Read Библия Церковнославянская Леѵі́тъ 3 Bible Online

Леѵі́тъ 3 - Библия Церковнославянская bible

Леѵі́тъ 3

¹А҆́ще же же́ртва спасе́нїѧ да́ръ є҆гѡ̀ гд҇ѹ, а҆́ще ѹ҆́бѡ ѿ говѧ́дъ є҆̀ принесе́тъ, а҆́ще мѹ́жескъ по́лъ и҆лѝ же́нскъ, непоро́ченъ да принесе́тъ є҆̀ пред̾ гд҇а:

²и҆ возложи́тъ рѹ́цѣ своѝ на главѹ̀ да́ра, и҆ да зако́летъ и҆̀ пред̾ гд҇емъ ѹ҆ две́рїй ски́нїи свидѣ́нїѧ: и҆ да возлїю́тъ сы́нове а҆арѡ҄ни жерцы̀ кро́вь на ѻ҆лта́рь всесожже́нїй ѡ҆́крестъ,

³и҆ да принесѹ́тъ ѿ же́ртвы спасе́нїѧ прино́съ гд҇ѹ, тѹ́къ покрыва́ющїй ѹ҆тро́бѹ, и҆ ве́сь тѹ́къ и҆́же на ѹ҆тро́бѣ,

⁴и҆ ѻ҆́бѣ пѡ́чки, и҆ тѹ́къ и҆́же на ни́хъ и҆ и҆́же на сте́гнахъ, и҆ препо́нкѹ, ѩ҆́же на пе́чени, съ по́чками ѿи́метъ:

⁵и҆ да вознесѹ́тъ ѧ҆̀ сы́нове а҆арѡ҄ни жерцы̀ на ѻ҆лта́рь во всесожжє́нїѧ на дрова̀ сѹ҄щаѧ на ѻ҆гнѝ, ѩ҆̀же на ѻ҆лтарѝ: прино́съ вонѧ̀ благово́нїѧ гд҇ѹ.

⁶А҆́ще же ѿ ѻ҆ве́цъ да́ръ є҆гѡ̀ же́ртва спасе́нїѧ гд҇ѹ, мѹ́жескъ по́лъ и҆лѝ же́нскъ, непоро́ченъ да принесе́тъ є҆̀.

⁷А҆́ще а҆́гнца принесе́тъ да́ръ сво́й, да приведе́тъ є҆го̀ пред̾ гд҇а,

⁸и҆ да возложи́тъ рѹ́кѹ на главѹ̀ да́ра своегѡ̀, и҆ да зако́летъ є҆го̀ ѹ҆ две́рїй ски́нїи свидѣ́нїѧ: и҆ да пролїю́тъ сы́нове а҆арѡ҄ни жерцы̀ кро́вь на ѻ҆лта́рь ѡ҆́крестъ,

⁹и҆ да принесе́тъ ѿ же́ртвы спасе́нїѧ прино́съ гд҇ѹ, тѹ́къ и҆ чре́сла чи҄ста съ лѧ́двїѧми да ѿлѹчи́тъ и҆̀: и҆ ве́сь тѹ́къ покрыва́ющїй ѹ҆тро́бѹ, и҆ ве́сь тѹ́къ и҆́же на ѹ҆тро́бѣ,

¹⁰и҆ ѻ҆́бѣ пѡ́чки, и҆ тѹ́къ и҆́же на ни́хъ, и҆́же на сте́гнахъ: и҆ препо́нкѹ, ѩ҆́же на пе́чени, съ по́чками ѿе́мь,

¹¹да вознесе́тъ жре́цъ на ѻ҆лта́рь: вонѧ̀ благоѹха́нїѧ, прино́съ гд҇ви.

¹²А҆́ще же ѿ козлѡ́въ да́ръ є҆гѡ̀ гд҇ѹ, да принесе́тъ пред̾ гд҇а:

¹³и҆ возложи́тъ рѹ́цѣ на главѹ̀ є҆гѡ̀, и҆ да зако́лютъ є҆̀ пред̾ гд҇емъ ѹ҆ две́рїй ски́нїи свидѣ́нїѧ: и҆ да пролїю́тъ сы́нове а҆арѡ҄ни жерцы̀ кро́вь на ѻ҆лта́рь ѡ҆́колѡ:

¹⁴и҆ да вознесе́тъ ѿ негѡ̀ прино́съ гд҇ѹ, тѹ́къ покрыва́ющїй ѹ҆тро́бѹ, и҆ ве́сь тѹ́къ и҆́же на ѹ҆тро́бѣ,

¹⁵и҆ ѻ҆́бѣ пѡ́чки, и҆ ве́сь тѹ́къ, и҆́же на ни́хъ, и҆́же на сте́гнахъ, и҆ препо́нкѹ, ѩ҆́же на пе́чени, съ по́чками ѿлѹчи́тъ:

¹⁶и҆ да вознесе́тъ жре́цъ на ѻ҆лта́рь, прино́съ вонѧ̀ благово́нїѧ гд҇ѹ: ве́сь тѹ́къ гд҇ѹ.

¹⁷Зако́нное въ вѣ́ки въ ро́ды ва́шѧ, во всѧ́комъ ѡ҆бита́нїи ва́шемъ: всѧ́кагѡ тѹ́ка и҆ всѧ́кїѧ кро́ве да не ѩ҆́сте.