Read Библия Церковнославянская I҆еремі́и 26 Bible Online

I҆еремі́и 26 - Библия Церковнославянская bible

I҆еремі́и 26

¹Въ нача́лѣ ца́рства ї҆ѡакі́ма сы́на ї҆ѡсі́ина бы́сть сло́во сїѐ ѿ гд҇а:

²та́кѡ речѐ гд҇ь: ста́ни во дворѣ̀ до́мѹ гд҇нѧ и҆ проповѣ́ждь всѣ҄мъ ї҆ѹде́ѡмъ, входѧ́щымъ кла́нѧтисѧ въ до́мъ гд҇ень, всѧ҄ словеса̀, ѩ҆̀же завѣща́хъ тебѣ̀ проповѣ́дати и҆̀мъ, не ѹ҆ймѝ словесѐ:

³не́гли послѹ́шаютъ и҆ ѿвратѧ́тсѧ кі́йждо ѿ пѹтѝ своегѡ̀ ѕла́гѡ, и҆ почі́ю ѿ ѕѡ́лъ, ѩ҆̀же помышлѧ́ю сотвори́ти и҆̀мъ ѕлы́хъ ра́ди начина́нїй и҆́хъ.

⁴И҆ рече́ши: та́кѡ речѐ гд҇ь: а҆́ще не послѹ́шаете менѐ, є҆́же ходи́ти въ зако́нѣхъ мои́хъ, ѩ҆̀же да́хъ пред̾ лице́мъ ва́шимъ,

⁵въ послѹша́нїе слове́съ ѻ҆́трѡкъ мои́хъ про҇ро́кѡвъ, и҆̀хже а҆́зъ посыла́ю къ ва́мъ и҆з̾ ѹ҆́тра, и҆ посла́хъ, и҆ не послѹ́шасте менѐ,

⁶и҆ да́мъ до́мъ се́й ѩ҆́коже силѡ́мъ, и҆ гра́дъ се́й да́мъ въ клѧ́твѹ всѣ҄мъ ѩ҆зы́кѡмъ всеѧ̀ землѝ.

⁷И҆ слы́шаша жерцы̀ и҆ лжепроро́цы и҆ всѝ лю́дїе ї҆еремі́ю глаго́люща словеса̀ сїѧ҄ въ домѹ̀ гд҇ни.

⁸И҆ бы́сть, є҆гда̀ ї҆еремі́а преста̀ глаго́лати всѧ҄, є҆ли҄ка завѣща̀ є҆мѹ̀ гд҇ь глаго́лати всѣ҄мъ лю́демъ, и҆ ѩ҆́ша ї҆еремі́ю жерцы̀ и҆ лжепроро́цы и҆ всѝ лю́дїе, глаго́люще: сме́ртїю да ѹ҆́мретъ,

⁹ѩ҆́кѡ проречѐ и҆́менемъ гд҇нимъ, глаго́лѧ: ѩ҆́коже силѡ́мъ бѹ́детъ се́й до́мъ, и҆ гра́дъ се́й ѡ҆пѹстѣ́етъ ѿ живѹ́щихъ. И҆ собра́шасѧ всѝ лю́дїе на ї҆еремі́ю въ домѹ̀ гд҇ни.

¹⁰И҆ слы́шаша кнѧ҄зи ї҆ѹ҄дины словеса̀ сїѧ҄, и҆ взыдо́ша ѿ до́мѹ царе́ва въ до́мъ гд҇ень и҆ сѣдо́ша во преддве́рїи вра́тъ до́мѹ гд҇нѧ но́выхъ.

¹¹И҆ рѣ́ша жерцы̀ и҆ лжепроро́цы кнѧзє́мъ и҆ всѣ҄мъ лю́демъ, глаго́люще: сѹ́дъ сме́ртный человѣ́кѹ семѹ̀, ѩ҆́кѡ проречѐ на се́й гра́дъ, ѩ҆́коже слы́шасте во ѹ҆́шы ва́ши.

