Read Библия Церковнославянская I҆еремі́и 31 Bible Online

I҆еремі́и 31 - Библия Церковнославянская bible

I҆еремі́и 31

¹Во вре́мѧ ѻ҆́но, речѐ гд҇ь, бѹ́дѹ въ бг҃а ро́дѹ ї҆и҃левѹ, и҆ ті́и бѹ́дѹтъ мѝ въ лю́ди.

²Та́кѡ речѐ гд҇ь: ѡ҆брѣто́хъ теплотѹ̀ {Є҆вр.: ѡ҆брѣто́ша благода́ть.} въ пѹсты́ни со и҆зги́бшими ѿ меча̀: и҆ди́те и҆ не потреби́те ї҆и҃лѧ,

³гд҇ь и҆здале́ча ѩ҆ви́тсѧ є҆мѹ̀: любо́вїю вѣ́чною возлюби́хъ тѧ̀, тогѡ̀ ра́ди вовлеко́хъ тѧ̀ въ щедрѡ́ты.

⁴ѩ҆́кѡ возграждѹ́ тѧ, и҆ возгради́шисѧ, дѣ́во ї҆и҃лева: во́змеши тѷмпа́ны своѧ҄ и҆ и҆зы́деши съ собо́ромъ и҆гра́ющихъ.

⁵Є҆щѐ насади́те вїногра́ды въ горѣ̀ самарі́йстѣй, насажда́юще насади́те и҆ похвали́те.

⁶ѩ҆́кѡ є҆́сть де́нь воззва́нїѧ ѿвѣщава́ющихъ въ гора́хъ є҆фре́мовыхъ: воста́ните и҆ взы́дите въ сїѡ́нъ ко гд҇еви бг҃ѹ на́шемѹ:

⁷ѩ҆́кѡ та́кѡ речѐ гд҇ь ї҆а́кѡвѹ: возвесели́тесѧ весе́лїемъ и҆ воскли́кните на главѹ̀ ѩ҆зы́кѡвъ: слы́шано сотвори́те и҆ похвали́те, рцы́те: сп҃сѐ гд҇ь лю́ди своѧ҄, ѡ҆ста́нокъ ї҆и҃левъ.

⁸Сѐ, а҆́зъ ведѹ̀ и҆̀хъ ѿ сѣ́вера и҆ соберѹ̀ и҆̀хъ ѿ конє́цъ землѝ въ пра́здникъ па́схи: и҆ чадороди́тъ наро́дъ мно́гъ, и҆ возвратѧ́тсѧ сѣ́мѡ.

⁹Съ пла́чемъ и҆зыдо́ша, а҆ со ѹ҆тѣше́нїемъ возведѹ̀ ѧ҆̀, проводѧ̀ чрез̾ рове́нники во́дъ по пѹтѝ пра́вѹ, и҆ не заблѹ́дѧтъ по немѹ̀: ѩ҆́кѡ а҆́зъ бѣ́хъ ї҆и҃леви во ѻ҆ц҃а̀, и҆ є҆фре́мъ пе́рвенецъ мѝ є҆́сть.

¹⁰Слы́шите, ѩ҆зы́цы, сло́во гд҇не, и҆ возвѣсти́те во ѻ҆́стровѣхъ да́льнихъ и҆ рцы́те: развѣ́ѧвый ї҆и҃лѧ собере́тъ є҆го̀ и҆ снабди́тъ є҆го̀, ѩ҆́кѡ па́стырь ста́до своѐ.

¹¹ѩ҆́кѡ и҆зба́ви гд҇ь ї҆а́кѡва и҆ и҆з̾ѧ́тъ є҆го̀ ѿ рѹкѝ си́льнѣйшихъ є҆гѡ̀.

¹²И҆ прїи́дѹтъ и҆ возвеселѧ́тсѧ въ горѣ̀ сїѡ́нъ, и҆ прїи́дѹтъ ко бл҃гота́мъ гд҇нимъ, на зе́млю пшени́цы и҆ вїна̀ и҆ плодѡ́въ, и҆ скотѡ́въ и҆ ѻ҆внѡ́въ: и҆ бѹ́детъ дѹша̀ и҆́хъ ѩ҆́коже дре́во плодови́то, и҆ не вза́лчѹтъ ктомѹ̀.

¹³Тогда̀ возра́дѹютсѧ дѣви҄цы въ собра́нїи ю҆́ношей, и҆ ста́рцы возра́дѹютсѧ: и҆ ѡ҆бращѹ̀ пла́чь и҆́хъ на ра́дость, и҆ ѹ҆тѣ́шѹ и҆̀хъ, и҆ сотворю̀ и҆̀хъ ве́селы.

¹⁴Возвели́чѹ и҆ ѹ҆пою̀ дѹ́шѹ жерцє́въ сынѡ́въ леѵі́иныхъ, и҆ лю́дїе моѝ бл҃го́тъ мои́хъ насы́тѧтсѧ.

