Read Библия Церковнославянская I҆еремі́и 28 Bible Online

I҆еремі́и 28 - Библия Церковнославянская bible

I҆еремі́и 28

¹И҆ бы́сть въ четве́ртое лѣ́то, ца́рствѹющѹ седекі́и царю̀ ї҆ѹ́динѹ, въ пѧ́тый мц҇ъ, рече́ ми а҆на́нїа сы́нъ а҆зѡ́ровъ лжи́вый проро́къ гаваѡні́тскїй въ домѹ̀ гд҇ни, пред̾ ѻ҆чи́ма жерцє́въ и҆ всѣ́хъ люді́й, глаго́лѧ:

²та́кѡ речѐ гд҇ь вседержи́тель бг҃ъ ї҆и҃левъ: сокрѹши́хъ ѩ҆ре́мъ царѧ̀ вавѷлѡ́нска:

³є҆щѐ два̀ лѣ҄та дні́й, возвращѹ̀ а҆́зъ на мѣ́сто сїѐ всѧ҄ сосѹ́ды до́мѹ гд҇нѧ, ѩ҆̀же взѧ̀ навѹходоно́соръ ца́рь вавѷлѡ́нскїй ѿ мѣ́ста сегѡ̀ и҆ пренесѐ ѧ҆̀ до вавѷлѡ́на,

⁴и҆ ї҆ехоні́ю сы́на ї҆ѡакі́мова царѧ̀ ї҆ѹ́дина, и҆ всѐ преселе́нїе ї҆ѹ́дино вше́дшее въ вавѷлѡ́нъ возвращѹ̀ въ мѣ́сто сїѐ, гл҃етъ гд҇ь, ѩ҆́кѡ сокрѹшѹ̀ ѩ҆ре́мъ царѧ̀ вавѷлѡ́нска.

⁵И҆ речѐ ї҆еремі́а про҇ро́къ ко а҆на́нїи лжепроро́кѹ пред̾ ѻ҆чи́ма жерцє́въ и҆ пред̾ ѻ҆чи́ма всѣ́хъ люді́й стоѧ́щихъ въ домѹ̀ гд҇ни,

⁶и҆ речѐ ї҆еремі́а: пои́стиннѣ та́кѡ да сотвори́тъ гд҇ь, да ѹ҆тверди́тъ гд҇ь сло́во твоѐ, є҆́же ты̀ прорица́еши, є҆́же возврати́ти сосѹ́ды до́мѹ гд҇нѧ и҆ всѧ҄ преселє́нныѧ и҆з̾ вавѷлѡ́на на мѣ́сто сїѐ:

⁷ѻ҆ба́че слы́шите сло́во сїѐ, є҆́же а҆́зъ глаго́лю во ѹ҆́шы ва́ши и҆ во ѹ҆́шы всѣ́хъ люді́й:

⁸проро́цы, бы́вшїи пре́жде менє̀ и҆ пре́жде ва́съ ѿ вѣ́ка, прореко́ша на мнѡ́ги зе́мли и҆ на ца҄рства вели҄ка ѡ҆ ра́ти и҆ ѡ҆ погѹбле́нїи и҆ ѡ҆ гла́дѣ:

⁹проро́къ прорекі́й ми́ръ, прише́дшѹ сло́вѹ позна́ютъ про҇ро́ка, є҆го́же посла̀ и҆̀мъ гд҇ь въ вѣ́рѣ.

¹⁰И҆ взѧ̀ а҆на́нїа пред̾ ѻ҆чи́ма всѣ́хъ люді́й кла҄ды ѿ вы́и ї҆еремі́ины и҆ сокрѹшѝ ѧ҆̀.

¹¹И҆ речѐ а҆на́нїа пред̾ ѻ҆чи́ма всѣ́хъ люді́й глаго́лѧ: си́це речѐ гд҇ь: та́кѡ сокрѹшѹ̀ ѩ҆ре́мъ навѹходоно́сора царѧ̀ вавѷлѡ́нска є҆щѐ два̀ лѣ҄та дні́й со вы́и всѣ́хъ ѩ҆зы́кѡвъ. И҆ ѿи́де ї҆еремі́а на пѹ́ть сво́й.

¹²И҆ бы́сть сло́во гд҇не ко ї҆еремі́и, по сокрѹше́нїи а҆на́нїинѣ кла҄дъ со вы́и є҆гѡ̀, гл҃ѧ:

¹³и҆дѝ и҆ рцы̀ ко а҆на́нїи глаго́лѧ: та́кѡ речѐ гд҇ь: кла҄ды дрєвѧ́ныѧ сокрѹши́лъ є҆сѝ и҆ сотвори́ши вмѣ́стѡ тѣ́хъ кла҄ды желѣ҄зны,

¹⁴ѩ҆́кѡ та́кѡ речѐ гд҇ь: ѩ҆ре́мъ желѣ́зенъ возложи́хъ на вы҄и всѣ́хъ ѩ҆зы́кѡвъ, слѹжи́ти навѹходоно́сорѹ царю̀ вавѷлѡ́нскѹ, и҆ послѹ́жатъ є҆мѹ̀: ктомѹ̀ и҆ ѕвѣ҄ри зємны́ѧ да́хъ є҆мѹ̀.

¹⁵И҆ речѐ ї҆еремі́а про҇ро́къ ко а҆на́нїи: слы́ши, а҆на́нїе: не посла̀ тебѐ гд҇ь, ты́ же сотвори́лъ є҆сѝ люді́й си́хъ ѹ҆пова́ти на непра́вдѹ.

¹⁶Тогѡ̀ ра́ди си́це речѐ гд҇ь: сѐ, а҆́зъ ѿпѹщѹ́ тѧ ѿ лица̀ землѝ, въ се́мъ лѣ́тѣ ѹ҆́мреши, ѩ҆́кѡ на гд҇а (бг҃а) глаго́лалъ є҆сѝ.

¹⁷И҆ ѹ҆́мре а҆на́нїа лжепроро́къ въ се́мъ лѣ́тѣ мц҇а седма́гѡ.