Read Библия Церковнославянская I҆еремі́и 14 Bible Online

I҆еремі́и 14 - Библия Церковнославянская bible

I҆еремі́и 14

¹И҆ бы́сть сло́во гд҇не ко ї҆еремі́и ѡ҆ бездо́ждїи.

²Рыда́ла ї҆ѹде́а, и҆ врата̀ є҆ѧ̀ разрѹши́шасѧ, и҆ ѡ҆темни́шасѧ на землѝ, и҆ во́пль ї҆ер҇ли́ма взы́де.

³И҆ вельмѡ́жи є҆гѡ̀ посла́ша ме́ншихъ свои́хъ къ водѣ̀: прїидо́ша на кла҄дѧзи и҆ не ѡ҆брѣто́ша воды̀, и҆ ѿнесо́ша сосѹ́ды своѧ҄ тщы̀: постыжде́ни сѹ́ть и҆ посра́млени, и҆ покры́ша главы҄ своѧ҄.

⁴И҆ дѣла̀ землѝ ѡ҆скѹдѣ́ша, ѩ҆́кѡ не бѧ́ше дождѧ̀ на зе́млю: постыжде́ни сѹ́ть земледѣ́лцы, покры́ша главы҄ своѧ҄.

⁵И҆ є҆лє́ницы на ни́вѣ роди́ша и҆ ѡ҆ста́виша, ѩ҆́кѡ не бѣ̀ травы̀.

⁶Ѻ҆на́гри ста́ша на ка́менїихъ, бра́ша въ себѐ вѣ́тръ ѩ҆́кѡ ѕмі́еве, ѡ҆скѹдѣ́ша ѻ҆́чи и҆́хъ, ѩ҆́кѡ не бѣ̀ травы̀.

⁷Беззакѡ́нїѧ на҄ша противѹста́ша на́мъ: гд҇и, сотворѝ на́мъ ра́ди и҆́мене твоегѡ̀, ѩ҆́кѡ мно́зи грѣсѝ на́ши пред̾ тобо́ю, тебѣ̀ согрѣши́хомъ.

⁸Ѡ҆жида́нїе ї҆и҃лево, гд҇и, сп҃си́телю на́шъ во вре́мѧ ско́рби! вскѹ́ю ѩ҆́кѡ пришле́цъ є҆сѝ на землѝ и҆ ѩ҆́кѡ пѹ́тникъ ѹ҆кланѧ́ющьсѧ во вита́лище;

⁹Є҆да̀ бѹ́деши ѩ҆́коже человѣ́къ спѧ́й, и҆лѝ а҆́ки мѹ́жъ не могі́й спастѝ; ты́ же въ на́съ є҆сѝ, гд҇и, и҆ и҆́мѧ твоѐ при́звано бы́сть на на́съ, не забѹ́ди на́съ.

¹⁰Сїѧ҄ гл҃етъ гд҇ь лю́демъ си҄мъ: возлюби́ша подвиза́ти но́зѣ своѝ и҆ не ѹ҆поко́ишасѧ, и҆ бг҃ъ не бл҃гопоспѣшѝ въ ни́хъ, нн҃ѣ воспомѧне́тъ беззакѡ́нїѧ и҆́хъ и҆ посѣти́тъ грѣхѝ и҆́хъ.

¹¹И҆ речѐ гд҇ь ко мнѣ̀: не моли́сѧ ѡ҆ лю́дехъ си́хъ во бла́го:

¹²є҆гда̀ пости́тисѧ бѹ́дѹтъ, не ѹ҆слы́шѹ проше́нїѧ и҆́хъ, и҆ а҆́ще принесѹ́тъ всесожжє́нїѧ и҆ жє́ртвы, не бл҃говолю̀ въ ни́хъ: ѩ҆́кѡ мече́мъ и҆ гла́домъ и҆ мо́ромъ а҆́зъ сконча́ю и҆̀хъ.

¹³И҆ реко́хъ: сы́й гд҇и бж҃е, сѐ, проро́цы и҆́хъ прорица́ютъ и҆ глаго́лютъ: не ѹ҆́зрите меча̀, и҆ гла́дъ не бѹ́детъ ва́мъ, но и҆́стинѹ и҆ ми́ръ да́мъ на землѝ и҆ на мѣ́стѣ се́мъ.

