Read Библия Церковнославянская Леѵі́тъ 4 Bible Online

Леѵі́тъ 4 - Библия Церковнославянская bible

Леѵі́тъ 4

¹И҆ речѐ гд҇ь къ мѡѷсе́ю, гл҃ѧ:

²рцы̀ къ сынѡ́мъ ї҆и҃лєвымъ, глаго́лѧ: дѹша̀ а҆́ще согрѣши́тъ пред̾ гд҇емъ не хотѧ́щи ѿ всѣ́хъ повелѣ́нїй гд҇нихъ, и҆́хже не лѣ́ть є҆́сть твори́ти, и҆ сотвори́тъ є҆ди́но что̀ ѿ ни́хъ:

³а҆́ще ѹ҆́бѡ а҆рхїере́й пома́занный согрѣши́тъ, во є҆́же лю́демъ согрѣши́ти, и҆ да приведе́тъ ѡ҆ грѣсѣ̀ свое́мъ, и҆́мже согрѣши́лъ, телца̀ ѿ говѧ́дъ непоро́чна гд҇ви ѡ҆ грѣсѣ̀:

⁴и҆ да приведе́тъ телца̀ къ две́ремъ ски́нїи свидѣ́нїѧ пред̾ гд҇а, и҆ да возложи́тъ рѹ́кѹ свою̀ на главѹ̀ телца̀ пред̾ гд҇емъ, и҆ да зако́летъ телца̀ пред̾ гд҇емъ:

⁵и҆ взе́мъ жре́цъ пома́занный соверше́нъ рѹка́ми ѿ кро́ве телца̀, и҆ да внесе́тъ ю҆̀ въ ски́нїю свидѣ́нїѧ,

⁶и҆ да ѡ҆мо́читъ жре́цъ пе́рстъ въ кро́ви, и҆ да покропи́тъ ѿ кро́ве седми́жды пе́рстомъ пред̾ гд҇емъ, ѹ҆ завѣ́сы ст҃ы́ни:

⁷и҆ да возложи́тъ жре́цъ ѿ кро́ве те́лчи на ро́ги ѻ҆лтарѧ̀ ѳѷмїа́ма сложе́нїѧ и҆́же пред̾ гд҇емъ, и҆́же є҆́сть въ ски́нїи свидѣ́нїѧ, и҆ всю̀ кро́вь те́лчѹ да и҆злїе́тъ ѹ҆ стоѧ́ла ѻ҆лтарѧ̀ всесожже́нїй, и҆́же є҆́сть ѹ҆ две́рїй ски́нїи свидѣ́нїѧ,

⁸и҆ ве́сь тѹ́къ телца̀, и҆́же ѡ҆ грѣсѣ̀, да ѿи́метъ ѿ негѡ̀, тѹ́къ покрыва́ющїй ѹ҆тро́бѹ, и҆ ве́сь тѹ́къ и҆́же на ѹ҆тро́бѣ,

⁹и҆ ѻ҆́бѣ пѡ́чки, и҆ тѹ́къ и҆́же на ни́хъ, и҆́же є҆́сть на сте́гнахъ, и҆ препо́нкѹ, ѩ҆́же на пе́чени, съ по́чками ѿи́метъ є҆̀,

¹⁰ѩ҆́коже ѿе́млетсѧ ѻ҆́ное ѿ телца̀ же́ртвы спасе́нїѧ, и҆ да вознесе́тъ жре́цъ на ѻ҆лта́рь приноше́нїѧ:

¹¹и҆ ко́жѹ те́лчѹ, и҆ всю̀ є҆гѡ̀ пло́ть со главо́ю, и҆ съ кра́йними частмѝ, и҆ со ѹ҆тро́бою, и҆ съ мѡты́лы:

¹²и҆ да и҆знесѹ́тъ всего̀ телца̀ внѣ̀ полка̀ на мѣ́сто чи́сто, и҆дѣ́же и҆зсыпа́ютъ пе́пелъ, и҆ да сожгѹ́тъ є҆го̀ на дрова́хъ ѻ҆гне́мъ: на мѣ́стѣ и҆зсыпа́нїѧ пе́пела да сожже́нъ бѹ́детъ.

