Read Библия Церковнославянская I҆еремі́и 19 Bible Online

I҆еремі́и 19 - Библия Церковнославянская bible

I҆еремі́и 19

¹Сїѧ҄ речѐ гд҇ь ко мнѣ̀: и҆дѝ и҆ стѧжѝ сосѹ́дъ скѹде́льничь жже́нъ, и҆ приведѝ ѿ ста́рєцъ людски́хъ и҆ ѿ ста́рєцъ свѧще́нническихъ:

²и҆ и҆зы́ди въ мѣ́сто многогро́бищное сынѡ́въ є҆ннѡ́нихъ, є҆́же є҆́сть бли́з̾ придве́рїѧ вра́тъ харсі́ѳскихъ {со́лнечныхъ}, и҆ прочтѝ та́мѡ всѧ҄ словеса̀, ѩ҆̀же а҆́зъ возгл҃ю тебѣ̀,

³и҆ рече́ши и҆̀мъ: слы́шите сло́во гд҇не, ца́рїе ї҆ѹ҄дины и҆ мѹ́жїе ї҆ѹ҄дины, и҆ ѡ҆бита́телїе ї҆ер҇ли́ма и҆ входѧ́щїи врата́ми си́ми: сїѧ҄ гл҃етъ гд҇ь си́лъ, бг҃ъ ї҆и҃левъ: сѐ, а҆́зъ наведѹ̀ ѕла҄ѧ на мѣ́сто сїѐ, ѩ҆́кѡ всѧ́комѹ слы́шащемѹ сїѧ҄ зазвѹчи́тъ во ѹ҆́шїю є҆гѡ̀:

⁴поне́же ѡ҆ста́виша мѧ̀, и҆ чѹ́жде сотвори́ша мѣ́сто сїѐ, и҆ пожро́ша на не́мъ богѡ́мъ чѹжди҄мъ, и҆́хже не вѣ́дѣша ті́и и҆ ѻ҆тцы̀ и҆́хъ: и҆ ца́рїе ї҆ѹ҄дины напо́лниша мѣ́сто сїѐ кро́ве непови́нныхъ

⁵и҆ созда́ша высѡ́каѧ ваа́лѹ на сожже́нїе сынѡ́въ свои́хъ ѻ҆гне́мъ, во всесожже́нїе ваа́лѹ, ѩ҆̀же не заповѣ́дахъ, ни гл҃ахъ, нижѐ взыдо́ша на се́рдце моѐ.

⁶Сегѡ̀ ра́ди, сѐ, дні́е грѧдѹ́тъ, гл҃етъ гд҇ь, и҆ не прозове́тсѧ ктомѹ̀ мѣ́сто сїѐ [паде́нїе] и҆ мѣ́сто многогро́бищное сынѡ́въ є҆ннѡ́нихъ, но мѣ́сто многогро́бищное [закла́нїѧ]:

⁷и҆ расточѹ̀ совѣ́тъ ї҆ѹ́динъ и҆ совѣ́тъ ї҆ер҇ли́ма въ мѣ́стѣ се́мъ, и҆ превращѹ̀ и҆̀хъ мече́мъ пред̾ враги҄ и҆́хъ и҆ въ рѹкѹ̀ и҆́щѹщихъ дѹ́шъ и҆́хъ: и҆ да́мъ трѹ́пїе и҆́хъ въ ѩ҆́дь пти́цамъ небє́снымъ и҆ ѕвѣрє́мъ земны҄мъ:

⁸и҆ поста́влю гра́дъ се́й въ разоре́нїе и҆ во звизда́нїе: всѧ́къ, и҆́же мимои́детъ, ѡ҆ не́мъ почѹди́тсѧ и҆ позви́ждетъ ѡ҆ все́й ѩ҆́звѣ є҆гѡ̀:

⁹и҆ снѣдѧ́тъ плѡ́ти сынѡ́въ свои́хъ и҆ плѡ́ти дще́рей свои́хъ, и҆ кі́йждо плѡ́ти по́дрѹга своегѡ̀ снѣ́сть во ѡ҆бстоѧ́нїи и҆ въ тѣснотѣ̀, въ не́йже запрѹ́тъ и҆̀хъ вразѝ и҆́хъ, и҆́щѹщїи дѹшѝ и҆́хъ.

¹⁰И҆ да сокрѹши́ши сосѹ́дъ пред̾ ѻ҆чи́ма мѹже́й и҆сходѧ́щихъ съ тобо́ю

¹¹и҆ рече́ши къ ни҄мъ: сїѧ҄ гл҃етъ гд҇ь си́лъ: та́кѡ сокрѹшѹ̀ лю́ди сїѧ҄ и҆ гра́дъ се́й, ѩ҆́коже сокрѹша́етсѧ сосѹ́дъ скѹде́льный, и҆́же не мо́жетъ ктомѹ̀ и҆сцѣли́тисѧ: и҆ въ тѡфе́ѳѣ погребѹ́тсѧ тогѡ̀ ра́ди, ѩ҆́кѡ не бѹ́детъ и҆но́гѡ мѣ́ста на погребе́нїе.

¹²Та́кѡ сотворю̀ мѣ́стѹ семѹ̀, гл҃етъ гд҇ь, и҆ ѡ҆бита́телємъ є҆гѡ̀, да поста́влю гра́дъ то́й ѩ҆́кѡ па́дающь.

¹³И҆ бѹ́дѹтъ до́мы ї҆ер҇ли́ма и҆ до́мы царе́й ї҆ѹ́диныхъ, ѩ҆́коже мѣ́сто па́дающее, ѿ нечисто́тъ свои́хъ во всѣ́хъ домѣ́хъ, въ ни́хже жрѧ́хѹ на кро́вѣхъ свои́хъ всемѹ̀ во́инствѹ небе́сномѹ и҆ приноша́хѹ возлїѧ҄нїѧ богѡ́мъ чѹжди҄мъ.

¹⁴И҆ прїи́де ї҆еремі́а ѿ (мѣ́ста) [паде́нїѧ], а҆́може посла̀ є҆го̀ гд҇ь про҇ро́чествовати, и҆ ста̀ во дворѣ̀ до́мѹ гд҇нѧ и҆ речѐ ко всѣ҄мъ лю́демъ:

¹⁵сїѧ҄ гл҃етъ гд҇ь си́лъ, бг҃ъ ї҆и҃левъ: сѐ, а҆́зъ наведѹ̀ на гра́дъ се́й и҆ на всѧ҄ гра́ды є҆гѡ̀ и҆ на всѧ҄ се́ла є҆гѡ̀ всѧ҄ ѕла҄ѧ, ѩ҆̀же гл҃алъ є҆́смь на́нь: ѩ҆́кѡ ѡ҆жесточи́ша вы҄и своѧ҄, є҆́же не слы́шати за́повѣдїй мои́хъ.