Read Библия Церковнославянская I҆еремі́и 16 Bible Online

I҆еремі́и 16 - Библия Церковнославянская bible

I҆еремі́и 16

¹И҆ бы́сть сло́во гд҇не ко мнѣ̀, рекѹ́щее: и҆ ты̀ да не по́ймеши жены̀,

²и҆ не роди́тсѧ тебѣ̀ сы́нъ, нижѐ дще́рь на мѣ́стѣ се́мъ.

³ѩ҆́кѡ сїѧ҄ гл҃етъ гд҇ь ѡ҆ сынѣ́хъ и҆ дще́рехъ, и҆̀же родѧ́тсѧ на мѣ́стѣ се́мъ, и҆ ѡ҆ ма́терехъ и҆́хъ, ѩ҆̀же роди́ша и҆̀хъ, и҆ ѡ҆ ѻ҆тцѣ́хъ и҆́хъ роди́вшихъ ѧ҆̀ въ землѝ се́й:

⁴сме́ртїю лю́тою и҆зо́мрѹтъ, не ѡ҆пла́чѹтсѧ и҆ не погребѹ́тсѧ: во ѡ҆́бразъ на лицы̀ землѝ бѹ́дѹтъ и҆ мече́мъ падѹ́тъ и҆ гла́домъ сконча́ютсѧ, и҆ бѹ́дѹтъ трѹ́пїе и҆́хъ во снѣ́дь пти́цамъ небє́снымъ и҆ ѕвѣрє́мъ земны҄мъ.

⁵Сїѧ҄ гл҃етъ гд҇ь: да не вни́деши въ до́мъ и҆́хъ пи́рный, ни да хо́диши пла́кати, нижѐ да рыда́еши и҆̀хъ, поне́же ѿѧ́хъ ми́ръ мо́й ѿ люді́й си́хъ, речѐ гд҇ь, мл҇ть и҆ щедрѡ́ты.

⁶И҆ ѹ҆́мрѹтъ вели́цыи и҆ ма́лїи въ землѝ се́й: не погребѹ́тсѧ, ни ѡ҆пла́чѹтсѧ, нижѐ терза́нїе ѡ҆ ни́хъ бѹ́детъ, нижѐ ѡ҆брі́ютсѧ ра́ди и҆́хъ,

⁷и҆ не прело́мѧтъ хлѣ́ба во стена́нїи и҆́хъ ко ѹ҆тѣше́нїю над̾ ме́ртвымъ, и҆ не дадѹ́тъ и҆̀мъ питїѧ̀ ча́ши ко ѹ҆тѣше́нїю над̾ ѻ҆тце́мъ и҆ ма́терїю и҆́хъ.

⁸И҆ въ до́мъ пи́рный да не вни́деши сѣдѣ́ти съ ни́ми, є҆́же ѩ҆́сти и҆ пи́ти.

⁹Поне́же сїѧ҄ гл҃етъ гд҇ь си́лъ, бг҃ъ ї҆и҃левъ: сѐ, а҆́зъ ѿимѹ̀ ѿ мѣ́ста сегѡ̀ во ѻ҆́чїю ва́шєю и҆ во дне́хъ ва́шихъ гла́съ ра́дости и҆ гла́съ весе́лїѧ, гла́съ жениха̀ и҆ гла́съ невѣ́сты.

¹⁰И҆ бѹ́детъ, є҆гда̀ возвѣсти́ши лю́демъ си҄мъ всѧ҄ словеса̀ сїѧ҄, и҆ рекѹ́тъ къ тебѣ̀: вскѹ́ю гл҃алъ є҆́сть гд҇ь на на́съ всѧ҄ ѕла҄ѧ сїѧ҄; ка́ѧ непра́вда на́ша; и҆ кі́й грѣ́хъ на́шъ, и҆́мже согрѣши́хомъ гд҇ѹ бг҃ѹ на́шемѹ;

¹¹И҆ рече́ши къ ни҄мъ: поне́же ѡ҆ста́виша мѧ̀ ѻ҆тцы̀ ва́ши, гл҃етъ гд҇ь, и҆ и҆до́ша в̾слѣ́дъ богѡ́въ чѹжди́хъ, и҆ послѹжи́ша и҆̀мъ и҆ поклони́шасѧ и҆̀мъ, мене́ же ѡ҆ста́виша и҆ зако́на моегѡ̀ не сохрани́ша:

¹²и҆ вы̀ го́рше дѣ́ласте, не́же ѻ҆тцы̀ ва́ши, и҆ сѐ, вы̀ хо́дите кі́йждо в̾слѣ́дъ по́хотей се́рдца ва́шегѡ лѹка́вагѡ, є҆́же не слѹ́шати менѐ:

¹³и҆ и҆зри́нѹ ва́съ ѿ землѝ сеѧ̀ въ зе́млю, є҆ѧ́же не вѣ́сте вы̀ и҆ ѻ҆тцы̀ ва́ши, и҆ послѹ́жите та́мѡ богѡ́мъ чѹжди҄мъ де́нь и҆ но́щь, и҆̀же не дадѹ́тъ ва́мъ ми́лости.

¹⁴Сегѡ̀ ра́ди, сѐ, дні́е грѧдѹ́тъ, гл҃етъ гд҇ь, и҆ не рекѹ́тъ ктомѹ̀: жи́въ гд҇ь, и҆́же и҆зведѐ сынѡ́въ ї҆и҃левыхъ ѿ землѝ є҆гѵ́петскїѧ:

¹⁵но: живе́тъ гд҇ь, и҆́же и҆зведѐ сынѡ́въ ї҆и҃левыхъ ѿ землѝ сѣ́верныѧ и҆ ѿ всѣ́хъ стра́нъ, а҆́може и҆зве́ржени бы́ша: и҆ возвращѹ̀ и҆̀хъ въ зе́млю и҆́хъ, ю҆́же да́хъ ѻ҆тцє́мъ и҆́хъ.

¹⁶Сѐ, а҆́зъ послю̀ ры҄бари мнѡ́ги, речѐ гд҇ь, и҆ ѹ҆ловѧ́тъ и҆̀хъ: и҆ посе́мъ послю̀ мнѡ́ги ловцы̀, и҆ ѹ҆ловѧ́тъ и҆̀хъ на всѧ́цѣй горѣ̀ и҆ на всѧ́цѣмъ хо́лмѣ и҆ ѿ пеще́ръ ка́менныхъ.

¹⁷ѩ҆́кѡ ѻ҆́чи моѝ на всѣ́хъ пѹте́хъ и҆́хъ, не сокрове́ни сѹ́ть ѿ лица̀ моегѡ̀, и҆ не ѹ҆тає́на сѹ́ть беззакѡ́нїѧ и҆́хъ ѿ ѻ҆́чїю моє́ю.

¹⁸И҆ возда́мъ пе́рвѣе сѹгѹ҄баѧ беззакѡ́нїѧ и҆ грѣхѝ и҆́хъ, и҆́миже ѡ҆скверни́ша зе́млю мою̀ въ мертвечи́нахъ ме́рзостей свои́хъ и҆ въ беззако́нїихъ свои́хъ, и҆́миже напо́лниша достоѧ́нїе моѐ.

¹⁹Гд҇и, ты̀ крѣ́пость моѧ̀ и҆ по́мощь моѧ̀ и҆ прибѣ́жище моѐ во дне́хъ ѕлы́хъ: къ тебѣ̀ ѩ҆зы́цы прїи́дѹтъ ѿ послѣ́днихъ землѝ и҆ рекѹ́тъ: вои́стиннѹ лжи́выхъ стѧжа́ша ѻ҆тцы̀ на́ши їдѡлѡвъ, и҆ нѣ́сть въ ни́хъ по́льзы.

²⁰Є҆да̀ сотвори́тъ себѣ̀ человѣ́къ бо́ги, и҆ ті́и не сѹ́ть бо́зи;

²¹Сегѡ̀ ра́ди, сѐ, а҆́зъ покажѹ̀ и҆̀мъ во вре́мѧ сїѐ рѹ́кѹ мою̀ и҆ зна́емѹ сотворю̀ и҆̀мъ си́лѹ мою̀, и҆ позна́ютъ, ѩ҆́кѡ и҆́мѧ мнѣ̀ гд҇ь.