¹⁵Та́кѡ речѐ гд҇ь: гла́съ въ ра́мѣ слы́шанъ бы́сть пла́ча и҆ рыда́нїѧ и҆ во́плѧ: рахи́ль пла́чѹщисѧ ча҄дъ свои́хъ, и҆ не хотѧ́ше ѹ҆тѣ́шитисѧ, ѩ҆́кѡ не сѹ́ть.

¹⁶Та́кѡ речѐ гд҇ь: да почі́етъ гла́съ тво́й ѿ пла́ча и҆ ѻ҆́чи твоѝ ѿ сле́зъ, ѩ҆́кѡ є҆́сть мзда̀ дѣлѡ́мъ твои҄мъ, гл҃етъ гд҇ь, и҆ возвратѧ́тсѧ ѿ землѝ вра́жїѧ:

¹⁷и҆ є҆́сть наде́жда послѣ҄днимъ твои҄мъ, (гл҃етъ гд҇ь,) и҆ возвратѧ́тсѧ сы́нове твоѝ въ предѣ́лы своѧ҄.

¹⁸Слы́шѧ слы́шахъ є҆фре́ма пла́чѹща: наказа́лъ мѧ̀ є҆сѝ, (гд҇и,) и҆ наказа́хсѧ: а҆́зъ ѩ҆́коже теле́цъ не наѹчи́хсѧ: ѡ҆брати́ мѧ, и҆ ѡ҆бращѹ́сѧ, ѩ҆́кѡ ты̀ є҆сѝ гд҇ь бг҃ъ мо́й:

¹⁹поне́же послѣдѝ плѣне́нїѧ моегѡ̀ пока́ѧхсѧ и҆ послѣдѝ разѹмѣ́нїѧ моегѡ̀ возстена́хъ въ де́нь посрамле́нїѧ и҆ показа́хъ тебѣ̀, ѩ҆́кѡ прїѧ́хъ ѹ҆кори́знѹ ѿ ю҆́ности моеѧ̀.

²⁰Сы́нъ любе́зенъ мнѣ̀ є҆фре́мъ, ѻ҆троча̀ питѣ́ющеесѧ {нѣ́жное}, поне́же словеса̀ моѧ҄ въ не́мъ, па́мѧтїю воспомѧнѹ̀ и҆̀: тогѡ̀ ра́ди потща́хсѧ ѡ҆ не́мъ, ми́лѹѧй поми́лѹю є҆го̀, речѐ гд҇ь.

²¹Поста́ви себѐ самого̀, сїѡ́не, стра́жѹ, сотворѝ мѹче́нїе, напра́ви се́рдце твоѐ на пѹ́ть пра́въ, и҆́мже ходи́лъ є҆сѝ: возврати́сѧ, дѣви́це ї҆и҃лева, ѡ҆брати́сѧ во гра́ды твоѧ҄ рыда́ющи.

²²Доко́лѣ ѿвраща́ешисѧ, дщѝ ѡ҆безче́ствованаѧ; ѩ҆́кѡ созда̀ гд҇ь сп҇нїе въ насажде́нїе но́во, въ не́мже сп҇нїи ѡ҆бы́дѹтъ человѣ́цы.

²³ѩ҆́кѡ та́кѡ речѐ гд҇ь: є҆щѐ рекѹ́тъ сло́во сїѐ въ землѝ ї҆ѹде́йстѣй и҆ во градѣ́хъ є҆ѧ̀, є҆гда̀ возвращѹ̀ преселе́нїе є҆гѡ̀: блг҇ве́нъ гд҇ь на првднѣй горѣ̀ ст҃ѣ́й свое́й:

²⁴и҆ живѹ́щїи во градѣ́хъ ї҆ѹ́диныхъ и҆ во все́й землѝ є҆гѡ̀, кѹ́пнѡ со земледѣ́лцемъ, и҆ вознесе́тсѧ во ста́дѣ.

²⁵ѩ҆́кѡ ѹ҆пои́хъ всѧ́кѹ дѹ́шѹ жа́ждѹщѹ и҆ всѧ́кѹ дѹ́шѹ а҆́лчѹщѹ насы́тихъ.

²⁶Тогѡ̀ ра́ди воста́хъ ѿ сна̀ и҆ ви́дѣхъ, и҆ со́нъ мѝ сла́докъ бы́сть.

²⁷Сѐ, дні́е грѧдѹ́тъ, гл҃етъ гд҇ь, и҆ всѣ́ю ї҆и҃лѧ и҆ ї҆ѹ́дѹ сѣ́мѧ человѣ́чо и҆ сѣ́мѧ ско́тское.

