Read Библия Церковнославянская I҆еремі́и 34 Bible Online

I҆еремі́и 34 - Библия Церковнославянская bible

I҆еремі́и 34

¹Сло́во, є҆́же бы́сть ко ї҆еремі́и ѿ гд҇а, є҆гда̀ навѹходоно́соръ ца́рь вавѷлѡ́нскїй и҆ всѝ вѡ́и є҆гѡ̀, и҆ всѧ̀ землѧ̀ вла́сти є҆гѡ̀ и҆ всѝ лю́дїе воева́хѹ на ї҆ер҇ли́мъ и҆ на всѧ҄ гра́ды ї҆ѹ҄дины, гл҃ѧ:

²та́кѡ речѐ гд҇ь бг҃ъ ї҆и҃левъ: и҆дѝ ко седекі́и царю̀ ї҆ѹ́динѹ и҆ рече́ши є҆мѹ̀: та́кѡ речѐ гд҇ь: преда́нїемъ преда́стсѧ се́й гра́дъ въ рѹ́цѣ царѧ̀ вавѷлѡ́нска, и҆ во́зметъ є҆го̀ и҆ пожже́тъ є҆го̀ ѻ҆гне́мъ:

³и҆ ты̀ не ѹ҆цѣлѣ́еши ѿ рѹкѹ̀ є҆гѡ̀, и҆ ѩ҆́тъ бѹ́деши, и҆ въ рѹ́цѣ є҆гѡ̀ преда́сисѧ: и҆ ѻ҆́чи твоѝ ѻ҆́чи є҆гѡ̀ ѹ҆́зрѧтъ, и҆ ѹ҆ста̀ є҆гѡ̀ со ѹ҆сты҄ твои́ми соглаго́лютъ, и҆ въ вавѷлѡ́нъ вни́деши.

⁴Но ѻ҆ба́че слы́ши сло́во гд҇не, седекі́е, царю̀ ї҆ѹ́динъ! та́кѡ гл҃етъ гд҇ь къ тебѣ̀: не ѹ҆́мреши ѿ меча̀, но въ ми́рѣ ѹ҆́мреши:

⁵и҆ ѩ҆́коже пла́каша ѻ҆тцє́въ твои́хъ ца́рствовавшихъ пре́жде тебє̀, воспла́чѹтсѧ и҆ тебє̀: ѹ҆вы̀, го́споди, и҆̀: ѹ҆вы̀, го́споди! воспла́чѹтсѧ и҆ тебє̀, ѩ҆́кѡ сло́во а҆́зъ согл҃ахъ, речѐ гд҇ь.

⁶И҆ глаго́ла ї҆еремі́а про҇ро́къ ко седекі́и царю̀ ї҆ѹ́динѹ всѧ҄ словеса̀ сїѧ҄ во ї҆ер҇ли́мѣ.

⁷И҆ си́ла царѧ̀ вавѷлѡ́нска воева̀ на ї҆ер҇ли́мъ и҆ на гра́ды ї҆ѹ҄дины ѡ҆ста́вшыѧсѧ: на лахі́съ и҆ на а҆зи́кѹ, ѩ҆́кѡ ті́и ѡ҆ста́шасѧ во градѣ́хъ ї҆ѹ́диныхъ гра́ды твє́рды.

⁸Сло́во бы́вшее ко ї҆еремі́и ѿ гд҇а, повнегда̀ сконча́ти царю̀ седекі́и завѣ́тъ къ лю́демъ, и҆̀же во ї҆ер҇ли́мѣ, є҆́же нарещѝ и҆̀мъ ѿпѹще́нїе,

⁹є҆́же ѿпѹсти́ти комѹ́ждо раба̀ своего̀ и҆ комѹ́ждо рабы́ню свою̀, є҆вре́анина и҆ є҆вре́аныню, свобѡ́дны, да не рабо́таетъ мѹ́жъ ѿ ї҆и҃лѧ.

¹⁰И҆ ѡ҆брати́шасѧ всѝ вельмѡ́жи и҆ всѝ лю́дїе встѹпи́вшїи въ завѣ́тъ, є҆́же ѿпѹсти́ти комѹ́ждо раба̀ своего̀ и҆ комѹ́ждо рабѹ̀ свою̀ свобѡ́дны и҆ ктомѹ̀ не владѣ́ти и҆́ми. Слы́шаша ѹ҆̀бо и҆ ѿпѹсти́ша.

¹¹И҆ ѡ҆брати́шасѧ по си́хъ вспѧ́ть и҆ ѹ҆держа́ша па́ки рабы҄ и҆ рабы҄ни своѧ҄, и҆̀хже ѿпѹсти́ша свобо́дныхъ, и҆ взѧ́ша въ рабы҄ и҆ рабы҄ни.

