Read Библия Церковнославянская I҆еремі́и 18 Bible Online

I҆еремі́и 18 - Библия Церковнославянская bible

I҆еремі́и 18

¹Сло́во, є҆́же бы́сть ко ї҆еремі́и ѿ гд҇а, рекѹ́щее:

²востанѝ и҆ сни́ди въ до́мъ скѹде́льничь, и҆ та́мѡ ѹ҆слы́шиши словеса̀ моѧ҄.

³И҆ снидо́хъ въ до́мъ скѹде́льничь, и҆ сѐ, то́й творѧ́ше дѣ́ло на ка́менехъ.

⁴И҆ разби́сѧ сосѹ́дъ, є҆го́же то́й творѧ́ше ѿ гли́ны рѹка́ма свои́ма: и҆ па́ки то́й сотворѝ и҆з̾ негѡ̀ и҆́ный сосѹ́дъ, ѩ҆́коже ѹ҆го́дно во ѻ҆́чїю є҆гѡ̀ твори́ти.

⁵И҆ бы́сть сло́во гд҇не ко мнѣ̀, рекѹ́щее:

⁶є҆да̀, ѩ҆́коже скѹде́льникъ се́й, не возмогѹ̀ сотвори́ти ва́съ, до́ме ї҆и҃левъ; речѐ гд҇ь: сѐ, ѩ҆́коже бре́нїе въ рѹкѹ̀ скѹде́льника, та́кѡ вы̀ є҆стѐ, до́ме ї҆и҃левъ, въ рѹкѹ̀ моє́ю:

⁷наконе́цъ возгл҃ю на ѩ҆зы́къ и҆ на ца́рство, да и҆скореню̀ и҆̀хъ и҆ разорю̀ и҆ расточѹ̀ ѧ҆̀:

⁸и҆ а҆́ще ѡ҆брати́тсѧ ѩ҆зы́къ то́й ѿ всѣ́хъ лѹка́вствъ свои́хъ, то̀ раска́юсѧ ѡ҆ ѡ҆ѕлобле́нїихъ, ѩ҆̀же помы́слихъ сотвори́ти и҆̀мъ:

⁹и҆ наконе́цъ рекѹ̀ на ѩ҆зы́къ и҆ ца́рство, да возсози́ждѹ и҆ насаждѹ̀ ѧ҆̀,

¹⁰и҆ а҆́ще сотворѧ́тъ лѹка҄ваѧ пред̾ ѻ҆чи́ма мои́ма, є҆́же не послѹ́шати гла́са моегѡ̀, то̀ раска́юсѧ ѡ҆ благи́хъ, ѩ҆̀же гл҃ахъ сотвори́ти и҆̀мъ.

¹¹И҆ нн҃ѣ рцы̀ ко мѹжє́мъ ї҆ѹ҄динымъ и҆ ѡ҆бита́телємъ ї҆ер҇ли́ма, рекі́й: сїѧ҄ речѐ гд҇ь: сѐ, а҆́зъ творю̀ на ва́съ ѕла҄ѧ и҆ мы́шлю на ва́съ ѹ҆мышле́нїе: да ѡ҆брати́тсѧ ѹ҆́бѡ кі́йждо ѿ пѹтѝ своегѡ̀ лѹка́вагѡ, и҆ и҆спра́вите пѹти҄ ва́шѧ и҆ ѹ҆мышлє́нїѧ ва҄ша.

¹²И҆ реко́ша: ѹ҆крѣпи́мсѧ, и҆́бо по развраще́нїємъ на́шымъ по́йдемъ, и҆ кі́йждо ѹ҆го́дное се́рдца своегѡ̀ лѹка́вагѡ сотвори́мъ.

