Read Библия Церковнославянская Леѵі́тъ 25 Bible Online

Леѵі́тъ 25 - Библия Церковнославянская bible

Леѵі́тъ 25

¹И҆ речѐ гд҇ь къ мѡѷсе́ю на горѣ̀ сїна́йстѣй, гл҃ѧ:

²глаго́ли сынѡ́мъ ї҆и҃лєвымъ и҆ рече́ши къ ни҄мъ: є҆гда̀ вни́дете въ зе́млю, ю҆́же а҆́зъ даю̀ ва́мъ, и҆ почі́етъ землѧ̀, ю҆́же а҆́зъ даю̀ ва́мъ, сѹббѡ҄ты гд҇ѹ.

³Ше́сть лѣ́тъ да сѣ́еши ни́вѹ твою̀, и҆ ше́сть лѣ́тъ да рѣ́жеши вїногра́дъ тво́й и҆ собере́ши пло́дъ є҆гѡ̀:

⁴въ седмо́е же лѣ́то сѹббѡ́та, поко́й да бѹ́детъ землѝ, сѹббѡ́та гд҇нѧ: ни́вы твоеѧ̀ сѣ́ѧти и҆ вїногра́да твоегѡ̀ рѣ́зати не бѹ́деши,

⁵и҆ сама҄ собо́ю произраста҄ющаѧ ни́вы твоеѧ̀ да не по́жнеши, и҆ вїногра́да ѿлѹче́нїѧ твоегѡ̀ да не собере́ши: лѣ́то поко́ѧ бѹ́детъ землѝ.

⁶И҆ бѹ́дѹтъ сѹббѡ҄ты землѝ ѩ҆́ди тебѣ̀, и҆ рабѹ̀ твоемѹ̀ и҆ рабы́ни твое́й, и҆ нае́мникѹ твоемѹ̀ и҆ ѡ҆бита́лникѹ прилежа́щемѹ къ тебѣ̀,

⁷и҆ скотѡ́мъ твои҄мъ и҆ ѕвѣрє́мъ сѹ́щымъ на землѝ твое́й да бѹ́детъ всѧ́къ пло́дъ є҆гѡ̀ въ снѣ́дь.

⁸И҆ и҆счи́слиши себѣ̀ се́дмь лѣ́тъ поко́ѧ, се́дмь лѣ́тъ седми́жды: и҆ бѹ́дѹтъ тебѣ̀ се́дмь седми́нъ лѣ́тъ, четы́редесѧть де́вѧть лѣ́тъ.

⁹И҆ возвѣсти́те трѹ́бнымъ гла́сомъ во все́й землѝ ва́шей мц҇а седма́гѡ въ десѧ́тый де́нь мц҇а: въ де́нь ѡ҆чище́нїѧ возвѣсти́те трѹбо́ю во все́й землѝ ва́шей.

¹⁰И҆ ѡ҆свѧти́те лѣ́то, пѧтьдесѧ́тое лѣ́то, и҆ разгласи́те ѡ҆ставле́нїе на землѝ всѣ҄мъ живѹ́щымъ на не́й: лѣ́то ѡ҆ставле́нїѧ зна́менїе сїѐ бѹ́детъ ва́мъ: и҆ да ѿи́детъ кі́йждо ва́съ въ притѧжа́нїе своѐ, и҆ кі́йждо во ѻ҆те́чество своѐ ѿи́дете.

¹¹Ѡ҆ставле́нїѧ зна́менїе сїѐ бѹ́детъ ва́мъ, лѣ́то пѧтьдесѧ́тое, лѣ́то бѹ́детъ ва́мъ: ни сѣ́ѧти, нижѐ жа́ти бѹ́дете, є҆́же са́мо произни́кнетъ на не́й, и҆ да не ѡ҆б̾е́млеши ѡ҆свѧще́нныхъ (бг҃ѹ) є҆ѧ̀:

¹²ѩ҆́кѡ ѡ҆ставле́нїѧ зна́менїе є҆́сть, ст҃о да бѹ́детъ ва́мъ: ѿ ни́въ ѩ҆ди́те плоды̀ є҆ѧ̀:

¹³и҆ въ лѣ́то ѡ҆ставле́нїѧ зна́менїѧ сегѡ̀ да возврати́тсѧ кі́йждо въ притѧжа́нїе своѐ.

