Read Библия Церковнославянская Леѵі́тъ 26 Bible Online

Леѵі́тъ 26 - Библия Церковнославянская bible

Леѵі́тъ 26

¹Не сотвори́те себѣ̀ (*ѡ҆бразѡ́въ) рѹкотворе́ныхъ, нижѐ и҆зва́ѧныхъ, нижѐ столпа̀ поста́вите себѣ̀, нижѐ ка́мене поста́вите въ землѝ ва́шей во зна́менїе, ко є҆́же покланѧ́тисѧ є҆мѹ̀: а҆́зъ є҆́смь гд҇ь бг҃ъ ва́шъ.

²Сѹббѡ҄ты моѧ҄ сохрани́те, и҆ ѿ ст҃ы́хъ мои́хъ ѹ҆бо́йтесѧ: а҆́зъ є҆́смь гд҇ь.

³А҆́ще въ повелѣ́нїихъ мои́хъ хо́дите, и҆ за́пѡвѣди моѧ҄ сохранитѐ и҆ сотворитѐ ѧ҆̀:

⁴и҆ да́мъ до́ждь ва́мъ во вре́мѧ своѐ, и҆ землѧ̀ да́стъ плоды̀ своѧ҄, и҆ древеса̀ сє́лнаѧ ѿдадѧ́тъ пло́дъ сво́й:

⁵и҆ пости́гнетъ ва́мъ млаче́нїе (*жи҄тъ) ѡ҆бра́нїе вїна̀, и҆ ѡ҆бра́нїе вїна̀ пости́гнетъ сѣ́ѧтвѹ, и҆ снѣ́сте хлѣ́бъ ва́шъ въ сы́тость, и҆ вселите́сѧ съ тве́рдостїю на землѝ ва́шей, и҆ ра́ть не про́йдетъ сквозѣ̀ зе́млю ва́шѹ:

⁶и҆ да́мъ ми́ръ въ землѝ ва́шей, и҆ ѹ҆́снете, и҆ не бѹ́детъ ѹ҆страша́ѧй ва́съ: и҆ погѹблю̀ ѕвѣ҄ри лю҄тыѧ ѿ землѝ ва́шеѧ:

⁷и҆ ра́ть сквозѣ̀ зе́млю ва́шѹ не про́йдетъ, и҆ пожене́те врагѝ ва́шѧ, и҆ падѹ́тъ пред̾ ва́ми ѹ҆бїе́нїемъ:

⁸и҆ поженѹ́тъ ѿ ва́съ пѧ́ть сто̀, и҆ сто̀ ва́съ пожене́тъ тмы҄, и҆ падѹ́тъ вразѝ ва́ши пред̾ ва́ми мече́мъ:

⁹и҆ при́зрю на ва́съ и҆ блг҇влю̀ ва́съ, и҆ возращѹ̀ ва́съ и҆ ѹ҆мно́жѹ ва́съ, и҆ поста́влю завѣ́тъ мо́й съ ва́ми:

¹⁰и҆ снѣ́сте вє́тхаѧ и҆ вє́тхаѧ ве́тхихъ, и҆ вє́тхаѧ ѿ лица̀ но́выхъ и҆знесе́те:

¹¹и҆ поста́влю завѣ́тъ мо́й въ ва́съ, и҆ не возгнѹша́етсѧ дш҃а̀ моѧ̀ ва́ми:

¹²и҆ похождѹ̀ въ ва́съ, и҆ бѹ́дѹ ва́мъ бг҃ъ, и҆ вы̀ бѹ́дете мѝ лю́дїе:

¹³а҆́зъ є҆́смь гд҇ь бг҃ъ ва́шъ, и҆зведы́й ва́съ и҆з̾ землѝ є҆гѵ́петскїѧ, сѹ́щымъ ва́мъ рабѡ́мъ: и҆ сокрѹши́хъ ѹ҆́зы ѩ҆рма̀ ва́шегѡ, и҆ и҆зведо́хъ ва́съ со дерзнове́нїемъ.

¹⁴А҆́ще же не послѹ́шаете менѐ, нижѐ сотворитѐ повелѣ́нїй мои́хъ си́хъ,

¹⁵но ни покорите́сѧ и҆̀мъ, и҆ ѡ҆ сѹдба́хъ мои́хъ вознегодѹ́етъ дѹша̀ ва́ша, ѩ҆́кѡ не твори́ти ва́мъ всѣ́хъ за́повѣдїй мои́хъ, ѩ҆́кѡ разори́ти завѣ́тъ мо́й,

¹⁶и҆ а҆́зъ сотворю̀ си́це ва́мъ, и҆ наведѹ̀ на ва́съ скѹ́дость и҆ кра́стѹ, и҆ желтѧни́цѹ врежда́ющѹю ѻ҆́чи ва́ша и҆ дѹ́шы ва́шѧ и҆стаева́ющѹю: и҆ посѣ́ете вотщѐ сѣ́мена ва҄ша, и҆ поѧдѧ́тъ ѧ҆̀ сѹпоста́ты ва́шѧ:

¹⁷и҆ ѹ҆твержѹ̀ лицѐ моѐ на ва́съ, и҆ паде́те пред̾ враги҄ ва́шими, и҆ поженѹ́тъ вы̀ ненави́дѧщїи ва́съ, и҆ побѣ́гнете ни комѹ́же гонѧ́щѹ ва́съ.

