Read Библия Церковнославянская I҆еремі́и 43 Bible Online

I҆еремі́и 43 - Библия Церковнославянская bible

I҆еремі́и 43

¹И҆ бы́сть, є҆гда̀ преста̀ ї҆еремі́а глаго́лѧ къ лю́демъ всѧ҄ словеса̀ гд҇нѧ, ѩ҆̀же посла̀ гд҇ь къ ни҄мъ,

²и҆ речѐ а҆зарі́а сы́нъ маасе́евъ и҆ ї҆ѡана́нъ сы́нъ карі́евъ и҆ всѝ мѹ́жїе презо́рливїи ко ї҆еремі́и, глаго́люще: лже́ши, не посла́ тѧ къ на́мъ гд҇ь бг҃ъ на́шъ глаго́лати: не входи́те во є҆гѵ́петъ жи́ти та́мѡ:

³но варѹ́хъ сы́нъ нирі́инъ под̾ѹща́етъ тѧ̀ на на́съ, да на́съ вда́си въ рѹ́цѣ халдє́йстѣ ѹ҆мори́ти на́съ и҆ превестѝ на́съ въ вавѷлѡ́нъ.

⁴И҆ не послѹ́ша ї҆ѡана́нъ и҆ всѝ воевѡ́ды си́лы и҆ всѝ лю́дїе (не послѹ́шаша) гла́са гд҇нѧ, є҆́же жи́ти на землѝ ї҆ѹ́динѣ.

⁵И҆ взѧ̀ ї҆ѡана́нъ и҆ всѝ воевѡ́ды си́лы всѧ҄ ѡ҆ста́вшыѧ ї҆ѹ҄дины, возвращє́ныѧ ѿ всѣ́хъ ѩ҆зы́кѡвъ, а҆́може разсѣ́ѧни бы́ша, є҆́же жи́ти на землѝ ї҆ѹ́динѣ,

⁶мѹ́жы си҄льныѧ и҆ жєны̀, и҆ младе́нцы и҆ дщє́ри царє́вы, и҆ дѹ́шы, ѩ҆̀же ѡ҆ста́ви навѹзарда́нъ воево́да си́лы со годолі́емъ сы́номъ а҆хїка́мовымъ сы́на сафа́нова, и҆ ї҆еремі́ю про҇ро́ка, и҆ варѹ́ха сы́на нирі́ина,

⁷и҆ внидо́ша во є҆гѵ́петъ, ѩ҆́кѡ не послѹ́шаша гла́са гд҇нѧ, и҆ внидо́ша во тафна́съ.

⁸И҆ бы́сть сло́во гд҇не ко ї҆еремі́и во тафна́сѣ гл҃ѧ:

⁹возмѝ себѣ̀ ка́мєни вели҄ки и҆ скры́й ѧ҆̀ пред̾ враты̀ до́мѹ фараѡ́нѧ во тафна́сѣ пред̾ ѻ҆чи́ма мѹже́й ї҆ѹ́диныхъ, и҆ рече́ши къ ни҄мъ:

¹⁰та́кѡ гл҃етъ гд҇ь си́лъ, бг҃ъ ї҆и҃левъ: сѐ, а҆́зъ послю̀ и҆ приведѹ̀ навѹходоно́сора царѧ̀ вавѷлѡ́нска раба̀ моего̀, и҆ поста́витъ престо́лъ сво́й на ка́менїихъ си́хъ, и҆̀хже скры́лъ є҆сѝ, и҆ воздви́гнетъ ѻ҆рѹ́жїе своѐ на нѧ̀,

¹¹и҆ вни́детъ и҆ порази́тъ зе́млю є҆гѵ́петскѹ: и҆̀хже на сме́рть, на сме́рть, и҆ и҆̀хже на преселе́нїе, на преселе́нїе, а҆ и҆̀хже под̾ ме́чь, под̾ ме́чь:

¹²и҆ пожже́тъ ѻ҆гне́мъ до́мы богѡ́въ и҆́хъ, и҆ пожже́тъ ѧ҆̀, и҆ пресели́тъ ѧ҆̀, и҆ покры́етъ зе́млю є҆гѵ́петскѹю, ѩ҆́коже покрыва́етсѧ пастѹ́хъ ри́зою свое́ю: и҆ и҆зы́детъ ѿтѹ́дѹ съ ми́ромъ

¹³и҆ сокрѹши́тъ столпы̀ и҆лїѹпо́лѧ {со́лнечнагѡ гра́да}, и҆́же во є҆гѵ́птѣ, и҆ до́мы богѡ́въ є҆гѵ́петскихъ пожже́тъ ѻ҆гне́мъ.