¹³А҆́ще же ве́сь со́нмъ сынѡ́въ ї҆и҃левыхъ согрѣши́тъ не хотѧ́щь, и҆ ѹ҆таи́тсѧ глаго́лъ ѿ лица̀ со́нма, и҆ сотворѧ́тъ є҆ди́нѹ ѿ всѣ́хъ за́повѣдїй гд҇нихъ, є҆ѧ́же не лѣ́ть є҆́сть твори́ти, и҆ согрѣша́тъ,

¹⁴и҆ ѹ҆вѣ́стсѧ и҆̀мъ грѣ́хъ, и҆́мже согрѣши́ша въ не́мъ: и҆ да приведе́тъ со́нмъ телца̀ ѿ волѡ́въ непоро́чна ѡ҆ грѣсѣ̀, и҆ приведе́тъ и҆̀ пред̾ двє́ри ски́нїи свидѣ́нїѧ:

¹⁵и҆ да возложа́тъ ста́рцы со́нма рѹ́ки своѧ҄ на главѹ̀ телца̀ пред̾ гд҇емъ, и҆ да зако́лютъ телца̀ пред̾ гд҇емъ,

¹⁶и҆ да внесе́тъ жре́цъ пома́занный ѿ кро́ве те́лчи въ ски́нїю свидѣ́нїѧ,

¹⁷и҆ да ѡ҆мо́читъ жре́цъ пе́рстъ сво́й въ кро́ви те́лчи, и҆ да покропи́тъ седми́жды пред̾ гд҇емъ, пред̾ завѣ́сою ст҃ы́ни:

¹⁸и҆ ѿ кро́ве да возложи́тъ жре́цъ на ро́ги ѻ҆лтарѧ̀ ѳѷмїа́мѡвъ сложе́нїѧ, и҆́же є҆́сть пред̾ гд҇емъ, и҆́же є҆́сть въ ски́нїи свидѣ́нїѧ: и҆ всю̀ кро́вь да и҆злїе́тъ ѹ҆ стоѧ́ла ѻ҆лтарѧ̀ приноше́нїй, и҆́же є҆́сть ѹ҆ две́рїй ски́нїи свидѣ́нїѧ,

¹⁹и҆ ве́сь тѹ́къ є҆гѡ̀ да во́зметъ ѿ негѡ̀, и҆ вознесе́тъ на ѻ҆лта́рь:

²⁰и҆ сотвори́тъ телцѹ̀ семѹ̀, ѩ҆́коже сотворѝ телцѹ̀, и҆́же ѡ҆ грѣсѣ̀, та́кѡ сотвори́тсѧ: и҆ да помо́литсѧ ѡ҆ ни́хъ жре́цъ, и҆ ѡ҆ста́витсѧ и҆̀мъ грѣ́хъ:

²¹и҆ да и҆знесѹ́тъ телца̀ всего̀ внѣ̀ полка̀, и҆ да сожгѹ́тъ телца̀, ѩ҆́коже сожго́ша телца̀ пе́рвагѡ: грѣ́хъ (бо) со́нма є҆́сть.

²²А҆́ще же кнѧ́зь согрѣши́тъ, и҆ сотвори́тъ є҆ди́нѹ ѿ всѣ́хъ за́повѣдїй гд҇а бг҃а своегѡ̀, не хотѧ̀, и҆́же не лѣ́ть є҆́сть твори́ти, и҆ согрѣши́тъ, и҆ престѹ́питъ,

²³и҆ ѹ҆вѣ́стсѧ є҆мѹ̀ грѣ́хъ, и҆́мже согрѣшѝ въ не́мъ: да принесе́тъ да́ръ сво́й козла̀ ѿ ко́зъ мѹ́жескъ по́лъ непоро́ченъ грѣха̀ ра́ди,

²⁴и҆ возложи́тъ рѹ́кѹ свою̀ на главѹ̀ козла̀: и҆ да зако́лютъ є҆го̀ на мѣ́стѣ, и҆дѣ́же закала́ютъ всесожжє́нїѧ пред̾ гд҇емъ: ѡ҆ грѣсѣ́ (бо) є҆́сть:

²⁵и҆ да возложи́тъ жре́цъ ѿ кро́ве, ѩ҆́же ѡ҆ грѣсѣ̀, пе́рстомъ на ро́ги ѻ҆лтарѧ̀ всесожже́нїй, и҆ всю̀ кро́вь є҆гѡ̀ да и҆злїе́тъ ѹ҆ стоѧ́ла ѻ҆лтарѧ̀ всесожже́нїй,

²⁶и҆ ве́сь тѹ́къ є҆гѡ̀ вознесе́тъ на ѻ҆лта́рь, ѩ҆́коже тѹ́къ же́ртвы спасе́нїѧ: и҆ да помо́литсѧ ѡ҆ не́мъ жре́цъ грѣха̀ ра́ди є҆гѡ̀, и҆ ѡ҆ста́витсѧ є҆мѹ̀.