¹²И҆ речѐ ї҆еремі́а ко всѣ҄мъ кнѧзє́мъ и҆ ко всѣ҄мъ лю́демъ, глаго́лѧ: гд҇ь посла́ мѧ прорещѝ на до́мъ се́й и҆ на гра́дъ се́й всѧ҄ словеса̀, ѩ҆̀же слы́шасте:

¹³и҆ нн҃ѣ лѹ́чшыѧ сотвори́те пѹти҄ ва́шѧ и҆ дѣла̀ ва҄ша и҆ послѹ́шайте гла́са гд҇а бг҃а ва́шегѡ, и҆ преста́нетъ гд҇ь ѿ ѕѡ́лъ, ѩ҆̀же гл҃а на вы̀:

¹⁴и҆ сѐ, а҆́зъ въ рѹка́хъ ва́шихъ, сотвори́те мѝ ѩ҆́коже ѹ҆го́дно и҆ ѩ҆́коже лѹ́чше ва́мъ ѩ҆влѧ́етсѧ:

¹⁵но разѹмѣ́юще да ѹ҆разѹмѣ́ете, ѩ҆́кѡ а҆́ще ѹ҆бїе́те мѧ̀, кро́вь непови́ннѹ дади́те са́ми на сѧ̀ и҆ на гра́дъ се́й и҆ на живѹ́щыѧ въ не́мъ: ѩ҆́кѡ пои́стиннѣ посла́ мѧ гд҇ь къ ва́мъ глаго́лати во ѹ҆́шы ва́ши всѧ҄ словеса̀ сїѧ҄.

¹⁶И҆ рѣ́ша кнѧ҄зи и҆ всѝ лю́дїе ко жерцє́мъ и҆ ко лжепроро́кѡмъ: нѣ́сть человѣ́кѹ семѹ̀ сѹ́дъ сме́ртный, ѩ҆́кѡ во и҆́мѧ гд҇а на́шегѡ глаго́ла къ на́мъ.

¹⁷И҆ воста́ша мѹ́жїе ѿ старѣ́йшинъ зе́мскихъ и҆ рѣ́ша всемѹ̀ собо́рѹ людско́мѹ, глаго́люще:

¹⁸мїхе́а мѡраѳі́тскїй бѣ̀ про҇ро́чествѹѧ во дни҄ є҆зекі́и царѧ̀ ї҆ѹ́дина и҆ речѐ всѣ҄мъ лю́демъ ї҆ѹ҄динымъ, глаго́лѧ: та́кѡ речѐ гд҇ь: сїѡ́нъ ѩ҆́кѡ ни́ва и҆з̾ѡре́тсѧ, и҆ ї҆ер҇ли́мъ ѩ҆́кѡ въ пѹ́ть непрохо́дный бѹ́детъ, и҆ гора̀ хра́ма бѹ́детъ въ лѹ́гъ дѹбра́вный.

¹⁹Є҆да̀ ѹ҆бива́ѧ ѹ҆бѝ є҆го̀ є҆зекі́а ца́рь ї҆ѹ́динъ и҆ всѝ лю́дїе ї҆ѹ҄дины; не ѹ҆боѧ́шалисѧ ѹ҆́бѡ гд҇а; И҆ поне́же помоли́шасѧ лицѹ̀ гд҇ню, и҆ почѝ гд҇ь ѿ ѕѡ́лъ, ѩ҆̀же гл҃аше на нѧ̀: и҆ мы̀ сотвори́хомъ ѕлѡ́бы вели҄ки на дѹ́шы на́шѧ.

²⁰И҆ бѣ̀ человѣ́къ прорица́ѧ и҆́менемъ гд҇нимъ, ѹ҆рі́а сы́нъ саме́овъ ѿ карїаѳїарі́ма, и҆ проречѐ на гра́дъ се́й и҆ ѡ҆ землѝ се́й по всѣ҄мъ словесє́мъ ї҆еремї҄инымъ.

²¹И҆ слы́ша ца́рь ї҆ѡакі́мъ и҆ всѝ кнѧ҄зи всѧ҄ словеса̀ є҆гѡ̀ и҆ и҆ска́хѹ ѹ҆би́ти є҆го̀: и҆ слы́ша ѹ҆рі́а и҆ ѹ҆боѧ́сѧ, и҆ бѣжа̀ и҆ прїи́де во є҆гѵ́петъ.

²²И҆ посла̀ ца́рь ї҆ѡакі́мъ мѹ́жы во є҆гѵ́петъ, є҆лдаѳа́на сы́на а҆хѡ́рова и҆ мѹ́жы съ ни́мъ во є҆гѵ́петъ,

²³и҆ и҆зведо́ша є҆го̀ ѿтѹ́дѹ и҆ приведо́ша є҆го̀ ко царю̀, и҆ поразѝ є҆го̀ мече́мъ и҆ вве́рже є҆го̀ во гро́бъ сынѡ́въ люді́й свои́хъ.

²⁴Ѻ҆ба́че рѹка̀ а҆хїка́ма сы́на сафані́ина бѣ̀ со ї҆еремі́ею, є҆́же не преда́ти є҆гѡ̀ въ рѹ́цѣ люді́й, да не ѹ҆бїю́тъ є҆гѡ̀.