¹⁴А҆́ще же ѿда́си кѹ́плею бли́жнемѹ твоемѹ̀, и҆лѝ а҆́ще притѧ́жеши ѿ бли́жнѧгѡ твоегѡ̀, да не ѡ҆скорблѧ́етъ человѣ́къ бли́жнѧгѡ:

¹⁵по числѹ̀ лѣ́тъ по зна́менїи, да притѧ́жеши ѿ бли́жнѧгѡ, по числѹ̀ лѣ́тъ плодѡ́въ да прода́стсѧ тебѣ̀.

¹⁶ѩ҆́коже а҆́ще бо́лѣе лѣ́тъ, ѹ҆мно́житъ притѧжа́нїе є҆гѡ̀, и҆ ѩ҆́коже а҆́ще мнѣ́е лѣ́тъ, ѹ҆менши́тъ притѧжа́нїе є҆гѡ̀: ѩ҆́кѡ число̀ плодѡ́въ є҆гѡ̀, та́кѡ да прода́стъ тебѣ̀.

¹⁷Да не ѡ҆скорби́тъ человѣ́къ бли́жнѧгѡ, и҆ да ѹ҆бои́шисѧ гд҇а бг҃а твоегѡ̀: а҆́зъ гд҇ь бг҃ъ ва́шъ.

¹⁸И҆ сотвори́те всѧ҄ ѡ҆правда҄нїѧ моѧ҄ и҆ всѧ҄ сѹды̀ моѧ҄, сохрани́те же и҆ сотвори́те ѧ҆̀, и҆ всели́тесѧ на землѝ ѹ҆пова́юще.

¹⁹И҆ да́стъ землѧ̀ плоды̀ своѧ҄, и҆ снѣ́сте въ сы́тость, и҆ вселите́сѧ на не́й ѹ҆пова́юще.

²⁰А҆́ще же рече́те: что̀ ѩ҆́сти бѹ́демъ въ седмо́е лѣ́то сїѐ, а҆́ще не сѣ́емъ, ни собира́емъ плодѡ́въ свои́хъ;

²¹и҆ послю̀ блг҇ве́нїе моѐ ва́мъ въ лѣ́то шесто́е, и҆ сотвори́тъ плоды̀ своѧ҄ на трѝ лѣ҄та:

²²и҆ посѣ́ете въ лѣ́то ѻ҆смо́е, и҆ снѣ́сте ѿ плодѡ́въ ве́тхихъ да́же до лѣ́та девѧ́тагѡ: до́ндеже приспѣ́ютъ плоды̀ є҆ѧ̀, снѣ́сте вє́тхаѧ ве́тхихъ.

²³И҆ землѧ̀ да не прода́стсѧ во ѹ҆твержде́нїе: моѧ́ бо є҆́сть землѧ̀, ѩ҆́кѡ прише́лцы и҆ присе́лницы вы̀ є҆стѐ предо мно́ю:

²⁴и҆ по все́й землѝ ѡ҆держа́нїѧ ва́шегѡ, и҆скѹ́пъ дади́те землѝ.

²⁵А҆́ще же нище́тствѹетъ бра́тъ тво́й, и҆́же съ тобо́ю, и҆ прода́стъ ѿ ѡ҆держа́нїѧ своегѡ̀, да прїи́детъ ѹ҆́жикъ бли́жнїй є҆мѹ̀ и҆ и҆скѹ́питъ прода́нїе бра́та своегѡ̀.

²⁶А҆́ще же не бѹ́детъ комѹ̀ ѹ҆́жика, и҆ возмо́жетъ рѹка̀ є҆гѡ̀ ѡ҆брѣстѝ дово́ленъ и҆скѹ́пъ є҆гѡ̀,

²⁷и҆ и҆счи́слитъ лѣ҄та прода́нїѧ є҆гѡ̀, и҆ возда́стъ є҆́же и҆зли́ше и҆́мать, человѣ́кѹ є҆мѹ́же про́дано бѣ̀ ѻ҆́ное, и҆ возврати́тсѧ во ѡ҆держа́нїе своѐ.

²⁸А҆́ще же не ѡ҆брѧ́щетъ рѹка̀ є҆гѡ̀ дово́лное, є҆́же ѿда́ти є҆мѹ̀, да бѹ́детъ про́даное кѹпи́вшемѹ є҆̀ да́же до шеста́гѡ лѣ́та ѡ҆ставле́нїѧ, и҆ и҆зы́детъ во ѡ҆ставле́нїе, и҆ возврати́тсѧ во ѡ҆держа́нїе своѐ.

²⁹А҆́ще же кто̀ прода́стъ до́мъ ѡ҆бита́емый во гра́дѣ ѡ҆гражде́ннѣмъ, и҆ бѹ́детъ и҆скѹпле́нїе є҆гѡ̀, до́ндеже и҆спо́лнитсѧ: лѣ́то дні́й бѹ́детъ и҆скѹпле́нїе є҆гѡ̀.

