ даю̀ ва́мъ, и҆ по́жнете жа́твѹ є҆ѧ̀, и҆ принесе́те снопы̀ нача́токъ жа́твы ва́шеѧ къ жерцѹ̀,

¹¹и҆ вознесе́тъ сно́пъ пред̾ гд҇а прїѧ́тенъ ва́мъ: на ѹ҆́трїе пе́рвагѡ днѐ сѹббѡ́ты да вознесе́тъ є҆го̀ жре́цъ.

¹²И҆ сотвори́те въ де́нь, въ ѻ҆́ньже а҆́ще принесе́те сно́пъ, ѻ҆вча̀ непоро́чно є҆динолѣ́тно во всесожже́нїе гд҇ѹ:

¹³и҆ же́ртвѹ є҆гѡ̀ двѣ̀ десѧти҄ны мѹкѝ пшени́чны спрѧ́жены въ є҆ле́и: же́ртва гд҇ѹ, въ воню̀ благово́нїѧ гд҇ѹ: и҆ возлїѧ́нїе є҆гѡ̀ вїна̀ четве́ртѹю ча́сть їна.

¹⁴И҆ хлѣ́ба, и҆ прѧ́женыхъ кла́сѡвъ но́выхъ да не снѣ́сте, да́же до тогѡ̀ днѐ сама́гѡ, до́ндеже принесе́те вы̀ да́ры бг҃ѹ ва́шемѹ: зако́ннѡ вѣ́чнѡ въ ро́ды ва́шѧ во все́мъ населе́нїи ва́шемъ.

¹⁵И҆ сочти́те себѣ̀ ѿ наѹ́трїѧ сѹббѡ́тъ, ѿ днѐ, въ ѻ҆́ньже а҆́ще принесе́те снопы̀ возложе́нїѧ, се́дмь седми́цъ цѣ́лыхъ

¹⁶да́же до наѹ́трїѧ послѣ́днїѧ седми́цы да сочте́те пѧтьдесѧ́тъ дні́й, и҆ да принесе́те же́ртвѹ но́вѹ гд҇ѹ.

¹⁷Ѿ вселе́нїѧ ва́шегѡ да принесе́те хлѣ́бы возложе́нїе, два̀ хлѣ҄ба: ѿ двѹ́хъ десѧти́нъ мѹкѝ пшени́чны да бѹ́дѹтъ, ква́шєны да и҆спекѹ́тсѧ ѿ пе́рвыхъ плодѡ́въ гд҇ѹ:

¹⁸и҆ да принесе́те со хлѣ́бами се́дмь а҆́гнцєвъ непоро́чныхъ є҆динолѣ́тныхъ, и҆ телца̀ є҆ди́наго ѿ ста́дъ, и҆ ѻ҆вна̀ два̀ непорѡ́чна: и҆ бѹ́дѹтъ во всесожже́нїе гд҇ѹ, и҆ жє́ртвы и҆́хъ, и҆ возлїѧ҄нїѧ и҆́хъ, же́ртва вонѧ̀ благово́нїѧ гд҇ѹ.

¹⁹И҆ сотвори́те козла̀ ѿ ко́зъ є҆ди́наго ѡ҆ грѣсѣ̀, и҆ два̀ а҆́гнца є҆динолѣ҄тна въ же́ртвѹ сп҇нїѧ съ хлѣ́бами пе́рвыхъ жи҄тъ.

²⁰И҆ да возложи́тъ ѧ҆̀ жре́цъ съ хлѣ́бами пе́рвыхъ жи҄тъ, возложе́нїе пред̾ гд҇емъ со ѻ҆бѣ́ма а҆́гнцы: ст҃а бѹ́дѹтъ гд҇ѹ, жерцѹ̀ и҆́же прино́ситъ ѧ҆̀, томѹ̀ да бѹ́дѹтъ.

²¹И҆ прозове́те се́й де́нь, наро́читъ ст҃ъ бѹ́детъ ва́мъ: всѧ́кагѡ дѣ́ла рабо́тнѧ не сотвори́те въ ѻ҆́нь: зако́ннѡ вѣ́чнѡ въ ро́ды ва́шѧ во все́мъ населе́нїи ва́шемъ.

²²И҆ є҆гда̀ жне́те жа́твѹ землѝ ва́шеѧ, не потреби́те ѡ҆ста́нка жа́твы ни́вы своеѧ̀, є҆гда̀ жне́те, и҆ ѿ па́дающихъ ѿ жа́твы ва́шеѧ да не собере́ши: ни́щемѹ и҆ прише́лцѹ ѡ҆ста́виши ѧ҆̀: а҆́зъ гд҇ь бг҃ъ ва́шъ.

²³И҆ речѐ гд҇ь къ мѡѷсе́ю, гл҃ѧ:

²⁴рцы̀ сынѡ́мъ ї҆и҃лєвымъ, глаго́лѧ: мц҇а седма́гѡ, въ пе́рвый де́нь мц҇а, да бѹ́детъ ва́мъ поко́й, [па́мѧть трѹ́бъ]: нарече́нъ ст҃ъ бѹ́детъ ва́мъ:

²⁵всѧ́кагѡ дѣ́ла рабо́тнѧ не сотвори́те, и҆ принесе́те всесожже́нїе гд҇ѹ.

