Read Библия Церковнославянская I҆еремі́и 21 Bible Online

I҆еремі́и 21 - Библия Церковнославянская bible

I҆еремі́и 21

¹Сло́во, є҆́же бы́сть ѿ гд҇а ко ї҆еремі́и, є҆гда̀ посла̀ къ немѹ̀ ца́рь седекі́а пасхѡ́ра сы́на мелхі́ина и҆ софо́нїю сы́на васаі́ева, свѧще́нника, глаго́лѧ:

²вопросѝ ѡ҆ на́съ гд҇а, ѩ҆́кѡ навѹходоно́соръ ца́рь вавѷлѡ́нскїй воста̀ на на́съ: сотвори́тъ ли гд҇ь съ на́ми по всѣ҄мъ чѹдесє́мъ свои҄мъ, и҆ ѿи́детъ ѿ на́съ;

³И҆ речѐ ї҆еремі́а къ ни҄мъ: та́кѡ рцы́те седекі́и: сїѧ҄ гл҃етъ гд҇ь бг҃ъ ї҆и҃левъ:

⁴сѐ, а҆́зъ ѡ҆браща́ю ѻ҆рѹ҄жїѧ бра҄ннаѧ, ѩ҆̀же сѹ́ть въ рѹка́хъ ва́шихъ, и҆́миже вы̀ ѡ҆полча́етесѧ на царѧ̀ вавѷлѡ́нска и҆ халде́йска, и҆̀же ѡ҆бстоѧ́тъ ва́съ ѡ҆́крестъ внѣ̀ стѣ́нъ: и҆ соберѹ̀ та̀ посредѣ̀ гра́да сегѡ̀,

⁵и҆ поборю̀ а҆́зъ по ва́съ рѹко́ю просте́ртою и҆ мы́шцею крѣ́пкою съ ѩ҆́ростїю и҆ гнѣ́вомъ вели́кимъ,

⁶и҆ побїю̀ всѣ́хъ ѡ҆бита́ющихъ во гра́дѣ се́мъ, человѣ́ки и҆ скоты̀, гѹби́телствомъ вели́кимъ, и҆ и҆́змрѹтъ.

⁷И҆ по си́хъ, та́кѡ гл҃етъ гд҇ь, да́мъ седекі́ю царѧ̀ ї҆ѹ́дина и҆ рабы҄ є҆гѡ̀, и҆ лю́ди є҆гѡ̀ и҆ ѡ҆ста́вльшыѧсѧ во гра́дѣ се́мъ ѿ гѹби́телства и҆ гла́да и҆ меча̀, въ рѹкѹ̀ навѹходоно́сора царѧ̀ вавѷлѡ́нска и҆ въ рѹкѹ̀ врагѡ́въ и҆́хъ и҆ въ рѹкѹ̀ и҆́щѹщихъ дѹ́шъ и҆́хъ, и҆ побїе́тъ и҆̀хъ ѻ҆́стрїемъ меча̀: и҆ не пощажѹ̀ и҆́хъ, нижѐ мл҇тивъ бѹ́дѹ и҆̀мъ.

⁸И҆ къ лю́демъ си҄мъ рече́ши: сїѧ҄ гл҃етъ гд҇ь: сѐ, а҆́зъ даю̀ пред̾ ва́ми пѹ́ть живота̀ и҆ пѹ́ть сме́рти:

⁹и҆́же ѡ҆бита́етъ во гра́дѣ се́мъ, ѹ҆́мретъ мече́мъ и҆ гла́домъ и҆ гѹби́телствомъ, а҆ и҆сходѧ́й, и҆́же прибѣжи́тъ ко халде́ѡмъ ѡ҆бстоѧ́щымъ ва́съ, жи́въ бѹ́детъ, и҆ бѹ́детъ дѹша̀ є҆гѡ̀ въ плѣ́нъ, и҆ жи́въ бѹ́детъ.

¹⁰Ѹ҆тверди́хъ бо лицѐ моѐ на гра́дъ се́й во ѕла҄ѧ, а҆ не во блага҄ѧ, речѐ гд҇ь: въ рѹ́ки царѧ̀ вавѷлѡ́нска преда́стсѧ, и҆ сожже́тъ є҆го̀ ѻ҆гне́мъ.

¹¹До́ме царѧ̀ ї҆ѹ́дина, слы́шите сло́во гд҇не:

¹²до́ме даві́довъ, сїѧ҄ гл҃етъ гд҇ь: сѹди́те заѹ́тра сѹ́дъ и҆ и҆спра́вите, и҆ и҆зба́вите си́лою ѹ҆гнете́наго ѿ рѹкѝ ѡ҆би́дѧщагѡ и҆̀, да не зажже́тсѧ ѩ҆́кѡ ѻ҆́гнь ѩ҆́рость моѧ̀ и҆ возгори́тсѧ, и҆ не бѹ́детъ ѹ҆гаша́ющагѡ, ра́ди лѹка́выхъ ѹ҆мышле́нїй ва́шихъ.

¹³Сѐ, а҆́зъ къ тебѣ̀ ѡ҆бита́ющемѹ во крѣ́пцѣ и҆ по́льнѣ ѹ҆до́лїи, речѐ гд҇ь, и҆̀же глаго́лете: кто̀ побїе́тъ на́съ; и҆лѝ кто̀ вни́детъ въ до́мы на́шѧ;

¹⁴И҆ посѣщѹ̀ на ва́съ по лѹка҄вымъ начина́нїємъ ва́шымъ, речѐ гд҇ь, и҆ возжгѹ̀ ѻ҆́гнь въ лѣ́сѣ є҆гѡ̀, и҆ поѧ́стъ всѧ҄, ѩ҆̀же ѡ҆́крестъ є҆гѡ̀.