Read Библия Церковнославянская I҆еремі́и 44 Bible Online

I҆еремі́и 44 - Библия Церковнославянская bible

I҆еремі́и 44

¹Сло́во бы́вшее ко ї҆еремі́и (ѿ гд҇а) и҆ ко всѣ҄мъ ї҆ѹде́ємъ сѹ́щымъ въ землѝ є҆гѵ́петстѣй и҆ сѣдѧ́щымъ во магда́лѣ и҆ во тафна́сѣ, и҆ во мемфі́сѣ и҆ въ землѝ паѳѹ́рстѣ, гл҃ѧ:

²та́кѡ гл҃етъ гд҇ь бг҃ъ ї҆и҃левъ: вы̀ ви́дѣсте всѧ҄ ѕла҄ѧ, ѩ҆̀же наведо́хъ на ї҆ер҇ли́мъ и҆ на гра́ды ї҆ѹ҄дины: и҆ сѐ, пѹ́сти сѹ́ть нн҃ѣ ѿ живѹ́щихъ,

³ѿ лица̀ ѕло́бы и҆́хъ, ю҆́же сотвори́ша разгнѣ́вати мѧ̀, ходѧ́ще кади́ти богѡ́мъ чѹжди҄мъ, и҆́хже не вѣ́дѣсте вы̀ са́ми и҆ ѻ҆тцы̀ ва́ши.

⁴И҆ посла́хъ къ ва́мъ ѻ҆́троки моѧ҄ про҇ро́ки заѹ́тра, и҆ посыла́хъ ѧ҆̀, гл҃ѧ: не твори́те дѣ́ла ѡ҆скверне́нїѧ сегѡ̀, є҆го́же возненави́дѣхъ.

⁵И҆ не послѹ́шаша менѐ, ни приклони́ша ѹ҆́ха своегѡ̀ ѡ҆брати́тисѧ ѿ ѕло́бъ свои́хъ, є҆́же не кади́ти богѡ́мъ и҆нѣ҄мъ.

⁶И҆ вска́па ѩ҆́рость моѧ̀ и҆ гнѣ́въ мо́й и҆ разгорѣ́сѧ во вратѣ́хъ ї҆ѹ́диныхъ и҆ внѣ̀ ї҆ер҇ли́ма: и҆ бы́ша во ѡ҆пѹстѣ́нїе и҆ въ непроходи́мѹю до сегѡ̀ днѐ.

⁷И҆ нн҃ѣ си́це речѐ гд҇ь вседержи́тель, бг҃ъ ї҆и҃левъ: вскѹ́ю вы̀ творитѐ ѕлѡ́бы вели҄ки на дѹ́шы своѧ҄, є҆́же и҆зсѣщѝ ва́мъ мѹ́жы и҆ жєны̀, младе́нца и҆ ссѹ́щаго ѿ среды̀ ї҆ѹ́ды, да не ѡ҆ста́нетсѧ ни є҆ди́нъ ѿ ва́съ,

⁸разгнѣ́вати мѧ̀ въ дѣ́лѣхъ рѹ́къ ва́шихъ, кади́ти богѡ́мъ и҆нѣ҄мъ въ землѝ є҆гѵ́петстѣй, въ ню́же прїидо́сте жи́ти та́мѡ, да и҆зсѣ́чени бѹ́дете и҆ въ проклѧ́тїе да бѹ́дете и҆ на ѹ҆кори́знѹ во всѣ́хъ ѩ҆зы́цѣхъ землѝ;

⁹є҆да̀ забы́сте ѕлѡ́бы ѻ҆тє́цъ ва́шихъ и҆ ѕлѡ́бы царе́й ї҆ѹ́диныхъ, и҆ ѕлѡ́бы кнѧзе́й ва́шихъ и҆ ѕлѡ́бы ва́шѧ, и҆ ѕлѡ́бы же́нъ ва́шихъ, ѩ҆̀же сотвори́ша въ землѝ ї҆ѹ́динѣ и҆ внѣ̀ ї҆ер҇ли́ма;

¹⁰И҆ не преста́ша да́же до сегѡ̀ днѐ и҆ не ѹ҆боѧ́шасѧ, и҆ не держа́хѹсѧ зако́нѡвъ мои́хъ и҆ повелѣ́нїй мои́хъ, ѩ҆̀же да́хъ пред̾ лице́мъ ва́шимъ и҆ пред̾ ѻ҆чи́ма ѻ҆тє́цъ ва́шихъ.

