Read Библия Церковнославянская Леѵі́тъ 27 Bible Online

Леѵі́тъ 27 - Библия Церковнославянская bible

Леѵі́тъ 27

¹И҆ речѐ гд҇ь къ мѡѷсе́ю, гл҃ѧ:

²глаго́ли сынѡ́мъ ї҆и҃лєвымъ и҆ рече́ши къ ни҄мъ, глаго́лѧ: человѣ́къ, и҆́же а҆́ще ѡ҆бѣща́етъ ѡ҆бѣ́тъ, ѩ҆́кѡ цѣ́нѹ дѹшѝ своеѧ̀ гд҇ѹ,

³да бѹ́детъ цѣна̀ мѹ́жеска по́лѹ ѿ два́десѧти лѣ́тъ до шести́десѧти лѣ́тъ, да бѹ́детъ цѣна̀ є҆гѡ̀ пѧтьдесѧ́тъ дїдра́хмъ сребра̀ вѣ́сомъ ст҃ы́мъ,

⁴же́нска же по́лѹ да бѹ́детъ цѣна̀ три́десѧть дїдра́хмъ:

⁵а҆́ще же ѿ пѧтѝ лѣ́тъ до два́десѧти лѣ́тъ, да бѹ́детъ цѣна̀ мѹ́жескѹ по́лѹ два́десѧть дїдра́хмъ, же́нскѹ же по́лѹ де́сѧть дїдра́хмъ:

⁶ѿ мц҇а же є҆ди́нагѡ до пѧтѝ лѣ́тъ, да бѹ́детъ цѣна̀ мѹ́жеска по́лѹ пѧ́ть дїдра́хмъ сребра̀, же́нска же по́лѹ трѝ дїдра҄хмы сребра̀:

⁷а҆́ще же ѿ шести́десѧти лѣ́тъ и҆ вы́шше, а҆́ще ѹ҆́бѡ мѹ́жескъ по́лъ бѹ́детъ, да бѹ́детъ цѣна̀ є҆гѡ̀ пѧтьна́десѧть дїдра́хмъ сребра̀, а҆́ще же же́нскъ по́лъ, де́сѧть дїдра́хмъ.

⁸А҆́ще же ѹ҆бо́гъ бѹ́детъ цѣно́ю свое́ю, да ста́нетъ пред̾ жерце́мъ, и҆ да ѡ҆цѣни́тъ є҆го̀ жре́цъ: ѩ҆́коже мо́жетъ рѹка̀ ѡ҆бѣща́вшагѡсѧ, та́кѡ ѡ҆цѣни́тъ є҆го̀ жре́цъ.

⁹А҆́ще же ѿ скотѡ́въ приноси́мыхъ ѿ ни́хъ да́ръ гд҇ѹ, и҆́же а҆́ще да́стъ ѿ си́хъ гд҇ѹ, бѹ́детъ ст҃о.

¹⁰Да не премѣни́тъ добра̀ ѕлы́мъ, нижѐ ѕла̀ до́брымъ: а҆́ще же и҆змѣнѧ́ѧ и҆змѣни́тъ ѻ҆́ный ско́тъ ското́мъ, да бѹ́детъ и҆ то́й и҆ премѣне́нїе ст҃а.

¹¹А҆́ще же всѧ́къ ско́тъ нечи́стъ, ѿ ни́хже не прино́ситсѧ да́ръ гд҇ѹ, да поста́витъ скота̀ пред̾ жерце́мъ,

¹²и҆ ѡ҆цѣни́тъ є҆го̀ жре́цъ междѹ̀ до́брымъ и҆ междѹ̀ ѕлы́мъ: и҆ ѩ҆́коже ѡ҆цѣни́тъ є҆го̀ жре́цъ, та́кѡ да бѹ́детъ.

¹³А҆́ще же и҆скѹпѹ́ѧ и҆скѹ́питъ є҆го̀, да приложи́тъ пѧ́тѹю ча́сть къ цѣнѣ̀ є҆гѡ̀.

¹⁴И҆ человѣ́къ, и҆́же а҆́ще ѡ҆свѧти́тъ до́мъ сво́й ст҃ъ гд҇ѹ, и҆ ѡ҆цѣни́тъ є҆го̀ жре́цъ междѹ̀ до́брымъ и҆ междѹ̀ ѕлы́мъ: ѩ҆́коже ѡ҆цѣни́тъ є҆го̀ жре́цъ, та́кѡ да ста́нетъ.

¹⁵А҆́ще же ѡ҆свѧти́вый є҆го̀ и҆скѹ́питъ до́мъ сво́й, да приложи́тъ къ семѹ̀ пѧ́тѹю ча́сть сребра̀ цѣны̀ є҆гѡ̀, и҆ бѹ́детъ є҆мѹ̀.

¹⁶А҆́ще же ѿ ни́въ ѡ҆держа́нїѧ своегѡ̀ ѡ҆свѧти́тъ человѣ́къ гд҇ѹ, и҆ да бѹ́детъ цѣна̀ є҆гѡ̀ по сѣ́ѧнїю є҆гѡ̀, за спѹ́дъ ѩ҆чме́нѧ пѧтьдесѧ́тъ дїдра́хмъ сребра̀.

¹⁷А҆́ще же ѿ лѣ́та ѡ҆ставле́нїѧ ѡ҆свѧти́тъ ни́вѹ свою̀, по цѣнѣ̀ є҆ѧ̀ да ста́нетъ.