²⁸И҆ бѹ́детъ, ѩ҆́коже бдѣ́хъ на нѧ̀ потреби́ти и҆ ѡ҆ѕло́бити, та́кѡ бдѣ́ти бѹ́дѹ ѡ҆ ни́хъ, є҆́же созида́ти и҆ насажда́ти, речѐ гд҇ь.

²⁹Въ ты҄ѧ дни҄ не рекѹ́тъ ктомѹ̀: ѻ҆тцы̀ ѩ҆до́ша ки҄слаѧ, а҆ зѹ́бы дѣ́темъ ѡ҆ско́минишасѧ:

³⁰но кі́йждо свои́мъ грѣхо́мъ ѹ҆́мретъ, и҆ ѩ҆́дшемѹ ки҄слаѧ ѡ҆скоменѧ́тсѧ зѹ́бы є҆гѡ̀.

³¹Сѐ, дні́е грѧдѹ́тъ, гл҃етъ гд҇ь, и҆ завѣща́ю до́мѹ ї҆и҃левѹ и҆ до́мѹ ї҆ѹ́динѹ завѣ́тъ но́въ,

³²не по завѣ́тѹ, є҆го́же завѣща́хъ ѻ҆тцє́мъ и҆́хъ въ де́нь, въ ѻ҆́ньже є҆́мшѹ мѝ за рѹ́кѹ и҆́хъ, и҆звестѝ ѧ҆̀ ѿ землѝ є҆гѵ́петскїѧ, ѩ҆́кѡ ті́и не пребы́ша въ завѣ́тѣ мое́мъ, и҆ а҆́зъ небрего́хъ и҆̀хъ, гл҃етъ гд҇ь.

³³ѩ҆́кѡ се́й завѣ́тъ, є҆го́же завѣща́ю до́мѹ ї҆и҃левѹ по дне́хъ ѻ҆́нѣхъ, гл҃етъ гд҇ь: даѧ̀ зако́ны моѧ҄ въ мы́сли и҆́хъ, и҆ на сердца́хъ и҆́хъ напишѹ̀ ѧ҆̀, и҆ бѹ́дѹ и҆̀мъ въ бг҃а, и҆ ті́и бѹ́дѹтъ мѝ въ лю́ди:

³⁴и҆ не наѹчи́тъ кі́йждо бли́жнѧго своего̀ и҆ кі́йждо бра́та своего̀, глаго́лѧ: позна́й гд҇а: ѩ҆́кѡ всѝ позна́ютъ мѧ̀ ѿ ма́ла да́же и҆ до вели́кагѡ и҆́хъ: ѩ҆́кѡ мл҇тивъ бѹ́дѹ непра́вдамъ и҆́хъ и҆ грѣхо́въ и҆́хъ не помѧнѹ̀ ктомѹ̀.

³⁵А҆́ще вознесе́тсѧ не́бо на высотѹ̀, речѐ гд҇ь, и҆ а҆́ще смири́тсѧ и҆спо́дъ землѝ ни́зѹ, и҆ а҆́зъ не ѿве́ргѹ ро́да ї҆и҃лева ѡ҆ всѣ́хъ, ѩ҆̀же сотвори́ша, гл҃етъ гд҇ь.

³⁶Та́кѡ речѐ гд҇ь, да́вый со́лнце во свѣ́тъ днѐ, лѹнѹ̀ и҆ ѕвѣ́зды на свѣ́тъ но́щи, и҆ во́пль на мо́ри, и҆ возшѹмѣ́ша вѡ́лны є҆гѡ̀, гд҇ь вседержи́тель и҆́мѧ є҆мѹ̀.

³⁷А҆́ще премо́лкнѹтъ зако́ны сі́и ѿ лица̀ моегѡ̀, речѐ гд҇ь, то̀ и҆ ро́дъ ї҆и҃левъ преста́нетъ бы́ти ѩ҆зы́къ пред̾ лице́мъ мои́мъ во всѧ҄ дни҄.

³⁸Сѐ, дні́е грѧдѹ́тъ, речѐ гд҇ь, и҆ сози́ждетсѧ гра́дъ гд҇еви ѿ столпа̀ а҆намеи́лѧ до вра́тъ ѹ҆го́лныхъ:

³⁹и҆ и҆зы́детъ размѣ́ренїе є҆гѡ̀ проти́вѹ є҆мѹ̀ до моги́лъ гари́въ, и҆ ѡ҆б̾и́метсѧ ѡ҆́крестъ и҆збра́ннымъ ка́менїемъ,

⁴⁰и҆ всю̀ ю҆до́ль ме́ртвыхъ и҆ пе́пела, и҆ ве́сь а҆ссаримѡ́ѳъ да́же до водоте́чи ке́дрскїѧ, да́же до ѹ҆́гла ко́нїй вра́тъ восто́чныхъ, ѡ҆сщ҃е́нїе гд҇еви, и҆ ктомѹ̀ не и҆сто́ргнетсѧ и҆ не потреби́тсѧ да́же до вѣ́ка.