Read Библия Церковнославянская I҆еремі́и 37 Bible Online

I҆еремі́и 37 - Библия Церковнославянская bible

I҆еремі́и 37

¹И҆ ца́рствова седекі́а сы́нъ ї҆ѡсі́инъ вмѣ́стѡ ї҆ехоні́и сы́на ї҆ѡакі́мова, є҆го́же поста́ви навѹходоно́соръ ца́рь вавѷлѡ́нскїй ца́рствовати во ї҆ѹде́и.

²И҆ не послѹ́ша то́й и҆ ѻ҆́троцы є҆гѡ̀ и҆ лю́дїе землѝ слове́съ гд҇нихъ, ѩ҆̀же гл҃а рѹко́ю ї҆еремі́иною.

³И҆ посла̀ ца́рь седекі́а ї҆ѡаха́ла сы́на селемі́ина и҆ софо́нїю сы́на массе́а жерца̀ ко ї҆еремі́и про҇ро́кѹ, глаго́лѧ: моли́сѧ за ны̀ ко гд҇ѹ бг҃ѹ на́шемѹ.

⁴Ї҆еремі́а же свобо́денъ прихожда́ше и҆ прохожда́ше средѣ̀ гра́да, не введо́ша бо є҆го̀ во хра́минѹ темни́чнѹю.

⁵И҆ си́ла фараѡ́нѧ и҆зы́де и҆з̾ є҆гѵ́пта, слы́шавше халде́є ѡ҆бле́гшїи ї҆ер҇ли́мъ слѹ́хъ и҆́хъ, ѿстѹпи́ша ѿ ї҆ер҇ли́ма.

⁶И҆ бы́сть сло́во гд҇не ко ї҆еремі́и гл҃ѧ:

⁷та́кѡ речѐ гд҇ь бг҃ъ ї҆и҃левъ: та́кѡ рече́ши царю̀ ї҆ѹ́динѹ, посла́вшемѹ къ тебѣ̀ вопроси́ти мѧ̀: сѐ, си́ла фараѡ́нѧ, и҆зше́дшаѧ ва́мъ на по́мощь, возврати́тсѧ па́ки до землѝ є҆гѵ́петскїѧ,

⁸и҆ возвратѧ́тсѧ халде́є и҆ повою́ютъ гра́дъ се́й, и҆ во́змѹтъ є҆го̀ и҆ пожгѹ́тъ є҆го̀ ѻ҆гне́мъ.

⁹ѩ҆́кѡ та́кѡ речѐ гд҇ь: не прельща́йте дѹ́шъ свои́хъ, глаго́люще: ѿходѧ́ще ѿи́дѹтъ ѿ на́съ халде́є: ѩ҆́кѡ не ѿи́дѹтъ.

¹⁰И҆ а҆́ще побїе́те всю̀ си́лѹ халде́євъ вою́ющихъ на вы̀, и҆ ѡ҆ста́нѹтъ нѣ́цыи ѩ҆́звени, кі́йждо на мѣ́стѣ свое́мъ, сі́и воста́нѹтъ и҆ пожгѹ́тъ гра́дъ се́й ѻ҆гне́мъ.

¹¹И҆ бы́сть є҆гда̀ взы́де си́ла халде́йска ѿ ї҆ер҇ли́ма, ѿ лица̀ си́лы фарлѡ́ни,

¹²и҆зы́де ї҆еремі́а и҆з̾ ї҆ер҇ли́ма и҆тѝ въ зе́млю венїамі́ню, є҆́же кѹпи́ти ѿтѹ́дѹ посредѣ̀ люді́й.

¹³Внегда́ же бы́ти є҆мѹ̀ во вратѣ́хъ венїамі́нихъ, и҆ (бы́сть) та́мѡ человѣ́къ, ѹ҆ негѡ́же ѡ҆бита̀ сарѹі́а сы́нъ селемі́инъ, сы́на а҆на́нїина, и҆ взѧ̀ ї҆еремі́ю, глаго́лѧ: ко халде́ємъ ты̀ бѣжи́ши.

¹⁴И҆ речѐ ї҆еремі́а: лжа̀, не ко халде́ємъ а҆́зъ бѣгѹ̀. И҆ не послѹ́ша є҆гѡ̀. И҆ взѧ̀ сарѹі́а ї҆еремі́ю и҆ приведѐ є҆го̀ ко кнѧзє́мъ.

¹⁵И҆ разгнѣ́вашасѧ кнѧ҄зи на ї҆еремі́ю и҆ би́ша є҆го̀, и҆ посла́ша є҆го̀ въ до́мъ ї҆ѡнаѳа́на книго́чїѧ, ѩ҆́кѡ то́й сотвори́ша хра́миною темни́чною.

¹⁶И҆ прїи́де ї҆еремі́а въ до́мъ рва̀ и҆ въ хере́тъ {ѹ҆зи́лище}, и҆ сѣ́де тѹ̀ дни҄ мнѡ́ги.

¹⁷И҆ посла̀ седекі́а ца́рь и҆ призва̀ є҆го̀, и҆ вопроша́ше є҆го̀ ца́рь ѡ҆́тай, а҆́ще є҆́сть сло́во ѿ гд҇а; И҆ речѐ є҆мѹ̀ ї҆еремі́а: є҆́сть. И҆ речѐ: въ рѹ́цѣ царѧ̀ вавѷлѡ́нска пре́данъ бѹ́деши.

¹⁸И҆ речѐ ї҆еремі́а царю̀: чи́мъ преѡби́дѣхъ тѧ̀ и҆ ѻ҆́троки твоѧ҄ и҆ лю́ди сїѧ҄, ѩ҆́кѡ ты̀ вдае́ши мѧ̀ въ до́мъ темни́чный;

¹⁹и҆ гдѣ̀ сѹ́ть проро́цы ва́ши прорица́вшїи ва́мъ, глаго́люще, ѩ҆́кѡ не прїи́детъ ца́рь вавѷлѡ́нскїй на ва́съ и҆ на зе́млю сїю̀;

²⁰нн҃ѣ же послѹ́шай, молю́тисѧ, го́споди мо́й, царю̀, да паде́тъ моле́нїе моѐ пред̾ лице́мъ твои́мъ: и҆ не посыла́й мѧ̀ па́ки въ до́мъ ї҆ѡнаѳа́на книго́чїѧ, даю̀ ѹ҆мрѹ̀ та́мѡ.

²¹И҆ повелѣ̀ ца́рь, и҆ вверго́ша є҆го̀ во хра́минѹ темни́чнѹю, и҆ даѧ́хѹ є҆мѹ̀ хлѣ́бъ є҆ди́нъ на де́нь и҆звнѣ̀, и҆дѣ́же пекѹ́тъ, до́ндеже сконча́шасѧ хлѣ́бы и҆з̾ гра́да. И҆ сѣдѧ́ше ї҆еремі́а во дворѣ̀ темни́чнѣмъ.