¹¹Тогѡ̀ ра́ди та́кѡ гл҃етъ гд҇ь си́лъ, бг҃ъ ї҆и҃левъ: сѐ, а҆́зъ приста́влю лицѐ моѐ на вы̀ во ѕло̀, є҆́же погѹби́ти всѧ҄ лю́ди ї҆ѹ҄дины:

¹²и҆ возмѹ̀ ѡ҆ста́нки ї҆ѹ҄дины, и҆̀же поста́виша ли́ца своѧ҄, є҆́же вни́ти въ зе́млю є҆гѵ́петскѹ и҆ жи́ти та́мѡ, и҆ и҆сче́знѹтъ всѝ въ землѝ є҆гѵ́петстѣй, и҆ падѹ́тъ мече́мъ и҆ гла́домъ, и҆ и҆сче́знѹтъ ѿ ма́ла да́же до вели́ка: и҆ бѹ́дѹтъ на ѹ҆кори́знѹ и҆ въ па́гѹбѹ и҆ въ проклѧ́тїе:

¹³и҆ посѣщѹ̀ на сѣдѧ́щихъ въ землѝ є҆гѵ́петстѣй, ѩ҆́коже посѣти́хъ на ї҆ер҇ли́мъ, мече́мъ и҆ гла́домъ и҆ сме́ртїю,

¹⁴и҆ не бѹ́детъ ѹ҆цѣлѣ́вша ни є҆ди́нагѡ же ѿ ѡ҆ста́вшихъ ї҆ѹ́диныхъ, ѡ҆бита́ющихъ въ землѝ є҆гѵ́петстѣй, є҆́же возврати́тисѧ на зе́млю ї҆ѹ́динѹ, къ не́йже ті́и надѣ́ютсѧ дѹша́ми свои́ми возврати́тисѧ та́мѡ: не возвратѧ́тсѧ, ра́звѣ и҆збѣ́гшїи.

¹⁵И҆ ѿвѣща́ша ї҆еремі́и всѝ мѹ́жїе разѹмѣ́ющїи, ѩ҆́кѡ кадѧ́тъ жєны̀ и҆́хъ богѡ́мъ и҆ны҄мъ, и҆ всѧ҄ жєны̀ собо́ръ вели́къ, и҆ всѝ лю́дїе сѣдѧ́щїи въ землѝ є҆гѵ́петстѣй, въ землѝ паѳѹ́рстѣ, глаго́люще:

¹⁶сло́во, є҆́же глаго́лалъ є҆сѝ къ на́мъ во и҆́мѧ гд҇не, не послѹ́шаемъ тебѐ,

¹⁷ѩ҆́кѡ творѧ́ще сотвори́мъ всѧ́кое сло́во, є҆́же и҆зы́детъ и҆з̾ ѹ҆́стъ на́шихъ, кади́ти цари́цѣ небе́снѣй и҆ возлива́ти є҆́й возлїѧ҄нїѧ, ѩ҆́коже сотвори́хомъ мы̀ и҆ ѻ҆тцы̀ на́ши, и҆ ца́рїе на́ши и҆ кнѧ҄зи на́ши во градѣ́хъ ї҆ѹ́диныхъ и҆ внѣ̀ ї҆ер҇ли́ма: и҆ насы́тихомсѧ хлѣ́бѡвъ, и҆ бла́го на́мъ бы́сть, и҆ ѕла̀ не ви́дѣхомъ.

¹⁸И҆ є҆гда̀ преста́хомъ кади́ти цари́цѣ небе́снѣй и҆ возлива́ти возлїѧ҄нїѧ, ѡ҆скѹдѣ́хомъ хлѣ҄бы всѝ мы̀, и҆ мече́мъ и҆ гла́домъ сконча́хомсѧ.

¹⁹И҆ є҆гда̀ кади́хомъ мы̀ цари́цѣ небе́снѣй и҆ возлива́хомъ є҆́й возлїѧ҄нїѧ, є҆да̀ без̾ мѹже́й на́шихъ твори́хомъ є҆́й ѡ҆прѣсно́ки и҆ возлива́хомъ є҆́й возлїѧ҄нїѧ;

²⁰И҆ речѐ ї҆еремі́а всѣ҄мъ лю́демъ си҄льнымъ и҆ всѣ҄мъ жена́мъ и҆ всѣ҄мъ лю́демъ ѿвѣща́вшымъ є҆мѹ̀ словеса̀, глаго́лѧ:

²¹не кажде́нїе ли, є҆́же кади́сте во градѣ́хъ ї҆ѹ́диныхъ и҆ внѣѹ́дѹ ї҆ер҇ли́ма вы̀ и҆ ѻ҆тцы̀ ва́ши, и҆ ца́рїе ва́ши и҆ кнѧ҄зи ва́ши и҆ лю́дїе землѝ, помѧнѹ̀ гд҇ь, и҆ взы́де на срдце є҆гѡ̀;