³⁰А҆́ще же не и҆скѹ́питъ, до́ндеже сконча́етсѧ лѣ́то всѐ, да ѹ҆крѣпи́тсѧ до́мъ сѹ́щїй во гра́дѣ и҆мѹ́щемъ ѡ҆гражде́нїе въ тве́рдость кѹпи́вшемѹ є҆го̀, въ ро́ды є҆гѡ̀, и҆ не возврати́тсѧ во ѡ҆ставле́нїе.

³¹До́мы же и҆̀же на се́лѣхъ, и҆̀мже нѣ́сть ѡ҆́крестъ и҆́хъ ѡ҆гражде́нїѧ, къ селѹ̀ землѝ да приложа́тсѧ: и҆скѹпѹ́ємы всегда̀ да бѹ́дѹтъ, и҆ во ѡ҆ставле́нїе да возвратѧ́тсѧ.

³²И҆ гра́ди леѵі́тстїи, до́мы градѡ́въ ѡ҆держа́нїѧ и҆́хъ, и҆скѹпѹ́ємы да бѹ́дѹтъ всегда̀ леѵі́тѡмъ.

³³И҆ и҆́же а҆́ще и҆скѹ́питъ ѿ леѵї҄тъ: и҆ и҆зы́детъ прода́нїе домѡ́въ гра́да ѡ҆держа́нїѧ и҆́хъ во ѡ҆ставле́нїе, ѩ҆́кѡ до́мы градѡ́въ леѵі́тскихъ ѡ҆держа́нїе и҆́хъ, посредѣ̀ сынѡ́въ ї҆и҃левыхъ.

³⁴И҆ се́ла ѿдѣлє́наѧ градѡ́мъ и҆́хъ да не продадѹ́тсѧ, ѩ҆́кѡ ѡ҆держа́нїе вѣ́чное сїѐ и҆́хъ є҆́сть.

³⁵А҆́ще же нище́тствѹетъ бра́тъ тво́й, и҆́же съ тобо́ю, и҆ и҆знемо́жетъ рѹка́ми ѹ҆ тебє̀, застѹпѝ є҆го̀ ѩ҆́кѡ прише́лца и҆ присе́лника, да поживе́тъ бра́тъ тво́й съ тобо́ю:

³⁶да не во́змеши ѿ негѡ̀ ли́хвы, нижѐ бо́лѣе (*да́нагѡ), и҆ ѹ҆бои́шисѧ бг҃а твоегѡ̀: а҆́зъ гд҇ь: и҆ поживе́тъ бра́тъ тво́й съ тобо́ю.

³⁷Сребра̀ твоегѡ̀ да не да́си є҆мѹ̀ въ ли́хвѹ, и҆ ра́ди прибы́тка не да́си є҆мѹ̀ пи́щей твои́хъ.

³⁸А҆́зъ гд҇ь бг҃ъ ва́шъ, и҆зведы́й вы̀ и҆з̾ землѝ є҆гѵ́петскїѧ, є҆́же да́ти ва́мъ зе́млю ханаа́нскѹ, ѩ҆́кѡ бы́ти мнѣ̀ бг҃ѹ ва́шемѹ.

³⁹А҆́ще же ѡ҆ѹбо́жаетъ бра́тъ тво́й ѹ҆ тебє̀, и҆ прода́стсѧ тебѣ̀, да не порабо́таетъ тебѣ̀ рабо́ты ра́бскїѧ:

⁴⁰а҆́ки нае́мникъ и҆лѝ пришле́цъ да бѹ́детъ тебѣ̀, да́же до лѣ́та ѡ҆ставле́нїѧ дѣ́лати бѹ́детъ ѹ҆ тебє̀,

⁴¹и҆ да и҆зы́детъ ѿ тебє̀, и҆ дѣ́ти є҆гѡ̀ съ ни́мъ въ лѣ́то ѡ҆ставле́нїѧ, и҆ да ѿи́детъ въ ро́дъ сво́й, и҆ во ѡ҆держа́нїе ѻ҆́тчее своѐ возврати́тсѧ,

⁴²поне́же рабѝ моѝ сѹ́ть сі́и, и҆̀хже и҆зведо́хъ и҆з̾ землѝ є҆гѵ́петскїѧ, да не прода́стсѧ прода́нїемъ ра́бїимъ:

⁴³да не ѡ҆тѧготи́ши є҆гѡ̀ трѹдо́мъ, и҆ ѹ҆бои́шисѧ гд҇а бг҃а твоегѡ̀.

