Read Библия Церковнославянская I҆еремі́и 4 Bible Online

I҆еремі́и 4 - Библия Церковнославянская bible

I҆еремі́и 4

¹А҆́ще ѡ҆брати́шисѧ, ї҆и҃лю, гл҃етъ гд҇ь, ко мнѣ̀ ѡ҆брати́сѧ: и҆ а҆́ще ѿи́меши ме́рзѡсти твоѧ҄ ѿ ѹ҆́стъ твои́хъ, и҆ ѿ лица̀ моегѡ̀ ѹ҆бои́шисѧ,

²и҆ клене́шисѧ, живе́тъ гд҇ь, во и҆́стинѣ и҆ въ сѹдѣ̀ и҆ въ пра́вдѣ, и҆ благословѧ́тъ въ не́мъ ѩ҆зы́цы и҆ въ не́мъ восхва́лѧтъ бг҃а во ї҆ер҇ли́мѣ.

³Сїѧ҄ бо гл҃етъ гд҇ь мѹжє́мъ ї҆ѹ҄динымъ и҆ ѡ҆бита́телємъ ї҆ер҇ли҄млимъ: понови́те себѣ̀ полѧ̀ и҆ не сѣ́йте на те́рнїи:

⁴ѡ҆брѣ́житесѧ бг҃ѹ ва́шемѹ и҆ ѡ҆брѣ́жите жестосе́рдїе ва́ше, мѹ́жїе ї҆ѹ҄дины и҆ ѡ҆бита́ющїи во ї҆ер҇ли́мѣ, да не и҆зы́детъ ѩ҆́кѡ ѻ҆́гнь ѩ҆́рость моѧ̀, и҆ возгори́тсѧ, и҆ не бѹ́детъ ѹ҆гаша́ѧй, ра́ди лѹка́вства начина́нїй ва́шихъ.

⁵Возвѣсти́те во ї҆ѹде́и, и҆ да ѹ҆слы́шитсѧ во ї҆ер҇ли́мѣ: глаго́лите, воспо́йте трѹбо́ю на землѝ, возопі́йте ѕѣлѡ̀ и҆ рцы́те: собери́тесѧ, и҆ вни́демъ во гра́ды твє́рды.

⁶Воздви́гше (зна́менїе) бѣжи́те въ сїѡ́нъ, потщи́тесѧ, не сто́йте, ѩ҆́кѡ ѕла҄ѧ а҆́зъ навождѹ̀ ѿ сѣ́вера и҆ сотре́нїе вели́ко.

⁷Взы́де ле́въ ѿ ло́жа своегѡ̀, и҆ погѹблѧ́ѧй ѩ҆зы́ки воздви́жесѧ и҆ и҆зы́де ѿ мѣ́ста своегѡ̀, да положи́тъ зе́млю твою̀ въ пѹсты́ню, и҆ гра́ди твоѝ разорѧ́тсѧ, ѡ҆ста́вшїи без̾ ѡ҆бита́телей.

⁸Ѡ҆ си́хъ препоѧ́шитесѧ во врє́тища и҆ пла́чите и҆ рыда́йте, ѩ҆́кѡ не ѿврати́сѧ гнѣ́въ ѩ҆́рости гд҇ни ѿ ва́съ.

⁹И҆ бѹ́детъ въ де́нь то́й, гл҃етъ гд҇ь, поги́бнетъ се́рдце царе́во и҆ се́рдце нача́лникѡвъ, и҆ свѧще́нницы ѹ҆жа́снѹтсѧ, и҆ проро́цы ѹ҆дивѧ́тсѧ.

¹⁰И҆ реко́хъ: ѽ, влдко гд҇и, є҆да̀ ѡ҆больсти́лъ є҆сѝ лю́ди сїѧ҄ и҆ ї҆ер҇ли́ма, рекі́й: ми́ръ бѹ́детъ ва́мъ; и҆ сѐ, про́йде ме́чь да́же до дѹшѝ и҆́хъ.

¹¹Во вре́мѧ ѻ҆́но рече́тсѧ лю́демъ си҄мъ и҆ ї҆ер҇ли́мѹ: дѹ́хъ заблѹжде́нїѧ въ пѹсты́ни, пѹ́ть дще́ре люді́й мои́хъ, не ко ѡ҆чище́нїю, нижѐ во ст҃о́е:

¹²дѹ́хъ и҆сполне́нїѧ ѿ си́хъ прїи́детъ мнѣ̀, и҆ нн҃ѣ а҆́зъ возгл҃ю сѹды̀ моѧ҄ къ ни҄мъ.

¹³Сѐ, ѩ҆́кѡ ѡ҆́блакъ взы́детъ, и҆ ѩ҆́кѡ ви́хрь колєсни́цы є҆гѡ̀, быстрѣ́е ѻ҆рлѡ́въ ко́ни є҆гѡ̀: го́ре на́мъ, ѩ҆́кѡ бѣ́дствѹемъ.

¹⁴Ѡ҆мы́й ѿ лѹка́вства се́рдце твоѐ, ї҆ер҇ли́ме, да спасе́шисѧ: доко́лѣ бѹ́дѹтъ въ тебѣ̀ помышлє́нїѧ бѣ́дъ твои́хъ;

¹⁵Гла́съ бо возвѣща́ющагѡ ѿ да́на прїи́детъ, и҆ слы҄шана бѹ́детъ болѣ́знь ѿ горы̀ є҆фре́мли.

