Read Библия Церковнославянская I҆еремі́и 38 Bible Online

I҆еремі́и 38 - Библия Церковнославянская bible

I҆еремі́и 38

¹И҆ слы́ша сафані́а сы́нъ наѳа́нь и҆ годолі́а сы́нъ пасхѡ́ровъ, и҆ ї҆ѡаха́лъ сы́нъ селемі́инъ и҆ фасхѡ́ръ сы́нъ мелхі́евъ словеса̀, ѩ҆̀же ї҆еремі́а глаго́ла ко всѣ҄мъ лю́демъ, глаго́лѧ:

²та́кѡ речѐ гд҇ь: сѣдѧ́й во гра́дѣ се́мъ ѹ҆́мретъ мече́мъ и҆ гла́домъ и҆ мо́ромъ, и҆сходѧ́й же ко халде́ємъ жи́въ бѹ́детъ, и҆ бѹ́детъ дѹша̀ є҆гѡ̀ на ѡ҆брѣ́тенїе, и҆ жи́въ бѹ́детъ.

³ѩ҆́кѡ та́кѡ речѐ гд҇ь: преда́нїемъ преда́стсѧ гра́дъ се́й въ рѹ́цѣ си́лы царѧ̀ вавѷлѡ́нска, и҆ во́зметъ є҆го̀.

⁴И҆ реко́ша царю̀: да ѹ҆́мретъ человѣ́къ то́й, ѩ҆́кѡ се́й разслаблѧ́етъ рѹ́цѣ мѹже́й вою́ющихъ ѡ҆ста́вшихсѧ во гра́дѣ и҆ рѹ́ки всѣ́хъ люді́й, глаго́лѧ къ ни҄мъ по словесє́мъ си҄мъ: ѩ҆́кѡ человѣ́къ се́й не проповѣ́даетъ лю́демъ си҄мъ ми́ра, но то́кмѡ ѕла҄ѧ.

⁵И҆ речѐ ца́рь седекі́а: сѐ, то́й въ рѹка́хъ ва́шихъ. Поне́же не можа́ше ца́рь проти́вѹ и҆̀мъ.

⁶И҆ взѧ́ша ї҆еремі́ю и҆ вверго́ша є҆го̀ въ ро́въ мелхі́инъ, сы́на царе́ва, и҆́же бѧ́ше во дворѣ̀ темни́чнѣмъ: и҆ свѣ́сиша є҆го̀ ѹ҆́жами въ ро́въ, въ ро́вѣ же не бѧ́ше воды̀, но ти́на, и҆ бѧ́ше въ ти́нѣ ї҆еремі́а.

⁷И҆ слы́ша а҆вдемеле́хъ мѹ́ринъ, и҆ то́й бѧ́ше во дворѣ̀ царе́вѣ, ѩ҆́кѡ вверго́ша ї҆еремі́ю въ ро́въ: ца́рь же (въ то́й ча́съ) сѣдѧ́ше во вратѣ́хъ венїамі́нихъ.

⁸И҆ и҆зы́де а҆вдемеле́хъ ѿ до́мѹ царе́ва и҆ речѐ ко царю̀ глаго́лѧ:

⁹ѕлосотвори́лъ є҆сѝ, ѩ҆̀же сотвори́лъ є҆сѝ, ѹ҆бива́ѧ человѣ́ка сего̀ ѿ лица̀ гла́да, ѩ҆́кѡ нѣ́сть хлѣ́ба во гра́дѣ ктомѹ̀.

¹⁰И҆ повелѣ̀ ца́рь а҆вдемеле́хѹ, глаго́лѧ: поимѝ съ собо́ю ѿсю́дѹ три́десѧть мѹже́й и҆ и҆звлецы̀ ї҆еремі́ю и҆з̾ ро́ва, да не ѹ҆́мретъ.

¹¹И҆ поѧ́тъ а҆вдемеле́хъ мѹ́жы, и҆ прїи́де въ до́мъ царе́въ подзе́мный, и҆ взѧ̀ ѿтѹ́дѹ вє́тхи по́рты и҆ вє́тхїѧ ѹ҆́жы, и҆ вве́рже ѧ҆̀ ко ї҆еремі́и въ ро́въ, и҆ речѐ къ немѹ̀:

¹²положѝ сїѧ҄ под̾ ѹ҆́жы. И҆ сотворѝ ї҆еремі́а си́це.

¹³И҆ и҆звлеко́ша є҆го̀ ѹ҆́жами и҆ и҆з̾ѧ́ша є҆го̀ и҆з̾ ро́ва. И҆ сѣ́де ї҆еремі́а во дворѣ̀ темни́чнѣмъ.

¹⁴И҆ посла̀ ца́рь, и҆ призва̀ къ себѣ̀ ї҆еремі́ю въ до́мъ [а҆селїси́ль], и҆́же въ домѹ̀ гд҇ни. И҆ речѐ є҆мѹ̀ ца́рь: вопроша́ю тѧ̀ словесѐ (є҆ди́нагѡ), и҆ не ѹ҆та́й ѿ менє̀ словесѐ.

¹⁵И҆ речѐ ї҆еремі́а царю̀: а҆́ще повѣ́мъ тѝ, то̀ не сме́ртїю ли ѹ҆мори́ши мѧ̀; и҆ а҆́ще совѣща́ю тѝ, то̀ не послѹ́шаеши менѐ.