¹⁸И҆ а҆́ще до сегѡ̀ не послѹ́шаете менѐ, и҆ приложѹ̀ наказа́ти вы̀ ѩ҆́звами седми́жды за грѣхѝ ва́шѧ:

¹⁹и҆ сокрѹшѹ̀ досажде́нїе горды́ни ва́шеѧ, и҆ положѹ̀ не́бо ва́мъ а҆́ки желѣ́зно, и҆ зе́млю ва́шѹ а҆́ки мѣ́дѧнѹ:

²⁰и҆ бѹ́детъ вотщѐ крѣ́пость ва́ша, и҆ не да́стъ землѧ̀ ва́ша сѣ́мене своегѡ̀, и҆ древа̀ села̀ ва́шегѡ не дадѹ́тъ плода̀ своегѡ̀.

²¹И҆ а҆́ще по си́хъ по́йдете страно́ю и҆ не восхо́щете послѹ́шати менѐ, приложѹ̀ ва́мъ ѩ҆́звъ се́дмь по грѣхѡ́мъ ва́шымъ,

²²и҆ послю̀ на вы̀ ѕвѣ҄ри лю҄тыѧ земны҄ѧ, и҆ и҆з̾ѧдѧ́тъ вы̀ и҆ потребѧ́тъ скоты̀ ва́шѧ, и҆ ѹ҆ма́лєны сотворю̀ вы̀, и҆ пѹ҄сты бѹ́дѹтъ пѹтїѐ ва́ши.

²³И҆ а҆́ще си́ми не нака́жетесѧ, но по́йдете ко мнѣ̀ страно́ю,

²⁴пойдѹ̀ и҆ а҆́зъ съ ва́ми въ ѩ҆́рости страно́ю, и҆ поражѹ̀ вы̀ и҆ а҆́зъ седми́жды грѣ҄хъ ра́ди ва́шихъ,

²⁵и҆ наведѹ̀ на вы̀ ме́чь мстѧ́й ме́сть завѣ́та, и҆ вбѣ́гнете въ гра́ды ва́шѧ: и҆ послю̀ на вы̀ сме́рть, и҆ пре́дани бѹ́дете въ рѹ́цѣ вра҄гъ ва́шихъ:

²⁶внегда̀ скорбѣ́ти ва́мъ скѹ́достїю хлѣ́бѡвъ, и҆ и҆спекѹ́тъ де́сѧть же́нъ хлѣ́бы ва́шѧ въ пещѝ є҆ди́нѣй, и҆ ѿдадѧ́тъ хлѣ́бы ва́шѧ вѣ́сомъ, и҆ ѩ҆́сти бѹ́дете, и҆ не насы́титесѧ.

²⁷А҆́ще же въ си́хъ не послѹ́шаете менѐ и҆ по́йдете ко мнѣ̀ страно́ю,

²⁸и҆ а҆́зъ пойдѹ̀ съ ва́ми въ ѩ҆́рости страно́ю, и҆ накажѹ̀ вы̀ а҆́зъ седми́жды по грѣхѡ́мъ ва́шымъ:

²⁹и҆ ѩ҆́сти бѹ́дете плѡ́ти сынѡ́въ ва́шихъ, и҆ плѡ́ти дще́рей ва́шихъ ѩ҆́сти и҆́мате,

³⁰и҆ сотворю̀ пѹста҄ѧ ка҄пища ва҄ша и҆ потреблю̀ древѧна҄ѧ рѹкотворє́нїѧ ва҄ша, и҆ положѹ̀ трѹ́пы ва́шѧ на трѹ́пѣхъ кѹмї҄ръ ва́шихъ, и҆ возненави́дитъ ва́съ дш҃а̀ моѧ̀:

³¹и҆ сотворю̀ гра́ды ва́шѧ пѹ҄сты, и҆ ѡ҆пѹстошѹ̀ ст҃а҄ѧ ва҄ша, и҆ не ѡ҆бонѧ́ю вонѝ же́ртвъ ва́шихъ:

³²и҆ сотворю̀ пѹ́стѹ а҆́зъ зе́млю ва́шѹ, и҆ ѹ҆дивѧ́тсѧ ѡ҆ не́й вразѝ ва́ши, живѹ́щїи на не́й:

³³и҆ разсы́плю вы̀ въ ѩ҆зы́ки, и҆ потреби́тъ вы̀ находѧ́й ме́чь, и҆ бѹ́детъ землѧ̀ ва́ша пѹста̀, и҆ гра́ды ва́ши бѹ́дѹтъ пѹ҄сты.