²⁶И҆ речѐ гд҇ь къ мѡѷсе́ю, гл҃ѧ:

²⁷и҆ въ десѧ́тый де́нь седма́гѡ мц҇а сегѡ̀ [де́нь ѡ҆чище́нїѧ], нарече́нъ ст҃ъ да бѹ́детъ ва́мъ: и҆ смири́те дѹ́шы ва́шѧ, и҆ принеси́те всесожже́нїе гд҇ѹ:

²⁸всѧ́кагѡ дѣ́ла не сотвори́те въ са́мый де́нь се́й: є҆́сть бо де́нь ѡ҆чище́нїѧ се́й ва́мъ, ѹ҆моли́ти ѡ҆ ва́съ пред̾ гд҇емъ бг҃омъ ва́шимъ:

²⁹всѧ́ка бо дѹша̀, ѩ҆́же не покори́тсѧ въ де́нь то́й, потреби́тсѧ ѿ люді́й свои́хъ:

³⁰и҆ всѧ́ка дѹша̀, ѩ҆́же сотвори́тъ дѣ́ло въ са́мый де́нь се́й, поги́бнетъ дѹша̀ та̀ ѿ люді́й свои́хъ:

³¹всѧ́кагѡ дѣ́ла не сотвори́те, зако́ннѡ вѣ́чнѡ въ ро́ды ва́шѧ, во всѣ́хъ селе́нїихъ ва́шихъ.

³²Сѹббѡ҄ты сѹббѡ́тъ бѹ́дѹтъ ва́мъ: и҆ смири́те дѹ́шы ва́шѧ, ѿ девѧ́тагѡ днѐ мц҇а ѿ ве́чера, да́же до десѧ́тагѡ днѐ мц҇а, до ве́чера, сѹббѡ́тствѹйте сѹббѡ҄ты ва́шѧ.

³³И҆ речѐ гд҇ь къ мѡѷсе́ю, гл҃ѧ:

³⁴рцы̀ сынѡ́мъ ї҆и҃лєвымъ, глаго́лѧ: въ пѧтыйна́десѧть де́нь мц҇а седма́гѡ сегѡ̀, [пра́здникъ кѹ́щей] се́дмь дні́й гд҇ѹ:

³⁵и҆ де́нь пе́рвый нарече́нъ ст҃ъ бѹ́детъ: всѧ́кагѡ дѣ́ла рабо́тнѧ не сотвори́те:

³⁶се́дмь дні́й да принесе́те всесожжє́нїѧ гд҇ѹ: и҆ де́нь ѻ҆смы́й нарече́нъ ст҃ъ бѹ́детъ ва́мъ, и҆ принесе́те всесожжє́нїѧ гд҇ѹ: и҆схо́дное є҆́сть, всѧ́кагѡ дѣ́ла рабо́тнѧ не сотвори́те.

³⁷Сі́и пра́здницы гд҇ни, ѩ҆̀же нарече́те нарѡ́читы ст҃ы, є҆́же приноси́ти прино́сы гд҇ѹ: всесожжє́нїѧ и҆ жє́ртвы и҆́хъ, и҆ возлїѧ҄нїѧ и҆́хъ ѿ днѐ до днѐ,

³⁸кромѣ̀ сѹббѡ́тъ гд҇нихъ и҆ кромѣ̀ дарѡ́въ ва́шихъ, и҆ кромѣ̀ всѣ́хъ ѡ҆бѣ́тѡвъ ва́шихъ и҆ кромѣ̀ благово́льныхъ ва́шихъ, ѩ҆̀же а҆́ще дади́те гд҇ѹ.

³⁹И҆ въ пѧтыйна́десѧть де́нь мц҇а седма́гѡ сегѡ̀, є҆гда̀ сконча́ете жи҄та землѝ, пра́зднѹйте гд҇ѹ се́дмь дні́й: въ де́нь пе́рвый поко́й, и҆ въ де́нь ѻ҆смы́й поко́й:

⁴⁰и҆ да во́змете себѣ̀ въ де́нь пе́рвый пло́дъ дре́ва красе́нъ, и҆ вѣ́твь фі́нїческѹю, и҆ вѣ҄тви дре́ва ча҄стыѧ, и҆ вє́рбы, и҆ а҆́гнѡвы вѣ҄тви <font color=grey>{садо́вїе палесті́нское}</font> ѿ пото́ка, и҆ возвесели́тесѧ пред̾ гд҇емъ бг҃омъ ва́шимъ се́дмь дні́й въ лѣ́то:

⁴¹зако́ннѡ вѣ́чнѡ въ ро́ды ва́шѧ, въ мц҇ъ седмы́й пра́зднѹйте є҆го̀:

⁴²въ кѹ́щахъ да пребѹ́дете се́дмь дні́й: всѧ́къ тѹзе́мецъ во ї҆и҃ли да пребѹ́детъ въ кѹ́щахъ:

⁴³ѩ҆́кѡ да ѹ҆вѣ́дѧтъ ро́ды ва́шѧ, ѩ҆́кѡ въ кѹ́щахъ всели́хъ сы́ны ї҆и҃лєвы, внегда̀ и҆звестѝ мнѣ̀ и҆̀хъ и҆з̾ землѝ є҆гѵ́петскїѧ: а҆́зъ гд҇ь бг҃ъ ва́шъ.

⁴⁴И҆ повѣ́да мѡѷсе́й пра́здники гд҇ни сынѡ́мъ ї҆и҃лєвымъ.