¹⁴И҆ речѐ гд҇ь ко мнѣ̀: лжи́вѡ проро́цы прорица́ютъ во и҆́мѧ моѐ, не посла́хъ и҆́хъ, ни заповѣ́дахъ и҆̀мъ, ни гл҃алъ є҆́смь къ ни҄мъ: поне́же видѣ҄нїѧ лжи҄ва и҆ гада҄нїѧ и҆ волшє́бства и҆ произво́лы се́рдца своегѡ̀ ті́и прорица́ютъ ва́мъ.

¹⁵Сегѡ̀ ра́ди сїѧ҄ гл҃етъ гд҇ь ѡ҆ проро́цѣхъ, и҆̀же проро́чествѹютъ во и҆́мѧ моѐ лѡ́жнаѧ, и҆ а҆́зъ не посла́хъ и҆́хъ, и҆̀же глаго́лютъ: ме́чь и҆ гла́дъ не бѹ́детъ на землѝ се́й: сме́ртїю лю́тою ѹ҆́мрѹтъ и҆ гла́домъ сконча́ютсѧ проро́цы ті́и.

¹⁶И҆ лю́дїе, и҆̀мже ті́и проро́чествѹютъ, бѹ́дѹтъ и҆зве́ржени на пѹте́хъ ї҆ер҇ли́ма ѿ лица̀ меча̀ и҆ гла́да, и҆ не бѹ́детъ погреба́ѧй и҆̀хъ, и҆ жєны̀ и҆́хъ и҆ сы́нове и҆́хъ и҆ дщє́ри и҆́хъ, и҆ и҆злїю̀ на ни́хъ ѕла҄ѧ и҆́хъ.

¹⁷И҆ рече́ши къ ни҄мъ сло́во сїѐ: да и҆зведѹ́тъ ѻ҆́чи ва́ши сле́зы де́нь и҆ но́щь, и҆ да не преста́нѹтъ, ѩ҆́кѡ сотре́нїемъ вели́кимъ сотре́на (дѣ́ва) дще́рь люді́й мои́хъ и҆ ѩ҆́звою ѕло́ю ѕѣлѡ̀.

¹⁸А҆́ще и҆зы́дѹ на по́ле, и҆ сѐ, закла́ни мече́мъ: и҆ а҆́ще вни́дѹ во гра́дъ, и҆ сѐ, и҆ста́ѧвшїи гла́домъ: ѩ҆́кѡ проро́къ и҆ свѧще́нникъ ѿидо́ша въ зе́млю, є҆ѧ́же не вѣ́дѧхѹ.

¹⁹Є҆да̀ ѿме́щѹщь ѿве́рглъ є҆сѝ ї҆ѹ́дѹ, и҆ ѿ сїѡ́на ѿстѹпѝ дш҃а̀ твоѧ̀; вскѹ́ю порази́лъ є҆сѝ на́съ, и҆ нѣ́сти на́мъ и҆сцѣле́нїѧ; жда́хомъ ми́ра, и҆ не бѧ́хѹ блага҄ѧ: вре́мене ѹ҆врачева́нїѧ, и҆ сѐ, боѧ́знь.

²⁰Позна́хомъ, гд҇и, грѣхѝ на́шѧ, беззакѡ́нїѧ ѻ҆тє́цъ на́шихъ, ѩ҆́кѡ согрѣши́хомъ пред̾ тобо́ю.

²¹Преста́ни ра́ди и҆́мене твоегѡ̀, не погѹбѝ пр҇то́ла сла́вы твоеѧ̀: воспомѧнѝ, не разорѝ завѣ́та твоегѡ̀ и҆́же съ на́ми.

²²Є҆да̀ є҆́сть во и҆зва́ѧнныхъ ѩ҆зы́ческихъ, и҆́же дожди́тъ; и҆лѝ небеса̀ мо́гѹтъ да́ти вла́гѹ свою̀; не ты́ ли є҆сѝ, гд҇и бж҃е на́шъ; и҆ пожде́мъ тебѐ, гд҇и, ты́ бо сотвори́лъ є҆сѝ всѧ҄ сїѧ҄.