²⁷А҆́ще же дѹша̀ є҆ди́на согрѣши́тъ не хотѧ́щи ѿ люді́й землѝ, внегда̀ сотвори́ти є҆ди́нѹ ѿ всѣ́хъ за́повѣдїй гд҇нихъ, є҆́же не лѣ́ть є҆́сть твори́ти, и҆ согрѣши́тъ,

²⁸и҆ ѹ҆вѣ́стсѧ є҆мѹ̀ грѣ́хъ, и҆́мже согрѣшѝ въ не́мъ, и҆ да принесе́тъ да́ръ сво́й ко́зѹ ѿ ко́зъ же́нскъ по́лъ непоро́чнѹ, да принесе́тъ грѣха̀ ра́ди, и҆́мже согрѣшѝ:

²⁹и҆ да возложи́тъ рѹ́кѹ свою̀ на главѹ̀ грѣха̀ своегѡ̀: и҆ зако́лютъ ко́зѹ, ѩ҆́же грѣха̀ ра́ди, на мѣ́стѣ, и҆дѣ́же закала́ютъ всесожжє́нїѧ:

³⁰и҆ да во́зметъ жре́цъ ѿ кро́ве є҆ѧ̀ пе́рстомъ, и҆ да возложи́тъ на ро́ги ѻ҆лтарѧ̀ всесожже́нїй, и҆ всю̀ кро́вь є҆ѧ̀ и҆злїе́тъ ѹ҆ стоѧ́ла ѻ҆лтарѧ̀:

³¹и҆ ве́сь тѹ́къ да ѿи́метъ, ѩ҆́коже ѿе́млетсѧ тѹ́къ ѿ же́ртвы спасе́нїѧ, и҆ да вознесе́тъ жре́цъ на ѻ҆лта́рь въ воню̀ благово́нїѧ гд҇ѹ: и҆ да помо́литсѧ жре́цъ ѡ҆ не́мъ, и҆ ѡ҆ста́витсѧ є҆мѹ̀.

³²А҆́ще же ѻ҆́вцѹ принесе́тъ да́ръ сво́й грѣха̀ ра́ди, же́нскъ по́лъ непоро́ченъ да принесе́тъ ю҆̀:

³³и҆ да возложи́тъ рѹ́кѹ свою̀ на главѹ̀ ѩ҆́же ѡ҆ грѣсѣ̀, и҆ да зако́лютъ ю҆̀ грѣха̀ ра́ди на мѣ́стѣ, на не́мже закала́ютъ всесожже́нїѧ (на мѣ́стѣ ст҃ѣ):

³⁴и҆ взе́мъ жре́цъ ѿ кро́ве, ѩ҆́же ѡ҆ грѣсѣ̀, пе́рстомъ свои́мъ, да возложи́тъ на ро́ги ѻ҆лтарѧ̀ всесожже́нїѧ: и҆ всю̀ кро́вь є҆ѧ̀ да и҆злїе́тъ ѹ҆ стоѧ́ла ѻ҆лтарѧ̀ всесожже́нїѧ,

³⁵и҆ ве́сь тѹ́къ є҆ѧ̀ да ѿи́метъ, ѩ҆́коже ѿе́млетсѧ тѹ́къ ѻ҆вцы̀ ѿ же́ртвы спасе́нїѧ: и҆ да возложи́тъ є҆го̀ жре́цъ на ѻ҆лта́рь на всесожже́нїе гд҇не: и҆ да помо́литсѧ за него̀ жре́цъ ѡ҆ грѣсѣ̀, и҆́мже согрѣшѝ, и҆ ѡ҆ста́витсѧ є҆мѹ̀.