¹⁶И҆ клѧ́тсѧ є҆мѹ̀ ца́рь, глаго́лѧ: жи́въ гд҇ь, и҆́же сотворѝ на́мъ дѹ́шѹ сїю̀, а҆́ще ѹ҆бїю̀ тѧ̀ и҆ а҆́ще преда́мъ тѧ̀ въ рѹ́цѣ человѣ҄къ си́хъ и҆́щѹщихъ дѹшѝ твоеѧ̀ (на сме́рть).

¹⁷И҆ речѐ є҆мѹ̀ ї҆еремі́а: та́кѡ речѐ гд҇ь си́лъ, бг҃ъ ї҆и҃левъ: а҆́ще и҆зыды́й и҆зы́деши къ воево́дамъ царѧ̀ вавѷлѡ́нска, жива̀ бѹ́детъ дѹша̀ твоѧ̀, и҆ гра́дъ се́й не пожже́тсѧ ѻ҆гне́мъ, и҆ жи́въ бѹ́деши ты̀ и҆ до́мъ тво́й:

¹⁸а҆́ще же не и҆зы́деши ко кнѧзє́мъ царѧ̀ вавѷлѡ́нска, преда́стсѧ гра́дъ се́й въ рѹ́цѣ халдє́йстѣ, и҆ пожгѹ́тъ є҆го̀ ѻ҆гне́мъ, и҆ ты̀ не спасе́шисѧ ѿ рѹкѝ и҆́хъ.

¹⁹И҆ речѐ ца́рь ї҆еремі́и: а҆́зъ ѡ҆пасе́нїе и҆́мамъ ѿ ї҆ѹде́євъ и҆збѣжа́вшихъ ко халде́ємъ, да не предадѹ́тъ мѧ̀ (халде́є) въ рѹ́цѣ и҆́хъ, и҆ порѹга́ютсѧ мѝ.

²⁰И҆ речѐ ї҆еремі́а: не предадѧ́тъ тебѐ: послѹ́шай ѹ҆̀бо словесѐ гд҇нѧ, є҆́же а҆́зъ глаго́лю тебѣ̀, и҆ лѹ́чше тѝ бѹ́детъ, и҆ жива̀ бѹ́детъ дѹша̀ твоѧ̀:

²¹и҆ а҆́ще не восхо́щеши ты̀ и҆зы́ти, сїѐ сло́во, є҆́же сказа̀ мнѣ̀ гд҇ь:

²²и҆ сѐ, всѧ҄ жєны̀, ѡ҆ста́вшыѧсѧ въ домѹ̀ царѧ̀ ї҆ѹ́дина, и҆зведѹ́тсѧ ко кнѧзє́мъ царѧ̀ вавѷлѡ́нска: и҆ ты҄ѧ глаго́лахѹ: прельсти́ша тѧ̀ и҆ премого́ша тѧ̀ мѹ́жїе ми́рницы твоѝ, и҆ ѡ҆сла́биша во поползнове́нїихъ но́гѹ твою̀ и҆ ѿврати́шасѧ ѿ тебє̀:

²³и҆ жєны̀ твоѧ҄ и҆ ча҄да твоѧ҄ и҆зведѹ́тъ ко халде́ємъ, и҆ ты̀ не ѹ҆цѣлѣ́еши, ѩ҆́кѡ рѹко́ю царѧ̀ вавѷлѡ́нска ѩ҆́тъ бѹ́деши, и҆ гра́дъ се́й пожже́тсѧ.

²⁴И҆ речѐ є҆мѹ̀ ца́рь: человѣ́къ да не ѹ҆вѣ́сть слове́съ си́хъ, и҆ да не ѹ҆́мреши ты̀.

²⁵И҆ а҆́ще ѹ҆слы́шатъ кнѧ҄зи, ѩ҆́кѡ глаго́лахъ съ тобо́ю, и҆ прїи́дѹтъ къ тебѣ̀ и҆ рекѹ́тъ тѝ: повѣ́ждь на́мъ, что̀ глаго́ла къ тебѣ̀ ца́рь; не ѹ҆та́й ѿ на́съ, и҆ не ѹ҆бїе́мъ тебѐ: и҆ что̀ глаго́ла къ тебѣ̀ ца́рь;

²⁶И҆ рече́ши и҆̀мъ: поверго́хъ а҆́зъ моле́нїе моѐ пред̾ лице́мъ царе́вымъ, ѩ҆́кѡ да не возврати́тъ менѐ въ до́мъ ї҆ѡнаѳа́нь, ѹ҆мре́ти мѝ та́мѡ.

²⁷И҆ прїидо́ша всѝ кнѧ҄зи ко ї҆еремі́и и҆ вопроси́ша є҆го̀. И҆ повѣ́да и҆̀мъ по всѣ҄мъ словесє́мъ си҄мъ, ѩ҆̀же заповѣ́да є҆мѹ̀ ца́рь. И҆ ѹ҆мо́лкнѹша, ѩ҆́кѡ нѣ́сть слы́шано сло́во гд҇не.

²⁸И҆ сѣдѧ́ше ї҆еремі́а во дворѣ̀ темни́чнѣмъ, до́ндеже взѧ́ша ї҆ер҇ли́мъ.