¹³Сегѡ̀ ра́ди сїѧ҄ гл҃етъ гд҇ь: вопроси́те нн҃ѣ ѩ҆зы́кѡвъ, кто̀ слы́ша сицева҄ѧ стра҄шнаѧ, ѩ҆̀же сотворѝ ѕѣлѡ̀ дѣ́ва ї҆и҃лева;

¹⁴є҆да̀ ѡ҆скѹдѣ́ютъ ѿ ка́мене сосцы̀, и҆лѝ снѣ́гъ ѿ лїва́на; є҆да̀ ѹ҆клони́тсѧ вода̀ ѕѣ́лнѡ вѣ́тромъ носи́маѧ;

¹⁵поне́же забы́ша менѐ лю́дїе моѝ всѹ́е жрѹ́ще, и҆ и҆знемо́гѹтъ на пѹте́хъ свои́хъ и҆ на стезѧ́хъ вѣ́чныхъ, є҆́же взы́ти на стєзѝ не и҆мѹ́щыѧ пѹти҄ на хожде́нїе,

¹⁶є҆́же положи́ти зе́млю сво́ю въ запѹстѣ́нїе и҆ во звизда́нїе вѣ́чное: всѧ́къ, и҆́же пре́йдетъ по не́й, почѹди́тсѧ и҆ покива́етъ главо́ю свое́ю:

¹⁷ѩ҆́коже вѣ́тръ палѧ́щь разсѣ́ю и҆̀хъ пред̾ враги҄ и҆́хъ, хребе́тъ, а҆ не лицѐ покажѹ̀ и҆̀мъ въ де́нь поги́бели и҆́хъ.

¹⁸И҆ реко́ша: прїиди́те и҆ ѹ҆мы́слимъ ї҆еремі́ю совѣ́тъ, и҆́бо не поги́бнетъ зако́нъ ѿ свѧще́нника, ни совѣ́тъ ѿ премѹ́драгѡ, ни сло́во ѿ проро́ка: прїиди́те и҆ порази́мъ є҆го̀ ѧ҆зы́комъ, и҆ не во́нмемъ всѣ҄мъ словесє́мъ є҆гѡ̀.

¹⁹Вонмѝ, гд҇и, мнѣ̀ и҆ ѹ҆слы́ши гла́съ ѡ҆правда́нїѧ моегѡ̀.

²⁰Є҆да̀ воздаю́тсѧ ѕла҄ѧ за блага҄ѧ; ѩ҆́кѡ глаго́лаша словеса̀ на дѹ́шѹ мою̀ и҆ мѹчи́телство своѐ сокры́ша мѝ. Помѧнѝ стоѧ́вшаго мѧ̀ пред̾ тобо́ю, є҆́же глаго́лати за ни́хъ блага҄ѧ, да ѿвращѹ̀ гнѣ́въ тво́й ѿ ни́хъ.

²¹Сегѡ̀ ра́ди да́ждь сы́ны и҆́хъ въ гла́дъ и҆ соберѝ и҆̀хъ въ рѹ́цѣ меча̀: да бѹ́дѹтъ жєны̀ и҆́хъ безча҄дны и҆ вдѡвы̀, и҆ мѹ́жїе и҆́хъ да бѹ́дѹтъ ѹ҆бїе́ни сме́ртїю, и҆ ю҆́нѡши и҆́хъ да падѹ́тъ мече́мъ на ра́ти:

²²да бѹ́детъ во́пль въ домѣ́хъ и҆́хъ: наведѝ на ни́хъ разбо́йники внеза́пѹ, поне́же совѣща́ша сло́во, да и҆́мѹтъ мѧ̀, и҆ сѣ҄ти скры́ша на мѧ̀.

²³Ты́ же, гд҇и, вѣ́си ве́сь совѣ́тъ и҆́хъ на мѧ̀ въ сме́рть: да не ѡ҆ч҇тиши беззакѡ́нїѧ и҆́хъ и҆ грѣхѡ́въ и҆́хъ ѿ лица̀ твоегѡ̀ да не и҆згла́диши: да бѹ́детъ болѣ́знь и҆́хъ пред̾ тобо́ю, и҆ во вре́мѧ ѩ҆́рости твоеѧ̀ сотворѝ и҆̀мъ.