¹⁸А҆́ще же напослѣ́докъ по ѡ҆ставле́нїи ѡ҆свѧти́тъ ни́вѹ свою̀, да причте́тъ є҆мѹ̀ сребро̀ жре́цъ къ лѣ́тѡмъ ѡ҆ста́вшымсѧ да́же до лѣ́та ѡ҆ставле́нїѧ, и҆ ѿи́метсѧ ѿ цѣны̀ є҆гѡ̀

¹⁹А҆́ще же и҆скѹ́питъ ни́вѹ ѡ҆свѧти́вый ю҆̀, да приложи́тъ пѧ́тѹю ча́сть сребра̀ къ цѣнѣ̀ є҆ѧ̀, и҆ да бѹ́детъ є҆мѹ̀.

²⁰А҆́ще же не и҆скѹ́питъ ни́вы, и҆ ѿда́стъ ни́вѹ человѣ́кѹ и҆но́мѹ, не ктомѹ̀ да и҆скѹ́питъ ю҆̀:

²¹но да бѹ́детъ ни́ва минѹ́вшѹ лѣ́тѹ ѡ҆ставле́нїѧ, свѧта̀ хва́лна гд҇ѹ, ѩ҆́коже землѧ̀ ѿлѹче́наѧ: жерцѹ̀ да бѹ́детъ во ѡ҆держа́нїе є҆гѡ̀.

²²А҆́ще же ѿ ни́вы, ю҆́же стѧжа̀, ѩ҆́же нѣ́сть ѿ села̀ ѡ҆держа́нїѧ є҆гѡ̀, ѡ҆свѧти́тъ гд҇ѹ,

²³да сочте́тъ є҆мѹ̀ жре́цъ ѡ҆ста́нокъ цѣны̀ ѿ лѣ́та ѡ҆ставле́нїѧ, и҆ да ѿда́стъ цѣ́нѹ въ то́й де́нь ст҃ѹ гд҇ѹ:

²⁴и҆ въ лѣ́то ѡ҆ставле́нїѧ да ѿда́стсѧ ни́ва человѣ́кѹ, ѿ негѡ́же притѧжа̀ ю҆̀, є҆гѡ́же бѣ̀ ѡ҆держа́нїе землѝ.

²⁵И҆ всѧ́ка цѣна̀ да бѹ́детъ вѣ́сами свѧты́ми, два́десѧть пѣ́нѧзей бѹ́детъ дїдра́хма.

²⁶И҆ всѧ́къ пе́рвенецъ, и҆́же а҆́ще роди́тсѧ въ скотѣ̀ твое́мъ, да бѹ́детъ гд҇ѹ, и҆ да не ѡ҆свѧти́тъ є҆гѡ̀ никто́же: а҆́ще теле́цъ, а҆́ще ѻ҆вча̀, гд҇ѹ є҆́сть.

²⁷А҆́ще же ѿ четвероно́жныхъ нечи́стыхъ, да премѣни́тъ по цѣнѣ̀ є҆гѡ̀, и҆ да приложи́тъ пѧ́тѹю ча́сть є҆гѡ̀ къ семѹ̀, и҆ да бѹ́детъ є҆мѹ̀: а҆́ще же не и҆скѹ́питсѧ, да прода́стсѧ по цѣнѣ̀ є҆гѡ̀.

²⁸Всѧ́къ же ѡ҆бѣ́тъ, є҆го́же а҆́ще ѡ҆бѣща́етъ человѣ́къ гд҇ѹ ѿ всѣ́хъ, є҆ли҄ка є҆мѹ̀ сѹ́ть, ѿ человѣ́ка да́же до скота̀, и҆ ѿ ни́въ ѡ҆держа́нїѧ є҆гѡ̀, не прода́стсѧ, нижѐ и҆скѹ́питсѧ всѧ́кїй ѡ҆бѣ́тъ ст҃ъ ст҃ы́хъ бѹ́детъ гд҇ѹ.

²⁹И҆ всѧ́къ ѡ҆бѣ́тъ, и҆́же а҆́ще ѡ҆бѣща́нъ бѹ́детъ ѿ человѣ҄къ, не и҆скѹ́питсѧ, но сме́ртїю да ѹ҆мертви́тсѧ.

³⁰Всѧ́ка десѧти́на землѝ, ѿ сѣ́мене земна́гѡ и҆ ѿ плода̀ древѧ́нагѡ гд҇ѹ є҆́сть, ст҃о гд҇ѹ.

³¹А҆́ще же и҆скѹпѹ́ѧ и҆скѹ́питъ человѣ́къ десѧти́нѹ свою̀, пѧ́тѹю ча́сть є҆гѡ̀ да приложи́тъ къ немѹ̀, и҆ да бѹ́детъ є҆мѹ̀.

³²И҆ всѧ́ка десѧти́на волѡ́въ и҆ ѻ҆ве́цъ, и҆ всѧ́ко, є҆́же а҆́ще прїи́детъ въ число̀ под̾ же́злъ десѧ́тое, бѹ́детъ ст҃о гд҇ѹ.

³³Не премѣни́ши до́брагѡ ѕлы́мъ, нижѐ до́брымъ ѕла́гѡ: а҆́ще же премѣнѧ́ѧ премѣни́ши є҆̀, то̀ и҆ премѣне́нїе є҆гѡ̀ бѹ́детъ ст҃о, да не и҆скѹ́питсѧ,

³⁴Сїѧ҄ сѹ́ть за́пѡвѣди, ѩ҆̀же заповѣ́да гд҇ь мѡѷсе́ю къ сынѡ́мъ ї҆и҃лєвымъ на горѣ̀ сїна́йстѣй.