Read Библия Церковнославянская Леѵі́тъ 24 Bible Online

Леѵі́тъ 24 - Библия Церковнославянская bible

Леѵі́тъ 24

¹И҆ речѐ гд҇ь къ мѡѷсе́ю, гл҃ѧ:

²заповѣ́ждь сынѡ́мъ ї҆и҃лєвымъ, да во́змѹтъ тѝ є҆ле́й ѿ ма́сличїѧ чи́стъ и҆сцѣже́нъ въ свѣтѣ́нїе, да гори́тъ свѣти́ло всегда̀,

³внѣ̀ завѣ́сы въ ски́нїи свидѣ́нїѧ, и҆ возжига́ти бѹ́дѹтъ є҆го̀ а҆арѡ́нъ и҆ сы́нове є҆гѡ̀ ѿ ве́чера до заѹ́тра пред̾ гд҇емъ непреста́ннѡ, зако́ннѡ вѣ́чнѡ въ ро́ды ва́шѧ:

⁴на свѣти́лницѣ чи́стѣмъ возжига́ти бѹ́дете свѣти҄ла пред̾ гд҇емъ да́же до ѹ҆́тра.

⁵И҆ во́змете мѹкѝ пшени́чны, и҆ сотворитѐ ѿ неѧ̀ двана́десѧть хлѣ́бѡвъ: двѹ̀ десѧти́нъ да бѹ́детъ хлѣ́бъ є҆ди́нъ:

⁶и҆ возложи́те и҆̀хъ на два̀ положє́нїѧ, по шестѝ хлѣ́бѡвъ є҆ди́но положе́нїе на трапе́зѣ чи́стѣ пред̾ гд҇емъ:

⁷и҆ возложи́те на є҆ди́но положе́нїе лїва́нъ чи́стъ и҆ со́ль, и҆ да бѹ́дѹтъ хлѣ́бы въ па́мѧть предлежа́щыѧ пред̾ гд҇емъ:

⁸въ де́нь сѹббѡ́ты да предлага́ютсѧ пред̾ гд҇емъ всегда̀ ѿ сынѡ́въ ї҆и҃левыхъ, завѣ́тъ вѣ́чный:

⁹и҆ да бѹ́дѹтъ а҆арѡ́нѹ и҆ сынѡ́мъ є҆гѡ̀, и҆ да снѣдѧ́тъ ѧ҆̀ на мѣ́стѣ ст҃ѣ, сѹ́ть бо ст҃а҄ѧ ст҃ы́хъ: сїѐ и҆̀мъ ѿ же́ртвъ гд҇ѹ въ зако́нъ вѣ́чный.

¹⁰И҆ и҆зы́де сы́нъ жены̀ ї҆и҃лтѧныни, и҆ се́й бѣ̀ сы́нъ є҆гѵ́птѧнина въ сынѣ́хъ ї҆и҃левыхъ: и҆ прѧ́хѹсѧ въ полцѣ̀ и҆́же ѿ ї҆и҃лтѧныни и҆ мѹ́жъ ї҆и҃лтѧнинъ:

¹¹и҆ наре́къ сы́нъ жены̀ ї҆и҃лтѧныни и҆́мѧ (гд҇не) проклѧ̀. И҆ приведо́ша є҆го̀ къ мѡѷсе́ю. И҆́мѧ же ма́тере є҆гѡ̀ салѡмі́ѳъ, дще́рь даврі́ина, ѿ пле́мене да́нова.

¹²И҆ вверго́ша є҆го̀ въ темни́цѹ, разсѹди́ти ѡ҆ не́мъ повелѣ́нїемъ гд҇нимъ.

¹³И҆ речѐ гд҇ь къ мѡѷсе́ю, гл҃ѧ:

¹⁴и҆зведѝ клѧ́вшаго внѣ̀ полка̀, и҆ да возложа́тъ всѝ слы́шавшїи рѹ́цѣ своѝ на главѹ̀ є҆гѡ̀, и҆ да побїю́тъ є҆го̀ ка́менїемъ ве́сь со́нмъ:

¹⁵и҆ сынѡ́мъ ї҆и҃лєвымъ глаго́ли и҆ рече́ши къ ни҄мъ: человѣ́къ человѣ́къ, и҆́же а҆́ще проклене́тъ бг҃а своего̀, грѣ́хъ прїи́метъ:

¹⁶нарица́ѧй же и҆́мѧ гд҇не сме́ртїю да ѹ҆́мретъ: ка́менїемъ да побїю́тъ є҆го̀ ве́сь со́нмъ ї҆и҃льскїй: а҆́ще тѹзе́мецъ, и҆лѝ пришле́цъ, є҆гда̀ нарече́тъ и҆́мѧ гд҇не, да ѹ҆́мретъ:

¹⁷и҆ человѣ́къ, и҆́же а҆́ще порази́тъ всѧ́кѹ дѹ́шѹ человѣ́чѹ, и҆ ѹ҆́мретъ, сме́ртїю да ѹ҆́мретъ:

¹⁸и҆ и҆́же а҆́ще ѹ҆да́ритъ скота̀, и҆ ѹ҆́мретъ, да возда́стъ дѹ́шѹ вмѣ́стѡ дѹшѝ:

¹⁹и҆ а҆́ще кто̀ сотвори́тъ поро́къ бли́жнемѹ, ѩ҆́коже сотворѝ є҆мѹ̀, та́кожде и҆ є҆мѹ̀ да сотворѧ́тъ:

²⁰и҆зломле́нїе за и҆зломле́нїе, ѻ҆́ко за ѻ҆́ко, зѹ́бъ за зѹ́бъ: ѩ҆́коже сотвори́лъ поро́къ человѣ́кѹ, та́кожде да сотворѧ́тъ и҆ є҆мѹ̀:

²¹и҆́же а҆́ще ѹ҆да́ритъ человѣ́ка, и҆ ѹ҆́мретъ сме́ртїю да ѹ҆́мретъ:

²²ѡ҆правда́нїе є҆ди́но бѹ́детъ прише́лцѹ и҆ тѹзе́мцѹ, ѩ҆́кѡ а҆́зъ є҆́смь гд҇ь бг҃ъ ва́шъ.

²³И҆ глаго́ла мѡѷсе́й къ сынѡ́мъ ї҆и҃лєвымъ, и҆ и҆зведо́ша клѧ́вшаго внѣ̀ полка̀, и҆ поби́ша є҆го̀ ка́менїемъ ве́сь со́нмъ: и҆ сы́нове ї҆и҃лєвы сотвори́ша, ѩ҆́коже заповѣ́да гд҇ь мѡѷсе́ю.