¹⁶Рцы́те ѩ҆зы́кѡмъ: сѐ, прїидо́ша: возвѣсти́те во ї҆ер҇ли́мѣ: полцы̀ и҆́дѹтъ ѿ землѝ да́льнїѧ и҆ да́ша на гра́ды ї҆ѹ҄дины гла́съ сво́й,

¹⁷а҆́ки стра́жы се́лнїи бы́ша над̾ ни́мъ ѡ҆́крестъ: ѩ҆́кѡ пренебре́глъ мѧ̀ є҆сѝ, гл҃етъ гд҇ь.

¹⁸Пѹти҄ твоѧ҄ и҆ начина҄нїѧ твоѧ҄ сотвори́ша тебѣ̀ сїѧ҄: сїѐ лѹка́вство твоѐ, поне́же го́рько, ѩ҆́кѡ прикоснѹ́сѧ се́рдцѹ твоемѹ̀.

¹⁹Чре́во моѐ, чре́во моѐ боли́тъ мнѣ̀, и҆ чѹ҄вства се́рдца моегѡ̀, смѹща́етсѧ дѹша̀ моѧ̀, терза́етсѧ се́рдце моѐ: не ѹ҆молчѹ̀, ѩ҆́кѡ гла́съ трѹбы̀ ѹ҆слы́шала дѹша̀ моѧ̀, во́пль ра́ти и҆ бѣды̀:

²⁰сотре́нїе (на сотре́нїе) призыва́етсѧ, поне́же ѡ҆пѹстѣ́ла всѧ̀ землѧ̀, внеза́пѹ ѡ҆пѹстѣ̀ жили́ще моѐ, расторго́шасѧ ко́жы моѧ҄.

²¹Доко́лѣ зрѣ́ти и҆́мамъ бѣжа́щихъ, слы́шащь гла́сы трѹ҄бныѧ;

²²Поне́же вожде́ве люді́й мои́хъ менѐ не позна́ша: сы́нове бѹ́їи сѹ́ть и҆ безѹ́мни, мѹ́дри сѹ́ть, є҆́же твори́ти ѕла҄ѧ, бла́го же твори́ти не позна́ша.

²³Воззрѣ́хъ на зе́млю, и҆ сѐ, ничто́же, и҆ на не́бо, и҆ не бѣ̀ свѣ́та є҆гѡ̀.

²⁴Ви́дѣхъ го́ры, и҆ трепета́хѹ, и҆ всѝ хо́лми возмѹти́шасѧ.

²⁵Воззрѣ́хъ, и҆ сѐ, не бѣ̀ человѣ́ка, и҆ всѧ҄ пти҄цы небє́сныѧ ѹ҆жаса́хѹсѧ.

²⁶Ви́дѣхъ, и҆ сѐ, карми́лъ пѹ́стъ, и҆ всѝ гра́ди сожже́ни ѻ҆гне́мъ ѿ лица̀ гд҇нѧ, и҆ ѿ лица̀ гнѣ́ва ѩ҆́рости є҆гѡ̀ погибо́ша.

²⁷Сїѧ҄ гл҃етъ гд҇ь: пѹста̀ бѹ́детъ всѧ̀ землѧ̀, сконча́нїѧ же не сотворю̀.

²⁸Ѡ҆ си́хъ да пла́четъ землѧ̀, и҆ да помрачи́тсѧ не́бо свы́ше: поне́же гл҃ахъ, и҆ не раска́юсѧ: ѹ҆стреми́хсѧ, и҆ не ѿвращѹ́сѧ ѿ негѡ̀.

²⁹Ѿ гла́са ѩ҆здѧ́щихъ и҆ напрѧже́нна лѹ́ка побѣжѐ всѧ́ка страна̀: внидо́ша въ разсѣ҄лины и҆ въ дѹбра҄вы сокры́шасѧ и҆ на ка́менїе взыдо́ша: всѝ гра́ди ѡ҆ста́влени сѹ́ть, не ѡ҆бита́етъ въ ни́хъ человѣ́къ.

³⁰Ты́ же, запѹстѣ́лаѧ, что̀ сотвори́ши; а҆́ще ѡ҆блече́шисѧ во багрѧни́цѹ и҆ ѹ҆краси́шисѧ мони́сты златы́ми, а҆́ще нама́жеши сті́вїемъ ѻ҆́чи твоѝ, всѹ́е ѹ҆краше́нїе твоѐ: ѿри́нѹша тѧ̀ любѡ́вницы твоѝ, дѹшѝ твоеѧ̀ и҆́щѹтъ.

³¹Гла́съ бо ѩ҆́кѡ родѧ́щїѧ слы́шахъ стена́нїѧ твоегѡ̀: а҆́ки первородѧ́щїѧ гла́съ дще́ре сїѡ́ни и҆ста́етъ, и҆ ѡ҆пѹ́ститъ рѹ́цѣ своѝ: го́ре мнѣ̀, ѩ҆́кѡ и҆счеза́етъ дѹша̀ моѧ̀ над̾ ѹ҆бїе́нными.