⁴⁴И҆ ра́бъ и҆ рабы́нѧ, и҆̀же а҆́ще бѹ́дѹтъ ѹ҆ тебє̀ ѿ ѩ҆зы҄къ, и҆̀же ѡ҆́крестъ тебє̀ сѹ́ть, ѿ тѣ́хъ да притѧ́жете раба̀ и҆ рабы́ню.

⁴⁵И҆ ѿ сынѡ́въ присе́лничихъ, и҆̀же сѹ́ть въ ва́съ, ѿ си́хъ притѧ́жете, и҆ ѿ сро́дникѡвъ и҆́хъ, є҆ли́цы а҆́ще бѹ́дѹтъ въ землѝ ва́шей, да бѹ́дѹтъ ва́мъ во ѡ҆держа́нїе,

⁴⁶и҆ да раздѣлитѐ ѧ҆̀ дѣ́темъ ва́шымъ по ва́съ, и҆ да бѹ́дѹтъ ва́мъ во ѡ҆держа́нїе во вѣ́къ: бра́тїи же ва́шеѧ, сынѡ́въ ї҆и҃левыхъ, кі́йждо бра́та своегѡ̀ да не ѡ҆тѧготи́тъ є҆гѡ̀ въ трѹдѣ́хъ.

⁴⁷А҆́ще же ѡ҆брѧ́щетъ рѹка̀ прише́лца и҆лѝ присе́лника и҆́же ѹ҆ тебє̀, и҆ ѡ҆бнища́въ бра́тъ тво́й прода́стсѧ къ прише́лцѹ и҆лѝ присе́лникѹ и҆́же ѹ҆ тебє̀, и҆лѝ роди́вшемѹсѧ ѿ ро́да прише́лча,

⁴⁸по прода́нїи є҆мѹ̀, и҆скѹ́пъ да бѹ́детъ є҆мѹ̀, є҆ди́нъ ѿ бра́тїй є҆гѡ̀ да и҆скѹ́питъ є҆го̀:

⁴⁹бра́тъ ѻ҆тца̀ є҆гѡ̀, и҆лѝ сы́нъ бра́та ѻ҆тца̀ є҆гѡ̀, да и҆скѹ́питъ є҆го̀, и҆лѝ ѿ сво́йственныхъ пло́ти пле́мене є҆гѡ̀ и҆скѹ́питъ є҆го̀: а҆́ще же возмо́жетъ рѹка̀ є҆гѡ̀, и҆скѹ́питъ себѐ,

⁵⁰да сочте́тсѧ съ притѧжа́вшимъ є҆го̀, ѿ лѣ́та въ не́же прода́сѧ є҆мѹ̀ да́же до лѣ́та ѡ҆ставле́нїѧ, и҆ бѹ́детъ сребро̀ прода́нїѧ є҆гѡ̀ а҆́ки де́нь нае́мника: ѿ лѣ́та до лѣ́та да бѹ́детъ съ ни́мъ.

⁵¹А҆́ще же комѹ̀ мно́жае лѣ́тъ бѹ́детъ, проти́въ тѣ́хъ ѿда́стъ и҆скѹ́пъ сво́й, ѿ сребра̀ прода́нїѧ своегѡ̀.

⁵²А҆́ще же ма́лѡ ѡ҆ста́нетсѧ ѿ лѣ́тъ до лѣ́та ѡ҆ставле́нїѧ, и҆ да сочте́тъ є҆мѹ̀ по лѣ́тѡмъ є҆гѡ̀, и҆ ѿда́стъ и҆скѹ́пъ є҆гѡ̀ а҆́ки нае́мникъ:

⁵³ѿ го́да до го́да да бѹ́детъ съ ни́мъ: да не ѡ҆тѧготи́ши є҆гѡ̀ трѹдо́мъ пред̾ тобо́ю.

⁵⁴А҆́ще же не и҆скѹ́питсѧ по си҄мъ, да и҆зы́детъ въ лѣ́то ѡ҆ставле́нїѧ са́мъ и҆ дѣ́ти є҆гѡ̀ съ ни́мъ:

⁵⁵ѩ҆́кѡ моѝ сы́нове ї҆и҃лєвы рабѝ сѹ́ть, ѻ҆́троцы моѝ сі́и сѹ́ть, и҆̀хже и҆зведо́хъ и҆з̾ землѝ є҆гѵ́петскїѧ: а҆́зъ гд҇ь бг҃ъ ва́шъ.