¹²И҆ бы́сть сло́во гд҇не ко ї҆еремі́и ѿ гд҇а гл҃ѧ:

¹³та́кѡ речѐ гд҇ь бг҃ъ ї҆и҃левъ: а҆́зъ завѣща́хъ завѣ́тъ ко ѻ҆тцє́мъ ва́шымъ въ де́нь, въ ѻ҆́ньже и҆зба́вихъ ѧ҆̀ ѿ землѝ є҆гѵ́петскїѧ, и҆з̾ до́мѹ рабо́ты, гл҃ѧ:

¹⁴є҆гда̀ сконча́ютсѧ ше́сть лѣ́тъ, да ѿпѹ́стиши бра́та своего̀ є҆вре́анина, и҆́же про́данъ є҆́сть тебѣ̀: и҆ да дѣ́лаетъ тѝ ше́сть лѣ́тъ, и҆ да ѿпѹ́стиши є҆го̀ свобо́дна ѿ себє̀. И҆ не послѹ́шаша менѐ ѻ҆тцы̀ ва́ши, ни приклони́ша ѹ҆́ха своегѡ̀.

¹⁵И҆ ѡ҆брати́стесѧ вы̀ дне́сь сотвори́ти пра҄ваѧ пред̾ ѻ҆чи́ма мои́ма, є҆́же нарещѝ комѹ́ждо ѿпѹще́нїе бли́жнѧгѡ своегѡ̀: и҆ соверши́сте завѣ́тъ пред̾ лице́мъ мои́мъ въ домѹ̀, и҆дѣ́же нарѣче́сѧ и҆́мѧ моѐ въ не́мъ:

¹⁶и҆ ѿврати́стесѧ, и҆ ѡ҆скверни́сте завѣ́тъ мо́й, є҆́же возврати́ти комѹ́ждо раба̀ своего̀ и҆ комѹ́ждо рабѹ̀ свою̀, и҆̀хже ѿпѹсти́сте свобѡ́дны дѹше́ю и҆́хъ: и҆ покори́сте и҆̀хъ, ѩ҆́коже бы́ти ѹ҆ ва́съ въ рабы҄ и҆ въ рабы҄ни.

¹⁷Тогѡ̀ ра́ди си́це речѐ гд҇ь: вы̀ не послѹ́шасте менѐ, нарещѝ ѿпѹще́нїѧ кі́йждо бра́тѹ своемѹ̀ и҆ кі́йждо бли́жнемѹ своемѹ̀: сѐ, а҆́зъ нарица́ю ѿпѹще́нїе ва́мъ на ме́чь и҆ на сме́рть и҆ на гла́дъ, и҆ да́мъ вы̀ на разсы́панїе всѣ҄мъ ца́рствамъ зємны́мъ:

¹⁸и҆ да́мъ мѹ́жы престѹпи́вшыѧ завѣ́тъ мо́й и҆ не хранѧ́щыѧ слове́съ завѣ́та моегѡ̀, є҆мѹ́же соизво́лиша пред̾ лице́мъ мои́мъ: телца̀ є҆го́же разсѣко́ша на двѣ̀ ча҄сти и҆ ходи́ша междѹ̀ раздѣле́нными частьмѝ є҆гѡ̀:

¹⁹кнѧ҄зи ї҆ѹ҄дины и҆ кнѧ҄зи ї҆ер҇ли҄мли, и҆ вельмо́жы и҆ жерцы̀ и҆ всѧ҄ лю́ди землѝ ходѧ́щыѧ междѹ̀ раздѣле́нымъ телце́мъ,

²⁰и҆ да́мъ ѧ҆̀ въ рѹ́ки врагѡ́мъ и҆́хъ и҆ въ рѹ́ки и҆́щѹщихъ дѹшѝ и҆́хъ, и҆ бѹ́дѹтъ трѹ́пи и҆́хъ въ ѩ҆́дь пти́цамъ небє́снымъ и҆ ѕвѣрє́мъ зємны́мъ:

²¹и҆ седекі́ю царѧ̀ ї҆ѹде́йска и҆ кнѧ҄зи є҆гѡ̀ да́мъ въ рѹ́цѣ врагѡ́въ и҆́хъ и҆ въ рѹкѹ̀ и҆́щѹщихъ дѹшѝ и҆́хъ и҆ въ рѹкѹ̀ во́инства царѧ̀ вавѷлѡ́нска, ѿбѣга́ющихъ ѿ ни́хъ.

²²Сѐ, а҆́зъ завѣща́ю, речѐ гд҇ь, и҆ возвращѹ̀ ѧ҆̀ въ зе́млю сїю̀, и҆ повою́ютъ на ню̀, и҆ во́змѹтъ ю҆̀, и҆ пожгѹ́тъ ю҆̀ ѻ҆гне́мъ и҆ гра́ды ї҆ѹ҄дины: и҆ да́мъ ѧ҆̀ въ непрохѡ́дны ѿ живѹ́щихъ.