³⁴Тогда̀ возблаговоли́тъ землѧ̀ сѹббѡ҄ты своѧ҄, во всѧ҄ дни҄ запѹстѣ́нїѧ своегѡ̀, и҆ вы̀ бѹ́дете въ землѝ вра҄гъ ва́шихъ: тогда̀ воспра́зднѹетъ землѧ̀ и҆ возблаговоли́тъ сѹббѡ́ты своѧ҄:

³⁵во всѧ҄ дни҄ ѡ҆пѹстѣ́нїѧ своегѡ̀ воспра́зднѹетъ, ѩ҆̀же не пра́зднова въ сѹббѡ́тахъ ва́шихъ, є҆гда̀ живѧ́сте на не́й.

³⁶И҆ ѡ҆ста́вльшымсѧ ѿ ва́съ вложѹ̀ стра́хъ въ сердца̀ и҆́хъ въ землѝ вра҄гъ и҆́хъ, и҆ пожене́тъ и҆̀хъ гла́съ листа̀ летѧ́ща, и҆ побѣ́гнѹтъ ѩ҆́кѡ бѣжа́щїи ѿ ра́ти, и҆ падѹ́тъ ни ки́мже гони́ми.

³⁷И҆ пре́зритъ бра́тъ бра́та а҆́ки на ра́ти, ни комѹ̀ напа́дающѹ, и҆ не возмо́жете противѹста́ти врагѡ́мъ ва́шымъ:

³⁸и҆ поги́бнете въ ѩ҆зы́цѣхъ, и҆ потреби́тъ ва́съ землѧ̀ вра҄гъ ва́шихъ.

³⁹И҆ ѡ҆ста́вльшїисѧ ѿ ва́съ и҆стлѣ́ютъ за грѣхѝ своѧ҄ и҆ за грѣхѝ ѻ҆тє́цъ свои́хъ, въ землѝ вра҄гъ свои́хъ и҆ста́ютъ,

⁴⁰и҆ и҆сповѣ́дѧтъ грѣхѝ своѧ҄ и҆ грѣхѝ ѻ҆тє́цъ свои́хъ, ѩ҆́кѡ престѹпи́ша и҆ презрѣ́ша мѧ̀, и҆ ѩ҆́кѡ ходи́ша предо мно́ю страно́ю:

⁴¹и҆ а҆́зъ пойдѹ̀ съ ни́ми въ ѩ҆́рости страно́ю и҆ погѹблю̀ и҆̀хъ въ землѝ врагѡ́въ и҆́хъ: тогда̀ ѹ҆срами́тсѧ се́рдце и҆́хъ неѡбрѣ́заное и҆ тогда̀ позна́ютъ грѣхѝ своѧ҄:

⁴²и҆ помѧнѹ̀ завѣ́тъ ї҆а́кѡвль и҆ завѣ́тъ ї҆саа́ковъ, и҆ завѣ́тъ а҆враа́мль помѧнѹ̀,

⁴³и҆ зе́млю помѧнѹ̀, и҆ землѧ̀ ѡ҆ста́нетсѧ ѿ ни́хъ. Тогда̀ прїи́метъ землѧ̀ сѹббѡ҄ты своѧ҄, внегда̀ ѡ҆пѹстѣ́ти є҆́й и҆́хъ ра́ди: и҆ ѻ҆нѝ прїи́мѹтъ своѧ҄ беззакѡ́нїѧ, и҆́хже ра́ди презрѣ́ша сѹдбы҄ моѧ҄, и҆ ѡ҆ повелѣ́нїихъ мои́хъ вознегодова̀ дѹша̀ и҆́хъ:

⁴⁴ѻ҆ба́че сѹ́щымъ и҆̀мъ въ землѝ врагѡ́въ свои́хъ, не презрѣ́хъ и҆́хъ, нижѐ вознегодова́хъ ѡ҆ ни́хъ, ѩ҆́кѡ потреби́ти ѧ҆̀ и҆ разори́ти завѣ́тъ мо́й и҆́же къ ни҄мъ: а҆́зъ бо є҆́смь гд҇ь бг҃ъ и҆́хъ.

⁴⁵И҆ помѧнѹ̀ завѣ́тъ и҆́хъ пе́рвый, є҆гда̀ и҆зведо́хъ и҆̀хъ и҆з̾ землѝ є҆гѵ́петскїѧ, и҆з̾ до́мѹ рабо́ты пред̾ ѩ҆зы҄ки, є҆́же бы́ти мнѣ̀ бг҃ѹ и҆́хъ: а҆́зъ є҆́смь гд҇ь.

⁴⁶Сїѧ҄ сѹдбы҄ моѧ҄ и҆ повелѣ҄нїѧ моѧ҄, и҆ зако́нъ, є҆го́же дадѐ гд҇ь междѹ̀ собо́ю и҆ междѹ̀ сы́ны ї҆и҃лєвы, на горѣ̀ сїна́йстѣй, рѹко́ю мѡѷсе́овою.