²²И҆ не можа́ше гд҇ь терпѣ́ти ктомѹ̀ ѿ лица̀ ѕло́бы дѣѧ́нїй ва́шихъ и҆ ѿ гнѹ́сностей, ѩ҆̀же сотвори́сте: и҆ бы́сть землѧ̀ ва́ша во ѡ҆пѹстѣ́нїе и҆ въ непрохожде́нїе и҆ въ клѧ́твѹ, є҆́же не бы́ти живѹ́щымъ, ѩ҆́коже є҆́сть де́нь се́й,

²³ѿ лица̀ си́хъ, и҆̀мже кади́сте (їдѡлѡмъ) и҆ и҆́миже согрѣши́сте гд҇еви: и҆ не послѹ́шасте гла́са гд҇нѧ, и҆ въ повелѣ́нїихъ є҆гѡ̀ и҆ въ зако́нѣ и҆ во свидѣ́нїихъ є҆гѡ̀ не ходи́сте, и҆ пости́гнѹша вы̀ ѕла҄ѧ сїѧ҄, ѩ҆́коже де́нь се́й.

²⁴И҆ речѐ ї҆еремі́а лю́демъ и҆ жена́мъ: слы́шите сло́во гд҇не, ве́сь ї҆ѹ́да, и҆̀же є҆стѐ въ землѝ є҆гѵ́петстѣй:

²⁵та́кѡ речѐ гд҇ь вседержи́тель, бг҃ъ ї҆и҃левъ, гл҃ѧ: вы̀ и҆ жєны̀ ва́шѧ ѹ҆сты҄ ва́шими соглаго́ласте и҆ рѹка́ми ва́шими и҆спо́лнисте, глаго́люще: творѧ́ще сотвори́мъ и҆сповѣ҄данїѧ на҄ша, ѩ҆̀же ѡ҆бѣща́хомъ кади́ти цари́цѣ небе́снѣй и҆ возлива́ти возлїѧ҄нїѧ є҆́й: пребыва́юще пребы́сте во ѡ҆бѣ́тѣхъ ва́шихъ и҆ творѧ́ще сотвори́сте ѧ҆̀.

²⁶Тогѡ̀ ра́ди слы́шите сло́во гд҇не: ве́сь ї҆ѹ́да, сѣдѧ́щїи въ землѝ є҆гѵ́петстѣй: сѐ, клѧ́хсѧ и҆́менемъ мои́мъ вели́кимъ, речѐ гд҇ь, а҆́ще бѹ́детъ ктомѹ̀ и҆́мѧ моѐ во ѹ҆стѣ́хъ всегѡ̀ ї҆ѹ́ды, є҆́же рещѝ, жи́въ гд҇ь бг҃ъ, во все́й землѝ є҆гѵ́петстѣй.

²⁷ѩ҆́кѡ сѐ, а҆́зъ возбѹди́хсѧ на нѧ̀ ѡ҆ѕло́бити и҆̀хъ, а҆ не бл҃госотвори́ти, и҆ и҆сче́знѹтъ ве́сь ї҆ѹ́да живѹ́щїи въ землѝ є҆гѵ́петстѣй мече́мъ и҆ гла́домъ, до́ндеже сконча́ютсѧ.

²⁸И҆ ѹ҆цѣлѣ́вшїи ѿ меча̀ возвратѧ́тсѧ на зе́млю ї҆ѹ́динѹ ма́лымъ число́мъ: и҆ ѹ҆вѣ́дѧтъ ѡ҆ста́вшїи ї҆ѹ҄дины, пресели́вшїисѧ въ зе́млю є҆гѵ́петскѹ ѡ҆бита́ти та́мѡ, сло́во чїѐ пребѹ́детъ, моѐ, и҆лѝ и҆́хъ;

²⁹И҆ сїѐ ва́мъ зна́менїе, гл҃етъ гд҇ь, ѩ҆́кѡ посѣщѹ̀ а҆́зъ на вы̀ на мѣ́стѣ се́мъ, да ѹ҆вѣ́дите, ѩ҆́кѡ вои́стиннѹ и҆спо́лнѧтсѧ словеса̀ моѧ҄ на ва́съ во ѕла҄ѧ.

³⁰Та́кѡ речѐ гд҇ь: сѐ, а҆́зъ предаю̀ фараѡ́на вафрі́а царѧ̀ є҆гѵ́петска въ рѹ́цѣ врага̀ є҆гѡ̀ и҆ въ рѹ́цѣ и҆́щѹщихъ дѹшѝ є҆гѡ̀, ѩ҆́коже да́хъ седекі́ю царѧ̀ ї҆ѹ́дина въ рѹ́цѣ навѹходоно́сора царѧ̀ вавѷлѡ́нска врага̀ є҆гѡ̀ и҆ и҆́щѹщагѡ дѹшѝ є҆гѡ̀.